Luku 19

Jisọsu yẹle Zakíyọsu

1Jisọsu bya abahụ lẹ Jériko aghajalẹ iya-a aghaja. 2O nweru nwoke ọbu, ẹwha iya bụ Zakíyọsu, bụ onye ishi akịriko, o nwekwaru whọ iwhe shii. 3Ọ chọlahaa tẹ ya marụ onye ọbu, bụ Jisọsu, igwe-ọha ono te ekwe tọ kpata ụzo whụ iya nkele Zakíyọsu bẹ ha nwa kpụruru. 4Ọo ya bụ, ọ gbagbụa je enyihu oshi sịkamo, dụ l'ụzo iwhu nọdu tẹ ya whụ Jisọsu nkele o noo ụzo ẹka, l'oo-shi ghata. 5Jisọsu rwua ẹka ono. Ọ bya apalia ẹnya sụ iya: “Zakíyọsu, nyizeta ẹgwegwa, o noo l'ọo ibe ghu bẹ mu radụfutaje ntanụ-a.”

6O zhidakebe ẹgwegwa gude ẹhu-ụtso duta Jisọsu duba ibe iya. 7Ẹhu ghulahaa iwhe bụ ndu whụru iya nụ eghu. Whẹ kfulahaa sụ: “Leenu lẹ nwoke-e abahụ jeshia t'a kwaarụ iya ẹbyii l'ibe nwoke-e l'eme iwhe-dụ-ẹji-a.”

8Zakíyọsu gbalihu sụ Onye-Nwe-Ọha: “Onye-Nwe-Ọha, iwhe bụ iwhe mu nwe enwe bẹ mu l'e-ke ụzo labọ nụ ndu ụkpa uzhi lanụ. Nteke bụ l'ọ -dụ onye mu rijeru urwu, iwhe ọ bụ iwhe ọ bụ bẹ mu l'a-kfụ onye ono iwhe ha g'ọo iwhe mu riru iya urwu iya ugbo ẹno.”

9Jisọsu sụ iya: “Ntanụ-a b'a dzọtaru ndu uwhu-a eshi nwoke-e l'onwiya bụkwawho nwa Ébirihamu. 10O noo lẹ Abụbu-Ndiwhe byarụ tẹ ya chọo ndu ọwhu tuwhahuru etuwhahu nggẹ ya dzọfuta whẹ.”

Ẹtu ndu e yeru okpoga l'ẹka

(Mát. 25:14-30)

11Whẹ nụnyalewho iwhe ono l'ookfu, ọ wata whẹ ọ nmarụ ẹtu. Nteke ono be whẹ nọkubewaa Jerúsalẹmu ntse, tẹmenu whẹ dobenu sụ lẹ Chileke l'abyakebewaa ogoshi l'ọo ya bụ eze. 12Ọo ya bụ ọ sụ: “O nweru nwoke lanụ bụ eri ndu eze. O jee ọha ọbu teru ẹnya t'e kpube iya okpu-eze tẹmenu ya alwa. 13Ọ byalẹwho l'eje, o kuta ndu ozhi iya ụmadzu iri kekashiaru whẹ pọngu iri. Ọ sụ whẹ: ‘Unu gude iya gbajẹ nghọ t'iya lwa.’

14“Ọle nwoke ono bẹ dụ ndu alị iya ashị. Whẹ yefu ndu ozhi tẹ whẹ tsoje iya azụ azụ je ekfua l'ẹka ono l'ọ tọ dụkwa whẹ ree t'o bụru nwoke ono l'a-bụ eze whẹ.

15“Obenu l'e megelerwua, kpube nwoke ono okpu-eze ono. E kpubegele iya whọ okpu-eze ono, ọ lwa bya ezhia ozhi t'e kuaru iya ndu ozhi-a, ya nụru okpoga, tẹ ya marụ urwu whẹ ritaru lẹ nghọ whẹ.

16“Onye nke mbụ bya abya akfụru iya l'iwhu sụ iya: ‘Nnajị anyi, pọngu olu ghu ono tukobeekwaru onwiya urwu pọngu iri ọdo.’

