Luk 7

Ichechieek ogwu ibot akọn̄ ge okaan̄be

(Mat 8:5-13)

1Mgbọ Jisọs otumube ikọ chi inyi ebi ife cha isan̄a, inanan̄a me ere ya ije ifo ama Kapanọm. 2Me ama ya, îkaan̄ ogwu ibot akọn̄ ge òkakaan̄ gwun̄ uwu ge îmabe enenen, mè itoon̄ ejit me lek. Me ike mgbọ ya, gwun̄ uwu ogwu enerieen̄ yi îfiak enenen, mè igbet mkpa. 3Mgbọ ogwu ibot akọn̄ yi onọbe inu ofolek kè Jisọs, iraria usini ebi ugane ebi Ju ibe esi etumu enyi ibe soso, mè ogwugwu inye lek inu inigwa gwun̄ uwu kan̄ inyi ọmọ. 4Ife cha enunu me lek kè Jisọs, mè iniriaak ibe, “Soso, na si gwa gwun̄ uwu ene yi, ke ene yi îgbe ogwu owu môtapbe ubọk inyi me oniin̄ òkup ikeyi. 5Mije, ogwu enerieen̄ yi îma eji ebi Ju enenen, mè inama uwu ntitiin̄ inyi eji.” 6Jisọs onanan̄a igọọk ema ije.

Mgbọ ema ejebe igbet ere uwu ogwu ibot akọn̄ ya, ogwu ibot akọn̄ ya oraria ebi unene kan̄ ibe enetumu enyi Jisọs ibe ikayaka ìsisaak lek ìje ìnu uwu kan̄, mije ke ọmọ ìkagbe ogwu ogwugwu obonin̄ uwu kan̄; 7ke îre mije keyi ke ọmọ omọnọ ibe ke ọmọ ìkagbe ogwu òbokọt ije inu inigwen ogwugwu isi mè isi. Soso, mè ogwugwu itumu ikọ otu gaalek, ke lek gwun̄ uwu kan̄ mônye. 8Mije ke ọmọ ìre ogwu òkup me irak ebi ibot akọn̄ ìbebene igak ọmọ. Ọmọ me lek kan̄ îyaka ikaan̄ si ebi akọn̄ me irak kan̄. Ọmọ isinyi ene ge ida ibe, je, ke ìbojeje. Ọmọ iyaka ibe ofifi ene, na, ke ìbonunu. Ọmọ ibe gwun̄ uwu kan̄, rọ ikeyi, ke ìborọrọ.

9Ikọ ene ya otumube okeke Jisọs chieen̄. Igwugwu isi ikom, mè itumu inyi ebi ogbogbo ene cha ìkigọọk ọmọ me udun̄ ibe, “Ǹkitumu inyi enyi ibe ke ǹkararak ìchichini ojelek ikpele ichechieek òkup ikeyi, ìrere me otutuuk ido ebi Ijeren.” 10Ebi ikwaan̄ cha egwugwu ikom ifo uwu ogwu ibot akọn̄ ya, mè isi imun̄ ibe ke lek gwun̄ uwu kan̄ ya înye isan̄a.

Jisọs îjomo gwun̄ ogwu nwakpa ge me mkpa

11Mgbọ eya orakabe, Jisọs oneninan̄a me Kapanọm ije isi ama ekigwen Nên. Ebi udun̄ kan̄ mè ogbogbo ene mîgọọk ọmọ isi ama ya si. 12Mgbọ ema ekije igbet otunchit ama ya, ema emumun̄ ebenbe nkwukwu ene me inyọn̄ m̀kpata ibesa isibi isi ifuun̄. Gwun̄ enerieen̄ ya òkwukwu ìre gwun̄ ibot ge ogwu uga okaan̄be. Ogwu uga si ìre nwakpa. Owuwa ene enanan̄a me ama ya igbuku isibi ikigọọk nwakpa ya ije. 13Mgbọ Okaan̄-ene omun̄be nwakpa ya, njijin ogwu enenwaan̄ ya otetet ọmọ enenen. Itutumu inyi ibe, “Kayaka ìto ito.”

