Susumo 41

Yɔsɛf a há a Farawo cap-hâ negwi

1E bamâ neshey neba, Farawo a ranas negwi: a sé e tumal e kwogôm Gwɔrɔt Nil, 2ko di, berɔndɔng betaama berat vê mɔsɔ de ba sé biring-biring ba nusu, ba sé re sehwey e ji sere. 3Ko behak à berɔndɔng o betaama ba to nusu yi e ji gwɔrɔt o, ba sé gwɔshɔk, ngangajang, beves e bɛrɛng, ko ba tumal e hagat na vane de ba kana sé e tumal e kwogom. 4Ko di, berɔndɔng beves vane mo de ba sé gwɔshɔk ba re berat o mo de ba mɔsɔ. Ko Farawo a sene.

5Nevwa na to vo ɛ, a to ranas negwi ne neba: batô alkama bataama ba nusu e gbɛrɛng gwining, wa mara naka, wa sé gwim-gwim. 6E bamâ vɛ, bahak bataama ba nusu bagat na vere mo, ko neto mo na sé byaasas, na ga nɔshɔl yaga gul-rak de gwa pɛsɛl nɛ. 7Nè byaasas o na wɔlɔk batô alkama bataama de wa mara naka, de wa sé gwim-gwim. Ko Farawo a sene, ko sɛ̌ e negwi à nɛ.

8Nusu gasi, yey mɛ ya bɔrɔk hɛ, ko a tomo be wɔ̀ yishi mwa bevwoshon tanga bemât netsitsɛ̂ng Misra, a ha a yɛn negwi o, ko vit a hwak de a tɔk ha a yɛ cap-ha mo.

9Ko mwât nɔngɔs nshî sɔ a yâng Farawo, “À darwey, yunung ma rɔda kulu pyɛ́ vyes hom. 10Jeng de hwà kana tɛ̀ shom na me na mwât nuyêl bemât kyerês pyɛ́, ko hwà tɛ̀ ot e lɔ̂ ngyang de ha sé e lɔ̂ mwât nuyêl bemât gyeng lɔ mō. 11Wot a ranas negwi e ji turuk hining o, kawɛ na nemɛ na yerê cap-ha nɛ. 12Wen BeIbrani hwak á sè tanga wot e hwomo, yɛ á sè sam mwât nuyêl bemât gyeng lɔ mō. Jeng de wot a ha a yɛ negwi mot, a misang a kawɛ cap-hâ negwi o nemɛ. 13Ko sede remo de a misang a wot cap-ha mo, ano de pyɛ́ mo ya ba tɛ́ ɛ. Me, ba toyo na me e fwom hom, ko gwining o ba wey na yɛ.”

14Yi ano, Farawo a tomo be wɔ̀ yila Yɔsɛf, ko ba pat ɛ ziri yi e duk ngyang. Ba hwon ɛ, a sege berugu mɛ, a vey e nuyêl Farawo. 15Ko Farawo a yâng Yɔsɛf, “Ma ranas negwi, ko vit a mwat de a tɔk ha a me cap-hâ negwi o. Ko ma wok ka sede hwà wok negwi, hwó tɔk misang cap-ha mo.”

16Yɔsɛf a toyo a yɛ, a ye, “À darwey, a sé e me wɛt, e Dagwi zɔng de a tɔk ra ano! E yɛ wɛ e dura a hwo nerat mɛ.”

17Ano kwong, Farawo a yâng Yɔsɛf, “E ji negwi hom, ma sé e tumal e kwogôm Gwɔrɔt Nil. 18Ko di, berɔndɔng betaama berat vê mɔsɔ de ba sé biring-biring ba nusu, bá sè re sehwey e ji sere. 19Ko behak à berɔndɔng o betaama ba to nusu arɔng de ba gyɔt, ba sé gwɔshɔk, ngangajang, beves e bɛrɛng, ma ga sang di yere mo ano e ji mwa sevwêl Misra wɛt. 20Ko di, berɔndɔng beves vê gyɔt vane mo ba re betaama vê mɛsɛng o de ba mɔsɔ naka. 21Ko e bama de ba tala rê vɛ, mwat a ka tɔk, ba ga re pyɛ wɛt, yaga vit a sege hak na jeng de bá kana sè. Ko ma sene. 22E negwi mo nehak, ma di batô alkama bataama ba nusu e gbɛrɛng gwining o, wa mara naka, wa sé gwim-gwim. 23E bamâ vɛ bahak bataama ba nusu bagat na vere mo, ko neto mo na sé byaasas, na ga nɔshɔl yaga gul-rak de gwa pɛsɛl nɛ. 24Nè byaasas o na wɔlɔk batô alkama bataama barat o mo. Ma ga há a bevwoshon negwi hom, ko vit a hwak e ji mɛn de a tɔk nɔng me cap-hâ nɛ.”

