Luku 8

Ụnwanyi, l'etso Jisọsu

1Lẹ ntsulọhu nteke ono kwawhọ, Jisọsu tụko obodo lile mẹe mkpụkpu lile jekota arya ozhi-ọma ẹka Chileke bụ eze aryarya, ekfukwa iya who ekfu. Yẹle ụmadzu iri l'ẹbo ono lịkwaruwho, 2mẹe ụnwanyi ọ harụ mee whẹ mehukota l'ọgvu bu whẹ l'ẹhu mẹe ẹhu-ba-dụ-mma mmaanụ ọdo gudegeeru whẹ nụ. Ụnwanyi ọbu whẹ l'iya lị-gee ọbu bụ Méri ọwhu l'eeku Méri Mágudala bụ iya bụ onye ono, Jisọsu chịfuru ọgvu ẹsaa l'ẹhu, 3mẹe Jowána nyee Kuza ọwhu bụ onye Hẹ́rodu yeru ẹku iya l'ẹka t'o letaru iya ẹnya mẹe Suzána mẹwaro igweligwe ndu ọdo warọ. Ndu ono gẹ whẹ ha bẹ wofutaru iwhe lile whẹ nweru gude eyeru Jisọsu whẹ ẹka lẹ mkpa whẹ.

Ẹtu, e gude onye l'atụ iwhe akụ anma

(Mát. 13:1-9; Mak. 4:1-9)

4O be nteke igweligwe madzụ zakọberu, ndu shi lẹ mkpụkpu lẹ mkpụkpu wukfuta iya, Jisọsu gude ẹtu sụ whẹ: 5“Ọo nwoke jeru ọtu iwhe akụ iya. Nwoke ono l'atụ iwhe akụ ono, ọ harụ daa l'agụga echi-ụzo, e gude ọkpa dzọpyashia ya, ụnwu-ẹnu bya atụtua ya lwee. 6Ndu harụ nashịhu daa l'eli ẹwhuru. Efufuta l'oofufuta ọ nwụlwashihu, nkele mini ta adụdu l'ẹwhuru ono. 7O nweru ndu ọwhu harụ daa l'ẹka ogvu dụ l'ime alị yẹle ogvu ono bya atụko fushikota, ogvu ono kpagbushia ya. 8Ndu harụ daa l'ẹka alị dụ ree. O fushia vua, bya amịta-gee mebyi ụkporo ise ise.”

Jisọsu kfunyaa nno ryaa sụ: “Onye ụzo-nchị dụ t'ọ nụa ya.”

Iwhe Jisọsu kwoberu nmaa ẹtu ono

(Mát. 13:10-17; Mak. 4:10-12)

9Ndu l'etso ụzo iya bya ajịa ya iwhe ẹtu ono bụ. 10Ọ sụ whẹ: “Ọo unubẹdua bẹ Chileke meru t'unu marụ iwhe e shi domigee edomi lẹ nke abụbu ono, Chileke bụ eze, ọle nke ndu ọdo bẹ l'aatụko anmarụ whẹ l'ẹtu ẹtu nke ọwhu whẹ l'e-le ẹnya nta lee imo, ọle ọ tọ dụdu iwhe whẹ bya l'a-whụ, whẹ anụa iwhe nta nụa imo, ọle ọ tọ dụdu iwhe bya l'e-do whẹ ẹnya.

Jisọsu l'akọ iwhe ẹtu ono bụ

(Mát. 13:18-23; Mak. 4:13-20)

11“Unu lee iwhe ẹtu ono bụ ndọwa: Iwhe akụ ono bụ okfu Chileke. 12Ndu ọwhu darụ l'agụga echi-ụzo bẹ bụ ndu ọwhu nụ-geeru iya nụ; Oshifutuswe bya anafụ whẹ iwhe ono, a kụru l'ime obu whẹ ono tẹ whẹ be ekweta t'a dzọfuta whẹ. 13Ndu ọwhu darụ l'eli ẹwhuru bụ ndu ọwhu bụ nteke whẹ nụ-geeru okfu ono, whẹ kweta gude ẹhu-ụtso natakebe iya ree, ọle ọ tọ gbabẹdu ọgbaragbu l'obu whẹ, whẹ kwetarwee kpọo nwụkfu nwanshị, o belewho nteke iwhe adata byakfutaru whẹ, whẹ docha iya. 14Ndu ọwhu darụ l'ẹka ogvu dụ l'ime alị bẹ bụ ndu ọwhu nụ-geeru iya nụ, whẹ jenyaa l'ụzo whẹ ono, oke ọriri ẹhu whẹ mẹe ẹku mẹe iwhe-ụtso ọwhu dụ lẹ ndzụ whẹ, kpanụka whẹ ẹhu, tọ dụhe iwhe ozhi-ọma ono meru whẹ l'ẹhu. 15Ndu ọwhu darụ l'alị dụ ree; o noo ndu ọwhu nụru okfu ono, whẹ gude ọkpobe obu-ọma gudepyabeshia ya ike, whẹ taa nshi kfukashia okfu Chileke ono tẹ ndu ọdo kweta.”