14Mgbọ îtumube ikeya isan̄a, ijeje isi lek ebi ìbeben nkwukwu ene ya, mè itet ubọk me lek m̀kpata ya, ife cha eyayaka ikeke. Itutumu inyi nkwukwu ene ya ibe, “Gwun̄ enerieen̄, m̀be owu, nan̄a keke!” 15Ogwu òkwukwu ya obebene lek ikweek irek, mè ibene ikitumu ikọ. Jisọs osasa ọmọ ikana itap me ubọk ogwu uga.

16Ukpook otetet otutuuk ebi ìkup me ere ya. Ema ebebene ikitọn̄ Awaji, mè ikitumu ibe, “Ikpele ogwu nriran îra inu me etete kiji! Awaji îra inu ineninyan̄a ebi kan̄.” 17Etip inu yi Jisọs orọbe otataan̄ ikana otutuuk agan̄ Judia, mè otutuuk asabọn ama geelek òkana Judia okokop.

Jọn ògwook mun̄ îweek irọriọọn̄ ogwu Jisọs orebe

(Mat 11:2-19)

18Ebi udun̄ kè Jọn enenikpa otutuuk inu chi Jisọs orọbe inyi Jọn. Jọn onenigwen ene iba me lek kiban̄, 19mè iria ibe, “Ìsi ìdo-nu Okaan̄-ene ibe, ìre ogwugwu ore ogwu òbonunu ya? Sà ìre eji ekup ekpọ ofifi ene?”

20Mgbọ ebi osat kè Jọn cha enube me lek kè Jisọs, ema enenitumu inyi ọmọ ibe, “Jọn ògwook mun̄ oria eji inu me lek kwun̄ ibe eji enedo eriọọn̄ me otu kwun̄, mè ìre owu ore ogwu òbonunu ya? Sà ìre eji ekup ekpọ ofifi ene?”

21Me ike mgbọ yaage, Jisọs ogwagwa owuwa ebi orukan̄, mè ilap ijo erumun̄ isibi me emen owuwa ene, mè irọ inyi ebi ǹnàan̄ emọọn̄ inu. 22Eya orọ, Jisọs ofọfọọk ebi osat kè Jọn cha ibe, “Ìfon, mè ìsi ìkpa otutuuk inu enyi esabe chieen̄ kinyi imun̄, mè isa utọn̄ kinyi inọ, ìnyi Jọn. Ìkpa ìnyi ibe ke ebi ǹnàan̄ mêkimọọn̄ inu, ebi akọọk mêkije ije, ebi ìnan mêkinọ ikọ, mîgwa ebi inyakpa, mè ijomo ebi ìkwakwaan̄. Ìkpa si ìnyi ibe ke mîlook ebi ugbọọn̄ ata etip. 23Uga ubelejit okup inyi ene geelek ogwu ikanan̄age ìrọn̄ mije n̄a.”

24Mgbọ ebi ikwaan̄ kè Jọn cha egwube ikom ifo, Jisọs obebene ikitumu ikọ ofolek kè Jọn inyi urum ebi ene ìkup me ere ya, mè ikido ema ibe, “Mgbọ enyi esibibe isi lek kè Jọn me emen èwê, ìre keke ke enyi esi ikpọ? Ìre enyi esi ikpọ mbubet efet okiwumu iyaka imaan̄? 25Ire ìkare eya, ìre keke ke enyi esibi isi ikpọ ni? Ìre enyi esi ikpọ enerieen̄ òsasa ujuja unye otu ewe ofọnti ibala lek? Ire ebi ìkiluk ubene ugwem, mè ikitap ofọnti unye otu ewe, ojelek kè ebiba ekiluk me uwu ebi ubọọn̄, kpekikup me emen èwê. 26Ire, ǹdo-nu enyi. Ìre keke ke enyi esibi isi ikpọ? Ìre ogwu nriran ke enyi esi ikpọ? Iin̄, ǹkitumu inyi enyi ibe ke Jọn îmin igak ogwu nriran. 27Mije, îre ọmọ ke ege inu ofolek me Ikpa Mbuban ibe ke Awaji ìbe,

