Luku 9

Jisọsu l'eyefu ndụ-ozhi iri l'ẹbo

(Mát. 10:5-15; Mak. 6:7-13)

1Jisọsu bya ekukobe ụmadzu iri l'ẹbo ono, l'etso ụzo iya l'ẹka lanụ, bya agbẹe whẹ ike tẹ whẹ gudeje ike chịfuje ọgvu g'ọgvu ọbu l'eshilee ike, mẹe tẹ whẹ mejee tẹ madzụ mehu l'iwhe l'eme iya nụ. 2Ọ bya ezhi whẹ tẹ whẹ je aryaa nke ẹka, Chileke bụ eze arya mẹe tẹ whẹ mee ndu ẹhu l'adụa mma tẹ whẹ mehukota. 3Ọ sụ whẹ: “T'ọ bọ dụkwa iwhe unu l'e-gude eje. Unu be egudekwa oshi-o-gude-l'ẹka, unu te egude ẹkpa, unu te egude nri, unu te egude okpoga, unu te eye uwe nkwere labọ. 4Uwhu, unu bahụjeru, unu nọpyabelekwawho l'ẹka ono, unu shi l'ẹka ono jeshia mkpụkpu ọdo. 5Ẹka unu jeru, a -jịka unu, unu lụfudekwa lẹ mkpụkpu ono, unu jịshikwaa udzu-ẹja, dụ unu l'ọbochi-ọkpa, gude goshi whẹ l'ẹka unu lụfuakwaru iya.”

6Whẹ tụgburu je ejewhelahaa lẹ mkpụkpu lẹ mkpụkpu aryakashị ozhi-ọma ono, emekwawho tẹ ndu ẹhu l'eme mehukota.

Iwhe tụfuru Hẹ́rodu ẹhu

(Mát. 14:1-12; Mak. 6:14-29)

7Ọ-chị-ọha, bụ Hẹ́rodu nụkota iwhe lile ono, meru nụ, ọ kpụbe iya ọnu okfu. O nweru ndu l'ekfu l'ọo Jọnu tetaru nọdu ndzụ ọdo. 8Ndu harụ sụ l'ọo Eláyija bẹ fụta-whuru azụ ọdo, ndu sụ l'ọo onye lanụ l'akahụ ndu nkfuchiru Chileke tetaru. 9Hẹ́rodu sụ: “Jọnu bẹ mbẹdua gbutaru iya ishi! ?Ọ kwanụ onye bụ onye ọwa, mu l'anụ ude iya ẹgube-ẹ ya?” O noo ya, Hẹ́rodu melahaa gẹ ya l'e-shi whụ Jisọsu ọbu ẹnya.

Jisọsu l'anụ ụnu madzụ iri l'ẹbo l'ụmadzu ụkporo iri nri

(Mát. 14:13-21; Mak. 6:30-44; Jọn. 6:1-14)

10Ndụ-ishi-ozhi ono bya ejegee lwawhu azụ bya akọkotaru Jisọsu iwhe lile whẹ mekotaru g'ọ ha. O duta whẹ, whẹ jeshia Bẹtusáyida nwẹka whẹ. 11Igweligwe ndu ono nụle iya whọ, whẹ wutsoru iya. Ọ natalẹkwa whẹ whọ ọkpobe anata, kfulahaaru whẹ okfu ẹka Chileke bụ eze, mekwaawho ọwhube ndu ẹhu l'eme whẹ mehukota, mbụ ndu l'ọogu ẹgu t'e mee whẹ tẹ whẹ mehu.

12O rwudelewho l'urwẹnyashi, ụmadzu iri l'ẹbo ono byakfuta iya bya asụ iya: “Sụkwawho ndu-a tẹ whẹ bahụ-gee lẹ mkpụkpu lẹ mkpụkpu-a mẹe l'uwhu l'uwhu ndu-a duwheru anyi mgburumgburu je akpata nri, whẹ l'eri, chọo ẹka whẹ l'a-radụ, ị whụru-a l'ẹka anyi nọ-ọwa bẹ bụ echi-ẹgu.”

13Ọ sụ whẹ: “Unubẹdua l'onwunu nụnu whẹ nri tẹ whẹ ria.”

Whẹ sụ iya: “Mẹ mkpakọ iwhe anyi gude l'ẹka-a kwa ishi buredi ise, ọ waa ẹma labọ. ?Tọo t'anyi je l'onwanyi je akpatarụ igweligwe ndu-a nri?” 14Nkele unwoke, dọkwanuru l'ẹka ono l'e-rwukwa l'ụnu iri l'ẹbo l'unwoke ụkporo ugbo iri.