Oryọku bẹ l'eedobeje l'eli ẹka iwhoro iya l'a-ngashị

(Mak. 4:21-25)

16“Ọ tọ dụdu onye l'anwụjeru ọku ye l'oryọku, ya ẹgbee wota iwhe kpupyabe iya, ọdua ya enwua ya lẹ mkpula ugbooshi. Ọo l'eli ẹka l'aatukobeje oryọku bẹ l'aatukobeje iya nke ọwhu onye batarụ nụ l'a-whụ iwhoro iya. 17O noo l'ọ tọ dụdu iwhe e domiru edomi l'eete emegee wofuta bya atụa jalaa. Tọ dụkwawho iwhe l'eme l'edomi l'ete ebekochaa fụta iwhoro, a madzuru iya. 18Unu kwabẹkwaru iwhe unu l'anụ lẹ nchị unu ẹnya, o noo l'iwhe bụ-zhia onye nweru nụ bẹ Chileke l'e-yekwabaaru. Ọle onye ọwhu l'ete enwee nụ, bẹ nwanwa iya ọwhu o doberu sụ l'iya nwe enwenwe owhu bẹ l'ẹe-gbẹenu natafụa ya.”

Ndu l'eme okfu Chileke bụ abụbu Jisọsu

(Mát. 12:46-50; Mak. 3:31-35)

19E megee, ne Jisọsu mẹe unwune iya bya abyakfuta iya. Whẹ ta adụ ike kpata ụzo jekfu iya nkele madzụ ha l'igweligwe l'ẹka ono. 20E je asụ Jisọsu: “Ne ghu yẹle unwune ghu nọkwa l'etezhi eme tẹ gụ lẹ whẹ whụ.”

21Ọ sụ whẹ: “O to nwekwa onye ọdo, bụ ne iya yẹle unwune iya t'a gbahaa ndu l'anụ okfu Chileke, eme iya eme.”

Jisọsu l'eme tẹ whẹrewhere nọdu ndoo

(Mát. 8:23-27; Mak. 4:35-41)

22O be ujiku lanụ, Jisọsu yẹle ndu l'etso ụzo iya tụko bahụ l'ụgbo. Ọ sụ whẹ: “Unu t'anyi dafụ azụ eze-ẹnyimu azụ iya ọwhu.” Whẹ ngarụ ụgbo whẹ jeshia. 23Whẹ nganyaa ụgbo ono, mgbẹnya rwekota Jisọsu. Oke whẹrewhere gude oke akpara-mini byakfuta whẹ l'echi mini ono. Mini wujilahaa ụgbo-ọ. Whẹ nma l'ẹto. 24Whẹ je ekutee Jisọsu sụ iya: “Nnajị-Ọha, Nnajị-Ọha, ụgbo l'abyakwa anyi ekpukpu.”

Ọ gbalihu bya abaarụ oke whẹrewhere ono mba, baarụ oke akpara-mini ono mba, ọ bụru getumu. Mgboko ono dalẹwho rịgbidingu. 25Ọ sụ whẹ: “?Ndẹhunu ekwekwe ọbu, unu kweru?”

Whẹ tsụlahaa egvu. Whẹ gude ẹhu-anmanma ekfu asụ: “?Ọo ẹgube madzụ gụnu bẹ nwoke-e bụ? ?Onye ọwhu l'asụje whẹrewhere yẹle mini l'ọ waa iwhe l'oo-me, ya emee g'o kfuru.”

