Jọn 19

Pailet îtip Jisọs oyerebet mkpa eyi uti nkwurieen̄

1Pailet onenisa Jisọs inyi ebi akọn̄ ibe esulu me njijan̄. 2Ebi akọn̄ cha enenisa ukpak ilọk okpibot ubọọn̄, mè isa ikwuun̄ ọmọ me ibot, mè itap ọmọ ujọn̄ọ ofọnti irio irio eyi ebi ubọọn̄ ekitap. 3Mgbọ ema ebalabe ọmọ ikeya isan̄a, ema ekekije isi ikitọp ọmọ amọn ibe, “Ogwu ubọọn̄ ebi Ju, eji mînyi owu amọn!” Isitumu ikeya, mîra ikitap ọmọ ada me isi.

4Pailet okpọkpọk isibi inu initumu inyi ebi Ju ibe, “Ìkpọ, mâsan̄a ene yi isibi inyi enyi, inyi enyi eriọọn̄ ibe ke ǹkamun̄ ikan geege îrọn̄be eyi masabe itip ọmọ oyerebet.” 5Jisọs oneninan̄a isibi, melek okpibot ubọọn̄ ya esabe ukpak ilọk me ibot, mè ofọnti ebi ubọọn̄ ya me lek. Mgbọ ya, Pailet otutumu inyi ebi Ju ibe, “Kpọ ene ya ire ogwu!”

6Mgbọ yaage ebi ibot ngwugwa mè ebi ìkibem Uwu Mbuban emun̄be Jisọs, ema ekekitaan̄ ukpo ibe, “Gon ọmọ kpan̄! Gon kpan̄ me uti nkwurieen̄!”

Ire, Pailet ofọfọọk ema ibe, “Enyi me lek kinyi ìsa ọmọ ìsi ìgon ìkpan̄. Emi ǹkamun̄ ikan geege îrọn̄be.”

7Ebi Ju ekekitumu inyi Pailet ibe, “Eji mîkaan̄ ikan. Igọọk me lek ikan kiji, ene yi ìre ogwu ebekpakpan̄, mije, ìkigwen lek kan̄ Gwun̄ Awaji.”

8Mgbọ Pailet onọbe ikọ ya, ukpook orọriọọn̄ itet ọmọ. 9Isasa Jisọs igwu ikom inin̄ uwu, mè isi ido ibe, “Ìre ònan̄a me owa?” Ire, Jisọs ìkafọọk ọmọ inu geege. 10Pailet ododo ọmọ ibe, “Ìre owu òkpotumu inu geege inyi emi? Ìre òkariọọn̄ ibe ke nkaan̄ unye itetele owu, inyi owu òfo, mè ikaan̄ si unye igogon owu me uti nkwurieen̄?”

11Jisọs ofọfọọk ọmọ ibe, “Owu kpomokọt ikaan̄ unye geege me lek n̄a ire ìkare Awaji onyi owu unye. Eya orọ, nrọ-nlọ eyi ebi ìsasa emi ijet owu omin igak eyi kwun̄.”

12Mgbọ Pailet onọbe ikọ ya Jisọs otumube, ibebene ikiweek ike ìbosa irọ mè etele Jisọs inyi ifo. Ire, ebi Ju ekekitaan̄ ukpo itumu inyi Pailet ibe, “Ire otele mè ene yi ifo, owu òkare unene ogwu Sisa. Mije, ene geelek òbebe ke ọmọ ìre ubọọn̄, ìre ogwu ochicha inyi ogwu Sisa.”

13Mgbọ Pailet onọbe ikọ ya ebi Ju etumube, isasan̄a Jisọs isibi, mè inisiki ikweek me inyọn̄ ogboon̄ oyerebet kan̄, me ere ekigwen Gabata me usem Iburu (eyi òsisibi Ogboon̄ Ewuuk). 14Inu ya ìrọ me òfo ejit ikarek me usen Ibem-lek, òboniwele Usen Mbuban me emen nde ijọk Iraraka. Pailet okukup me ere ya itumu inyi ebi Ju ibe, “Kpọ ogwu ubọọn̄ kinyi ire ogwu!”

15Ire, ebi Ju cha ekekitaan̄ ukpo ibe, “Ìtet ìsa ìje! Ìtet ìje! Ìgon ìkpan̄ me uti nkwurieen̄!”

Pailet onenido ema ibe, “Ìre ǹgon ogwu ubọọn̄ kinyi m̀kpan̄ me uti nkwurieen̄?”

