Susumo 17

Yósom, hɛ à pyɛ durâ wuna-na-sira

1E jeng de Abram á vɔk neshey kuru shabatat na nɛ shanetat, Dagwi Darwey a dura to mɛ na yɛ, a yang ɛ, “Me wɛ à Dagwi Wo Reto Mwa. Tik na hwo sangal sángal de ha jam a me, na hwo bin sè gyat. 2Mê wuna sira na hwo, mê gwɛ̌ yere mō hyɔt.”

3Abram a gaba gup e vwel, ko Dagwi a to yang ɛ, 4“Wuna-na-sira hom a het ngan: Hwà rɔda tɛ́ o dâ yére bemât jey pyak. 5E ngamo nuyel bê to be yila reza mō, à Abram#17:5 Abram: Cap reza mo ya sé bagat na “Da (wɔgɔ, Dagwi) a sé rwey”. wɛt, ko za mō ha rɔda sè Abraham,#17:5 Abraham: Cap rezâ “Abraham” ya sé bagat na “Dâ yére bemât jey pyak”. yaga ma sé tɛ̀ o dâ yére bemât jey pyak. 6Mê nɔng o yére pyak sizɔng, yemo de yê tɛ́ ɛ yére bemât jey detidetu, ko yi na hwo bê sɛ̀ begbɔng begwɔ̀m. 7Ma rɔda gyeng wuna-na-sira hom na hwo, na yere mō de ya to raa bama mō; wuna-na-sira mo à hane vit à yɛnɛ. Mê tɛ́ me Dagwi mō, na wo yere mō ye bama mō. 8Mê nɔng o, hwo tanga yere mō ye bama mō, vwêl rekyɛn mō, hɛ à vwêl Kanaan. Mwa vwel hê tɛ́ ɛ pyɛ nedanelɔ mō nesheneshey. Me kwong mê tɛ́ me Dagwi mɛn.”

9Dagwi a re nuyel, a ye, “Hwo, hwô gyeng sira hom, hwo na yére mō yê bama mō, mwa wɔ̀ sɛ̀ bezamang mɛn. 10Wuna-na-sira ma het de hwô gyeng, hwo na yere mō ye bama mō: Be wɔ́ a kawɛ rwas e cwɛl. 11Yin e yosom hin, ko hê tɛ́ ɛ pyɛ de yê dura, ma ga wuna sira hom na yin. 12Yi e remo, mwa hwey wen de ba tɔ e ji min bê yosom hɛ e tuk hê rwit. Bê ra ano mwa wɔ̀ sɛ̀ bezamang min, kɛ a sé e ji nèy lɔ, kɛ sam de hwà sey na dyām yi e yere dyuk ayi. 13Mwa yɛn beba, nèy lɔ na besam, gbing-gbing be yosom hɛn. Yi ano, sira hom hê sè e ra rebek min nesheneshey. 14Kawɛ rwas de ba yosom hɛ wɛt, mwat wane mo bê pat ɛ yi e ji bemat hom, yaga a ga gyili wuna-na-sira hom.”

15Dagwi a to gwɛ̌ yâng Abraham, “Hwo to yishi hwā mō, à Sarai wɛt, ko bê tang ɛ, à Sara.#17:15 Sara: Cap reza mo ya sé “hwông gwɔ̀m”. 16Mê tɛ̀ a yɛ nerat, ey, mê nɔng o hwey wen yi na yɛ. Mê tɛ̀ nerat e ra yɛ, yaga na a bin tɛ́ ɛ neng yére bemât jey detidetu, ko bê sɛ̀ begwɔ̀m yi e ji yére mɛ.”

17Ko Abraham a gaba gup e vwel, a hwo shɛgɛsh, a ye e yey mɛ, “Bê tɔ a gwomwakuk de gwa ga re neshey naga hwey a? Sara de a vɔk neshey kuru shabatat (90), remo à wɛ de e tɔ hwey a?” 18Ko a yâng Dagwi, “Ka ba yâng tik na Ishmayɛl a sɛ̀ nerat mō arɔng!”

19Ko Dagwi a yang ɛ, “Mwa ano, hwā mō Sara yɛ wɛ de e tɔ a hwo hwey wen, ko hwà rɔda vo a hɛ rezâ Yishak.#17:19 Yishak: Cap reza mo ya sé “a sé shɛgɛsh”. E yɛ kwong de mê gyeng wuna-na-sira hom na yɛ vɔk e nesheneshey, tanga yere yɛ bama mɛ arɔng. 20Rehâ Ishmayɛl kwong, ma ga wok. Di, mê tɛ̀ a yɛ nerat, mê nɔng ɛ yere, ko mê gwɛsɛ nepyak mɛn pyak-pyak. A rɔda tɛ́ ɛ dâ nèy gwɔ̀m kuru na vɛ beba, mê tɛ̀ ɛ, a sè dâ yerê bemât jey ryey. 21Ko a sé na Yishak de ma rɔda gyeng sira hom, yɛ de Sara a rɔda tɔ̀ a hwo nak, jeng ngan.” 22Jeng de Dagwi a yɛnɛ ha na Abraham, ko a vɛ̌ kyè, a tik ɛ.

23E tuk hane mo, Abraham kwong a jut Ishmayɛl, hwey mɛ, tanga mwa besam de ba tɔs ɛn e ji lɔ mɛ, na vemo de ba sey na dyām, ko a yosom kawɛ rwas e ji bemât lɔ mɛ tyɛng na hâ Dagwi. 24Abraham á vɔk neshey kuru shabatat na nɛ shanetat (99) jeng de ba yosom hɛ. 25Ko Ishmayɛl, hwey mɛ, ha vɔk neshey kuru na nɛ netat (13) jeng de ba yosom hɛ. 26E ji tuk hining o ba yosom Abraham tanga hwey mɛ Ishmayɛl, 27tanga mwa beras e ji bemât lɔ mɛ, vemo de ba tɔs ɛn e ji lɔ mɛ, na vemo de ba sey ɛn na dyām yi e yére dyuk.

Currently Selected:

Susumo 17: bomBI

Highlight

Copy