17“Ọ sụ iya: ‘I meru ree, ọkpobe onye ozhi mu. Eshi-ọwhu e gude ire ghu ẹka l'iwhe ha nwanshị, bẹ mu l'e-ye ghu obodo iri l'ẹka t'ị bụru onye ishi whẹ.’

18“Onye nke ẹbo bya asụ iya: ‘Nnajị anyi, pọngu olu ghu ono tukobekwaru onwiya urwu pọngu ise.’

19“Onye eze ono sụ iya: ‘Ọ kwawhọ obodo ise bẹ l'ịi-bụ onye ishi whẹ.’

20“Onye ọdo bya asụ: ‘Nnajị anyi, ọ wakwa pọngu olu ghu. Mu wolekwaru iya who kee ngvu lẹ nwa mpebala ẹkwa. 21O noo lẹ mu l'atsụ ghu egvu-o, l'ẹhuka parụ ghu ẹka l'ẹhu. Iiwotaje iwhe l'abụa ghu doberu, l'ịiwotaje iwhe l'abụa ghu kụru.’

22“Onye eze ono sụ iya: ‘Gụbe iyi-l'akụ-iyi-l'ẹkfu-a, ọo iwhe shi ghu l'ọnu bẹ mu l'e-gude nma ghu ikpe. Eshi-ọwhu ị marụ l'ẹhuka parụ mu ẹka l'ẹhu; mu l'eewotaje iwhe mu l'edobee, mu l'awọtajekwawho iwhe mu l'akụa, 23?ọo gụnu meru t'i yeru mu okpoga mu ono l'ụlo nche okpoga nke ọwhu bụ mu -lwarụ gẹ mu lwarụ ẹgube-ẹ mẹ mu eje ewota iya wota urwu, o tukoberu onwiya?’

24“Ọ sụ ndu kfụru l'ẹka ono: ‘Unu nata iwhe mmaanụ ono okpoga ono woru nụ onye ọwhu nweru pọngu iri whọ.’

25“Whẹ sụ iya: ‘Wa-a! ?O chia yẹbedua nweru pọngu iri b'ị sụru t'a nụ iya?’

26“Ọ sụ whẹ: ‘Tẹ mu kfuru iya unu, onye nweru nụ bẹ l'aa-nụbaa ọwhu ka shii, onye l'ete enwekwa nụ-a bẹ l'aa-gbẹenu nata nwa nwịya ọwhu o nwe. 27T'ọ bya ebe lẹ ndu okfu iya-a, bụ ndu-a l'ete ekwee tẹ mu bya abụru eze whẹ, unu chịta whẹ bya edobe l'atatiwhu mu l'ẹka-a tụko whẹ gbushikota.’ ”

Jisọsu l'abahụ lẹ Jerúsalẹmu

(Mát. 21:1-11; Mak. 11:1-11; Jọn. 12:12-19)

28Jisọsu kfugelewho iwhe ono, l'ookfu, ọ tụgbua jeshia Jerúsalẹmu l'ooje. 29Ọ byarwudelewho l'ugvu ọbu l'eekuje Ólivu bụ iya bụ lẹ mgboro Betuféji mẹe Bétani, o zhia ndu l'etso ụzo iya ụmadzu labọ sụ whẹ: 30“Unu bahụ lẹ mkpụkpu ono dụ unu l'iwhu. Unu rwulewho l'ọnuzo e shi abahụ l'ime mkpụkpu ono bẹ unu l'a-whụa nwa nkakfụ-ịgara, e liberu elibe l'ẹka ono l'ọ tọko dụbua onye nọkojeru iya l'eli. Unu tọta iya kpụta bya ẹka-a. 31Nteke bụ l'ọ dụ onye jịru unu sụ: ‘?Unu kwoberu gụnu atọta iya?’ Unu asụ onye ọbu lẹ mkpa iya dụ Onye-Nwe-Ọha.”

32Ọo ya bụ, ndu ozhi ono, e zhiru ozhi ono tụgbua rwua, ọ bụleruwho lẹge o kfuru iya bụ lẹge ọ dụ. 33Whẹ tọtadelewho nwa nkakfụ-ịgara ono, ndu nwe iya nụ sụ whẹ: “?Unu kwoberu gụnu atọta nkakfụ-ịgara ono?”