Ebi ibot ngwugwa efọfọọk ibe, “Eji kpekaan̄ ofifi ubọọn̄ geege ilọ me lek ogwu Sisa.”

16Itata kan̄, Pailet okakana Jisọs itap ema me ubọk inyi esa esi egon ekpan̄.

Mîgon Jisọs me uti nkwurieen̄

(Mat 27:32-44; Mak 15:21-32; Luk 23:26-43)

Ebi akọn̄ etetet Jisọs isa ije, 17mè ibene uti nkwurieen̄ ebesa igon ọmọ itoon̄ ọmọ ibe ibeme, mè isa ọmọ ije inan̄a isi ere ekigwen Gọligọta me usem Iburu (eyi òsisibi Ere Ngigọ Ibot Ene). 18Me ere ya ke ema enigon Jisọs me inyọn̄ uti nkwurieen̄ ya. Îkaan̄ si ene iba egonbe me ere ya melek kan̄, ene ge me agan̄ ulom kan̄, ene ge me agan̄ ujit kan̄, mè igon ọmọ me etete.

19Pailet onenige ulook inyi egon me inyọn̄ uti nkwurieen̄ ya. Inu îgebe ya ìre, JISỌS OGWU NAJERET, OGWU UBỌỌN̄ EBI JU. 20Ere egonbe Jisọs îgbet ere me lek ama. Ulook ya si, ege me usem Iburu, mè usem ebi Rom òrere Latin, mè ige si me usem ebi Giris. Eya orọ, owuwa ebi Ju mîmun̄ ulook ya, mè ifuk. 21Ebi ibot ngwugwa ebi Ju enenisi lek kè Pailet, mè isi itumu inyi ibe, “Ìkanwọn ubọk ogebe, ‘Ogwu ubọọn̄ ebi Ju.’ Kpan̄asi ikeya, ge ibe ke ene yi ìbe ke ọmọ ìre ogwu ubọọn̄ ebi Ju.”

22Pailet ofọfọọk ema ibe, “Inu ngebe, nge isan̄a.”

23Mgbọ ebi akọn̄ cha egonbe Jisọs isan̄a, ema eneniteen̄ ofọnti kan̄ iche irek ini inyi lek kiban̄, ene ge irek ge. Inenisik ofọnti irak kan̄. Ofọnti irak ya, elọlọk bene me inyọn̄ re ijọn̄, kpunu ere geege egbabe ichim me lek.

24Ema enenitọt ibe mè ema ekagwak ofọnti ya, mè ema eneroon̄ nriroon̄ esa eriọọn̄ ogwu ebesa inyi. Inu ya ìrọ ikeya isasa irọ iso inu egebe me Ikpa Mbuban ibe,

“Mîkpulu ofọnti n̄a iche inyi lek kiban̄,

mè iroon̄ nriroon̄ mije ofọnti irak n̄a.”#19:24 Itọn̄ 22:18

Inu ya egebe me Ikpa Mbuban ke ebi akọn̄ cha erọ si iso.

25Meri nga kè Jisọs, mè ogwu ngwan̄ enenwaan̄, mè Meri nwa kè Kilopas, mè Meri ogwu Magidala òwa me agba lek uti nkwurieen̄ ya egonbe Jisọs me inyọn̄. 26Mgbọ Jisọs oraan̄be chieen̄ imun̄ ogwu uga, mè imun̄ si ogwu udun̄ kan̄ ogwu îmun̄be me chieen̄ ekekebe me ere ya, itutumu inyi ogwu uga ibe, “Uga, kpọ gwun̄ kwun̄ enerieen̄ ire ogwa,” 27mè itumu inyi ogwu udun̄ kan̄ ya ibe, “Kpọ nga kwun̄ ire ogwa.” Bene me mgbọ ya, ogwu udun̄ kè Jisọs ya osasa nga kè Jisọs ifo uwu kan̄, inyi inigọọk ọmọ ikup.

Mkpa kè Jisọs

(Mat 27:45-56; Mak 15:33-41; Luk 23:44-49)

28Sọnja mgbọ iraraka, Jisọs imumun̄ ibe ke ọmọ îra irọ otutuuk ikwaan̄ kan̄ isan̄a, inenitumu ibe, “Ebek îrak emi.” Ikọ ya onenirọ iso inu egebe me Ikpa Mbuban.#19:28 Itọn̄ 22:15; 69:21 29Ema enenimọnọ ise ijiin̄ me emen miin̄ agburu eyi etapbe me emen ugọn̄ ge iyik me ere ya, mè iniben ise ya mè miin̄ me lek inwaan̄ me otu mbubet isop, mè ibene ifo inyọn̄ isa itap ọmọ me otu. 30Mgbọ Jisọs ofipbe miin̄ ya isan̄a, itutumu ibe, “Îta.” Ikọ ya itata me otu, ikakana ibot isiki, mè itọbọ.

