KADIBILANGAN 9

Pa’pasa ma’penduanna

9:1-14

1Ma’kadami tu PUANG lako Musa lan padang pangallaran Sinai lan taun ma’penduan, tonna mangka tassu’ lan mai tondok Mesir, tonna bulan bunga’na, Nakua:

2Iatu to Israel la umpogau’ Pa’pasa, ke attu dipamanassanni.

3Iake allo ma’pessangpulo a’pa’ bulan iate, ke makaroenni, la mipogau’ tu iannato lan attu dipamanassanni, situru’ tu mintu’ aluk dipondok dionato sia mintu’ atoranna la mipogau’.

4Mesuami Musa lako mintu’ to Israel la umpogau’ Pa’pasa.

5Napogau’mi tu Pa’pasa lan bulan bunga’na tonna allo ma’pessangpulo a’pa’ bulan iato, tonna makaroen, lan padang pangallaran Sinai; susitu mangka Napepasanan PUANG lako Musa, napogau’ dukato Israel tu iannato.

6Attu iato den tau naruttakki batang rabuk, naurunganni tae’ nama’din umpogau’ Pa’pasa allo iato; iamoto nasae umpennoloi Musa sola Harun allo iato.

7Ma’kadami tu tau iato mai lako nakua: Iatu kami naruttakkikan batang rabuk; ma’apari angki digagai umpemalaran pamengan pemala’ lako PUANG dio lu mintu’ to Israel lan attu mangka dipamanassa la umpogau’i to?

8Ma’kadami Musa lako tau iato mai nakua: Kampaipi sattu’, angku perangii apa tu la Napasan PUANG diona kamu.

9Ma’kadami tu PUANG lako Musa, Nakua;

10Pokadai te iannate lako to Israel, kumua; Iake den misa’ tau naruttakki batang rabuk ba’tu male lumio’ – iate atoran iate la dipapatuangkomi, susi duka bati’mi – la umpogauran duka Pa’pasa PUANG.

11Lan bulan ma’penduan lan allo ma’pessangpulo a’pa’ ke makaroen, la napogau’ tau iato mai tu iannato, sola roti tang diragii sia rampa-rampa mapai’ la nakande tau iato mai.

12Sia da’ nanannai tu torrona sae lako melambi’na, sia moi misa’ bukunna da nale’toi; susi nasangmoto dipondok tu diona Pa’pasa, la napogau’ tau iato.

13Apa iatu tau masero sia tae’ namale lumio’, anna kasalangai umpogau’ Pa’pasa, la disabu’i tu tau iato dio mai bangsana, belanna tae’ napennoloanni tu pamengan pemala’ lako PUANG lan attu mangka dipamanassa lan umpogau’i to.

14Iake denni to sae torro dio lu kalemi, tu la morai umpogauran Pa’pasa Puang, sipatu la napogau’ unturu’ apa dipondok diona Pa’pasa sia atoran dionato. Misa’ri tu atoran dipondokangkomi sola nasang, la to sae la iatu mai pa’tondokan.

Diona lentong gaun sia lentong api

9:15-23

15Iatonna allo dinii umpabendan Kema, nasamboimi gaun tu Kema iato, iamotu Tenda Kasa’bian, tonna bongimo nasamboimi gaun tu Kema susito api ditiro sae lako melambi’.

16Tontong bang susito; nasamboi gaun tu Kema iato, sia susito api ditiro ussamboi ke bongi.

17Iake tiangka’omi tu gaun iato dao mai Tenda, ke’de’omi tu to Israel, naumba nanii torro tu gaun iato, inde dukato nanii ma’tenda tu to Israel.

18Tete dio parentaNa PUANG nake’de’ tu to Israel, sia tete dio parentaNa PUANG anna ma’tenda; lan mintu’ attu nanii gaun dao kema iato, pada duka masainnato nanii torro tu tau iato ma’tenda dio.

19Iake masai tu gaun torro dao Kema, napogau’mi to Israel tu kamenomban lako PUANG, tae’ namale len.

20Sipissan-pissan tu gaun ba’tu pirang allo torro dao Kema; ianna susito ma’tenda tu tau unturu’ parentaNa PUANG, sia tete dio parentaNa PUANG nake’de’ tu tau iato.

21Sipissan-pissan tu gaun torro randuk dio mai makaroen sae lako melambi’; ianna tiangka’ tu gaun ke melambi’, ke’de’ duka tu tau; la allona la bonginna, ianna tiangka’ tu gaun, la ke’de’ duka tu tau.

22Iake masai tu gaun torro dao Kema, ba’tu duang allo, ba’tu sangbulan, ba’tu masaipi, iatu to Israel torro ma’tenda, tae’ nake’de’ len; apa iake tiangka’mi tu gaun, namane ke’de’ tu tau iato.

23Tete dio parentaNa PUANG, anna ma’tenda tu tau iato sia tete dio parentaNa PUANG, anna ke’de’ tu tau iato; napogau’mi tu kamenomban lako PUANG situru’ parentaNa PUANG nalopian Musa.

Currently Selected:

KADIBILANGAN 9: SDA

Highlight

Copy