“ ‘Emi mâria gwun̄ ikwaan̄ n̄a ibe idasi ije me isi kwun̄,

mè isi inen̄e oniin̄ isun̄ iban owu.’#7:27 Mal 3:1

28“Me atikọ, ǹkitumu inyi enyi ibe, me etete ebilene, kpunu ene geege emanbe, ogwu òmimin igak Jọn. Ire, ogwu òsisip ichit me emen mkpulu eyi Awaji îmin igak Jọn.” 29(Mgbọ otutuuk ebi ìkup me ere ya, ògak ge, ebi ìkibọkọ otitip ido, enọbe ikọ cha Jisọs otumube ibak Jọn, ema echechieek ibe ke inu ya ìrọ igọọk me nkeek Awaji me atikọ. Mije, ema cha ìre ebi Jọn ogwookbe mun̄. 30Ire, ebi Farisi mè ebi ìjeen̄ Ikan mîjit nkeek Awaji okaan̄be me lek kiban̄, mije ema ekachieekge ibe Jọn igwook ema mun̄.)

31Jisọs obebene ikitumu ibe, “Ìre m̀basa ebi mgbọ kechi itọ me lek keke mọnọ? Ìre ife chi ebet lek keke mọnọ? 32Ebi ukot kechi ekup kubọk nsabọn ìsisiki ikweek me oyet ifit. Ebi agan̄ ge ekekitaan̄ ukpo itumu inyi ebi agan̄ keyilọ ibe,

“ ‘Eji mîkwak okwa ijọk inyi enyi,

enyi kpechieek ijojop.

Eji mîyaka ikwak okwa ito inyi enyi,

mun̄ ito ìkasibi enyi me chieen̄.’

33Mije, mgbọ Jọn ògwook mun̄ onube, ìkakirie inorie, ìkakinwọ si miin̄. Enyi ebebe ke ijo erumun̄ me emen kan̄. 34Ire, mgbọ Gwun̄ Ebilene onube, mè ikirie inorie, mè ikinwọ miin̄, enyi ebebene ikitumu ibe ke ogwugwa ìre ogwu ebek ile, mè ogwu usa-miin̄, ogwu òkigọọk ebi ìkibọkọ otitip ido, mè ofifi ebi ijo ife ìkup esese esese ikitet unene. 35Ire, inan̄a me lek ebi ìbọbọkọ iriọọn̄-inu eyi Awaji itap, ebi ene mêmun̄ ibe ke iriọọn̄-inu eyi Awaji ore eyi òtatat.”

Enenwaan̄ òrọ ijo îken Jisọs aran̄

36Usen ge, ogwu Farisi ge onenigwen Jisọs isa isi iriak ichen me uwu kan̄. Jisọs osisi, mè igọọk isiki ikweek irek me lek ikasi me uwu ya ikirie inorie. 37Mgbọ ogwu enenwaan̄ òje oyet ge me ama ya onọbe ibe ke Jisọs òwa me uwu ogwu Farisi ya okupbe ikirie ichen, imọmọnọ iko ge esabe ewuuk ekigwen alabasita irom, eyi aran̄ utop olu ojotbe emen, ikaan̄ me ubọk isa ije inu uwu ya. 38Mgbọ îrebe uwu ya, iraraka inin̄, mè isi ikeke me ukot kè Jisọs, me agan̄ udun̄, mè ibene ikito ito. Mun̄ ito ònan̄a me chieen̄ kan̄ okekirọn̄ọ igwook me ukot kè Jisọs. Ogwu enenwaan̄ ya okekisa ijeek ibot kan̄ ituku mun̄ ito ya, mè ikisa otu ifip ukot iba kè Jisọs, mè inichili iko ya, mè ikana aran̄ ya òkup me emen igwook me ukot iba kè Jisọs.

