Susumo 39

Yɔsɛf tanga hwâ Pɔtifar

1BeIshmayɛl ba ga kyè na Yɔsɛf vɔk e sevwêl Misra, ba row a Pɔtifar hɛ. Pɔtifar o á sè gwining e ji bemât badu gbɔng gwɔ̀m Farawo, yɛ à mwât nuyêl vê gyeng lɔ gbɔng gwɔ̀m o. 2-3Yɔsɛf a sé sangal e ji lɔ dalɔ mɛ WoMisra mo, e rá fwom. Dagwi Darwey a sɛlɛ hɛ, ko yaga ano, a di wɛng e ji kayɛ pyɛ de a ra. Dalɔ mɛ a di pyɛ́ yane mo, 4ko yey mɛ ya pɛngɛ na Yɔsɛf. A jut ɛ, a tik ɛ jaram yaga fwom de gwa sé mwɛ, a tɛ̀ ɛ mwât nuyêl lɔ mɛ na pyɛ̂ mwa de a vɔk. 5Yi e jeng yane, Dagwi Darwey a tɛ̀ nerat e ra lɔ̂ WoMisra mo na mwa pyɛ̂ nedanerey mɛ de a vɔk, yê lɔ tanga yê hey; a ra ano yaga Yɔsɛf. 6A tik pyɛ́ mɛ mwa e vwɔ̂ Yɔsɛf. Pyɛ mɛ ya to sé na râ pyɛ cak wɛt, sɛ̌ pyɛ́ de e re zɔng.

Yɔsɛf á sè mwat o hwɔf, zɛrɛ mo. 7Ba sé sangal ano, ko hwâ dalɔ̂ Yɔsɛf a tɛ̀ bayis e ra yɛ, a dura a yɛ simo, ko tuhak a yang ɛ, “Dyɛng na me!” 8Ko a kyɛ́ ɛ, a yang ɛ, “Di, a remo de ma sé sangal e ngamo, vit a pyɛ de dalɔ hom e sap e ra yɛ, a ga nɔ́ng me kayɛ pyɛ de a vɔk e ji vwɔ hom. 9A vɔk reto e lɔ mo de ha dal nang wɛt. A ro na pyɛ cak e me wɛt sɛ̌ hwo zɔng, yaga hwà sé hwā mɛ. Yi e rɛ̌ de mê ra gbɔng pyɛ vyes yemo ano, na me ra a Dagwi renɛn arɛt?” 10Ko hwā mo a dopse rangsâl Yɔsɛf kahɛ tuk, ko Yɔsɛf a simo, na a dyɛng na yɛ, kɛ a sangal bagat na yɛ wɛt.

11Ko tuhak Yɔsɛf a yel, na a ra fwom mɛ e ji lɔ. Vit a mwât fwom hwak de a sé e ji lɔ, 12ko hwā mo a kaba rugu mɛ, a ye, “Dyɛng na me!” Ko Yɔsɛf a hàla a yɛ rugu mo e vwɔ mɛ, a tele vɔk e majey. 13Sede hwā mo a di, de a ga hàla a yɛ rugu mo, a ga nusu hɛ, 14ko a yila bemât fwôm lɔ mo, a yang ɛn, “Di in, rwas hom a vey a wot na WoIbrani womo de a sé byɛs ot! A yel e ngamo, na a dyɛng na me, ko ma dak sekun. 15Sede a wok, ma dak sekun na gbɔng fwɔ, a vɛ̌ hàla rugu mɛ na me, a hywit ɛ, ko a tele vɔk e majey.”

16A vɔ̀k rugû Yɔsɛf o, sɛ̌ jeng de rwas mɛ a vɛ̄ hɛ e lɔ. 17Ko a jɛt a rwas mɛ ha mo, a ye, “Sam WoIbrani, womo de hwà vey mɛ e ngamo e lɔ mot, a yel e ji duk hom, a simo na a byɛs me. 18Ko jeng de ma dak sekun na gbɔng fwɔ, a tele vɔk e majey, a hàla rugu mɛ na me.”

19Jeng de dalɔ̂ Yɔsɛf a wok pyɛ́ mwa de hwā mɛ a ha a yɛ, yemo de sam mɛ a ra a yɛ, ko yey mɛ ya fus na Yɔsɛf. 20A tɛ̀, be rɔgɔs hɛ e lɔ̂ ngyang, e kwɔn de gbɔng gwɔ̀m e rɔgɔs ɛ bemat mɛ. Ko mwa ano de Yɔsɛf a sé e lɔ̂ ngyang, 21Dagwi Darwey á sè tanga yɛ, a dura a yɛ nerat mɛ. Yi ano, yêy gbɔng mwât bɛrɛ̂ng lɔ̂ ngyang ya pɛngɛ na yɛ, 22ko a tɛ̀ ɛ mwât nuyêl mwâ bemat de ba sé re ngyang, na mwa fwom de be ra e hwomo. 23Yɛ pyɛ mɛ a to sé ra fwom hwak gwomo de a ga kana tik a Yɔsɛf wɛt, yaga a di, Dagwi Darwey a sé tanga Yɔsɛf, ko a tɛ̀, a di wɛng e râ kayɛ pyɛ.

Currently Selected:

Susumo 39: bomBI

Highlight

Copy