Luk 8

Ebibaan̄ ebi ìkitap ubọk inyi Jisọs

1Sọnja mgbọ iraraka, Jisọs onenikijijen̄e ikana otutuuk ama ile mè asabọn ama ikilook ata etip eyi mkpulu eyi Awaji. Akọp mè ebi otuchieen̄ iba kan̄ ekekigọọk ọmọ ikijijen̄e ikana, 2ema mè usini ebibaan̄ ebi Jisọs olapbe ijo erumun̄ isibi me emen, mè igwa esese chieen̄ orukan̄ me lek. Erieen̄ ebibaan̄ cha ìre Meri ogwu Magidala ogwu Jisọs olapbe ijo erumun̄ jaaba isibi me emen, 3mè Juwana nwa kè Chusa ogwu ibot ikwaan̄ me uwu kè Erọdu, mè Susana, mè owuwa ofifi ebibaan̄. Ebibaan̄ chi ekisa ikpoko ubọk kiban̄, mè inu ema ekaan̄be itap ubọk inyi Jisọs mè ebi otuchieen̄ kan̄.

Urọk ogwu òwop mfut

(Mat 13:1-9; Mak 4:1-9)

4Ebi ene enenikigbuku inan̄a me ama ile geelek isibi inu me lek kè Jisọs. Jisọs onenito urọk inyi ema ibe, 5“Ene ge oninan̄a isi iwop mfut me uko kan̄. Mgbọ îkigwọ mfut cha ifiaak, usini orọrọn̄ me eden̄ oniin̄. Ebi ene ejajak me ukot iraka, ebi kè ofut enenitọk otutuuk imeen̄ isan̄a. 6Usini mfut cha orọrọn̄ me ijọn̄ ewuuk. Mgbọ îtibibe isibi, ikwakwaan̄ isan̄a mije kpunu mun̄ me irak ijọn̄ ya. 7Usini mfut orọrọn̄ me ijọn̄ ere ukpak okupbe. Ukpak melek mfut cha egbagbaan̄ itibi isibi. Ukpak cha otitibi ikana ichit nsek otu mfut cha. Ìkachieek ibe itibi ijaan̄, mè ito ata mfut. 8Ire, usini mfut cha orọrọn̄ me ata ijọn̄, mè itibi isibi, mè ito ogbogbo mfut òwawa igak echi esabe iwop, efit mgbọ.” Mgbọ Jisọs otobe urọk ya isan̄a, itutumu inyi ema ibe, “Ogwu ikaan̄ utọn̄ isasa inọ ikọ, inọ.”

9Ebi udun̄ kan̄ enenido ọmọ inu urọk ya osibibe. 10Jisọs otutumu inyi ema ibe, “Mîchili otutuuk nlelet inu eyi mkpulu Awaji ijeen̄ enyi, inyi enyi eriọọn̄. Ire, ǹkitumu ikọ me urọk inyi ebi ofifi ene, inyi,

“ ‘Ema mêmun̄, ire, kpebekọt imun̄ itat;

ema mênọ, ire, kpebekọt igobo itet.’#8:10 Asaya 6:9 ”

11Itutumu ikeyi isan̄a, inenibe ema, “Ibot urọk ya ìre ikeyi: Mfut ya ìre ikọ Awaji. 12Echi òrọrọn̄ me eden̄ oniin̄ ìre ebi ìnọnọ ikọ ya, ire, Yọk onunu initeen̄ ikọ ya isan̄a me ejit kiban̄, inyi ema ekakọt ìchieek, mè ìbọkọ unyan̄a. 13Mfut echi òrọrọn̄ me ijọn̄ ewuuk ìre ebi ìbọbọkọ ikọ ya itap me unwọọn̄ mgbọ ema enọbe. Ire, ikọ ya ìkatibi ugwun̄-ijọn̄ me emen kiban̄. Ema echieek me lek ikọ ya sọntiik mgbọ. Ire, mgbọ ntọ-mkpọ onube, ema ewawaka irọn̄. 14Mfut echi òrọrọn̄ me ijọn̄ ukpak ìkeke inyi ebi ìnọnọ ikọ ya, mè ibọkọ itap. Ire, ike mgbọ okije, uyọrọlek linyọn̄, mè ulọk inu ubọọn̄, mè ubelejit eyi linyọn̄ onenikana ichit ikọ ya, mè irọ inyi mfut kan̄ ikakikup ìkan, mè ìren̄e kubọk ge. 15Ire, mfut echi òrọrọn̄ me ata ijọn̄ ìkeke inyi ebi ìnọnọ ikọ ya, mè ibọkọ itap me ata ejit, mè itet ikaan̄, mè igban̄ utọn̄ me lek, mè ikat ejit ikeke inye mege ire mgbọ îtobe mfut.

