Susumo 23

Abraham a sey kwɔ̂n lɛrɛ̂ Sara

1Sara, hwâ Abraham, a vɔk neshey naga na kuru baba na nɛ netaama (127) e jey. 2A ku e pomô Kiriyat-Arba, de be tâng hɛ, à Hɛbrɔn a remo, e sevwêl Kanaan. Abraham a lashe yey mɛ, a tosho Sara.

3A hwo hala revîn hwā mɛ, a wɔ́ na BeHiti, a yang ɛn, 4“Ma sé kwɛnɛt e sangal e ngamo e ji min. Row a me hin kwɔn de hê tɛ́ ɛ nap, na me lɛrɛ ɛ hwā hom, na me gas me na revin mɛ.”

5BeHiti ba toyo a Abraham, ba ye, 6“Wok ot, à darwey! Hwà sé mwat e ji mot de Dagwi a ga nɔng o reto na nerey. Lɛrɛ hwā mō e ji kwɔn de ha dal na nerat de wot a vɔk. Vit a hwak e ji mot de a rɔda ró mɛ a hwo na kwɔn mɛ, yaga na hwo lɛrɛ ɛ hwā mō.”

7Abraham a sogo, a ye a BeHiti, bedâ vwel o, guduruk, 8ko a yang ɛn, “Ka sede yin a simo, na me lɛrɛ hwā hom, na me gas me na revin mɛ, ko tik na yin wok me. Ra in a me won na Ɛfrɔn Zohar, 9na yɛ a nɔng me fwara mɛ, de gwa sé e Makpɛla, wɔ̀ sɛ̀ yɛnɛ̂ cwɛl mɛ. Rangal hin hɛ, na yɛ a row a me kwɔn o e bayis min, e mwa dyām de kwɔn o ha kaba, na he tɛ́ ɛ kwɔ̂n besak hom.”

10E jeng yane mo, Ɛfrɔn á sè e sangal e kwɔn o tanga bwang BeHiti mo. A toyo a Abraham e wôk bemat mwa de ba sé e dúra e rwi yel e ji pomo mo, a ye, 11“À darwey hom, wok me! Ma nɔng o cwɛl o tanga fwara de gwa sé e ji gwɛ. E nuyêl bemat hom, ma nɔng o gwɛ, na hwo lɛrɛ ɛ hwā mō.”

12Abraham a to ye guduruk e nuyêl bedâ vwel o, 13a yâng Ɛfrɔn e wok mɛn mwa, “Ka hwà yâng simo hwo wok me, mê tala dyām yaga cwɛl o. Hwo sey yɛ̄ yi e vwɔ hom, yaga na me bin lɛrɛ ɛ̀ hwā hom e hwomo.”

14Ɛfrɔn a toyo a Abraham, a ye, 15“À darwey hom, wok me! Yaga kekwɔn de ka sé e ra shɛkɛl dyam pyɛng#23:15 shɛkɛl dyam pyɛng: Shɛkɛl dyam pyɛng gwining wa sé dyâm fwôm mwat yaga tuk hining. naga benaas (400) zɔng, ko ka vey sɛ́ e tē hom na hwo arɛt? Lɛrɛ ɛ̀ hwā mō zɔng.” 16Abraham a simo, ko a masa a Ɛfrɔn dyam pyɛng tyɛng na pyɛ de a ha e betong BeHiti: shɛkɛl naga benaas (400) tyɛng na masa de bejik bá ra e jeng o.

17Ano de cwɛl de gwa kana sé gwô Ɛfrɔn e Makpɛla, e rwa rak na Mamrɛ, gwa tɛ́ ɛ gwô Abraham. Gwa wuna na fwara de gwa sé e ji gwɛ, na mwa batîn cɔ́gɔt de ya sé vɔk e yɛnɛ̂ nerêy cwɛl o mwa. 18Ba nɔ̂ng Abraham, na gwo tɛ́ ɛ mwɛ. Ba ra pyɛ́ yane mo e nuyêl mwa BeHiti de ba sé e kwɔ̂n tula mo. 19Ano kwong, Abraham a lɛrɛ hwā mɛ Sara e fwara de gwa sé e cwɛ̂l Makpɛla, e rwa rak na Mamrɛ — hɛ à Hɛbrɔn a remo — e ji sevwêl Kanaan. 20Ano de cwɛl o, na fwara de gwa sé e ji gwɛ, de gwa kana sé gwô BeHiti, gwa tɛ́ ɛ nap Abraham yaga kwɔ̂n besak mɛ.

Currently Selected:

Susumo 23: bomBI

Highlight

Copy