Susumo 19

Banɛ̂n Sɔdɔm ba gwɛ̌ hɛn

1Betom-lagwi beba mo ba wul Sɔdɔm nawiri. Lɔt kwong á sè e sangal e rwi pomô Sɔdɔm. Jeng de a di ɛn, a sogo, a wɔ̀ sey ɛn, ko a gaba e cât bol mɛn, 2a ye, “À bedagwɔ, ma sé mwin, lɔ hom ha sé min, yē in rɛng, na yin kus bol min, na yin pɔl ɛ̀, ko yin de ba kaba gwong bop nagasi.”

Yɛn a ye, “Wey, wot e pɔl e majey zɔng.”

3Ko a shonong e ra yɛn ding-ding, ko yɛn a ye rɛng, ba yel e ji lɔ mɛ. Lɔt a tɛ̀, be yong pyɛ́ naka, na be yong ɛ̀ kpam-tuk sana géy-sing, ko yɛn a re.

4Ko gyam na be wɔ̀ dyɛng, bemât pomô Sɔdɔm, bewen tanga bemakuk mwa pɔk ba gwɔrɔ lɔ Lɔt o. 5Yɛn a yila Lɔt, ba yang ɛ, “Bemat a vɛ̌ de ba vey na hwo naturuk ɛ? Nusu a wot na yɛn, na wot dyɛng na yɛn!”

6Lɔt a nusu yi e ji lɔ, a bang rwi duk o, 7a ye, “Me ra won na yin, à begwa, yin kwon ra pyɛ vyes yane wɛt! 8Di in, ma vɔk beyorôm behwóng hom beba. Tik na me nusu a yin na yɛn, yin ra mɛ̀ pyɛ de yin e simo. Ko yin ra bemat vemo ko tyɔng wɛt. Yɛn a sé bekɛnɛt hom, ko gbing-gbing me jut nedirik mɛn.”

9Ko yɛn a ye, “Nɔ́ng ot gwong! Hwo kwɛnɛt zɔng! Wà a nɔng o reto, na hwo nɔng ot nu e ra pyɛ de wot e ra arɛt? Sek yi e ngamo! Ka ano wɛt, ko wot a rɔda dura a hwo neves de na dal ne bemat mō mo!” Yɛn a tusa Lɔt vɔk e bama, ko ba ye ngyɛ́k na be kwɔrɔ rwi duk o. 10Ko bekɛnɛt beba mo yi e hwomo e ji mo ba nára vɔ, ba hwɔtɔ Lɔt vɔk e ji lɔ, ba bang rwi duk, 11ko ba tɛ̀ a bemat o nebǒk, besɛl o tanga berey o mwa yɛn a kyě ra gegárak, na be jāma dem de rwiduk o gwa sé ɛ.

Lɔt a tik Sɔdɔm

12Bekɛnɛt o ba yâng Lɔt, “Hwà vɔk mwat mō hwak e ngamo arɛt? Kɛ besɔ mó, kɛ nèy bewen na behwong, kɛ kawɛ mwat de a sé mwo e ji pomo mo ayi? Nusu na yɛn yi e kwɔn hemo. 13Wot a sé kyè wɔ̀ wey na kwɔn hemo, yaga sekun de be tɛ̀sɛ e ra bemat o sa ga kat e nuyêl Dagwi Darwey. Yaga ano, a tomo hot, wot wey na pomo mo.”

14Ko Lɔt a wɔ̀ ha a besɔ mɛ, vemo de be hwono behwóng mɛ, a yang ɛn, “Sogo hin yi e kwɔn hemo, yaga Dagwi Darwey e kyè wɔ̀ wey na pomo mo.” Ko besɔ mɛ ba tɛ̀ ha mo sede neshɔngɔlɔng zɔng.

15Nagasi bop betom-lagwi mo ba pɛl a Lɔt kya, ba yang ɛ, “Sogo, na hwo jut hwā mō tanga behwóng mó beba de ba sé tanga hwo, yaga bê kwon bak ɛ hin e ji wey na pomo mo.” 16Ko Lɔt a lashe jeng. Ko Dagwi Darwey e bɛɛ nemwishish Lɔt. Yaga ano, bemat o ba hwɔtɔ hɛ na vɔ, na hwā mɛ, tanga behwóng mɛ beba, ba pat ɛ vɔk e mâ pomo. 17Bama de ba ga pat ɛ, yɛn a ye, “Dari yaga neken mō, hwo ye byak à bama wɛt! Tele vɔk e beraku. Hwo to tumal e kwɔ̂n nɛk hemo wɛt, yaga bê kwon bak ɛ hwo!”

