KADADIAN 15

Lampa kadanNa Puang Matua lako Abram

15:1-21

1Ta’kala tonna mangka tu mintu’nato, saemi kadanNa PUANG lako Abram lan patiro mendeata Nakua: Da mumataku’, e Abram, belanna Akumo tu balulang toto’mu sia rongko’ kapuamu.

2Ma’kadami Abram nakua: O PUANG Puangku, apara tu la Mikamaseanna’, belanna la tontong bangna’ susito, tang la keanak, na iatu Eliezer, to Damsyik, iamo la umpomana’ barang apangku?

3Sia nakuapa tu Abram: Tae’ tongan Mikamaseina’ bati’, manassa denni misa’ tu pa’kurinangku la umpomana’ barang apangku.

4Ta’kala saemi tu kadanNa PUANG lako kalena Nakua: Tangia tau iato la umpomana’ barang apammu, sangadinna misa’ to sun dilassakmu tu la umpomana’ barang apammu!

5Nasolammi Puang sun lako salian, Nama’kada Nakua: Mentingarako langngan langi’, bilangi tu mintu’ bintoen, ke mubelai umbilangi. Nakuami ungkuanni: Susi dukamoto tu bati’mu.

6Napatonganmi Abram tu PUANG, iamoto tu Nabilang Puang napomalolo Abram.

7Ma’kadami tu Puang lako kalena Nakua: Akumo tu PUANG, mangka ussolangko sun lan mai Ur, tondok to Kasdim, la umbenko te padang iate la musiosso’i.

8Ma’kadami tu Abram nakua: O PUANG Puangku, apara tu la ma’din kunii untandai kumua iate padang la kusiosso’i?

9Ma’kadami Puang lako kalena: AlanNa’ misa’ sapi birang tu tallung taun dadinna, sia misa’ bembe’ birang tu tallung taun dadinna, sia misa’ domba laki tu tallung taun dadinna sia bu’ku’ misa’ na burung misa’!

10Nabaami tu mintu’nato, nasesean nasangi, anna pasitingayoanni, apa iatu manuk-manuk napakalebu.

11Ta’pami tu pa’duku’ dio to’ passampan iato, apa narambai Abram.

12Iatonna lambunmo allo, ta’kala mamma’mi tu Abram, natarru’ leppengna narampoimi katirambanan sia nakabu’ kamapattangan kapua.

13Ma’kadami Puang lako Abram: La muissan tongan-tongan kumua iatu bati’mu la torro mempue to lan tondok tang napotondok sia la napokaunan to ma’tondok sia la napakario-rio a’pa’ ratu’ taunna.

14Apa iatu bangsa umpokaunanni, la Kupaolai salunna, namangkato la tassu’mi umbaa ianan sanda makamban.

15La sule marampa’ko sangtondok to dolomu, sia iapi ammu dipatama batu dilobang, ke lellenganna siamoko.

16Iatu bati’ ma’patang papa’mu la sule indete, belanna tae’pa nasundun langngan lolokna tu kakadakeanna to Amori.

17Ta’kala iatonna lambunmo allo sia malillinmo dio mai, denmi tu misa’ dapo’ merambu sia misa’ sulo ma’lana-lana urruak tangnga mintu’ passampan.

18Allo ia dukamoto anNa basse kada tu PUANG sola Abram, Nakua: Kubenmo bati’mu tu padang iate, angge dio mai salu Mesir landa’ lako salu kapua iamotu salu Efrat:

19tu naninna to Keni sia to Kenizi sia to Kadmon,

20sia to Het sia to Feris sia to Refaim,

21sia to Amori sia to Kanaan sia to Girgasi sia to Yebus.

Currently Selected:

KADADIAN 15: SDA

Highlight

Copy