31Inu ya ìrọ me usen Ibem-lek, eyi ofit iwele kan̄ obonire Usen Mbuban òsisibi esese mije mfaka ijọk Iraraka ya. Me orọmijọn̄ ebi Ju, nkwukwu ene ìkakijeen̄ me inyọn̄ uti nkwurieen̄ me Usen Mbuban. Eya orọ, ebi ibot ebi Ju enenisi ibeek Pailet ibe inyi ida mè efaan̄ ukot ebi ene ita egonbe me uti nkwurieen̄ cha, inyi egwat lek ekwaan̄, inyi esan̄a ema esa esi efuun̄. 32Pailet onyinyi ida, ebi akọn̄ enunu me lek ebi egonbe igbaalek kè Jisọs cha, mè ifaan̄ ukot ogwu adasi, mè ifaan̄ si echi ogwu òso iba. 33Mgbọ ema enube me lek kè Jisọs, mè imun̄ ibe ke îkwu isan̄a, ema kpefaan̄ ukot kan̄. 34Ogwu akọn̄ ge me etete kiban̄ osasa otunwa ichim Jisọs me agba nkan̄. Mgbọ yaage, eje mè mun̄ ogbọgbọọk isibi. 35Ogwu òkukup isa chieen̄ kan̄ imun̄ otutuuk inu cha òrọrọ ore ogwu ògege inu cha ọmọ omun̄be inyi enyi, inyi enyi esa me lek ikọ kan̄ echieek. Ikọ ene ya okitumu ìre atikọ. Ọmọ îriọọn̄ si ibe ke ọmọ ìkitumu atikọ. 36Inu chi òmọmọnọ irek îrọ iso inu egebe me Ikpa Mbuban ibe,

“Kpunu ukwuuk geege efan̄abe me lek kan̄.”#19:36 Isis 12:46; Ifuk 9:12; Itọn̄ 34:20

37Mîge si me ofifi ere me Ikpa Mbuban ibe,

“Ebi ene mêbene chieen̄ ikpọ

ogwu ema esabe otunwa ichim.”#19:37 Jek 12:10

Ifufuun̄ kè Jisọs

(Mat 27:57-61; Mak 15:42-47; Luk 23:50-56)

38Sọnja mgbọ iraraka, ogwu enerieen̄ ge ekigwen Josefu, ogwu ònan̄a me ama ekigwen Arimatia, onenisi ibeek Pailet ibe itele inyi ọmọ iben nkwukwu kè Jisọs isi ifuun̄. Josefu yi ìre ene ge me lek ebi udun̄ kè Jisọs. Ire, ìkasan̄a lek kan̄ ìsibi kubọk ogwu òchechieek me lek kè Jisọs, mije ukpook ebi Ju. Mgbọ Josefu obọkọbe unye me ubọk kè Pailet, inenisi ijene nkwukwu kè Jisọs isibi me inyọn̄ uti nkwurieen̄. 39Nikodimọs, ogwu òsisi lek kè Jisọs me eririeen̄ ya, îgọọk Josefu ije ije ya. Nikodimọs onenisa ugwun̄ esabe ikpọk uti mâa mè alò igbaan̄ igwa, eyi ekisa irọ inyi nkwukwu ene ikajọ, ikaan̄ me ubọk inu. Ugwun̄ ya îsabe inu îlobo ikup kubọk akpa uchi ilile iba. 40Mgbọ ebirieen̄ iba chi esan̄abe nkwukwu kè Jisọs isibi ijọn̄, ema enenisa ekwut okuket ikat ikana otutuuk lek, mè ikigwook ugwun̄ cha igbaalek igọọk me ubọk ebi Ju ekisa ifuun̄ ene. 41Uko ge òwa me agba lek ere egonbe Jisọs ikpan̄. Me emen uko ya, ayaya udọn̄-ufuun̄ ge erọkọbe me lek ewuuk òwa si, eyi kperarak ifuun̄ ene geege me emen. 42Eya orọ, ubọk usen ya orebe usen ekibem lek iban Usen Mbuban, ema ebeben nkwukwu kè Jisọs isi ifuun̄ me emen udọn̄ ya, mije, îgbetbe me ere ya.

Currently Selected:

Jọn 19: Obolo

Highlight

Copy