18Ko Lɔt a ye, “Gabɔk, à dagwɔ! 19Hwà ga ra a me pyɛ́ ryat sizɔng de hwà ga sey neken hom. Ko di, mê tɔk wul beraku mo wɛt, yaga gyeng gawey hê sɛ̀ me e gwong, ko mê ku. 20Di, kerepomo kere; ka sé bagat de wot e tɔk tele vɔk ɛ̀. Ka sede hwà simo, ko hwo wey na kɛ wɛt, ka sé ketege mo zɔng. Tik na me tele vɔk ɛ̀, na me bin sey neken hom.”

21Ko a yang ɛ, “Tala mo, ma ga simo. Ma rɔda wey na kerepomo de hwà ha e ra kɛ wɛt. 22Rá ziri! Tele vɔk e hwomo, yaga mê tɔk ra pyɛ cak wɛt, sɛ̌ hwà wɔ̀ wul e hwomo.” Yaga Lɔt a ye, ka sé ketege mo, ba yila kwɔn o, à Zowar.#19:22 Zowar: E lêm BeIbrani rezâ Zowar ra sé bagat na retîn ha “ketege”.

Ba wey na Sɔdɔm tanga Gɔmɔra

23Lɔt a wul Zowar e zang-gwi gasi. 24Ko Dagwi Darwey a lusha kyâ negang e ra Sɔdɔm na Gɔmɔra yi e lagwi. 25A wey na bapomo mo, na mwa nɛk o, na mwa bemat de ba sè e sangal e ji bapomo mo, tanga pyɛ́ de ye tabas yi e vwel. 26Ko hwâ Lɔt a di bama, a tɛ́ ɛ tô nevwashe.

27Abraham a sogo bop nagasi, a kyè vɔk e kwɔn de a kana tumal ɛ̀ e nuyêl Dagwi Darwey. 28A bɛrɛng vɔk e rwa vwêl bak Sɔdɔm tanga Gɔmɔra na mwa nɛk o, ko a di kyeng he tugus, sede kyeng de he sogso e gwogbɔng gwofwam-ju. 29Gwong a gwane, de Dagwi, jeng de a ga wey na bapomo de ba sè e nɛk o, a bare na Abraham, ko a pat Lɔt yi e gawey o.

Susû BeMowap tanga BeAmɔn

30Lɔt a nusu yi e Zowar, a wɔ̀ sangal e beraku tanga behwóng mɛ beba, yaga e wokos bengyip sangal e ji Zowar. A sangal e fwara tanga behwóng mɛ. 31Tuhak, hwong kunat o a yâng swɛl o, “Da mot a ga kwop, ko vit à mwat e ji mwa vwel o de e ra weneng mot. 32Vēy, wot tɛ̀ da mot a feng nshî anap. E bama mo, wot e dyɛng na yɛ, yaga na yerê da mot ye kwon tala hɛ wɛt”. 33Naturuk hane mo yɛn a tɛ̀ da mɛn a sɔ nshî anap, ko hwong kunat a yel, a dyɛng na da mɛ, yɛ kwong a tɔk wɛt.

34Tuk het arɔng, hwong kunat a yâng swɛl, “Di, turûk yos ma dyɛng na da hom. Tik na wot to tɛ̀ ɛ a feng nshî anap naturuk yunung arɔng. Ko hwo wɔ̀ yel, na hwo dyɛng na yɛ, yaga na yerê da mot ye kwon tala hɛ wɛt”. 35Ano de yɛn a tɛ̀ ɛ a feng nshî anap e ji naturuk nane mo arɔng. Hwóng mɛ swɛl o a yel, a dyɛng na yɛ; yɛ kwong a tɔk wɛt. 36Gwong a gwane de behwông Lɔt ba sey jim yi na da mɛn. 37Hwong kunat a tɔ hwey wen, a vo a hɛ rezâ Mowap;#19:37 Mowap: E ji lêm BeIbrani rezâ “Mowap” ra sé bagat na batîn ha “yi na da hom”. yɛ wɛ à dâ BeMowap vê yunung. 38Swɛl arɔng a tɔ hwey wen, a vo a hɛ rezâ Bɛn-Ami;#19:38 Bɛn-Ami: Cap reza mo ya sé “hwey wen cang hom”. yɛ wɛ à dâ BeAmɔn vê yunung.

Currently Selected:

Susumo 19: bomBI

Highlight

Copy