Urọk mkpukan̄

(Mak 4:21-25)

16“Kpunu ogwu òkimin mkpukan̄ isan̄a, mè iben isi iyik me irak mkpilaak. Kpan̄asi ikeya, ìboben itoon̄ me inyọn̄ ngugọọn̄, inyi ene geelek òninin̄ uwu ya isa utoon̄ mkpukan̄ ya imọọn̄ inu. 17Inu geelek eletbe, mêsan̄a isibi me chieen̄ otutuuk ene. Inu geelek echitbe, mêchili ibook me emen utoon̄ inyi ebi ene eriọọn̄. 18Eya orọ, enyi ìriọọn̄ ubọk ìgban̄ utọn̄ me lek ikọ n̄a. Mije, ogwu ikaan̄ inu, mêkpọk inyi ene ya inu igbaalek eyi îwuukbe lek ikaan̄. Ire, ogwu ikakaan̄ge inu, ìrere sọntiik inu eyi îkeekbe ibe ọmọ îtet ikaan̄ inye, mêtet ibọkọ isan̄a me ubọk.”

Nga kè Jisọs mè ebi ngwan̄ kè Jisọs

(Mat 12:46-50; Mak 3:31-35)

19Mgbọ Jisọs okitumu ikọ ya, nga kan̄ mè ebi ngwan̄ kan̄ enunu ibenimun̄ ọmọ. Ire, kpekọt ije igbet ere ọmọ okupbe, mije ebi ene ewabe enenen. 20Ene ge me etete ebi ife cha ojeje isi itumu inyi ọmọ ibe, “Kpọ nga kwun̄ mè ebi ngwan̄ kwun̄ me oyet ekekebe ikiweek imumun̄ owu.” 21Jisọs otutumu inyi otutuuk ebi ìkup me ere ya ibe, “Nga n̄a mè ebi ngwan̄ n̄a ìre ebi geelek ìnọnọ ikọ Awaji, mè ikirọ.”

Jisọs îrọ egwijo iwọ

(Mat 8:23-27; Mak 4:35-41)

22Usen ge, Jisọs onenitumu inyi ebi udun̄ kan̄ ibe, “Eji enesaba okwaan̄ oyô yi etoon̄ me usaba agan̄.” Ema eninin̄ uji ge, mè itap awala, mè ibene ikisaba okwaan̄ oyô ya. 23Jisọs osisiki ilaak me emen uji ya. Me ekakpọge chieen̄, unye efet okpọkpọ ibene ikiwut itoon̄ me inyọn̄ isi mun̄ me okwaan̄ oyô ya, mè ikitap mun̄ me uji me agba agan̄ iba. Ebi udun̄ kè Jisọs cha ebebene ikifieek owot ibe ke uji kiban̄ mônirek.

24Ema esisi itimi Jisọs, mè ibe ọmọ, “Ogwu Nte, ogwu Nte, eji mênichieen̄ me mun̄!”

Jisọs onanan̄a ikeke, mè igana inyi egwijo ya mè ekoon̄ ya. Egwijo ya owọwọ, isi mun̄ olilibi inyana. 25Jisọs onenido ebi udun̄ kan̄ ibe, “Ìre keke orọ enyi kpekaan̄ ichechieek?” Inu ya Jisọs orọbe okeke ema chieen̄, mè itet ema ukpook enenen.

Ema ebebene ikitumu me lek kiban̄ ibe, “Ìre kpasi ene ire ogwu, ogwu òkinyi ida, efet mè mun̄ okekigban̄ utọn̄ inyi ida kan̄?”

Jisọs îgwa ogwu ijo erumun̄ otapbe iraak

(Mat 8:28-34; Mak 5:1-20)

