Zɛkarya 1

Dagwi Darwey a yâng bemat mɛ, be toyo vey na yɛ

1E pwɛl gwô rwit gwô shey hê neba de Dariyus á sè Da vwel Pɛrsya, Dagwi Darwey a ha na Zɛkarya hwêy Bɛrɛkya hwêy Ido, zarap mɛ. 2-3A yang ɛ, a ha a BeYuda ngan: “Me, Dagwi Darwey, Dâ Jey Mwa, má vɔk shom sizɔng na bedabeda min. Ko a remo, ma sé yang in, yin toyo vey na me, ko me arɔng ma rɔda toyo vey na yin. 4Yin raa begwong bedabeda min wɛt. Raane, bezarap hom bá ha a yɛn ha hom wɔgɔ, yɛn a doyo yi e neves mɛn, na yɛn a tik ragas neves. Ko yɛn á wɛt betong na ha hom, kɛ yɛn á gyeng hɛ wɛt. 5Bedabeda min o a vɛ a remo ɛ? Bezarap vane mo ba ka nàra gbak-gbak arɔng wɛt. 6Ko neha ná tusa de ma ha yi e nû bezarap hom na ga sila hɛn na bedabeda min. Yi ano, yɛn á doyo yi e banɛn mɛn, ko yɛn á ha wɔgɔ, Dagwi Darwey, Dâ Jey Mwa, a ga tabak hɛn tyɛng na neves de yɛn a ga ra, sede remo de a ga tɛ̀ e yey mɛ, na a ra a yɛn.”

Zɛkarya a di pyɛ́ detidetu na negwi-ywey

(1:7—6:8)

Pyɛ ye mɛsɛng o: Bemât bedwa

7-8E tuk hê kuru baba na hɛ naas (24) hê pwɛl Shebat, gwɛ a pwɛl gwô kuru na gwɛ gwining, Dagwi Darwey a ha na me na negwi-ywey nabwalak. Ma di mwat hwak e ra dwa de wa sé zà swinang. A sé tumal e batîn gbirin bahak e ji nɛk, ko e bama mɛ, bemât bedwa behak bá sè arɔng, ko bùm bedwa mo bá se zà swinang, na zà, tanga rɔgɔ. 9Ma rangal tom-lagwi de a dopse misang a me pyɛ́ de me bɛrɛng, ma ye, “À da, e beva a bemât bedwa vemo ɛ?”

Ko a yang me, “Mê ha a hwo.”

10Ko mwat de a sé tumal e batîn gbirin o, a toyo a me, a ye, “A sé e vɛ de Dagwi Darwey a tomo, na be di pyɛ́ de ya sé kyě té e jey.”

11Ko bemât bedwa mo ba ha na tom-lagwî Dagwi Darwey de a sé tumal e batîn gbirin o ba ye, “Wot a ga wɔ̀ di pyɛ́ de ya sé kyě té e jey o, ko di, jey o mwa ya sé yuu-yuu.”

12Ko tom-lagwi o a yâng Dagwi Darwey, “A Dâ Jey Mwa, hwà ga ra shom na Yɛrusalɛm tanga bwang bapomô Yuda neshey kuru bataama (70) a remo. Ê to gwɛ̌ ros e rɛ̌, na hwo wok nemwishish mɛn arɛt?”

13Dagwi Darwey a toyo a tom-lagwi de a dopse misang a me pyɛ́ mo na neha nerat de na wɔrɔk hɛ. 14Ko tom o a yang me, me shara ha de Dagwi Darwey, Dâ Jey Mwa a ye: “Ma tɛ̀ yey ding-ding na repomô Yɛrusalɛm, rɛ a Siyɔn, ko ra sé e yey hom kayɛ jeng. 15Ma ra shom na yére bemât jey jeng tyɔng, ko a remo ya ga sogo sizɔng. Yɛn á tak a bemat hom na neves de na dal pyɛ de ma kana bare, ko ra ano mo ha ka bɔrɔk hɛn wɛt. 16Yaga ano, ma toyo na me wok nemwishish Yɛrusalɛm. Ba rɔda yong Gbɔng Duk Re a me Fongol, na be to lɔk gbɔng repomo mo arɔng. Me, Dagwi Darwey, Dâ Jêy Mwa, ma ha ano.”

17Tom-lagwi o a to yang me, me shara ha hemo ngan: “Dagwi Darwey, Dâ Jêy Mwa a ye, Bapomô bemat hom ba rɔda to sila na pyɛ̂ nedanerey. Yɛrusalɛm, wa rɔda to tɛ́ ɛ repomo hom, ko ma rɔda wɔrɔk bemat Siyɔn.”

Pyɛ ye neba: Ngɛngɛ naas

18E bama mo ma di ngɛngɛ naas. 19Ma hwo rangâl tom-lagwi de e dopse misang a me pyɛ́ mo, ma yang ɛ, “Cap vɛ ya sé sɛ́ ɛ?” A toyo a me, a ye, “Ya sé e tô yére bemât jey de ya kana shara BeYuda na BeIsrayɛl tanga bemât Yɛrusalɛm.”

20Ko Dagwi Darwey a dura a me bezu benaas. 21Ko ma rangal hɛ, ma ye, “Ba vey ra sɛ́ arɛt?”

A toyo a me, a ye, “Ba vey, na be tɛ̀ a yére bemât jey o bengyip tyɔng wɛt, yaga ya kana re BeYuda mo na como vit, ya shara hɛn. Bezu mo ba rɔda wey na yɛ.”

Currently Selected:

Zɛkarya 1: bomBI

Highlight

Copy