Luk 4

Ntọ-mkpọ kè Jisọs

(Mat 4:1-11; Mak 1:12-13)

1Jisọs onenije inan̄a me agba okwaan̄ Jodan ya, mè Ekwukwu Mbuban me emen kan̄. Ekwukwu Mbuban onenisa ọmọ ifo emen èwê. 2Ere ya ke Yọk otọ ọmọ ikpọ akọp usen ini. Me otutuuk usen cha îkupbe me ere ya, ìkarie inorie geege. Uraafiọọn̄ otataka ọmọ enenen mgbọ usen cha otabe.

3Yọk onunu me lek kan̄, mè itumu inyi ọmọ ibe, “Ire owu ore Gwun̄ Awaji, tumu-nu nyi ewuuk chi ibe ikana inorie.”

4Jisọs ofọfọọk ọmọ ibe, “Ege me Ikpa Mbuban ibe, ‘Ìkare inorie gaalek ke ene obokisa iluk ugwem.’#4:4 Ikan 8:3 ”

5Yọk onenisa Jisọs ije isi inene ere ge òbebene, mè isa sọntiik mgbidim mgbọ ikeke me ere yaage ijeen̄ ọmọ otutuuk ama ubọọn̄ geelek eyi linyọn̄ keyi ere ebilene elukbe, 6mè initumu inyi ọmọ ibe, “Kpọ, emi mâyaka otutuuk inu ubọọn̄ eyi ama ubọọn̄ chi, mè unye isasa ikikpulu ema otutuuk inyi owu, mije, mîyaka otutuuk kiban̄ itap emi me ubọk. Emi mâkọt iyaka ema inyi ene geelek òneneme emi. 7Eya orọ, ire owu otọbọ ebum inyi emi, otutuuk ama ubọọn̄ chi môkana ire echi kwun̄.”

8Jisọs ofọfọọk ọmọ ibe, “Ege me Ikpa Mbuban ibe, ‘Tọbọ ebum nyi Okumugwem Awaji kwun̄, mè kisi ikwaan̄ nyi ọmọ gaalek.’#4:8 Ikan 6:13 ”

9Yọk osasa Jisọs isi me ere òbebene ichit me inyọn̄ Uwu Mbuban me Jeruselem, mè itumu inyi ọmọ ibe, “Ire owu ore Gwun̄ Awaji, nan̄a me ere yi wulu keke me ijọn̄ nu. 10Mije, ege me Ikpa Mbuban ibe,

“ ‘Awaji mônyi ebi osat kan̄ ida

ibe eriọọn̄ ubọk ekpọ owu chieen̄ me lek.

11Ebi osat cha mêben owu ikaan̄ me ubọk kiban̄,

inyi owu okatọbọ ukot me lek ewuuk.’#4:11 Itọn̄ 91:1,12 ”

12Jisọs ofọfọọk ọmọ ibe, “Ege me Ikpa Mbuban ibe, ‘Katọ Okumugwem Awaji kwun̄ ìkpọ.’#4:12 Ikan 6:16 ”

13Yọk itọtọ Jisọs ikpọ me agan̄ geelek isan̄a, itetele ọmọ, mè ikikup ikpọ mgbọ ọmọ môyakabe ikaan̄ ofifi irek ikpọk initọ Jisọs ikpọ.

Mîjit Jisọs me Najeret

(Mat 13:53-58; Mak 6:1-6)

14Jisọs onenigwu ikom ika inu Galili, melek unye Ekwukwu Mbuban me emen kan̄. Etip kan̄ otataan̄ ikana otutuuk agan̄ ya. 15Inenikijeen̄ inu me uwu ntitiin̄ òkup me ama cha. Otutuuk ene ekekitọn̄ ọmọ.

16Jisọs oneninan̄a me agan̄ ya ije isi Najeret ere ekpukpobe ọmọ isibi, mè ije isi uwu ntitiin̄ kiban̄ me Usen Mbuban, ike îkirọ me Usen Mbuban geelek. Ineninan̄a ikeke ibofuk Ikpa Mbuban. 17Enenisa ikpa ogwu nriran Asaya ijet ọmọ ibe ifuk. Ibọbọkọ, mè ichili. Chieen̄ kan̄ olilibi itoon̄ me ere ge, ifufuk. Ere chieen̄ kan̄ olibibe itoon̄ ya ìre ere egebe ibe,

18“Ekwukwu Okumugwem òwa me lek n̄a,

mije, Okumugwem îgobo emi

ibe emi ǹsi ǹlook ebi ugbọọn̄ ata etip.