25Yɔsɛf a yâng Farawo, “À darwey, negwi neba mō mo na sé pyɛ jining o. Dagwi a dura a hwo pyɛ de a sé kyè wɔ̀ ra. 26Berɔndɔng betaama berat o ba sé neshey netaama; batô alkama bataama barat o arɔng ba sé neshey netaama, cap-ha mo ya sé pyɛ jining o. 27Berɔndɔng betaama vê gyɔt, beves e bɛrɛng, de ba nusu e bama, ba sé neshey netaama; tyɛng ano na neto alkama de na sé byaasas, de na ga nɔshɔl yaga gul-rak: Mwa ba sé neshey netaama ne vyong. 28A sé tyɛng sede remo de ma ga ha a hwo, à darwey: Dagwi a ga dura a hwo pyɛ́ de a sé kyè wɔ̀ yong ɛ́, na a ra. 29Bê ra neshey netaama de pyɛ̂ re yê sè shɛrɛk sizɔng e yɛnɛ̂ sevwêl Misra mwa. 30E bama mo, neshey netaama ne vyong nê raa, ba rɔda ye bam na neshey pyɛ́ shɛrɛk, vyong yê kyiri mwa sevwel o. 31Pyɛ̂ re de yá sè shɛrɛk bê to bare mɛ wɛt, yaga vyong de yê raa yê sè jɔgɔ wɛt. 32Ko di, à darwey, sede remo de hwà ranas negwi nining o zang ba, hemo ha dura pyɛ de Dagwi a ga tɛ̀ e yey, na a ra, ko e jut jeng na a ra yɛ wɛt. 33A remo, à darwey, tik na hwo kasa mwât netsitsɛng, womo de a vɔk tɔ́k na bɛ́rɛng nuyel, na hwo tɛ̀ ɛ wo nuyel e ji sevwêl Misra. 34Ko hwo to tɛ̀ bemât bɛrɛng vwel o, na hwo gas sevwêl Misra zang tungun#41:34 gas sevwêl Misra zang tungun: kɛ: be paa pyɛ jining e ji pyɛ́ tyungun yi e bwâl sevwêl Misra. Ba tɔk cap-hâ batîn ha vemo yɛ́t wɛt. e ji neshey netaama ne pyɛ́ shɛrɛk. 35Tik na yɛn a tula pyɛ́ yê neshey nerat nemo de ne kyè vey mwa, na hwo nɔng ɛn reto, na be shusha, na be bang yɛ̄ e begban de ba sé e bapomo. 36Pyɛ́ mo yê sè e begban yaga neshey netaama ne vyong de ne kyè vey e ra sevwêl Misra, yaga na vyong o ye kwon wey na vwel o wɛt.”

Ba tɛ̀ Yɔsɛf mwât sɛlɛ̂ Farawo

37Redu de Yɔsɛf a vo a Farawo ra jam a yɛ tanga mwa bemât badu mɛ. 38Farawo a yang ɛn, “Wot e to sɛ̀ mwat sede womo a? Dagwi a tɛ̀ gabik mɛ e ji yɛ!” 39Ano kwong a yâng Yɔsɛf, “Dagwi a ga dura a hwo pyɛ́ yemo mwa: Yi ano, ma di, vit a mwat hwak de a vɔk netsitsɛng kɛ tɔk sede hwo. 40Ma rɔda tik lɔ hom mwa e vwɔ mō, ko pyɛ́ de hwô nɔng nu, e yɛ̄ de bemat hom mwa ba rɔda ra, sɛ̌ yaga negwɔm zɔng de mê sè e nuyel mō.” 41A re nuyel, a ye, “Ma ga tɛ̀ o wo nuyel e mwa neyɛnɛ̂ sevwêl Misra.” 42Ko a pat yɔbɔ̂ negwɔm yi e vwɔ mɛ, a tɛ̀ a Yɔsɛf e vwɔ, a tɛ̀, be tɛ̀ a yɛ yɔ̀m de ya pɛngɛ pes, ko a tɛ̀ lwɛlɛ̂ dyam shinang e fwɔ mɛ. 43Ko a nɔng ɛ kyɛkyɛ̂ bedwa wo mwât sɛlɛ hɛ, na a yel ɛ, ko bemât gyeng mɛ ba kyè e yêl Yɔsɛf, ba mok, ba tē, “Nɔng in gwong!”#41:43 “Nɔng in gwong”: Ba tɔk cap-hâ retîn ha hemo e lêm BeMisra yɛ́t wɛt.

