Markus 16

Sene Yɛsu yi e reku

(Mat 28:1-8; Luk 24:1-12; Yoh 20:1-10)

1Sede Tuk Shábat ha ga kwey, Marya wo Magdala, na Marya nêng Yakɔp, tanga Salome ba sey behal nesang nerat, na yɛn a wɔ̀ mɔmɔ mɛ̀ revîn Yɛsu. 2Bop-bop nagasi tûk mɛsɛng e ji sati mo, yɛn a sogo vɔk e sak o, ko yɛn a wɔ̀ wul e hwomo jeng de gwi gwa ga nusu. 3E gwong, yɛn a ha na bemɛn, ba ye, “Wà a rɔda biring a wot gwofwa mo yi e rwi sak o arɛt?” 4Yaga gwofwa mo gwa sé gworwey o. Ko sede yɛn a ye ganga, yɛn a di ba ga kana biring gwofwa mo vɔk e vwara. 5Jeng de yɛn a yel e ji sak o, yɛn a di wen hwak de a tɛ̀ gworugu gwopwɛng, a sé e sangal e vwɔ yege, ko yɛn a ye lot.

6A yang ɛn, “Yin kwon ye lot wɛt! Yin a sé jāma Yɛsu wo Nazarɛt de bá kak ɛ e ra cɔ́gɔt. A sé e ngamo wɛt! Ba ga sene hɛ yi e reku! Di in, kwɔn a hemo de bá lasha hɛ ɛ̀. 7Ko kyè in a remo kwong, na yin a wɔ̀ ha a bemât masâ fwom mɛ tanga Bitrus há hemo: ‘A sé tānga kyè vɔk e sevwêl Galili, na a wɔ̀ gyeng in. Yin a rɔda di ɛ e hwomo, sede remo de á kana ha a yin.’ ”

8Beha mo ba vow na bengyip, ko a sé a yɛn kpɛɛ. Yɛn a nusu yi e sak o, ko yɛn a tele. Yɛn a ha a mwat hwak pyɛ cak wɛt, yaga yɛn a wok bengyip.

[Bebok-basa beroso behak ba vɔk nelang o ne 9-20 wɛt.]

Yɛsu a dura a Marya wo Magdala tó mɛ

(Mat 28:9-10; Yoh 20:11-18)

9E bama de Yɛsu a sene yi e reku, bop nagasi tûk mɛsɛng e ji sati mo, a tānga dura a Marya wo Magdala tó mɛ. E yɛ de Yɛsu á kana paa cēng tyaama e rebek mɛ. 10A kyè, ko a wɔ̀ ha a vemo de bá kana sè tanga Yɛsu. A pom, a sɛ̀ ɛn e de lashê yey, ko ba sé tosho arɔng. 11Mwa ano de yɛn a wok Marya a ye, Yɛsu a sé na neken, ko yɛ a ga di ɛ, yɛn a sey tsak o na há mɛ wɛt.

Yɛsu a dura a bemât masâ fwom mɛ beba tó mɛ

(Luk 24:13-35)

12E bama mo, Yɛsu a dura tó mɛ e gwong hwak detu na bemât masâ fwom mɛ beba e jeng de yɛn a sé e gwong vɔk e nebapomô hey. 13Yɛn a to ɛn vɔk e Yɛrusalɛm, ba wɔ̀ ha a bwang bemɛn, ko yɛn arɔng, yɛn a sey tsak o na há mɛn wɛt.

Yɛsu a dura a bemât masâ fwom mɛ kuru na wɛ gwining tó mɛ

(Mat 28:16-20; Luk 24:36-49; Yoh 20:19-23; T.B.Yɛsu 1:6-8)

14E tala mo, Yɛsu a dura a bemât masâ fwom mɛ kuru na wɛ gwining tó mɛ e jeng de yɛn a sé re pyɛ́. A hwo gyong ɛn, yaga yɛn a sey tsak o wɛt, yaga yɛn a tɛ̀ neyey mɛn kashalang, ko yɛn a kyɛ́ ɛn nà sey tsak o na hâ vemo de ba ga di ɛ e bama de a sene yi e reku. 15Ko a yang ɛn, “Kyè in vɔk e kahɛ kwɔn e ji jey, na yin a shara a yére bemasî mwa Yɛgɛt Yat. 16Kawɛ mwat de a sey tsak o, ko be tɛ̀ a yɛ batisma, ba rɔda sey neken mɛ. Ko kawɛ mwat de a sey tsak o wɛt, ba rɔda gang ɛ na shɔt. 17Ba rɔda tɔk vemo de ba sey tsak o yi e râ pyɛ́ yemo ngan: Yɛn a rɔda paa cēng e ji reza hom, ko yɛn a rɔda ha balem baduk. 18Ka sede yɛn a hashe begwɔ̄m kɛ ba sɔ nedɔm, ko pyɛ́ mo ya rɔda mǎ hɛn ko tyɔng wɛt. Yɛn a rɔda tɛ̀ vɔ mɛn e ra bemât serɔ, ko ba rɔda tɛ̀ tyang.”

Ba jut Yɛsu vɔk e lagwi

(Luk 24:50-53; T.B.Yɛsu 1:9-11)

19Bama de Darwey Yɛsu a ha na bemât masâ fwom mɛ, ba jut ɛ vɔk e lagwi, ko a sangal e vwɔ yegê Dagwi. 20E tala mo, bemat mɛ mo ba gasang hɛn, na be kyě shara rehâ Dagwi e kahɛ kwɔn, ko Darwey a sɛlsɛ hɛn. A dura a bemat wɔgɔ, reha de bemât masâ fwom mɛ mo ba kyě shara ra sé tsak o; a dura ano yi e pyɛ̂ bes de yɛn a ra.

Currently Selected:

Markus 16: bomBI

Highlight

Copy