Îria emi ibe ǹsi ǹlook ebi ìkup me mkpọn

ibe ke mîsan̄a ebibi isibi me mkpọn,

mè ǹsi ǹlook ebi ǹnàan̄ ibe ke ebibi mêkọt imọọn̄ inu,

mè ǹsan̄a ebi ekirọ ikeme ǹsibi me irak ubọk ufialek,

inyi ekaan̄ utelelek.

19Îria emi si ibe emi ǹnu ǹnenlook ibe ke mgbọ

Okumugwem obonyan̄a ebi kan̄ isibi îre.”#4:19 Asaya 61:1-2

20Jisọs ifufuk isan̄a, ichichit ikpa ya, mè iyaka itap me ubọk ogwu ikwaan̄ me uwu ntitiin̄ ya, mè isiki ikweek irek. Otutuuk ebi ìkup me uwu ntitiin̄ ya ekpọkpọ igwuun̄ ọmọ chieen̄ me lek. 21Inenitumu inyi ema ibe, “Cherekeyi, inu yi egebe me Ikpa Mbuban, eyi enyi esabe utọn̄ kinyi inọ, îrọ iso me chieen̄ kinyi.”

22Ata ikọ òkinan̄a ọmọ me otu isibi okpọkpọ ikitop otutuuk ebi ìkup me uwu ntitiin̄ ya me lek, mè ike ema chieen̄ enenen. Ema ekekitumu ibe, “Ìre ìkafat ìre gwun̄ kè Josefu ore ogwu?”

23Jisọs onenitumu inyi ema ibe, “Emi nriọọn̄ ibe ke enyi mêto urọk inyi emi ibe, ‘Ogwu ofia, gwa lek kwun̄ nu! Inu cha geelek eji enọbe ibe ke owu orọ me Kapanọm, rọ-nu inu cha me ere keyi, òrere ama kwun̄, inyi eji egọọk emun̄.’ ”

24“Me atikọ, ǹkitumu inyi enyi ibe ke ogwu nriran ìkakikaan̄ umin me ama kan̄. 25Me atikọ, owuwa ebi nwakpa òwa me Ijeren me ukot kè Ilaija ogwu nriran, me mgbọ ibot ikayakage ìrep otutuuk acha ita mè onyan̄ gweregwen, eyi ikpele akan̄ onin̄be ikana otutuuk ido geelek. 26Ire, Awaji ìkaria Ilaija ìsi me lek nwakpa Ijeren geege. Kpan̄asi ikeya, Awaji ìria Ilaija isi me lek nwakpa ge me ama Jerefat me agan̄ Sidọn. 27Ikeya si, owuwa ebi orukan̄ inyakpa òwa me Ijeren me ukot kè Ilaisia ogwu nriran. Ire, kpunu ene geege me etete kiban̄ ogwu Ilaisia ogwabe. Kpan̄asi ikeya, îre Nieman ogwu ònan̄a me ido Siria gaalek ke Ilaisia ogwa.”

28Otutuuk ebi ìkup me uwu ntitiin̄ ya, mè inọ ikọ cha Jisọs otumube enanaan̄ ejit enenen, 29mè inan̄a ikeke jîp, mè inin̄ Jisọs gìrìrìm, mè ibieen̄ ọmọ isibi me emen ama ya, mè isa ọmọ ije ifo ere òkup ngigo ngigo me inyọn̄ ogoon̄ ere ama Najeret okekebe, ibesi ibieen̄ ọmọ itọp, mè inan̄a me ere ya irọn̄ me ijọn̄ me ebon ogoon̄ ya, mè ikwu. 30Ire, Jisọs okpọkpọ ije itibi me etete urum kiban̄, mè ije isibi isi ere ìbosi.

