Luku 15

Atụru, a chọru achọ

(Mát. 18:12-14)

1Ọo ya bụ lẹ ndu akịriko mẹe ndu ọdo, vu ejo ẹwha akpụlitaderu ntse tẹ whẹ bya angabẹ nchị nụta iwhe Jisọsu l'ezhi. 2Ndu Fárisii mẹe ndu o-zhi-iwu dederu iya nwirinwiri sụ: “Ntaa bẹ nwoke-e l'anatajẹ ndu l'eme iwhe-dụ-ẹji whẹ l'iya atụko eri nri.” 3Jisọsu bya anmaarụ whẹ ẹtu-a sụ:

4“Ọ -bụru l'onye lanụ lẹ g'unu ha bẹ nweru atụru ụkporo ugbo ise, nnanụ tuwhahu, onye ọbu ?ta ahadụ ụkporo ugbo ẹno l'iri lẹ tete ndu ọwhuna l'echi-ẹgu, chọru nnanụ whọ tuwhahuru jeshia, chọo ya jeye nteke l'ọo-whụ iya? 5Nteke ọ whụleru iya whọ, ya apata iya tukobe l'ukuvu ete ẹswa ala. 6O -rwua uwhu, ya ekukoo ọnya iya whẹ mẹe obutobu iya whẹ sụ whẹ: ‘Unu bya etebude mu ẹswa-o; lẹ mu whụakwaru atụru mu-a shi tuwhahu nụ.’ 7Sụa, o noo gẹ oke ẹhu-ụtso l'a-dụ l'imigwe l'iswi ẹhu onye lanụ, l'eme iwhe-dụ-ẹji, darụ onwiya ụta haa ome iwhe-dụ-ẹji ono lwakfuta Chileke, amamẹ ụmadzu ụkporo ugbo ẹno l'iri lẹ tete bụkota ndu ọma, mkpa ọda onwowhe ụta, ghaa umere ta adụru whẹ.

Okpoga, a chọru achọ

8“Ọdo bụ ?ndẹnu nwanyị l'e-nwe shịru iri, shịru olu etuwhahu iya, t'ọ bọ nwụru ọku ye l'oryọku zakọta ụlo iya aza chọo ya jeye nteke l'ọo-whụ iya. 9Nteke ọ whụleru iya whọ, ya abya ekukoo ọnya iya whẹ mẹe obutobu iya whẹ sụ whẹ: ‘Unu bya etebude mu ẹswa lẹ mu whụwaru shịru olu mu-a, shi tuwhahu nụ-a.’ 10Sụa, o nokwawho gẹ ndu ojozhi-imigwe l'e-te ẹswa onye shi eme iwhe-dụ-ẹji, darụ onwiya ụta haa ome iwhe-dụ-ẹji ono lwakfuta Chileke.”

Nwata jewhuhuru ejewhuhu

11Jisọsu nmaarụ whẹ ẹtu ọdo sụ: “O nweru nwoke ọbu nwụtaru ụnwegirima unwoke labọ. 12Nke nwata nọnyaa, ọ bya asụ nna iya: ‘Nna, kee iwhe ghu nụ mu ọwhu rwuberu mu nụ.’ Nna whẹ ono bya ekekahuru whẹ iwhe g'iwhe ha, o nweru.

13“T'a nọhe iwhe barụ ishi, nke nwata ono tụtukobe iwhe lile o nweru palihu ije. Ọ tụgbua lashia ọha teru ẹnya, je anọdu l'ẹka ono kpakashigezhia okpoga iya lẹ ndzụ ọla l'iyi. 14Ọ kpakagelewho iwhe ono, a nụru iya, ejo mkpẹgu bya l'alị ono, ọ kpabalahaa nri akpaba. 15O kwe lakfushia onye lanụ lẹ ndu a nwụru anwụ l'alị ono. Onye ono zhi iya t'o jejeru iya ocheru ezhi l'ẹgu. 16Ẹgu gụta-be iya nke ọwhu l'ọoduje iya nke t'a sụ l'a nụru iya ẹgbo iwhe l'aawụshijeru ezhi ono, tẹ ya hata nụ tajia ẹwho, ọle ọ tọ dụdu onye l'anụje iyẹ ya.