Jisọsu sụ ndu l'etso ụzo iya: “Ngwa! Unu mee whẹ tẹ whẹ nọdu-gee anọdu l'alị l'itsutsu l'itsutsu, tẹ whẹ nọo ụkporo ẹbo-ẹbo l'iri iri.”

15Whẹ bya emee iwhe o zhiru whẹ, mee ndu ono whẹ nọdukota anọdu gẹ whẹ hakọta. 16Ọ bya ewota ishi buredi ise ono mẹe ẹma labọ whọ palia ẹnya l'imeli kele Chileke ekele nri ono. Ọ bya anyawashịa ya nụ ndu l'etso ụzo iya tẹ whẹ dobe iya igweligwe ndu ono l'iwhu. 17Whẹ rijishikota ẹwho gẹ whẹ ha. A bya atụtukobe ibiribe iya ọwhu whẹ riwhodoru, o ji nkata-ivu iri l'ẹbo.

Pyita l'ekfu nke Jisọsu

(Mát. 16:13-19; Mak. 8:27-29)

18O be nteke ọbu Jisọsu nọdu nwekiya ekfu anụ Chileke, ndu l'etso ụzo iya nọdukwawho l'ẹka ono whẹ l'iya. Ọ sụ whẹ: “?O zhia onye bẹ ndiwhe l'asụje-zhia lẹ mu bụ?”

19Whẹ sụ iya: “O nweru ndu l'asụje l'ị bụ Jọnu baputizimu, o nwekwaruwho ndu l'asụje l'ị bụ Eláyija. Ndu asụ l'ọo onye lanụ l'akahụ ndu nkfuchiru Chileke bẹ tetaru nọdu ndzụ.”

20Ọ sụ whẹ: “?Unubẹdua ?unu l'asụjekwanu l'ọo onye bẹ mu bụ?”

Pyita sụ iya: “Ọo gụbedua bụ Kuráyisutu ọbu bụ iya bụ Onye Ndzọta ono, shi l'ẹka Chileke.”

Jisọsu l'ekfu okfu nke anwụhu iya

(Mát. 16:20-28; Mak. 8:30—9:1)

21O kfuru whẹ iya kfushiaru whẹ iya ike sụ whẹ t'ọ bọ dụkwa onye whẹ l'e-kfuru iwhe ono. 22Ọ sụ whẹ: “Lẹ mbẹdua bụ Abụbu-Ndiwhe bẹ jefutajekwa iwhe-ọtsulanu, ha l'igweligwe, ndu bụ ọgurenya ajịka mu, ndu ishi ndu l'agbajẹ ẹja nụ Chileke mẹe ndu o-zhi-iwu ajịkakwa mu whọ. Whẹ egbua mu. Mu nọo abalị labọ, mbọku ọwhu l'e-kwe iya ujiku ẹto, mu eshi l'ọnwu teta nọdu ndzụ ọdo.”

23Ọ sụ whẹ gẹ whẹ hakọta: “Onye l'ọogu ẹgu tẹ ya tsoru mu, t'onye ono swefu ẹnya l'ẹhu onwiya, onye ọbu evulia oswebe ọnwu nkiya mbọku-mbọku vuru tsoru mu. 24O noo l'iwhe bụ onye l'eme tẹ ya dzọo onwiya ndzụ, bẹ kwa etuwha bẹ l'ootuwha ndzụ iya ọbu. Onye ono, kwobekwanuru iswi ẹhu Abụbu-Ndiwhe tuwhaa ndzụ iya lẹ mgboko-o l'a-dzọ onwiya ndzụ. 25Tẹ ?ndẹhunu urwu ọbu, madzụ ritaru, m'ọ -nwekotagezhiaru iwhe lile, dụ lẹ mgboko-o, tuwhaa onwiya, ọdukwanua, ọ laa onwiya l'iyi? 26Nkele onye iwhere ẹhu Abụbu-Ndiwhe dụ, iwhere oozhi ozhi-ọma iya dụ iya, iwhere onye ono l'a-dụkwawho Abụbu-Ndiwhe mẹ ọ -nọdulewho l'ogbu-zaazaa nkiya abya mẹe l'ogbu-zaazaa Nna iya mẹe l'ogbu-zaazaa nke ndu ojozhi-imigwe dụ nsọ. 27Ọle tẹ mu kfulekwaru iya whọ unu to doo unu ẹnya; o nwekwaru ndu harụ kfụru l'ẹka-a, l'ẹte afụa nwụhu gbahaa lẹ whẹ whụadaru gẹ Chileke gude egoshi l'ọo ya bụ eze.”