Jisọs îrieen̄ ijo erumun̄ isibi me emen ene

(Mak 1:21-28)

31Jisọs onanan̄a me Najeret ije isi Kapanọm, ama òkup me Galili, mè ibene ikijeen̄ ebi ene inu me Usen Mbuban. 32Inu ya îkijeen̄ okpọkpọ ike ebi ene chieen̄, mije ìkijeen̄ ikọ Awaji ya kubọk ogwukaan̄ ikọ ya me lek kan̄.

33Me emen uwu ntitiin̄ ya, ogwu enerieen̄ ge òwa, ogwu ijo erumun̄ okupbe me emen. Ogwu enerieen̄ yi otataan̄ ukpo itumu inyi ọmọ ibe, 34“Ìre keke ke okiweek eji me lek, owu Jisọs ogwu Najeret? Ìre ònu ibonijijaka eji? Nriọọn̄ owu ijaan̄ lek. Owu ìre Ogwu Òkup Mbuban, ogwu Awaji oriabe inu.”

35Jisọs orarama ọmọ mgbọ yaage ibe, “Chit otu! Nan̄a sibi me emen ogwu enerieen̄ ya.” Ijo erumun̄ ya obeben ogwu enerieen̄ ya itọbọ me ijọn̄ me isi otutuuk ife cha, mè inan̄a me emen kan̄ isibi. Ire, ìkasak unan geege me lek ogwu enerieen̄ ya.

36Inu ya òrọrọ okwukwu ebi ene lek enenen. Ema ekekitumu me lek kiban̄ ibe, “Iyak! Ijejeen̄ keyi ye? Sà unye keyi ye? Ikọ otu ikike ke ene yi otumu inyi ijo erumun̄, ijo erumun̄ ogbagban̄, mè inan̄a me emen ene isibi.” 37Etip kè Jisọs otataan̄ ikana otutuuk ama òkup me agan̄ ya.

Jisọs îgwa owuwa ebi orukan̄

(Mat 8:14-17; Mak 1:29-34)

38Jisọs oneninan̄a me uwu ntitiin̄ ya isibi, mè ije isi uwu kè Saimọn. Mgbọ ya, ukan̄ îbak nga nwa kè Saimọn me lek enenen. Ebi ene etutumu inyi Jisọs ibe initap ubọk irọ inyi lek ogwu enenwaan̄ ya inye. 39Jisọs okwukwuun̄ isi ikpọ ogwu enenwaan̄ ya me inyọn̄ mkpilaak, mè igana ere inyi orukan̄ ya, orukan̄ ya otetele ogwu enenwaan̄ ya, lek kan̄ onyenye. Inanan̄a ikeke mgbọ yaage, mè isi ikirọ inorie inyi ema.

40Me agan̄ ikakwun̄ usen ya, ebi ene ekpukpulu otutuuk ebi kiban̄ ebi chieen̄ orukan̄ geelek okifiak isa ijet Jisọs ibe igwa. Jisọs ototoon̄ ubọk me lek kiban̄ me ge me ge, mè igwa otutuuk kiban̄ isan̄a. 41Ògak ge, Jisọs îrieen̄ si ijo erumun̄ isibi me emen owuwa ene. Ijo erumun̄ cha ekekitaan̄ ukpo itumu inyi Jisọs ibe, “Owu ore Gwun̄ Awaji!” Ire, Jisọs okekigana inyi ema ibe echit otu. Ìkachieek ibe ema esan̄a amọn, mije, ema mîriọọn̄ ibe ke Jisọs ore Karais ya.

42Me ofit iwele kan̄, me agan̄ egwe, Jisọs ojeje isibi me ama ya isi ere ònọnọọn̄. Ebi ene ekekijijen̄e ikana ikiweek ọmọ. Mgbọ ema eweekbe ọmọ imun̄, ema eweweek irọrọ inyi ọmọ igọọk ema iluk, mè ikatele ema. 43Ire, Jisọs ofọfọọk ema ibe, “Mâsi ilook si ata etip ofolek mkpulu eyi Awaji me ama kechilọ si. Îre mije keya ke Awaji oria emi inu.” 44Ikeya ke Jisọs ojijen̄e ikana otutuuk uwu ntitiin̄ òkup me agan̄ Judia ikitumu ikọ Awaji.

Currently Selected:

Luk 4: Obolo

Highlight

Copy