34Whẹ sụ whẹ: “Mkpa iya dụ Onye-Nwe-Ọha.” 35Whẹ kpụta nkakfụ-ịgara ono kpụtaru Jisọsu, bya achịta-gee uwe ugwẹhu whẹ wukobe l'eli iya, yetaru Jisọsu ẹka, ọ nọdu iya anọdu l'eli. 36O jedelewho, ndu madzụ l'atụsakaa uwe whẹ l'echi-ụzo.

37O rwukubedelewho Jerúsalẹmu ntse l'eweze ugvu Ólivu, iwhe bụkota igweligwe ndu l'etso iya telahaa ẹswa, echi mkpu aja Chileke l'eze iwhe ono, kpọru gẹ l'aa-nọ atụ ọnu iya, o meru whẹ whụkota. 38Whẹ sụ: “Onye Chileke gọru ọnu-ọma nụ bẹ eze ono bụ, mbụ onye ono, Onye-Nwe-Ọha zhiru t'ọ bya. Tẹ nchị dụ ndoo l'imigwe, t'ugvu dụru Chileke, bụ Ọkalibe-Kangokotaru-Nu.”

39Ndu Fárisii lị l'igweligwe ndu ono sụ Jisọsu: “O-zhi-iwhe ?ti gbochidu ndu ono l'etso ụzo ghu nchị.”

40Ọ sụ whẹ: “Iwhe mu l'ekfuru unu bụ lẹ ndu-a -nozhiwaa ndoo, ẹwhuru, dụ l'alị echilahaa mkpu ọbu l'onwiya.”

Jisọsu l'arya ẹkwa Jerúsalẹmu

41Jisọsu rwudelewho Jerúsalẹmu, ọ bya apalia ẹnya lee ya, ọ ryashịa ẹkwa iya sụ: 42“Gụbe Jerúsalẹmu nggẹ l'ị madụru-a iwhe l'e-me tẹ nchị dụ ghu ndoo ntaa, ọle ntaa b'e domiru iya t'ẹnya ghu ba awhụ iya. 43Nkele ọo zhiawho ujiku lanụ bẹ ndu ọhogu ghu l'a-fụru ghu gvuwhe ghu ose ọgu mgburumgburu, gvuwhe ghu ịga nowhee ghu mgburumgburu. Whẹ eshi l'ẹka lile ekpo rwuturwutu bya eripyabe ghu, 44whẹ egbushia gụ l'ụnwu ghu ono, kụru ghu l'ime tsụa unu ọtsu ẹkfu. Ọhogu ghu ta ahakwa ẹwhuru lanụ t'o kpokfuru ibe iya l'eli ghu, o nokwanu nkele ị tị madụ nteke a byarụ ghu adzọta.”

Jisọsu nọ l'eze-ụlo Chileke

(Mát. 21:12-17; Mak. 11:15-19; Jọn. 2:13-22)

45Jisọsu bya abahụ l'eze-ụlo Chileke je awata ọchikashi ndu nọdu iya ere iwhe. 46Ọ sụ whẹ: “Unu ta amadụ l'e deru l'ẹkwo Okfu Chileke lẹ Chileke sụru: ‘Ụlo mu l'a-bụ ụlo l'aa-nọdu ekfu anụ mu.’ Ọle unubẹdua gbẹenu bya ewota iya mebe ụlo ẹka ndu l'ana nfụ l'edomije onwowhe.”

47L'ọonoje ezhi iwhe l'eze-ụlo Chileke ono mbọku-mbọku. Ndu ishi ndu l'agbajẹ ẹja nụ Chileke mẹe ndu o-zhi-iwu mẹe ndu nweru ẹnya l'echi ọha, chọlahaa ụzo whẹ l'e-shi gbua ya. 48Whẹ ta amahẹnu gẹ whẹ l'e-me iya nkele ndu ono gẹ whẹ ha dọ-wheru iya mgburumgburu tọgbo nchị anụ iwhe l'ookfu.

Currently Selected:

Luku 19: Ezaa

Highlight

Copy