Luku 16

Onye ishi, manụkaru ágụ

1Jisọsu sụkwawho ndu l'etso ụzo iya: “O nweru nwoke lanụ, nweru iwhe, nwekwaruwho onye ishi ndu ozhi iya. Ama bya agbaarụ nwoke ono l'onye ono, o yeru l'ishi ndu ozhi iya l'emebyishi ẹku iya emebyishi. 2Ọ bya ekua onye ishi ndu ozhi ono sụ iya: ‘?Ọo gụnu bẹ dụ ẹgube-ẹ, mu l'anụ, l'iime? Kọoru mu g'i gude eletaru mu iwhe mu ẹnya, o noo l'ị tịi bụbahedua onye ishi ndu ozhi ọdo.’ 3Onye ishi ndu ozhi ono bya arịa sụ: ‘?Ọ nụa gụnu bẹ mu l'e-me gẹ onye-nwe-mu-nụ bya l'anafụ mu ọbu ishi ndu ozhi iya? Tọ hẹ l'ume dụkwadu mu oogbu ọgu, ọ dụkwa mu whọ iwhere gẹ mu l'ejeshia ọryo aryọ. 4Ẹhee! Mu mawarụ iwhe mu l'e-me nke ọwhu ndiwhe l'e-kwejero tẹ mu batarụ whẹ l'uwhu mẹ a -chịfule mu whọ l'ọbu ishi ndu ozhi.’ 5Ọ bya ekukobe iwhe bụ ndu lile ji onye-nwe-iya-nụ ono ụgwo l'ẹhu l'ẹhu. Ọ sụ onye nke ivurụzo: ‘?Ọo ụgwo gụnu b'i ji onye-nwe-mu-nụ?’ 6Onye ononalanụ sụ iya l'ọo ụgwo ite mmanụ ụkporo ugbo ise. Ọ sụ iya: ‘Ngwa narụ ẹkwo, e deru ụgwo, i ji; nọ-zeta ẹgwegwa dee ite mmanụ ụkporo labọ l'iri.’ 7Ọ sụ onye ọdo: ‘?Ọo gụnu bẹ gụbedua ji?’ Ọ sụ iya l'ọo ẹkpa witi ụkporo ugbo ise. Ọ sụ iya: ‘Narụ ẹkwo-ụgwo nke ghu dee ẹkpa witi ụkporo ugbo ẹno.’ ” 8Nnajị-Ọha jaa onye-ishi-ozhi ono, l'eete egudee ire iya ẹka ajaja nkele o meru umere onye marụ ágụ, o noo l'ụnwu-eliwhe bẹ ka ọma agụ l'iwhe lile ọgbo elenu-a l'eme, amamẹ ndu ọwhu nọ l'iwhoro Chileke.

9Jisọsu kfulashia sụ: “O noo iwhe meru mu sụ unu, t'unu gude ẹku mgboko-o shitaru onwunu ọnya nke ọwhu bụ nteke ẹku ono lalẹruwho, e duru unu lashia l'uwhu ono l'ẹte abyaa l'echihu echihu. 10Onye e gude ire iya ẹka l'iwhe ha nwanshị, bẹ l'ee-gudekwawho ire iya ẹka l'iwhe ha shii, onye l'ẹte edobee onwiya chịriri l'iwhe ha nwanshị, ta abyakwa l'e-dobe onwiya chịriri l'iwhe ha shii. 11Ọo ya bụ, ọ -bụru l'eete egudedu ire unu ẹka l'ẹka ẹku mgboko-o dụ ?ndẹhunu gẹ l'ee-shi gude ire unu ẹka l'ẹka ọkpobe ẹku dụ? 12Tẹmenu ọ -bụru l'eete egudedu ire unu ẹka l'ẹka iwhe onye ọdo dụ ?ọo onye l'a-nụkwanu unu ọwhu l'a-bụ nke ẹka unu?

13“Ọ tọ dụdu nwozhi, l'achịtaje nnajị labọ ejekotaru ozhi l'ugbo lanụ, t'ọ bọ kpọ onye lanụ ashị, ye onye ọwhu obu, ọdua ya eye ẹhu l'ozhi nke onye lanụ, apa nke onye ọwhu ẹka lanụ. Unu ta anọkwa etso ụzo Chileke, unu achịkwawho nta ẹku l'ugbo lanụ.”

Jisọsu l'ezhi iwhe bụ uche Chileke

(Mát. 11:12-13; 5:31-32; Mak. 10:11-12)

14Ndu Fárisii tụko iwhe ono Jisọsu kfuru nụkota g'ọ ha, whẹ bya agbadẹru Jisọsu mgbacha nkele ọo lẹ whẹ yenukaru ẹnya l'okpoga. 15Ọ sụ whẹ: “Ọo unubẹdua bụ ndu l'anọje emebe onwunu ndu dụ chịriri l'iwhu ndiwhe, ọle Chileke bẹ makọtaru obu unu. O noo nkele iwhe ndiwhe kpọru mkpa gbee bụru ejo iwhe l'ẹnya Chileke.

