Ozhi ndu ishi-ozhi 8

1L'eegbu Sutívinu; Sọlu l'atụ l'ishi l'ishi.

Sọlu l'akpa chọchi ẹhu

O noo ya, e shilewho mbọku ono gẹdegede wata anọ akpa ndu chọchi ẹhu lẹ Jerúsalẹmu, akpashị whẹ iya ike. Ndu ono, kweru nu gẹ whẹ hakọta gbakashịhu, t'a gụfule iya whọ ọwhube ndụ-ishi-ozhi. Whẹ gbakashịhu dzuru alị Judíya mẹe alị Samériya. 2Unwoke ndu Chileke dụru lẹ nsọ harụ bya apata Sutívinu je elia, ryaa ẹkwa iya ryashịa ya ike.

3Sọlu kebelewho ẹhu ekebe eme tẹ ya gbukaa chọchi ọbu; o tsoru jewhelahaa l'uwhu l'uwhu, akpụko ụnwanyi mẹe unwoke achị eye l'ụlo mkpọro.

Fílipu gude ozhi-ọma rwua Samériya

4Ọo ya bụ, ndu ono, kweru nu ono, a chịkashiru, whẹ dzuru mgboko whubelewho iwhu ezhi ozhi-ọma nke Jisọsu. 5Fílipu jeshia mkpụkpu, dụ lẹ Samériya je ekfukashiaru iya ndu ẹka ono, l'ọo Jisọsu bụ Kuráyisutu ọbu, mbụ Onye Ndzọta, Chileke zhiru t'ọ bya. 6Ndu ẹka ono nụlewho iwhe l'ookfu, whụfuaro iwhe dụ biribiri l'oome l'ẹka, whẹ ngabẹkota iya nchị. 7Whẹ whụ lẹ ndu ejo-maa bu l'ẹhu, ha l'igweligwe bẹ ejo-maa ono l'anọje echikaa mkpu, afụtakaa l'ẹhu ndu ọbu. Whẹ whụkwaawho lẹ ndu iwhe lọnwushiru ibẹhu lanụ mẹe ndu ngvụru bẹ hakwawhọ l'igweligwe, o mekotagee whẹ, whẹ mehu. 8Ẹhu-ụtso tụko mkpụkpu ono dzuru.

9O nweru nwoke lanụ ọbu, bu lẹ mkpụkpu ono, ẹwha iya bụ Sáyịmonu. Sáyịmonu bụ onye l'ada lẹ mgbashị. L'ọonoje eme iwhe dụ-gee ndu Samériya biribiri. L'ọonoje ekfu lẹ ya ka igwe ka alị. 10Mkpụkpu ono l'owhu l'anọje awụ gidigidi awụ ejekfu iya: nwata mẹe ọgurenya. Whẹ sụ l'ọo ya bụ ike Chileke ono, l'eekuje Eze-Ike. 11Nwoke ono bẹ shiwaa nteke teru ẹnya gude ọda lẹ mgbashị meta amamanshi nke ọwhu onyenọnu tụkoru dobe iya l'ọkpobe madzụ. 12Ọo ya bụ, Fílipu byalẹwho bya ezhia whẹ ozhi-ọma nke l'ọo Chileke bụ eze mẹe l'ọo Jisọsu Kuráyisutu bụ Onye-Ndzọta, whẹ kweta. A tụko whẹ gẹ whẹ ha mekota baputizimu, unwoke mẹe ụnwanyi. 13Sáyịmonu l'onwiya kwetakwawho, e mee ya baputizimu. L'ọonokubejewaro Fílipu ntse. L'ọobuje ọ whụlewho iwhe-awhụrulenya, Fílipu l'emeshikaa, ya akpụbe iya ọnu okfu.

14Ndụ-ishi-ozhi ono, nọ lẹ Jerúsalẹmu nọdu l'ẹka ono nụa lẹ ndu Samériya bẹ natawaru okfu Chileke. Whẹ yefu Pyita yẹle Jọnu tẹ whẹ je ẹka ono. 15Whẹ rwua ẹka ono, whẹ kfuru nụ Chileke tẹ ndu wowaru onwowhe ye Jisọsu l'ẹka nata Ume-Dụ-Nsọ. 16O noo lẹ nteke ono bẹ bụkwadua l'ẹwha Onye-Nwe-Ọha, bụ Jisọsu b'e gudekwadu mee whẹ baputizimu. Ọ tọ dụdu gẹ whẹ ha m'ọo onye lanụ, natawaru Ume-Dụ-Nsọ. 17Ọo ya bụ, Pyita yẹle Jọnu bya abyabẹ whẹ ẹka l'ishi; whẹ nata Ume-Dụ-Nsọ.

18Sáyịmonu whụlewho lẹ Chileke bẹ nụru ndu ono Ume-Dụ-Nsọ gẹ ndụ-ishi-ozhi byabẹru whẹ ẹka l'ishi. O kweta Pyita yẹle Jọnu okpoga. 19Sụ: “Unu menua tẹ mu nweru ẹgube ike ono nke ọwhu bụ onye mu byabẹjeru ẹka l'ishi, onye ọbu anata Ume-Dụ-Nsọ.”

20Pyita sụ iya: “Tẹ gụ l'okpoga ghu ọbu lakwaa l'iyi! ?Ọo iwhe Chileke l'anụje ẹwoma b'i doberu sụ l'ii-gude okpoga zụta? 21Mẹ tị lịkwa l'ozhi-a, anyi l'eje ọwa, tọ hẹ l'ii-jebude iya anyi. O noo nkele obu ghu ta adụdu ree l'iwhu Chileke. 22Ọo ya bụ t'ị dakwawhọ onwoghu ụta l'ejo ọriri ono, l'ịiri. Ryọo Chileke t'a marụ ?l'ọo-gụru ghu nvụ l'ejo ọriri ono, ị rịru. 23O noo lẹ mu leru ghu ẹnya, marụ l'ọo ẹnya-kfụrukfuru bẹ gụ l'iya l'eme, tẹmenu ọ bụru ejo ememe, l'ịinoje eme bẹ keru ghu ẹgbu.”

