Jọnu 9

Jisọsu l'emeta nwoke, shi ọtso ishi l'ẹwho ne iya

1Jisọsu l'aghata ejekwaro ẹka l'ooje, ọ whụa nwoke ọbu, shi ọtso ishi l'ẹwho ne iya. 2Tọ dụ iya bụ lẹ ndu l'etso ụzo iya ajị Jisọsu sụ iya: “O-zhi-iwhe ?ọo onye mesweru? ?Ọo nwoke-e metaru iwhe-dụ-ẹji, tọo ndu nwụru iya nụ, mbụ kpatakwanụru iwhe a bya l'anwụdeshia ya, l'ọotsowaa ishi?”

3Jisọsu sụ whẹ: “Ọ tọ bụkwa lẹ nwoke-e mesweru, ndu nwụru iya nụ te emeswe, bẹ meru iwhe l'ọotso ishi. Iwhe kparụ iya nụ bụ t'e shichia l'ẹhu iya goshi g'ike Chileke l'erebe ire. 4Anyi jefutajekwa ozhi nke onye ono, bụ iya zhiru mụbe Jisọsu nteke iwhoro dụkwadu. O noo l'ẹnyashi l'abyawaa, nteke l'adụhee onye l'adụkwadu ike eje ozhi. 5Lẹ ntaa mu nọkwadu l'eli mgboko-o bẹ bụ mu bụ iwhoro nke ndu mgboko-o.”

6O kfugelewho iwhe ono, ọ gbụru ọnu-mini tọgbo l'alị, gude ọnu-mini ono gwọ-whube ẹja, meta ẹja ono tee nwoke ono l'ẹnya, 7sụ iya: “Tụgbua je aswaa iwhu l'okpuru Sayilówamu.” Iwhe Sayilówamu fụtaru bụ: “Onye e zhiru”. Ọo ya bụ, ọ tụgbua je aswaa iwhu l'okpuru ono. Ọ dawhushia azụ l'ọowhuwaa ụzo.

8Ndu obutobu ono mẹe ndu shi awhụje iya l'ẹka l'ọoryo aryọ jịlahaa sụ; “?Tọ bụnu-a nwoke-e shi anọduje l'alị aryọ aryọ-ọ?”

9Ndu sụ: “Ọ kwa iya-a!” Ndu sụ: “Ọo ejire, ọ tọ dụ iya, onye ọwa bụ onye shiru iya nụ.”

Nwoke ono sụ: “Ọ kwa mu-a-o!”

10Whẹ jị iya: “?Ndẹe g'e meru ị whụlahaa ụzo?”

11Ọ sụ whẹ: “Ọo nwoke ọbu, l'eeku Jisọsu gwọru ẹpoto tee mu l'ẹnya labọ, sụ mu tẹ mu tụgbua je aswaa iwhu lẹ Sayilówamu. Ọo ya bụ, mu tụgbua je aswaa iwhu, mu whụlahaa ụzo.”

12Whẹ jị iya: “?Ndẹe ẹka ọ nọ?”

Ọ sụ whẹ: “Mu ta amahẹkwa.”

Ndu Fárisii l'ajị onye ono, shi atsọ ishi ono ajị

13Whẹ duta nwoke ono, shi dụ mbụ atsọ ishi dukfuta ndu Fárisii. 14Mbọku ono, Jisọsu gwọru ẹpoto ono tee nwoke ono l'ẹnya ọ whụlahaa ụzo bẹ bụ mbọku ọtuta-ume. 15Ndu Fárisii bya ajịkwa nwoke ono ọdo t'ọ kọo g'o shiru ọ bụ l'ọ whụde ụzo. Ọ sụ whẹ: “O metaru ẹja tee mu l'ẹnya mu whẹ ẹbo, mu je aswaa iwhu, mu whụlahaa ụzo.”

16Ndu Fárisii harụ sụ: “Nwoke ono te eshikwa l'ẹka Chileke, nggẹ l'o shi l'ẹka Chileke mẹe ya edobejekwa nsọ, dụ lẹ mbọku ọtuta-ume.”

Ndu ọwhu sụ: “?Ndẹ-zhia g'onye l'eme iwhe-dụ-ẹji l'e-me emekota ẹgube iwhe-awhụrulenya ọwhu dụ-gee nno?” Whẹ bọkahu onwowhe ẹbo.

17A nọnyaa, ndu Fárisii ono bya ajịkwa nwoke ono ọdo sụ iya: “?Ndẹe ọnu ọwhu gụbedua yeru l'okfu ẹhu nwoke ono eshi-ọwhu ọ bụ iya meru ghu, ị whụlahaa ụzo?”

18Ndu Ju ono te ekwetadu ilile lẹ nwoke ono shi atsọ ishi, a bya emee ya, ọ whụlahaa ụzo ntaa, jeye nteke whẹ je ekua ndu nwụru nwoke ono, e meru ọ whụlahaa ụzo, 19jị whẹ: “?Ọo onye ọwa bụ nwa unu ọbu, unu shi sụ l'a bya l'anwụ-deshia, l'ọotsowaa ishi? ?Ndẹhunu g'e meru ọ bya awhụlahaa ụzo ntaa?”