Jisọsu l'egbu zaa-zaa

(Mát. 17:1-8; Mak. 9:2-8)

28A nọlewho iwhe ha g'ọo abalị ẹsato, o kfuru iwhe ono, o duta Pyita, duta Jọnu, duta Jémusu je enyikota eli ugvu jeshia okfuru nụ Chileke. 29O kfunyalewho nụ Chileke, iwhu iya gbanwee, uwe iya chafụ, gbulahaa zaazaa. 30A bya l'eledeshia ẹnya, akahụ ndụ-ichee labọ l'ekfuwaa anụ iya. Ụmadzu labọ ono bụ Mósisu yẹle Eláyija. 31Whẹbedua goshikwaruwho onwowhe l'ogbu-zaazaa nke imigwe. Whẹ lẹ Jisọsu l'ekfu nke anwụhu ono, l'ọo-nwụhu, bụ iwhe Chileke tụberu l'oo-me iya lẹ Jerúsalẹmu. 32Nteke ono bẹ Pyita yẹle ndu whẹ l'iya lị kutehuhawaru nụ mgbẹnya. Whẹ tehu bya awhụ ogbu zaa-zaa ya ono mẹe ụmadzu labọ, whẹ l'iya kfụru l'ẹka ono. 33Ndu ono byalẹwho l'aha Jisọsu, Pyita sụ iya: “Nnajị-Ọha, ọ dụkwa anyi ree l'anyi nọ l'ẹka-a. T'anyi tụa ebeta ẹto, nnanụ nke ghu, nnanụ nke Mósisu, nnanụ nke Eláyija.” Ọle Pyita ta amatadụ ishi iwhe l'ookfu ekfu.

34L'ookfukwadua okfu ono, urwukpu bya asọ-kputa whẹ, ụmadzu ẹto ono, l'etso ụzo iya tsụlahaaa egvu gẹ urwukpu ono sokputaru whẹ. 35Olu-okfu shi l'urwukpu ono tụfulewho sụ: “Onye ọwa bụ Nwa mu nwoke, mu họtaru. Unu nụjeeru iya okfu.”

36Olu-okfu ono kfugelewho iwhe ono, ọ bụwaru-a Jisọsu bẹ bụ onye a whụru l'ẹka ono nkụnyi iya. Whẹ nọ-kirishia, tọ dụ onye whẹ kfuru iwhe ono, whẹ whụru.

Jisọsu ka ndakfụkfu ike

(Mát. 9:14-27)

37O rwua echile iya gẹ whẹ nyizetaleruwho l'eli ugvu ono, igweligwe madzụ wukfuta iya. 38Ọo ya bụ, nwoke lanụ nọ l'ime igweligwe ndu ono chishia sụ: “Onye-ukfu-l'ọha, byiko lenua nwa mu-a ẹnya, l'ọo mu nwa lanụ. 39L'o nweru ẹgube ọgvu l'abyajẹ iya nụ, ọ byawa iya ya aryaswerehu, ya atụ iya g'ọo ndakfụkfu, ụwhu akpụshi iya l'ọnu. L'ọobuje ọ nụ-geeda iya awhụ tẹmenu ya ahaa ya. 40Mbụ mu ryọwaa ndu l'etso ụzo ghu tẹ whẹ chịfu iya, whẹ ta adụ ike.”

41Jisọsu sụ: “Oowa! Unubẹ ọgbo ejo obu ọwa, l'adụa iwhe unu l'ekwetaje-e! ?O zhia nteke ole bẹ mu l'a-ta nshi tẹ mu l'unu nọ-be?” Ọ sụ nwoke ono: “Duta nwa ghu ọbu bya ẹka.”

42Nwata ono byakfutadelewho Jisọsu, ọgvu ono tụta nwata ono tụa l'alị lọchishide iya. Jisọsu baarụ ọgvu ono mba, mee nwata ono o mehu. O duru iya dee nna iya. 43Whẹ chikafugee ẹnya ele g'ike Chileke habe shii.

Jisọsu l'ekfu ọdo l'iya l'a-nwụhu teta nọdu ndzụ

(Mát. 17:22-23; Mak. 9:30-32)

Ọ tụko dụ-gekwadua ndu ono biribiri mbụ iwhe lile Jisọsu l'emekaa; ọ sụ ndu l'etso ụzo iya: 44“T'okfu-a bamikwaa unu l'ime nchị, o noo lẹ Abụbu-Ndiwhe bẹ l'ee-megee kpụru kpẹe ndiwhe l'ẹka.” 45Whẹ ta ama iwhe o kfuru nkele e domiru iya edomi t'o bo doshi whẹ ẹnya. Whẹ l'atsụkwawho egvu gẹ whẹ l'eme jị iyẹ ya.

