Susumo 45

1Yɔsɛf a tɔk to niri wɛt. A nɔng nu, na mwa BeMisra be nusu. Yi ano, mwat duk hwak á sɛ̀ wɛt, jeng de a ha a begwa mɛ mwat de yɛ a sé. 2A hwo tosho na gbɔng fwɔ, ko BeMisra ba tɔk wok, ko ha mo ha wɔ̀ wul lɔ Farawo. 3Yɔsɛf a yâng begwa mɛ, “Me wɛ a Yɔsɛf! Da hom a rɔngɔl kwen arɛt?” Ko begwa mɛ ba ye lot, yɛn a tɔk toyo a yɛ na ha wɛt.

4Yɔsɛf a yang ɛn, “Gwɛ̌ sek in bagat vey na me.” Ko jeng de ba gwɛ̌ sek, a to ye, “Ma sé gwà min Yɔsɛf, de yin a kana row vɔk e Misra! 5A remo, yin kwon beseng neyey min wɛt, yin tɛ̀ a bato min ɛ nɛ̂n row me vey e ngamo wɛt. A sé e Dagwi de a ga tomo me e nuyel min vey e ngamo e Misra, na a sey mɛ̀ nekên bemat. 6Shey hê neba a hemo de vyong ya sé e vwel o, ko bwâng neshey netungun de vit a how cap, vit a bwal. 7Dagwi a tomo me e nuyel min, yaga na a sey neken min e gwong gwô langat gwomo, yaga na yére min ye re nuyel na sangal e jey. 8Ko di, mwin a sé e yin de yin a tomo me vey e ngamo wɛt, ko e Dagwi wɛ. A ga tɛ̀ me da na Farawo, a tik lɔ mɛ e vwɔ hom, ko a tɛ̀, ma sé re negwɔm e ra mwa sevwêl Misra. 9To in ziri vɔk na da hom, na yin yang ɛ, a wok pyɛ de hwey mɛ Yɔsɛf ha ha a yɛ: ‘Dagwi a ga tɛ̀, ma sé re negwɔm mwâ sevwêl Misra. Vèy na me, hwo lashe jeng wɛt! 10Hwo vɔk ɛ nèy mō, na nèy nèy mō, na karâ vyēl tanga berɔndɔng mō, tanga pyɛ̂ mwa de ya sé myo. Hwà rɔda sangal e bak vwêl Gɔshɛn, kwɔn de hwô sè bagat na me. 11E hwomo de ma rɔda nɔngɔs hin pyɛ́ yaga bwâng neshey netungun ne vyong de na rɔngɔl. Yi ano, hwo, na belɔ mō mwa, tanga yas min, yin a rɔda bidɛ pyɛ cak wɛt.’ ”

12Yɔsɛf a re nuyel, a yâng begwa mɛ, “A remo yin a ga di na bayis min, Bɛnyamin arɔng a ga di, a sé e me de ma sé ha na yin. 13Há in a da hom e ra gbɔng nerey de ma vɔk e Misra, na pyɛ̂ mwa de yin a ga di. Ko ra in ziri, na yin vey na da hom e ngamo!”

14Ko a kula gwà mɛ Bɛnyamin e gey, ko a tosho, Bɛnyamin arɔng a tosho. 15A man ranang na begwa mɛ mwa, a sè tosho. Jeng a yane zɔng de begwa mɛ ba tɔk ha na yɛ.

16Reha mo ra wɔ̀ wul e lɔ Farawo wɔgɔ, begwa Yɔsɛf ba ga vey. Yey Farawo tanga bemât badu mɛ ya pɛngɛ sizɔng. 17Ko Farawo a tomo, be wɔ yila Yɔsɛf, a yang ɛ, “Há a begwa mō, be tɛ̀ a bemadung mɛn pyɛ́, na yɛn a kyè a remo vɔk e sevwêl Kanaan. 18Tik na yɛn a jut da mɛn tanga belɔ mɛn mwa, yɛn kyè vey na me, ma rɔda nɔ́ng ɛn bak vwel de wa dal na nerat e Misra, yɛn a rɔda re netâ vwel o. 19To ha a yɛn, be jut bekyɛkyɛ̂ behywarak yi e ngamo yaga jût nèy tanga beha mɛn, yɛn a vey na yɛn e ngamo tanga da mɛn. 20Yɛn a re yɔ̂m vey na pyɛ́ mɛn wɛt, yaga pyɛ́ de ya dal na nerat mwa e vwêl Misra yê tɛ́ ɛ myɛn.”

21Nèy Yakɔp na ra tyɛng ano. Yɔsɛf a nɔng ɛn bekyɛkyɛ, sede remo de Farawo a nɔng ɛ nu, ko a nɔng ɛn pyɛ̂ re yaga gwong. 22A nɔ̂ng kawɛ e ji mɛn gworugu de e tɔrɔ hɛ mɛ, ko a nɔ̂ng Bɛnyamin dyām pyɛng naga betat (300) tanga berugû tɔrɔ hɛ betungun. 23Ko a tomo a da mɛ na pyɛ́ yet ngan: Bemadung kuru de ba tɛ̀ a vɛ pyɛ́ ryat yê Misra, tanga shêp madung kuru de ba tɛ̀ a yɛ ɛ̀ pyɛ̂ yéneng, na kpam-tuk, na pyɛ̂ re cak yaga gwong. 24Sede a tɛ̀ begwa mɛ e gwong, a yang ɛn, “Yin tow nu na bemin e gwong wɛt.”

25Yɛn a sogo yi e Misra, ba kyè, ba wɔ̀ wul na da mɛn Yakɔp e sevwêl Kanaan. 26Ko ba ha a yɛ, “Yɔsɛf a sé kwen! E yɛ de a sé re negwɔm mwâ sevwêl Misra!” Nemi na ga a yɛ e yey, ko a sey tsak o wɛt. 27E bama de ba misang a yɛ mwa pyɛ́ de Yɔsɛf a ha a yɛn, ko a di bekyɛkyɛ de Yɔsɛf a tomo na be jut ɛ mɛ vɔk na yɛ, a yang ɛ hagalak. 28A ye, “Hwey hom Yɔsɛf ha sé na neken! Ma rɔda kyè, na me wɔ̀ di ɛ gyam na me de ku!”

Currently Selected:

Susumo 45: bomBI

Highlight

Copy