24Sáyịmonu sụ Pyita whẹ: “Byiko t'unu kfuru nụ Chileke t'ọ bọ dụ iwhe ono, unu kfushiru nno, dụ ọwhu l'erwu mu l'ẹhu.”

25Ọo ya bụ, Pyita mẹe Jọnu gbagee ama iwhe Jisọsu meru; zhigee ozhi-ọma Chileke l'ẹka ono, whẹ dawhushia azụ lẹ Jerúsalẹmu. Whẹ l'ala; whẹ l'ezhi ozhi-ọma ono echi-ụzo echi-ụzo l'igweligwe mkpụkpu ndu Samériya.

Fílipu yẹle nwoke Itiyópiya

26Ọo ya bụ: ojozhi-imigwe, shi l'ẹka Onye-Nwe-Ọha bya asụ Fílipu: “Gbashi jeshia ụzo ọhuda. Tụgbu-zhiaruwho jeye gụ alụfu l'echi-ụzo ono, shi Jerúsalẹmu bya aghaja l'echi-ẹgu ẹka whọ ala Gaza.” 27Fílipu kwakọbe tụgburu jeshia. Ọ lụfulewho echi-ụzo ono; ọ whụa onye Itiyópiya, a harụ aha, kwatarụ bụru eze madzụ. Ọo ya bẹ l'eletaru Kandési, bụ eze-nwanyị Itiyópiya ẹnya l'ẹku iya g'ọ ha. O shikwanu jee ọbaru Chileke ẹja lẹ Jerúsalẹmu. 28Ọ nọdu l'ime ụgbo-ịnya iya ala ibe iya. Ọ nọdu l'ime ụgbo-ịnya ono agụ okfu Chileke l'ẹkwo Ayizáya, onye nkfuchiru Chileke deru. 29Ume Chileke sụ Fílipu t'o jekube ụgbo-ịnya ono je anọkube iya ntse. 30Fílipu jekube iya bya nụa gẹ l'ọogu ẹkwo Ayizáya, onye nkfuchiru Chileke, ọ sụ iya: “?O doru ghu-a ẹnya mbụ iwhe l'ịigu?”

31Nwoke ono sụ iya: “?Ndẹhunu gẹ l'oo-shi doo mu ẹnya m'ọ -dụa onye zhiru mu iya?” Ọ sụ Fílipu t'o nyibata bya tẹ yẹle iya nọdu l'ime ụgbo-ịnya ono. 32Ẹka ọbu l'ọogu l'ẹkwo Okfu Chileke bụ ẹka Ayizáya deru sụ:

“Onye ono dụ g'ọo atụru, a kpụ eje egbugbu,

o nọo nwandoo g'ọo atụru, l'eebyishi ẹji,

to kfu m'ọo akpụru-okfu lanụ.

33E meru iya iwhe iwhere, nma iya ikpe ịnyigirinyi.

?Ọo onye l'a-tụkota ọnu ẹpa iya?

O noo l'a kpokwofuru ndzụ iya

akpokwofu lẹ mgboko-o.”

34Nwoke ono sụ Fílipu: “Byiko, mu sụru: ?Ọo onye bẹ onye nkfuchiru Chileke ono l'ekfuru? ?Ọo okfu ẹhu nkiya bẹ l'ookfu, tọo okfu ẹhu onye ọdo?” 35Fílipu bya awata iya ozhi iwhe. O shilewho lẹ nwa ẹnyoru ẹka ono, l'ọogu wata iya ozhi ozhi-ọma nke Jisọsu. 36Whẹ jenyaa, whẹ rwua ẹka-mini dụ. Nwoke ono sụ: “Lee mini ndọwa. ?Ọo gụnu l'akpọshikwadu t'i bi me mu baputizimu l'ẹka-a?” 37Fílipu sụ iya: “I -gudewaa obu ghu g'ọ ha kweta bẹ l'eemekwa ghu-a baputizimu.” Ọ sụ iya: “Ee! Mu kwetawaru lẹ Jisọsu Kuráyisutu bụ Nwa Chileke.”#8:37 Ọwhu, e deru l'okfu Giríku, gbarụ lẹ mbụ te eyekobekwa iya vẹsu 37. Ọle anyịbedua tsoru ndu ọwhu yekoberu iya nụ ye iya lẹ nke anyi.

38Nwoke ono sụ t'onye l'anga ụgbo-ịnya ono kfụshi, ọ kfụshi. Fílipu yẹle nwoke ono lịru bya atụko bahụ lẹ mini. Fílipu mee ya baputizimu. 39Whẹ lụfutalewho lẹ mini ono, Ume Onye-Nwe-Ọha mee Fílipu: o mihu, nwoke ono ta awhụhe iya. Onye Itiyópiya ono tụgbua lashia iwhe o shi, ẹhu l'atsọ iya ụtso gẹ l'ọola. 40Ẹka a whụwaruroo Fílipu ọdo bụwaruro lẹ Azótọsu. O kfukota okfu Chileke l'iwhe bụ ẹka, ọ ghataru jeye nteke o rwuru Sizaríya.

Currently Selected:

Ozhi ndu ishi-ozhi 8: Ezaa

Highlight

Copy