Zɛkarya 4
4
Pyɛ ye netungun: Pyɛ tikîs bekywa-kya na batîn pat
1Tom-lagwi de a dopse misang a me pyɛ́ mo a to vey, ko a shina me sede mwat de a kana sê nevwa. 2A rangal me, a ye, “Hwà di sɛ́ arɛt?”
Ko ma toyo a yɛ, ma ye, “Ma di pyɛ tikîs bekywa-kya de ba yong na dyam shinang zɔng. Ya vɔk keshi kemo de bé tɛ̀sɛ ɛ něy e ra rak o. Bekywa-kya ba sé betaama e ra kwɔ̂n tikîs bekywa-kya mo, ko kagwɛ kywa-kya gwa vɔk nekwɔn tɛ́sɛ kya netaama. 3Batîn cɔ́gɔt pwat baba ba sé e hagât pyɛ tikîs kywa-kya mo, rining e karɛ hagat o.” 4Ma hwo rangâl tom o, ma ye, “À da, pyɛ́ yemo ya dura sɛ́ arɛt?”
5Ko a rangal me, a ye, “Hwà tɔk wɛt a?”
Ma ye, “Wey, à da.”
6A yang me, “Hâ Dagwi Darwey, Dâ Jey Mwa, a hemo vɔk na Zɛrubabɛl: Hwà rɔda di wɛng yi na gap kɛ reto mō wɛt, ko yi na Gabik hom. 7Pyɛ́ de yê dul o yê tɔk se sede gwogbɔng gworaku e nuyel mō, ko ma rɔda gang yɛ e jey. Hwà rɔda tɛ̀ gwofwa de gwa bang rà rak Gbɔng Duk Re Fongol, ko ba rɔda gbɔ na yey pyɛng yaga gwɛ.”
8Dagwi Darwey a to ha na me, a ye, 9“Zɛrubabɛl a ga bomo retîs Gbɔng Duk womo, ko e yɛ wɛ de a rɔda tala fwom o. Jeng de pyɛ yemo yê té, ko yin a rɔda tɔk, e Dagwi Darwey, Dâ Jey Mwa, de a tomo me vey na yin. 10Bemat de ba byɛs tuk de be ra pyɛ́ shɛl o, ba rɔda vɔk yey pyɛng, ko ba rɔda di gwofwa de ba kasa e vwɔ Zɛrubabɛl.
“Bekywa-kya betaama mo ba sé e tô bayis hom, bayîs Dagwi Darwey, vemo de be bɛrɛng jey mwa.”
11Ma to rangal tom-lagwi, ma ye, “E sɛ́ a cap batîn pat baba vemo de ba sé e bahagat baba vê kwɔn tikîs bekywa-kya mo arɛt? 12Ko nelang pwat neba nemo de na sé e bahagât befɛ̂ng dyam shinang baba de něy ne nunus ɛ, cap nɛ a sɛ́ ɛ?”
13Ko a rangal me, a ye, “Hwà tɔk wɛt a?”
Ma toyo mɛ, ma ye, “Wey, à da.”
14Ko a yang me, “Yɛn vɛ à bemat beba de Dagwi a ga kasa, a ga mɔmɔ hɛn na něy, na be ra a yɛ fwom, yɛ Darwêy jey mwa.”
Currently Selected:
Zɛkarya 4: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