39Mgbọ ogwu Farisi ya omun̄be inu ya òrọrọ, ibebene ikitumu inyi lek kan̄ ibe, “Mebe ene yi ìre ogwu nriran, kè oriọọn̄ ojelek ene ogwu enenwaan̄ yi òkitet ọmọ ubọk me lek orebe. Ogwu enenwaan̄ yi ìre ogwu ijo.”

40Jisọs onenibe ọmọ, “Saimọn, nkaan̄ ikọ ge mbatumu inyi owu.”

Ogwu Farisi ya ofọfọọk ọmọ ibe, “Ogwu Ijejeen̄, tumu nyi emi ma!”

41Jisọs onenito urọk ge ibe, “Îkaan̄ ebirieen̄ iba ìfọfọọk ikpoko me ubọk ogwu enerieen̄ ge òkinyam ikpoko. Ene ge ofọọk efit dinari go, sà ogwulọ ofọọk akọp dinari go. 42Me lek kiban̄ ene iba cha, kpunu ogwu òkakaan̄ ikpoko isa isi ikpe urieek kan̄ inyi ogwukaan̄ ikpoko ya. Mije keya, ogwukaan̄ ikpoko ya ofufuk urieek ene iba cha ichep inyi lek kan̄, mè ibe ife cha ekayaka ìkpe ọmọ urieek cha, ke ọmọ îtele inyi ebibi.” Jisọs itoto urọk ya isan̄a, inenido ibe, “Me etete ebi urieek iba cha, ìre ogwu owa oboma ogwu òtetele urieek inyi ema ya ichit?”

43Saimọn ofọfọọk ibe, “Me nkeek n̄a, îre ogwu urieek kan̄ ominbe igak oboma ogwu òtetele urieek inyi ema ya ichit.”

Jisọs obebe ọmọ, “Owu ofọọk itat.”

44Itutumu ikeya isan̄a, ineniyaka isi ikweek ogwu enenwaan̄ ya, mè itumu inyi Saimọn ibe, “Ke omun̄ ogwu enenwaan̄ yi? Emi nnu me uwu kwun̄, owu òkanyi emi mun̄ ǹsa ǹgwọk ukot kubọk orọmijọn̄ kiji oweekbe. Ire, mun̄ ito ònan̄a me chieen̄ ogwu enenwaan̄ yi ke ogwu enenwaan̄ yi osa igwọk emi ukot, mè isa ijeek ibot kan̄ ituku emi ukot ichat. 45Owu òkakat emi mgbọ nnin̄be uwu kwun̄ kubọk orọmijọn̄ oweekbe. Ire, bene me karake nnin̄be uwu kwun̄, ogwu enenwaan̄ yi ìkpọkpọ ikifip ukot n̄a. 46Mgbọ nnube me uwu kwun̄, owu òkatọkọ emi aran̄ me ibot kubọk orọmijọn̄ okupbe. Ire, ogwu enenwaan̄ yi îsa aran̄ utop olu iniken emi me ukot agan̄ iba. 47Eya orọ, ǹkitumu inyi owu ibe ke ikpele imumechieen̄ ogwu enenwaan̄ yi okaan̄be ìkijeen̄ ibe ke mîtele ogbogbo ijo inu kan̄ inyi ọmọ. Ikeya si, ikaan̄ ogwu ikaan̄ sọntiik imumechieen̄ gaalek, ìsibi ibe ke îre sọntiik ijo inu gaalek ke etele inyi ene ya.”

48Jisọs onenitumu inyi ogwu enenwaan̄ ya ibe, “Ogwu enenwaan̄, mîtele otutuuk ijo kwun̄ inyi owu.”

49Ebi melek kiban̄ ìkukup me lek ikasi ya ebebene ikinunuun̄ me etete kiban̄ ibe, “Ìre kpasi ene ire ogwu òyaka inikitele ijo inyi ene?”

50Jisọs otutumu inyi ogwu enenwaan̄ ya ibe, “Ichechieek kwun̄ înyan̄a owu! Fo me esuuk.”

Currently Selected:

Luk 7: Obolo

Highlight

Copy