MATIUS 8

Kadipamalekeanna misa’ to golenan

8:1-4

Mark 1:40-45; Luk 5:12-16

1Iatonna mengkalaomo Yesu dao mai buntu iato, lendu’mi budanna tau undi unturu’I.

2Saemi misa’ to golenan tukku umpennoloi nakua: O Puang, iake Miporai, manassa kuasaKomi umpamalekena’.

3Nasorongammi tu limanNa, Nakaka’i, Nakua: Kuporai, la malekemoko! Ta’pa mondo bangsiami tu golenna.

4Nakuami Yesu lako: Kanandai tonganni, da mupokada lenni, moi lako misa’ duka tau, sangadinna malemoko umpa’pekitanan kalemu lako to minaa sia pemalaranni tu pemala’ napa’peannan Musa, tu la mendadi tanda lako tu tau.

Kadipamalekeanna misa’ kaunanna kamandang

8:5-13

Luk 7:1-10

5Iatonna male tama Kapernaum, saemi misa’ kamandang, mengkamoya-moya lako,

6sia nakua: O Puang, kaunanku dio banuangku kupi’ anna mamma’bang, sia lendu’ ia mapa’di’na.

7Nakuami ungkuanni; la mati’Ra’ka la umpamalekei?

8Apa mebali tu kamandang, nakua: O Puang, tae’ nasipatu ke la Puang ullese pengkalaoangku; sangadinna pokada bangmi sangbuku tu kada, la napomaleke kaunanku.

9Belanna aku te to diparentana’, naden pole’o tu surodadu kuparenta. Iake kukua ungkuanni tu misa’: Maleko, male; sia ke kukua lako tu misa’na: Maleko mai, sae; sia iake kukua lako kaunanku: Garagai te, nagaragai.

10Iatonna rangimi Yesu tu kada iato mangngami sia Nakua lako to undi unturu’I: Kukua mati’: Tonganna tongan moi misa’ lan mai to Israel, tae’ bangpa Kuappa’ tu kapatonganan susi matoto’na te.

11Sia Kukua lako kalemi, kumua buda tau la sae dio mai rampe matallo sia matampu’, naunno’ko’ kumande sisola Abraham sia Ishak sia Yakub lan Parenta Suruga;

12apa iatu to dianak lan Parenta iato la dipembuangan tama malillinna dio salian, diomo la nanii katumangiran sia kasisangeran isi.

13Nakuami Yesu lako tinde kamandang: Sulemokomi, susitu mipatonganna ten dukamoto la dadi lako kalemi. Maleke bangsiami tu kaunanna to attu iato.

Kadipamalekeanna matusanna baine Petrus

8:14-17

Mark 1:29-34; Luk 4:38-41

14Malemi Yesu tama banuanna Petrus, Nakitai tu matusanna baine Petrus, mamma’ bang lumalla’.

15Nakaka’mi tu limanna, napa’de tu lalla’na; milikmi, anna ia umparakai.

16Iatonna makaroenmo budami to natamai deata bulituk nasolan tau lako, anNa sisangbukuri kadanNa urrambai tu deata bulituk sia Napamaleke tu mintu’ to nasanta’ saki,

17kumua anna sundun tu kadanna nabi Yesaya, tu nakua:

Iamo unnalai tu kamakuyuanta sia ussondokanni tu mintu’ sakinta.

Puang Yesu umparadan angin bara’ lan tasik

8:18-27

Mark 4:35-41; Luk 9:57-62

18Iatonna kitai Yesu tu to buda untikui, Nasuami (tu anak gurunNa) lamban lian.

19Saemi misa’ pandita Sura’ nakua lako: O Guru, la undina’ urrundu’Komi umba-umba Miola.

20Nakuami Yesu lako: Sindallung ia den sia lo’ko’na, sia mintu’na duka manuk-manuk den sia serangna, apa Anak rampan dilino Ia tae’ bang inan nanii ussurrukan ulunNa.

21Den pole’omi misa’ tau, iamo anak gurunNa, ma’kada lako nakua: O Puang, la messimanpa’ angku lao dolo umpeliang ambe’ku.

22Apa Nakua Yesu lako: Undiko urrundu’Na’ da’ito anna to matemora umpeliangi tu to matena.

23IatonNa Kendekmo tu Yesu langan lembang, undimi tu anak gurunNa.

24Pakalan saemi angin kapua lan tu tasik, naleanni bombang tu lembang; apa mamma’ bang Ia tu Yesu.

25Saemi tu anak gurunNa untundanNi, nakua: O Puang, tunduikanni, sabu’kanni!

26Nakuami ungkuanni: Ma’apai ammi mataku’, e to tangkan ma’patongan? Mangkato milikmi, Nata’tanni tu angin sia bombang; rapa’ bangmi.

27Mangnga nasangmi tinde tau, nakua: Mindaraka Ia te Tau te, na moi angin sia tasik unturu’ dukai tu parentaNa?

Da’dua to natamai deata masussuk dio Gadara

8:28-34

Mark 5:1-20; Luk 8:26-39

28Iatonna rampomo lian dio tana Gadara, saemi napessitammui da’dua to natamai deata masussuk, lu dio mai to’ liang, lendu’ ia masarrangna, naurunganni moi misa’ duka tau tae’ ussarai lendu’ dio to’ lalan iato.

29Melalla-lallami sola duai nakua: La siaparaki’, e AnakNa Puang Matua? Iaraka Misae te, la saeKomi umpakario-riokanni dolo namane attunna?

30Denmi bai budai sangtuntunan marassan undaka’ kande sikambela tinde tau.

31Napalakumi deata masussuk lako Yesu nakua: IamMi la urrambaikan, suakanni inde to lako bai sangtuntunan.

32Nakuami ungkuanni tu deata masussuk: Laomokomi. Sangsunammi tu deata masussuk nalao untamai tu bai, nasipettu’mu’-tu’muran nasang tu bai sangtuntunan dao mai aya’ mi’lan rokko tasik namate malammu’ diong to’uai.

33Sipa’dondo-dondoammi mallai tu to mangkambi’na tinde bai male tama tondok, napa’peissananni tu iannato, sia iatu diona tinde to nataba deata masussuk.

34Sangsunammi tu mintu’ pa’tondokan umpellambi’i Yesu; iatonna tiromi, mengkamoya-moyami lako kumua anNa soro’ lan mai lili’na tondokna.

Currently Selected:

MATIUS 8: SDA

Highlight

Copy