Luku 18
18
Ẹtu nwa-mbunu yẹle onye ikpe
1Jisọsu bya anmaarụ whẹ ẹtu, o gude goshi whẹ tẹ whẹ kfuje nụ Chileke nteke nteke, tẹ whẹ ba asụje l'ike ekfukfu iya gvụwaru whẹ. 2Ọ sụ whẹ: “L'obodo lanụ b'o nweru onye ikpe, l'ẹte atsụ egvu Chileke, tọ dụ iwhe o kuru madzụ. 3O nwekwaruwho nwa-mbunu bu l'obodo ono, shi abyakfutaje iya nteke nteke bya aryọ iya sụ iya: ‘Byiko, kpefunu mu l'ẹka onye okfu mu.’ 4Onye ikpe ono te eyejeru iya ọnu l'ọnu mbụ. Ọ jịkanyalewho, ọ rịa sụ: ‘A makwarụ-a lẹ mu ta atsụdu Chileke egvu, tọ dụ iwhe mu kuru madzụ. 5Ọle eshi nwanyị-a kfuchinukawaru mu nchị bẹ mu l'e-kpefu iya l'ẹka onye okfu iya. Mu -ekpefua ya bẹ l'ọonolekwa abya gẹ l'ọobya-a jeye nteke l'oo-gude iwhe l'ekfu ekfu mịa mu mini.’ ”
6Ọo ya bụ lẹ Onye-Nwe-Ọha asụ: “?Unu nụwaru iwhe ono nwoke ono, bụ ejo onye ikpe kfuru? 7Sụa, ọ dụ unu gẹ-woo lẹ Chileke te egbechiduanu ka okpefu ndu ono, ọ họtaru ẹgwegwa, mbụ ndu l'echiku iya eswe l'ẹnyashi? ?L'ọokpooda ụkfu tẹmenu ya eyederu whẹ ẹka. 8Wawakwa, tẹ mu kfuru iya unu, oo-kpefu whẹ l'ọku l'ọku. Ọle ọbu nteke Abụbu-Ndiwhe byarụ ?l'ọo-whụa ndu kweru nọdu iya l'ẹka l'eliwhe-ọwa-e?”
Ẹtu onye Fárisii mẹe onye akịriko
9Ọ bya anmaarụ ndu ọwhu doberu sụ lẹ whẹ dụ chịriri gude nno akpọ ndu ọdo ẹbo l'afụ ẹtu-a. Ọ sụ whẹ: 10“O nweru ụmadzu labọ jeru l'eze-ụlo Chileke je ekfuru nụ Chileke. Onye lanụ bụ onye Fárisii, onye ọwhu bụ onye akịriko. 11Onye Fárisii ono gbalihu je akfụkwaruro iche kfuru nụ Chileke sụ: ‘Chileke, mu l'etu ghu ẹwha lẹ mu ta adụdu g'ọo ndu ọdo l'ewo iwhe madzụ l'ẹka ike mẹe ndu l'eme ejo ememe, mu ta akpa lẹ nwanyị, mbụ lẹ mu ta adụdu g'ọo nwoke-e bụ onye akịriko-o. 12Mu l'aswịje ẹgu ujiku labọ l'idzu lanụ ekfu anụ Chileke, mu l'eekeje iwhe bụ iwhe rwuru mu ẹka ụzo iri woru ụzo lanụ nụ Chileke.’ 13Onye ọwhu bụ onye akịriko whọ jekwaro je akfụru otẹnya. Tọ dụnu m'ọo ike palia iwhu apali, gbahalẹwho ẹka bẹ l'ootsu l'obu gude aryọ Chileke sụ: ‘Chileke, ẹkalali, whụaru mu imiko, mụbe onye l'emeje iwhe-dụ-ẹji.’ 14Jisọsu sụ ndu ono l'ookfuru: Tẹ mu kfuru unu: onye akịriko ono byakwa l'aladeshia ibe iya Chileke gụtawa iya l'onye dụ chịriri, haa onye ọwhu, o noo l'iwhe bụ onye l'ekuli onwiya eli bẹ l'ee-kuzeta alị, onye kuzetakwanuru onwiya alị bẹ l'ee-kuli eli.”
Ụnwegirima nshịi l'abyakfuta Jisọsu
(Mát. 19:13-15; Mak. 10:13-16)
15Ọo ya bụ, ndu madzụ l'edutakaaru Jisọsu ụnwegirima, e he l'ẹka t'ọ byaa whẹ ẹka. Ndu l'etso ụzo iya whụa ya, whẹ balahaaru ndu ono, l'ekutaru iya ụnwegirima ono mba. 16Jisọsu bya eku whẹ sụ whẹ: “Unu hakwaa ụnwegirima tẹ whẹ byakfuta mu. Unu ba akpọshishi whẹ abyabya, l'ọo ndu dụ nno bẹ Chileke bụ eze whẹ.” 17Sụ whẹ: “Tẹ mu kfule iya who t'o doo unu ẹnya, onye l'ete egudee obu ụnwegirima kweta l'ọo Chileke bụ eze iya ta abyakwa l'a-ha tẹ Chileke bụru eze iya.”
Onye nweru iwhe
(Mát. 19:16-30; Mak. 10:17-31)
18Onye ishi ndu Ju lanụ jị Jisọsu sụ iya: “O-zhi-iwhe, bụ onye ọma, ?ọo gụnu bẹ mu l'e-me nggẹ mu nweru ndzụ tututu-mịmimi?”