Jisọsu l'eme tẹ nwoke, ọgvu jiru ẹhu mehu

(Mát. 8:28-34; Mak. 5:1-20)

26Jisọsu whẹ bya erwua alị ndu Gérasa, dụ lẹ ncheko iwhu Gálili. 27Alụfuta l'ọolufuta l'ụgbo yẹle nwoke ọbu, ọgvu bu l'ẹhu, shi buru l'ime mkpụkpu ono dzuda. Ọ nọwaru ọdu shii toko yebua uwe l'ẹhu, to bu l'ụlo. Ẹka o bu bụ l'ẹka l'eelije madzụ. 28Ọ whụlewho Jisọsu, o chia mkpu bya adaa l'iwhu iya wolia olu sụ: “Jisọsu, Nwa Chileke, mbụ Chileke ono, bụ Ọkalibe-Kangokotaru-Nu! ?Ọo gụnu bẹ mu lẹ ghu jigba? Mu l'aryọkwa ghu whọ aryọryo t'ị ba abyakwa mu whọ ọnu áwhụ.” 29Iwhe meru iya nụ bụkwanuru lẹ Jisọsu bẹ dụhawaa mbụ sụ ọgvu ono t'ọ fụta nwoke ono l'ẹhu. Nkele nteke nteke bẹ ọgvu ono l'egudeshije nwoke ono ike, a tụa ya mkpọro l'ọkpa, tụa ya l'ẹka, e che iya eche. L'ọotukojelee iwhe ono gbabushia. Ọgvu ono l'emeje iya, ya asahụ lashia l'echi-ẹgu.

30Jisọsu bya ajị iya: “?Ẹwha ghu bụ gụnu?”

Ọ sụ iya: “Ẹwha mu bụ Ụnu-kpụku” nkele ọgvu ọbu bẹ ha l'igweligwe buru iya l'ẹhu. 31Ọgvu ono tụko ryọo Jisọsu sụ t'ọ bọ sụkwa whẹ tẹ whẹ je awụba l'iduma-maa.

32O nweruwho ikpoto ezhi dọru lẹ mgboro ẹka ono akpa nri l'agụga ugvu, ọgvu ono gẹ whẹ ha ryọo Jisọsu sụ t'ọ hanụa tẹ whẹ wụba ezhi ono l'ẹhu. Jisọsu sụ whẹ tẹ whẹ lọbaru. 33Ọgvu ono zefuta l'ẹhu nwoke ono, wụba ikpoto ezhi ono l'ẹhu. Tọ dụ iya bụ l'ikpoto ezhi ono g'ọ ha achabuhu ọso gburugburugburu, gbazeta lẹ kperekpere ẹka ono, je awụba lẹ eze-ẹnyimu. Mini rigbushia whẹ.

34Ndu l'eche ezhi ono whụlewho iwhe meru nụ, whẹ gbakashịhu je edokota iwhe lile ono, meru nu l'ime mkpụkpu, dooru iya ndu bu l'ẹgu. 35Ọo ya bụ, whẹ wụfuta jeshinua eje awhụada iwhe ọbu meru nụ. Whẹ byakfuta Jisọsu. Whẹ whụa nwoke ọbu, ọgvu shi l'ẹhu wụfu ọbu g'ọ nọkube Jisọsu. O mehuwanu, yewanu uwe l'ẹhu. Whẹ tsụhu egvu. 36Ndu whụru iwhe nwụru nụ bya akọoru whẹ g'e gude dzọo nwoke ono, ọgvu shi ji ẹhu ono. 37Ọo ya bụ lẹ ndu lile, bu l'alị Gérasa mgburumgburu aryọlahaa Jisọsu t'ọ lụfuru whẹ l'alị nkele whẹ l'atsụ egvu shii. Jisọsu bahụ l'ụgbo lashia. 38Nwoke ono, a chịshiru ọgvu l'ẹhu ryọlahaa Jisọsu tẹ yẹle iya nọdu.

Jisọsu te ekwe. Ọ sụ iya t'o bo tsoshi whẹ. Sụ iya: 39“Lashia ibe ghu je akọoru ndu nke ghu eze iwhe Chileke meru ghu.”

Nwoke ono tụgbua je etsoru mkpụkpu ono g'ọ ha aryakashị eze iwhe Jisọsu meru iya.

