Zɛkarya 3
3
Pyɛ ye nenaas: Yɔshuwa na Shetan
1Ba to dura a me pyɛ mo cak na negwi-ywey: Yɛ a Yɔshuwa, darwêy bepiris, a tumal e nuyel tom-lagwi Dagwi Darwey, ko Shetan a tumal e vwɔ yegê Yɔshuwa mo, a ga yóng ɛ, na a tɛ̀ sekun mɛ. 2Ko Dagwi Darwey a hwo yâng Shetan, “À Shetan, ma kyɛ́ me nà sey sekun mō. Ma ga kasa Yɛrusalɛm, ko ma ga sey mwat womo sede cɔgɔt de ba hwɔltɔ yi e ji kya.”
3Ko di, Yɔshuwa mo á sè e tumal e hwomo, na berugu de bá sè gbiridik. 4Tom-lagwi o a hwo yâng bemât sɛlɛ mɛ, be paa berugu de a tɛ̀. Ko a yâng Yɔshuwa, “Ma ga pat banɛn mō, ko ma rɔda nɔng o berugu bepas na hwo tɛ̀.”
5Ko ma yang ɛn, kɛ yɛn ê gyiri a Yɔshuwa kpin de wa sé haalal e rato mɛ bɛ. Yɛn a ra ano, ko yɛn a tɛ̀ a yɛ berugû fwom bepas, ko tom-lagwi wo Dagwi Darwey á sè e tumal e hwomo.
6E bama mo, tom-lagwi a yâng Yɔshuwa wɔgɔ, 7Dagwi Darwey, Dâ Jey Mwa, a ye, “Ka sede hwà gyeng badu hom, na hwo ra tom de ma nɔng o, ko ma rɔda nɔng o nedirîk Gbɔng Duk Re a me Fongol na nelalâ wɛ. Ko hwà rɔda tɔk sè e ji betom-lagwi de ba sé e nuyel hom. 8Yaga ano, à Yɔshuwa, hwo de hwà sé darwêy bepiris hom, na yin besâ fwom mɛ, bepiris, wet in betong. Yin a sé pyɛ̂ dura yê pyɛ́ de ye kyè vey. Ma rɔda vey na mwât fwom hom de be tang ɛ à Lang!
9“Ma sé tik fwa gwining de gwa vɔk bebak betaama e nuyêl Yɔshuwa. Ma rɔda jining jɔt e ra gwɛ, ko ma rɔda hashe banɛ̂n vwel hemo tuk hining. Me, Dagwi Darwey, Dâ Jey Mwa, ma ha ano. 10Jeng de tuk o ha rɔda pom, yin a rɔda sangal tyang, kawɛ e ji min a rɔda rini mwât vwara mɛ, ko yin ê re nèy batîn anap na regwi min.”
Currently Selected:
Zɛkarya 3: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