26Jisọs mè ebi udun̄ kan̄ enenisaba okwaan̄ ya, mè initoon̄ me agan̄ ijọn̄ ama ekigwen Gerasa eyi òkibene isi ikpọ agan̄ Galili me usaba agan̄ okwaan̄ oyô ya. 27Mgbọ Jisọs onan̄abe me uji ya isibi, mè ije inene ijọn̄, ogwu enerieen̄ ge ijo erumun̄ okupbe me emen onanan̄a me ama ya isibi inichichini ọmọ. Îfiin̄ mgbọ ogwu enerieen̄ ya obenebe ikije njak ikana ere, mè ikiluk me emen oron ekwukwu. Ìkayaka ìkiluk me uwu. 28Mgbọ ogwu enerieen̄ ya omun̄be Jisọs, itataan̄ ukpo, mè ilibi inu initọbọ ekpe me ukot kè Jisọs, mè ikitaan̄ ukpo itumu ibe, “Owu Jisọs Gwun̄ Awaji Ogwu Òbebene Ichit, òkiweek emi keke me lek? Soso, nriaak owu, kasulu emi osusut.” 29Ijo erumun̄ ya ìtumu ikọ ya, mije, Jisọs îwuuk lek igana inyi ibe inan̄a me emen ogwu enerieen̄ ya isibi. Owuwa mgbọ, ijo erumun̄ ya isibene me lek ogwu enerieen̄ ya, kpekikọt ikeme isiki. Isitap mkpọn me ubọk mè ukot isasa itet ọmọ ikaan̄ me ere ge, îra isọp mkpọn cha igwook. Ijo erumun̄ ya îra isa ọmọ ilibi inin̄ oron.

30Jisọs ododo ọmọ ibe, “Ìre keke ire erieen̄ kwun̄?”

Ibabak ibe ke erieen̄ kan̄ ìre “Urum,” mije, ijo erumun̄ òninin̄ me emen kan̄ îwa enenen. 31Ijo erumun̄ cha ekekiriaak Jisọs ibe ikaria ema ìsi ìtap me emen udọn̄ ikakaan̄ge okputut.

32Me ike mgbọ ya, owuwa okodi òjeje me urum òwa me agba agan̄ ge me inyọn̄ ogoon̄ ya okupbe ikirie urie. Ijo erumun̄ cha ebebeek Jisọs ibe itele inyi ema esi enin̄ emen okodi cha. Jisọs ochechieek. 33Ema enanan̄a me emen ogwu enerieen̄ ya isibi, mè isi inin̄ emen okodi cha. Otutuuk okodi cha olilibi inan̄a me inyọn̄ ogoon̄ ya ikwala isibi igwook me okwaan̄ mè inwọ mun̄, mè ikwaan̄ ita kpai.

34Mgbọ ebi ìkikpukpo okodi cha emun̄be inu ya òrọrọ, ema elilibi inin̄ emen ama òkup me otutuuk agba ijọn̄ ya, mè isi ikilook inu ema emun̄be ikana. 35Ebi ene egbugbuku isibi ibenisa chieen̄ kiban̄ imun̄ inu ya òrọrọ. Ema enenire lek kè Jisọs, mè imun̄ ogwu ijo erumun̄ onan̄abe me emen isibi ya okweekbe irek me ijọn̄ me ukot kè Jisọs, mè ofọnti me lek, mè iriọọn̄ lek kan̄. Ukpook otetet otutuuk kiban̄. 36Ebi ìkukup me ere ya imun̄ mgbọ inu ya orọbe, ebeben otutuuk ike Jisọs osabe igwa ogwu iraak ya ikpa inyi ebi ìnunu cha. 37Otutuuk ebi Gerasa, mè ebi ìnan̄a me bọn ama òkup me agan̄ ya ebebene ikiriaak Jisọs ibe isibi me inyọn̄ ijọn̄ kiban̄. Ema etumu ikọ ya, mije, inu ya Jisọs orọbe îtet ema ukpook enenen. Mije keya, Jisọs ogwugwu ikom isi inin̄ uji, mè ikọp isaba okwaan̄ oyô ya ifo agan̄ ema enan̄abe inu, ọmọ me ebi udun̄ kan̄. 38Sabum ema enisan̄a uji me ijọn̄, ogwu enerieen̄ ya Jisọs ogwabe iraak me lek orariaak Jisọs ibe itele inyi ọmọ igọọk ogwugwu ifo. Ire, Jisọs ojijit, mè itumu inyi ọmọ ibe, 39“Gwu kom fo, mè si kpa ata inu Awaji orọbe inyi owu nyi ebi ene.” Ogwu enerieen̄ ya ogwugwu ikom ifo, mè ikije ikana otutuuk ama ya ikikpa ikpele inu Jisọs orọbe inyi ọmọ inyi ebi ene.

Jisọs îgwa ogwu enenwaan̄ eje okisibi me lek, mè ijomo gwun̄ kè Jairọs

(Mat 9:18-26; Mak 5:21-43)

40Mgbọ Jisọs osababe okwaan̄ itoon̄ me agan̄ mgbọ înan̄abe ya, ebi urum ene ìkukup me atasuk ya ebọbọkọ ọmọ itap, mije, ema ekukup me ere ya ikibem mgbọ ìboka. 41Mgbọ ife cha ekibọkọ Jisọs itap, ogwu ibot uwu ntitiin̄ ge ekigwen Jairọs, onunu, mè inirọn̄ me ijọn̄ me ukot kè Jisọs, mè ikiriaak ibe inigọọk ọmọ isi uwu kan̄, 42mije ke ibot gwun̄ enenwaan̄ ge gaalek ọmọ okaan̄be, òsoso akọp mè acha iba, mônigak ọmọ ikwu.