Nwa Jáyirọsu mẹe nwanyị, nsọ l'eme

(Mát. 9:18-26; Mak. 5:21-43)

40Jisọsu lwawhulewho azụ, igweligwe ndu ono nata iya ọkpobe anata nkele onyenọnu gbee ngabẹru iya angabẹru. 41O nweru nwoke lanụ ọbu, ẹwha iya bụ Jáyirọsu, bụ onye ishi ụlo-ndzuko. Ọ bya adaa lẹ mgboro ọkpa Jisọsu ryọo ya t'ọ bya ibe iya. 42Iwhe ọbu l'ookuru iya bụkwanuru l'ọo nwata nwanyị lanụ bẹ nwoke ono nwụtaru ọdo ta adụhe. Nwata nwanyị ono nọwaru iwhe rwuru awha iri l'ẹbo. Nwata ono l'abya anwụhu.

Jisọsu tsoru iya whẹ jeshia. Igweligwe madzụ l'awụ gidigidi, akpa mkpa etso iya ibẹka ibe ẹbo. 43O nwekwaruwho nwanyị, nọ l'ẹka ono, nsọ-ụnwanyi mewaru awha iri l'ẹbo, t'o buhuje iya ebuhu. Nwanyị ono tụkowaru iwhe bụ iwhe o nwe enwe mewhushikota l'ẹka ndu l'eme ọgvu, tọ dụ onye ọwhu dụ ike meta iye ya. 44Nwanyị ono shia Jisọsu ụzo azụ bya emee ẹka l'ogboromọnu uwe Jisọsu, nsọ-ụnwanyi ono, l'eme iya nụ bụlekwaruwho getumu nteke ono who. 45Jisọsu sụ: “?Ọo onye meru mu ẹka?”

Tọ dụ onye kwetaru l'ọo ya. Pyita sụ iya: “Nnajị-Ọha, mbụ gẹ igweligwe ọha-a l'ekpo rwuturwutu etso ghu ibẹka ibe ẹbo ẹgube-ẹ, akpakwa ghu whọ mkpa.”

46Jisọsu sụ: “O nweruwho onye meru iya ẹka nkele mu mawarụ l'ike shi mu l'ẹhu lụfu.” 47Nwanyị ono nọnyaa marụ l'iya te edomikotadu onwiya, o gude ẹhu-anmanma fụta bya adaa l'iwhu iya, bya aryaa ya aryarya l'iwhu ọha iwhe kpatarụ iwhe ya jeshiaru ome ẹka l'uwe Jisọsu. O kfukwaawho lẹge iya gude mehu nteke ono who. 48Jisọsu sụ: “Nwada mu, ekwekwe, i kweru bẹ mewaru ghu i mehu ọbu. Lashia je eburu guu!”

49Jisọsu kpụkwaduru-a okfu ono l'ọnu ekfu, madzụ shi l'ibe onye ishi ụlo-ndzuko whọ, bụ Jáyirọsu bya bya asụ yẹbe onye ishi ụlo-ndzuko ono: “Hakwaa o-zhi-iwhe, be ekfuchihekwa iya nchị lẹ nwa ghu nwanyị ọbu bẹ tubuhuakwaru ume.”

50Jisọsu nụa ya, ọ sụ iya: “Ba atsụkwa egvu, ọlekwawho t'i kweta! I -kwetazhiwaa bẹ nwa ghu l'e-mehukwaa.”

51Jisọsu rwulewho uwhu ono, tọ dụhe onye, o kwekwaduru t'o otsoru iya bahụ l'ụlo gbahalẹwho Pyita mẹe Jọnu mẹe Jémusu, ọ wafụa ne lẹ nna nwata ono. 52Iwhe bụ ndu nọ l'ẹka ono tụko atsọ áwhụ, arya ẹkwa nwata ono. Jisọsu sụ whẹ: “Unu ba atsọshi áwhụ l'ọ tọ dụ anwụhu b'ọ nwụhuru, ọo mgbẹnya bẹ l'ooku.”

53Whẹ nma iya ụzu nchịchochi nkele o doru whẹ ẹnya l'ọo anwụhu bẹ nwata ono nwụhuru. 54Ọo ya bụ, ọ bya esekputa nwata ono l'ẹka, kua ya sụ: “Nwata mu, teta.” 55Nwata ono lwawhu azụ lẹ madzụ nteke ono who. O zhilihulekwawho, Jisọsu sụ tẹ whẹ nụ nwata ono nri t'o ria. 56Ọ kpụbe ndu nwụru nwata ono ọnu okfu. Jisọsu sụ whẹ tọ bọ dụkwa onye whẹ l'ekfuru iwhe ono, nwụru nụ.

Currently Selected:

Luku 8: Ezaa

Highlight

Copy