Onye kakọta onwe ẹnya

(Mát. 18:1-5; Mak. 9:33-37)

46Whẹ wata anọ adzọ ẹnya nke onye ka onwe ẹnya lẹge whẹ ha. 47Jisọsu bya amalẹruwho iwhe dụ whẹ l'obu, ọ bya ekuta nwata nshịi kfụkube onwiya. 48Ọ sụ whẹ: “Onye gude iswi mụbe Jisọsu goshi lẹ ya yeru nwata nshịi-a obu, bụkwa mbẹdua bẹ onye ono goshiru lẹ ya yeru obu. Onye goshiru lẹ ya yeru mu obu, goshikwaruwho lẹ ya yeru onye ono sụru tẹ mu bya obu, o noo l'ọo onye ẹnya nke iya kagee ọlwa alị lẹge unu ha bụ onye kakọta onwe ẹnya.”

Onye l'ẹte anọoru ghu l'ejo oshi bụ onye ghu

(Mak. 9:38-40)

49Jọnu sụ iya: “Nnajị-Ọha, anyi whụkwaru nwoke gude ẹwha ghu achịshi ọgvu. Anyi kpọshia yẹ ya eshi-ọwhu l'ooto tsoje ghu g'ọo anyịbedua.”

50Jisọsu sụ iya: “Unu ba akpọshishi iyẹ ya, o noo l'onye l'ẹte anọoru unu l'ejo oshi bẹ bụ onye unu.”

Ndu Samériya l'ajịka Jisọsu

51O rwudelewho ntse ntse mbụ mbọku l'ee-kubata iya l'imigwe, ọ tụgbua lẹ ya jefutaje Jerúsalẹmu. 52Ọ harụ ndu ozhi yefu tẹ whẹ vuru iya ụzo tụgburu. Ndu ozhi ono tụgbua je abahụ lẹ mkpụkpu lanụ dụ lẹ Samériya, je tẹ whẹ dozhiaru iya ẹka l'ọo-zẹe. 53Ndu ẹka ono jịka lẹ whẹ ta anatadụ iya nkele o cheberu iwhu lẹ Jerúsalẹmu. 54Jémusu yẹle Jọnu, bụ ndu l'etso ụzo iya whụa ẹgube iwhe ono, whẹ sụ Jisọsu: “Onye-Nwe-Ọha ?ọ dụ ghu ree t'anyi mee ọku t'o shi l'imigwe bya ekepyashia whẹ?”

55Jisọsu bya aghaa ẹnya gbochia whẹ nchị. 56E megee whẹ shi ẹka ono tụgbua jeshia mkpụkpu ọdo.

Ndu l'e-bekoo etso ụzo Jisọsu

(Mát. 8:19-22)

57Whẹ jenyaa l'ụzo, nwoke lanụ sụ Jisọsu: “Mu l'a-nọje-zhiawho etso ghu eje iwhe bụ ẹka l'iije.”

58Jisọsu sụ iya: “Ụwhegu nweru ẹnu ẹka, l'ọoraduje, ẹnu, l'ewhe l'eli nweru ẹkfunu ẹka, l'ọoradujekwawho. Ọle Abụbu-Ndiwhe te enwedu ẹka, bụ ẹka, l'oo-dobeje ishi.” 59Ọ sụ onye ọdo: “Tsoru mu.”

Onye ono sụ iya: “Onye-Nwe-Ọha, ngabẹkwawho tẹ mu je eliadaa nna mu.”

60Jisọsu sụ iya: “Haa ndu nwụhuru anwụhu tẹ whẹ lia ndu nke whẹ nwụhuru anwụhu. Jeshia gụbedua l'onwoghu je aryakaa l'ọo Chileke bụ eze.”

61Onye ọdo sụ iya: “Onye-Nwe-Ọha, mu l'e-tsokwaru ghu-a, ọle mu l'e-jeeda je asụ ndu ibe mu tẹ whẹ nọo ọwhoma.”

62Jisọsu sụ iya: “Iwhe bụ onye paliadaru ọgu tẹmenu onye ọbu ghadẹ ẹnya l'azụ, ta alịkwa l'ozhi l'egoshi l'ọo Chileke bụ eze.”

Currently Selected:

Luku 9: Ezaa

Highlight

Copy