20Ndu nwụru nwoke sụ: “Iwhe anyi mabeleruwho bụ l'onye-e bụ nwa anyi. Iwhe ọdo bụru l'o shi ọtso ishi l'ẹwho ne iya. 21G'e meru mee ọ bya awhụde ụzo ntaa bẹ anyi l'amahẹkwaa. Tọ hẹkwa l'anyi marụ onye ọbu, meru iya ọ whụlahaa ụzo. Unu jịtakwa iyẹ ya t'o kfua l'ọnu iya eshi-ọwhu ọgurenya iya dụwaa shii.” 22Iwhe ndu nwụru nwoke ono kwoberu kfua nno bụ lẹ whẹ l'atsụ ndu Ju egvu, o noo lẹ ndu Ju chịhawaru iya sụ l'ọ -bụ l'o nweru onye gude ọnu iya sụ l'edzudzu-ọha l'ọo Jisọsu bụ Kuráyisutu ọbu, whẹ ekefu onye ọbu l'oke, sụ t'o bọ batahẹkwa ụlo-ndzuko whẹ ọdo. 23O noo iwhe meru, ndu nwụru iya nụ sụ: “Unu jịtakwa iya, o meruroo ree, ọ bụwaru ọgurenya.”

24Ọo ya bụ, whẹ byakwa ekua nwoke ono, shi atsọ ishi nke ugbo labọ sụ iya: “Kwabẹ Chileke ugvu kfuaru anyi ire-lanụ, l'anyịbedua l'onwanyi bẹ makwarụ-a lẹ nwoke ono bụ onye l'eme iwhe-dụ-ẹji.”

25Nwoke ono sụ whẹ: “Ọ -bụru lẹ nwoke ono bụ onye l'eme iwhe-dụ-ẹji bẹ mu l'amakwaa, iwhe lanụ, mu ka ogude ẹka bụ lẹ mu shi atsọ ìshì, ọle ntaa bẹ mu l'awhụwaa ụzo.”

26Whẹ jị iya: “?Ndẹe g'o nwụru gụ l'iya? ?Ndẹe g'o meru mee ghu ọbu, ị whụlahaa ụzo?”

27Ọ sụ whẹ: “Ọ kwaa iwhe lanụ-a, mu kfuhawaru unu, unu te egbebe iya nchị. ?Unu kwoberu gụnu achọ tẹ mu kfua ya ọdo t'unu nụa? ?Unubẹdua l'achọfua t'unu bụru ndu l'etso ụzo iya?”

28Whẹ kpọderu iya iwhu sụ iya: “Ọ kwarọo gụbedua bụ onye l'etso ụzo iya, anyịbedua bụkwa ụzo Mósisu bẹ anyi l'etso. 29Ọ bụru Mósisu bẹ anyi marụ lẹ Chileke kfuru okfu nụ. Ọ bụru onye ọwa bẹ anyi l'ẹte amakwaa ẹka, o shi.”

30Nwoke ono, shi atsọ ishi bua sụ: “Ha-e! ?Ọ bụru gụnu? Ọ waa dụkwa mbẹdua biribiri! Unu ta amadụ ẹka, o shi, ọle o mewarunu mu saa ẹnya mu whẹ ẹbo whụlahaa ụzo. 31Iwhe doru ẹnya bụ lẹ Chileke ta angajẹduru ndu l'eme iwhe-dụ-ẹji nchị. Obekwanu l'onye bụa onye l'abarụ Chileke ẹja, eme iwhe dụ Chileke ono ree l'obu bẹ Chileke ono l'angajẹru nchị. 32Eshi nkeshi mgboko-o dụ bẹ l'ọ tọko dụbukwaa onye nụjeru l'ọ dụ onye mejeru onye shi l'ẹwho ne iya ọtso ishi, ọ bya awhụlahaa ụzo. 33Nggẹ l'ọo iwhe nwoke-e l'ete eshia Chileke l'ẹka, m'ọ tọ dụkwa iwhe ọ gọgo dụ ike mee.”

34Whẹ vụ iya pyịi; sụ iya: “?L'ịibya anyi ozhi iwhe lẹ gụbe onye ngụpyaberu ejo ememe l'ẹra?” Whẹ chịfu iya.

Ọtso ìshì nke ndu Fárisii

35Jisọsu nụa lẹ whẹ chịfuru nwoke ono, ọ bya eje achovu iya sụ iya: “I kweru nke Abụbu-Ndiwhe?”

36Nwoke ono sụ Jisọsu: “?Ọ hụnu onye bụ Abụbu-Ndiwhe ọbu? Kanụru mu iya nggẹ mu kweta nkiya.”

37Jisọsu sụ iya: “I gudekwa-a ẹnya ghu whụa onye ọbu. Mbụ ọ kwa iya l'ekfu eyeru ghu ntaa.”

38Nwoke ono sụ iya: “Oowo, Onye-Nwe-Ọha, lẹ mu kwetaakwaru.” Nwoke ono bya ebua iwhu l'alị baarụ iya ẹja.

39Jisọsu sụ iya: “Iwhe mu kwoberu bya l'eli-mgboko bụ tẹ mu kpee ikpe nke ọwhu ndu l'atsọ ishi l'a-whụlahaa ụzo, ndu l'awhụ ụzo ekpukota ishi.”

40Ndu Fárisii, harụ nọkube iya nụa iwhe ono, whẹ sụ iya: “?L'iikfu l'anyịbedua l'atsọfua ishi tọo gụnu?”

41Jisọsu sụ whẹ: “Nggẹ l'ọo iwhe l'unu l'atsọ ishi m'ọ tọ dụkwa iwhe-dụ-ẹji, gẹge adụ unu l'ẹhu. Obenu ntaa, unu sụru l'unu l'awhụ ụzo-ọ bẹ unu vukwawho iwhe-dụ-ẹji, unu metaru g'unu vu iya.”

Currently Selected:

Jọnu 9: Ezaa

Highlight

Copy