16“Iwu ono, shi l'ẹka Mósisu mẹe okfu ndu nkfuchiru Chileke bẹ dụtakwaru jeye Jọnu baputizimu bya, eshi nkeshi ono b'e shi wata anọ arya ozhi-ọma ẹka Chileke bụ eze aryarya, onyenọnu l'adzọ ụzo abahụ iya. 17Ọle ọ ka ntse t'igwe gvụ alị agvụ, amamẹ l'akpụru okfu iwu ono nnanụ bụ iwhe mmaanụ.

18“Onye chịfuru nyee ya, je alụa nwanyị ọdo bẹ bụkwa ogori bẹ l'oori, onye lụkwanuru nwanyị ji iya chịfuru achịfu bụkwaruwho ogori bẹ l'oori.

Onye eze mẹe onye ụkpa

19“O nweru nwoke lanụ ọbu, barụ eze l'eyeje uwe, l'amashi ụma ike, ereshikwawho ire ike. Nwoke ono l'anọje eri g'ẹhu ha iya mbọku-mbọku. 20O nwekwaruwho onye ụkpa, ọnya l'aba, ẹwha iya bụ Lázarọsu l'adabujeru l'ọnoguzo onye eze ono. 21L'ọonoje agụ Lázarọsu nggẹ l'ọ dụkwanu g'e shi a nụ iya ụnwu onu nri, shi lẹ teburu nri onye eze ono dashịa tẹ ya rijianu ẹwho, ọwhu kanụ njọ bụru lẹ nkụta l'awụjeru bya anọdu amịcha iya ọnya ono.

22“A nọnyaa, onye ụkpa ono nwụhu, ndu ojozhi-imigwe kulia ya je edokube Ébirihamu l'imigwe. Onye eze whọ bya anwụhukwawho, e lia ya. 23Ọ nọdu l'alị-mma l'ẹka ọ nọdu eje iwhe-ọtsulanu whụa Ébirihamu l'ụzo otẹnya, whụkwaawho Lázarọsu g'ọ nọkube iya. 24O chishia sụ: ‘Nna MU Ébirihamu, t'imiko mu dụnu ghu! Zhinu Lázarọsu t'ọ tsẹe ọnunu mkpụshi-ẹka lẹ mini bya emee mu l'ire, t'ire jia mu oyi nkele mu nọ l'oke iwhe-ọtsulanu l'ọku-a!’

25“Ọle Ébirihamu sụru iya: ‘Nwa mu, nyatanụ lẹ gụbedua nteke ị nọ ndzụ b'i natakọtaru iwhe dụ ree nke ghu, o nokwawho gẹ Lázarọsu natakwarụwho ejo iwhe nteke ono. Ntaa bẹ ẹhu dụwa iya guu l'ẹka-a, gụbedua nọdukwanu l'oke iwhe-ọtsulanu. 26O noo dụ iya rọo adụ. O nweru oke ose, parụ ẹka dubutaru anyi l'unu, t'ọ bọ dụ onye l'a-dụ ike ghata shi l'ẹka anyi nọ bya ẹka unu nọ, tọ dụkwanu onye l'a-dụ ike shi ẹka unu nọ byakfuta anyi.’

27“Nwoke ono sụ iya: ‘Ọ dụ ree, eshi-ọwhu ọ dụ nno nna, byiko zhinu Lázarọsu ibe nna mu, 28o noo nkele mu nweru unwune nwoke ise; zhi iya t'o je anmaarụ whẹ ọkwa nggẹ whẹ ta abyakfuta mu l'ẹka-a, ejo iwhe-ọtsulanu-a dụ-a.’

29“Ébirihamu sụ iya: ‘Unwune ghu ọbu nweru ẹkwo Mósisu mẹe ẹkwo ndu nkfuchiru Chileke, tẹ whẹ nụje iwhe ndu onona l'ekfu.’

30“Ọ sụ iya: ‘Wawa nna mu Ébirihamu, ?t'ị madụ l'o -nweru onye shi l'ọnwu teta jekfu whẹ bẹ whẹ l'a-ka ọda onwowhe ụta, haa ome iwhe-dụ-ẹji whẹ l'emegbabe lwakfuta Chileke.’

31“Ébirihamu sụ iya: ‘Ọ -bụru lẹ whẹ ta anụdu olu-okfu Mósisu mẹe olu-okfu ndu nkfuchiru Chileke, o nokwawho gẹ whẹ l'ẹte ekwe; e -behuduru o nwegeeru onye shi l'ọnwu teta nọdu ndzụ.’ ”

Currently Selected:

Luku 16: Ezaa

Highlight

Copy