PA’PUDIAN 116
116
Pa’kurre sumanga’, belanna tilendok dio mai kamatean
116:1-19
1Kukamali’ tu PUANG,
belanna Natanannimo talinga tu kadangku sia pengkamoyaku.
2Belanna Napalidannimo’ talinga,
iamoto angku la meongli’ (lako Kalena) angge tuoku.
3Naluang sambanna’ ulangna kamatean,
sia Narampoimo’ parri’ lino to mate,
kuperasaimo tu kamaparrisan sia karossoan.
4Apa meongli’na ussa’bu sanganNa PUANG:
o PUANG, karimmanni tu deatangku.
5Iatu Puang maturu-turu sia malambu’,
sia iatu Kapenombanta sa’pala buda.
6Iatu PUANG ungkaduttu’ to tang masuangga,
makuyu langkanmo’, apa Ia mangka ungkarimmannina’.
7E deatangku, sulemoko lako kasode-sodeammu,
belanna Napogau’mo Puang tu kameloan mati’.
8Belanna Mirampanammo tu deatangku dio mai kamatean,
sia tae’ Miparandannina’ katumangiran,
sia tang Mieloranna’ tilende’.
9La lolangna’ dio oloNa PUANG,
lan lu tondok to tuo.
10Tontongna’ ma’patongan, moi angku mangka ma’kada kumua:
Pussak tonganna’;
11Tongku mataku’ angku ma’kada, kukua:
Tang mana’pa’ tu mintu’ tolino.
12Apamo la kupenomban lako PUANG,
la sipakkanna mintu’ kameloanNa lako kaleku?
13La untadedanganna’ irusan tanda kadilendokan,
angku meongli’ ussa’bu’ sanganNa PUANG.
14La umpalesso’na’ mintu’ pangallonangku lako PUANG,
dio olona mintu’ taunNa.
15Keangga’ kapua dio oloNa PUANG
tu kamateanna tu mai to mengkaolaNa.
16O PUANG, tonganna aku te taumMi,
ondongpi inang taumMina’, sia anakna kaunanMi baine,
Kamumo tu mangka ungko’ka’i tu mai pungoku.
17La kupenomban tu pemala’ pa’pudian Mati’,
angku meongli’ ussa’bu’ sanganNa PUANG.
18La umpalesso’na’ mintu’ pangallonangku lako PUANG,
dio olona mintu’ taunNa.
19Lan tarampak banuanNa PUANG,
illan tangnga pangrante manikmu, e Yerusalem. Haleluya!
Currently Selected:
PA’PUDIAN 116: SDA
Highlight
Share
Copy
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