19Jisọsu sụ iya: “?Ọo gụnu meru l'iiku mu onye ọma, ọ tọ dụdu onye ọdo bụ onye ọma, gbahalẹwho Chileke nwẹkiya. 20Ị mawarụ-a iwhe lile Chileke sụru t'e mejee: ‘Be erikwa ogori, ti gbu ọchi, ti zhitakwa oshi, ba adzụkwa ejire tukobe madzụ ibe ghu, gụ akwabẹje ne lẹ nna, nwụru ghu nụ ugvu.’ ”
21Nwoke ono sụ iya: “Ọ tọko dụbukwaa iwu ono ọwhu mu doswejeru nkeshi mu bụ nwata.”
22Jisọsu nụlewho ono, ọ sụ iya: “Ọ lwarụ ghu iwhe lanụ l'ii-je emee. Lashia ntaa je ereshikotagezhia iwhe lile, i nwe enwe, chịta iwhe i retaru iya keshiaru ndu ụkpa. Ọo ya bụ gụ enweru ọkpobe iwhe l'imigwe. I -megee ya nno, gụ abya etsoru mu.” 23Nwoke ono nụlewho iwhe ono, ẹhu rwụrwuhu iya nkele o nwenukaru iwhe.
24Jisọsu lenyaa ya ẹnya; ọ sụ: “G'o gudebukwanua atsụ-be l'anụ tẹ ndu nweru iwhe haa tẹ Chileke bụru eze lẹ ndzụ whẹ. 25Nkele ọ kakwa ntse t'ịnya pyoghata l'ẹnya aga, amamẹ t'onye nweru iwhe haa tẹ Chileke bụru eze lẹ ndzụ iya.”
26Ndu nụru iya nụ sụ: “?Ọ bụhunuru onye bẹ l'aa-dzọfuta?”
27Jisọsu sụ: “Iwhe kpọru madzụ ẹka ememe bẹ bụkwa Chileke fụru mee ya.”
28Pyita sụ: “Lewaro anyịbedua harụ ibe anyi bya etsolahaa ghu-a.”
29Ọ sụ whẹ: “Iwhe mu l'ekfuru unu bụ, ọ tọ dụkwa onye gude iswi tẹ ya jee ozhi l'egoshi l'ọo Chileke bụ eze haa ụlo iya, ọdua ọ haa nyee ya, ọdua l'ọo nwune iya, ọdua ọ haa ndu nwụru iya nụ, ọdua l'ọo ụnwu iya b'ọ harụ, 30tẹ Chileke ba akfụ iya ụgwo iya nkfungo ntaa, onye ono enwekwaruwho ndzụ tututu-mịmimi l'ọgbo ọwhu dụ l'iwhu.”
Jisọsu l'ekfu iya nke ugbo ẹto lẹ ya l'a-nwụhu
(Mát. 20:17-19; Mak. 10:32-34)
31Jisọsu bya ekucha ụmadzu iri l'ẹbo ono ekucha sụ whẹ: “Unu lekwa lẹ ntaa bẹ anyi l'ejeekwa Jerúsalẹmu. Ọo l'ẹka ono bẹ iwhe lile ono, ndu nkfuchiru Chileke kfuru l'okfu ẹhu Abụbu-Ndiwhe l'e-mekota. 32O noo l'aa-kpụru iya nụ ndu l'ẹte amaa Chileke. Ee-gude iya mee ya iwhe ọchi, meru iwhe iwhere nụ iya, vụa ya ọnu-mini. 33Whẹ echia ya ẹchachi, kpụta iya gbua. O belewho lẹ mbọku nke ẹto iya, ya eshi l'ọnwu teta nọdu ndzụ ọdo.”
34Ndu ono ta adụ iwhe ono l'ookfu ọwhu doru whẹ ẹnya m'ọo nnanụ, okfu ono gbachikwaa whẹ whọ ẹnya, whẹ ta ama iwhe o kfuru.
Jisọsu l'eme onye aryọ l'atsọ ishi t'o mehu
(Mát. 20:29-34; Mak. 10:46-52)
35Jisọsu rwudelewho Jériko, o nweru onye ọbu l'atsọ ishi nọdu l'agụga echi-ụzo aryọ aryọ. 36Ọ nụlewho igidi igweligwe ndu l'awụghata, ọ jịlahaa iwhe l'anwụ nụ.
37Whẹ sụ iya: “Ọo Jisọsu onye Názaretu l'aghata.”
38O chishia sụ: “Jisọsu! Nwa Dévidi! Whụnuaru mu imiko!”
39Ndu ọwhu nọ l'ụzo iwhu l'agbochi iya nchị sụ iya t'o dobe ọnu ndoo. Ọ gbẹenu kabaa ya ọryashi ike: “Jisọsu! Nwa Dévidi whụaru mu imiko!”
40Jisọsu kfụru zhi t'e dutaru iye ya. Ọ byakụbelewho ntse Jisọsu sụ iya: 41“?Ọo gụnu b'ọ dụ ghu nke tẹ mu meeru ghu?”
Ọ sụ iya: “Onye-Nwe-Ọha mee mu tẹ mu whụje ụzo.”
42Jisọsu sụ iya: “Wata ọwhu ụzo ọbu, l'ekwekwe, i kweru nke Chileke mewaru ghu t'i mehu.”
43Nwoke ono watalẹkwawho ọwhu ụzo nteke onowho. O tsoru Jisọsu etu Chileke ẹwha. Iwhe bụ ndu whụru iya nụ jaa Chileke.
Currently Selected:
Luku 18: Ezaa
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