Mgbọ Jisọs okigọọk ọmọ ije, ogbogbo ene efafan̄a ichit Jisọs me oniin̄ ya. 43Ogwu enenwaan̄ ge, eje okisibi me lek otutuuk akọp mè acha iba, òwa me etete ife cha. Ogwu enenwaan̄ ya îfiat otutuuk ikpoko îkaan̄be inyi ebi ofia, ire, kpunu ogwu òkọkọt igwa ọmọ. 44Ike owuwa ebi ene ekanabe ichit Jisọs, ogwu enenwaan̄ ya onanan̄a me agan̄ udun̄ ikichichiki me etete ebi ene cha, mè ije inire lek kè Jisọs, mè ichak ubọk me otu utọn̄ ofọnti kè Jisọs. Mgbọ yaage, eje ya ofefieek.

45Jisọs oraraan̄ chieen̄, mè ikido ibe, “Ìre ekene ochak emi ubọk me lek?”

Mgbọ otutuuk ene ebe ke ìkare ema, Pita onenitumu inyi Jisọs ibe, “Ogwu Nte, ebi ene ekpọkpọ ikana ichit owu, mè ikinwan owu.”

46Ire, Jisọs okpọkpọk itumu ibe, “Ene ge îchak emi ubọk me lek, mije, nriọọn̄ ibe ke unye înan̄a emi me emen isibi.”

47Mgbọ ogwu enenwaan̄ ya omun̄be ibe ke ọmọ ìkakọt ìlet, isasan̄a lek kan̄ isibi, mè ikiran, mè inirọn̄ me ijọn̄ me ukot kè Jisọs. Me isi otutuuk ene me ere ya, ibeben inu òrọrọ ọmọ ochakbe ubọk me lek kè Jisọs ikpa, mè ikpa si ibe ke mgbọ yaage ọmọ ochakbe ubọk me lek kè Jisọs, lek kan̄ onyenye. 48Jisọs onenitumu inyi ọmọ ibe, “Gwun̄ enenwaan̄, ichechieek kwun̄ îrọ inyi lek kwun̄ inye. Fo me esuuk.”

49Jisọs òkitumu ikọ ya me otu, ene ge onanan̄a me uwu kè Jairọs ogwu ibot uwu ntitiin̄ ya inu, mè inibe Jairọs, “Kayaka ìmama lek ìsisaak ogwu ijejeen̄, ke gwun̄ kwun̄ enenwaan̄ ya îkwu.”

50Mgbọ Jisọs onọbe etip ya, itutumu inyi Jairọs ibe, “Kafieek owot! Kaan̄ ichechieek, ke lek gwun̄ ya mônye.” 51Mgbọ Jisọs orebe uwu kè Jairọs, ìkachieek ibe ene geege igọọk ọmọ inin̄ emen agwut ere emaan̄be gwun̄ enenwaan̄ ya, ita me lek Pita, mè Jọn, mè Jemis, mè nte gwun̄ ya, mè nga gwun̄ ya gaalek. 52Me ike mgbọ ya, otutuuk ebi ama ya ìninin̄ ijot uwu ya mêkito ito, mè ikifieek ejit inyi gwun̄ ya. Jisọs onyinyi ema ida ibe, “Ikayaka ìto ito! Gwun̄ enenwaan̄ ya ìkakwukwu, ìkilalaak.” 53Ife cha echachak ọmọ ichep, mije, ema mîriọọn̄ ibe ke gwun̄ enenwaan̄ ya îkwu. 54Ire, Jisọs otetet gwun̄ enenwaan̄ ya me ubọk, mè itumu inyi ibe, “Gwun̄ n̄a, nan̄a keke!” 55Ekwukwu gwun̄ ya oyayaka igwu ikom ininin̄ emen gwun̄ ya. Ijojomo, mè inan̄a ikeke mgbọ yaage. Jisọs obebe ogwu uga mè ogwu ute enyi gwun̄ ya inorie mè irie. 56Inu ya ogwogwook ogwu ute mè ogwu uga mbiribọ me lek. Ire, Jisọs otataba ema ubọk me utọn̄ ibe ekakpa inu ya ìnyi ene geege.

Currently Selected:

Luk 8: Obolo

Highlight

Copy