17“Ọ bya ebe nteke a nọnyaaru, égò rwua ya ọhu ẹwho, ọ sụ: ‘?Ọ nụa ụmadzu ole l'ime ndu nna mu buru ozhi bẹ nweru nri nweru etsutsu iya, mu nọdu l'ẹka-a ẹgu l'abya mu egbugbu-a. 18Mu l'agbalihu jekfu nna mu je asụ iya: Nna, mu meswewaru Chileke, meswekwaa ghu whọ. 19Mu ta agbahẹkwa nke t'i ku mu nwa ghu ọdo. Meje mu gẹ l'iime ndu ono, i butaru ebuta whẹ l'ejeru ghu ozhi.’ 20Nwata ono gbalihu lakfushia nna iya.

“Ọ nọdukwaduro l'ẹka teru ẹnya, nna iya tụfu ẹnya whụa ya. Imiko nwa iya ono dụ iya. Ọ gbakfu iya je ebyita iya ọma tsutsua ya ọnu.

21“Nwata ono sụ iya: ‘Nna, mu meswekwaru Chileke, meswekwaawho gụbedua. Mu ta agbahẹkwa nke t'i ku mu nwa ghu ọdo.’

22“Nna iya ono sụlee ndu l'oozhije ozhi: ‘Unu chịfutanu uwe mkpẹelanu whọ bụ iya kakọta-gezhia ọma ụma bya eyee ya. Unu ewota echi bya agbabẹ iya l'ẹka. Unu eyee ya akpọkpa. 23Unu akpụta nwada-eswi ẹba dụ l'ẹhu gbua t'anyi ria swaa ẹswa nwata-a. 24O noo lẹ nwa mu-a nwụhuru anwụhu, ọle ntaa b'ọ bya anọ-duwhuwaa ndzụ azụ. O shi jewhuhu ejewhuhu, ọle ntaa b'a whụwaru iya.’ Whẹ wata ome ẹswa.

25“Nteke ono bẹ ọkpara nwoke ono nọ rọo l'ẹgu. Ọ lwarwudelewho uwhu ntse, ọ nụa ụda nkwa mẹe egvu, l'eete. 26Ọ bya ekua onye lanụ l'ime ndu nna iya l'ezhije ozhi sụ: ‘?Ọo gụnu bẹ l'eme l'ibe anyi?’ 27Onye ono sụ iya: ‘Ọo nwune ghu lwarụ, nna ghu gbua nwada-eswi ẹba dụ l'ẹhu nkele ọ whụ-whuru iya azụ lẹ ndzụ.’

28“Ẹhu ghulahaa ọkpara iya ono eghu, to kwehe bahụ l'uwhu. Nna iya jekfu iya je aryọo ya sụ iya t'ọ batarọ. 29Ọ sụ nna iya: ‘Leeda, mu shi jetaru ghu ozhi nkeshi awha bụ awha ole, tọ dụ iwhe i zhijeru mu ọwhu mu kụngajeru ọnu akụnga. Ọle ị tịki nụbukwaa mu t'ọ ka mma l'ọo mkpi tẹ mu lẹ ndu ọnya mu gude mee ẹswa. 30O be nteke nwa ghu ọwa lwarụ, onye jewaru je atụko iwhe ghu kpakaaru ụnwanyi ọkpara, ị kpụta eswi ẹba dụ gbuaru iya.’

31“Nna iya sụ iya: ‘Nwa mu ?ọ kwa lẹ mu lẹ ghu bupyabe ebupyabe, iwhe lile mu nwe enwe bụru ghu nwe iya. 32Ọo iwhe rwuberu anyi t'anyi mee ẹswa, t'ẹhu tsọ anyi ụtso nkele nwune ghu-a nwụhuru anwụhu, ọ bya anọdu-whu ndzụ azụ. O shi jewhuhu ejewhuhu, ọle ntaa b'a whụwaru iya.’ ”

Currently Selected:

Luku 15: Ezaa

Highlight

Copy