Susumo 20
20
1Abraham a tik Mamrɛ, a vo gwong, a raa vɔk e rwa batîn vwêl Kanaan o, ko a sangal e tê Kadɛsh na Shur. E bama mo a kyè, a wɔ̂ sangal sángal rekyɛn e repomô Gerar. 2E hwomo a ye, hwā mɛ Sara a sé gwa mɛ. Ano gwɔ̀m Gerar a tomo, be jut a yɛ Sara mo. 3Ko e ji nabwalak Dagwi a vey a yɛ e ji negwi, a yang ɛ, “Tɔk, hwô ku, yaga hwā de hwà jut; a sé hwâ weneng.”
4Gyam na pyɛ mo ye té, Abimɛlɛk a ga kana wɔ bagat na Sara wɛt, ko a ye, “À Darwey, hwô wey na bemat, mwa ano de vit a hɛn nà nɛn arɛt? 5Abraham pyɛ mɛ a ye, Sara a sé gwa mɛ. Ko yɛ Sara pyɛ mɛ arɔng a ye, yɛ a sé gwa mɛ. Ma ra pyɛ yemo vit à tô yey, vit à me na renɛn.”
6E ji negwi o, Dagwi a ha a yɛ, “Ma tɔk mwin, hwà ra pyɛ mo vit à tô yey. Yaga ano de ma dul o, gyam hwo rɔngɔl nà ra nɛn, ko ma tik o, na hwo wɔ́ bagat na yɛ wɛt. 7Remo kwong, to toyo a mwat wane na hwā mɛ. A sé zarap hom, ko a rɔda ra won e to mō, na hwo nàra kwen. Ka sede hwà toyo na hwā mó wɛt, di, hwó kyè wɔ̀ ku, hwo na mwa bemat de ba sé bemo.”
8Abimɛlɛk a sogo bop nagasi, a yila bemât fwom mɛ, a ha a yɛn neyɛnɛ̂ pyɛ́ de ya té mwa. Bemat o ba wok bengyip sizɔng. 9Abimɛlɛk kwong a yila Abraham, a yang ɛ, “E sɛ́ de hwà ra a wot ɛ? Ma buru a hwo na sɛ́ arɛt, de hwà hwɔtɔ a me tanga bemat de ba sé e ji segwɔm hom gbɔng rezot ano ɛ? Hwà ra a me pyɛ́ de ya jam, na be ra a mwat wɛt. 10E sɛ́ de ya tɛ̀, hwà ra pyɛ yemo ɛ?”
11Abraham a ye, “Ma ra ano, yaga ma bare, vit a mwat hwak e ngamo de a wok bengyip Dagwi, ko ba rɔda mɔrɔ me, yaga na be sey ɛ hwā hom. 12Ko e ji ha mwin, yɛ a sé gwa hom o, hwey hwông da hom, ko e hê neng-gwɔ hom wɛt. Me kwong, ma ra weneng mɛ. 13E jeng de Dagwi a gas me na lɔ da hom vɔk e sevwel seduk, ma ha a yɛ, ma yang ɛ, ‘Nerat de hwô ra a me e kahɛ kwɔn de wot a wɔ́ ɛ̀, hwo ye, me ma sé gwa mō.’ ”
14Abimɛlɛk a jut vyēl, na berɔndɔng, tanga besam beras na beha, a nɔ̂ng Abraham, ko a toyo a yɛ na hwā mɛ Sara. 15A yang ɛ, “Di, vwel hom a hemo; sangal e kwɔn de yey mō ya simo”. 16Ko a yâng Sara, “Di, ma ga nɔ̂ng gwà mō dyām pyɛng gu rining (1,000), yaga nuha na mwa vemo de ba sé tanga hwo wɔgɔ, vit a hwo na nɛn. Vit a mwat de e tɛ̀ a hwo rekyìt.”
17-18Abraham a ra won yaga Abimɛlɛk, ko Dagwi a jut yɔ́m de a kana tɛ̀ e ra lɔ mɛ. Yaga Dagwi Darwey a ga kana tɛ̀ Abimɛlɛk, na hwā mɛ, tanga besam mɛ behwong o ba tɔk sɛ̀ tɔs wɛt, yaga remo de a jut Sara, hwâ Abraham. Ko a remo yɛn a to tɔk tɔs nèy.
Currently Selected:
Susumo 20: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