Ano de Farawo a tɛ̀ Yɔsɛf mwât sɛlɛ hɛ e ra mwa sevwêl Misra.

44A yang ɛ, “Mwa ano de ma sé e gwofwa negwɔm, vit a mwat e ji mwa sevwêl Misra de e tɔk ra pyɛ cak wɛt sɛ̌ hwà nɔng ɛ nu.” 45Ko a vo a Yɔsɛf rezâ Zafena-Paneya#41:45 Zafena-Paneya: E ji lêm BeMisra reza mo ra sé wɔgɔ, “Dagwi e ha, a sé kwen” kɛ: “mwât nɔ̂ng neken”. a to ra a yɛ wenêng Asenat, hwông Pɔtifɛra, gwɔ̀m sekwit wo repomô On. Yi ano de ba tɔk, sevwêl Misra sa sé e vwɔ̂ Yɔsɛf.

46Yɔsɛf a vɔk neshey kuru batat (30) jeng de a kaba fwom na Farawo, gbɔng gwɔ̀m Misra. Yɔsɛf a nusu, a wɔ̀ gwɔrɔ mwa sevwêl Misra, a bɛrɛng sɛ. 47E jeng neshey netaama ne sirik, vwel ha nɔngɔs pyɛ́ polos. 48Yɔsɛf a kyě tula yɛ̄ mwa, a bang yɛ̄ e begban bapomo; e ji begban karɛ repomo a bang ɛ̀ pyɛ́ de ya sé yê hiri de bà gwɔrɔ pomo mo. 49Ano Yɔsɛf a tula pyɛ̂ yéneng polos sede bazɛ̂k rep, a tik nà masa yaga nepyak yɛ.

50Gyam na neshey vyong ne vey, Yɔsɛf a vɔk nèy bewen neba na hwā mɛ Asenat, hwông Pɔtifɛra, gwɔ̀m sekwit wo repomô On. 51A ye, “Dagwi a ga tɛ̀, ma ga ye bam na mwa yɔ́m hom, ma ga ye bam na lɔ da hom arɔng”, ko a vo a hwêy negel o rezâ Manase.#41:51 Manase: E lêm BeIbrani rezâ Manase ra sé bagat na batîn ha “a ga tɛ̀, ma ye bam”. 52A to ye, “Dagwi a ga nɔng me nèy e ji sevwel de ba tak a me ɛ”, ko a vo a hwey o hê neba rezâ Ɛfrayim.#41:52 Ɛfrayim: E lêm BeIbrani rezâ Ɛfrayim ra sé bagat na batîn ha “nɔng nèy”.

53Neshey netaama ne pyɛ́ polos e sevwêl Misra nà vey kwey, 54ko neshey netaama ne vyong nà yel, tyɛng sede remo de Yɔsɛf a kana ha. Vyong ya sé e ra bwâng bavwel mwa, ko e ji sevwêl Misra pyɛ̂ re yá sɛ̀. 55Jeng de BeMisra ba hwo wok vyong, ba wɔ̂ tosho a Farawo, ko a yang ɛn, “Ci in na Yɔsɛf, ko kayɛ pyɛ de e ha a yin, ko yin ra.” 56Jeng de vyong o ya ga mɔrɔ mwa vwel, Yɔsɛf a wuma mwa begban, a tɛ̀ be paa pyɛ́ mo, na be rɛsɛl a BeMisra, yaga vyong yá sɛ̀ ding-ding. 57Ko bemât jey mwa arɔng ba vɛ̀sɛ e Misra na Yɔsɛf, na be seres pyɛ̂ yéneng yaga vyong de ya ye pɔk à jey.

Currently Selected:

Susumo 41: bomBI

Highlight

Copy