MARIKO 12

Kalewenet agobo mbareet ne po sabibuk

(Mat 21:33-46; Luk 20:9-19)

1 # Isa 5.1-2 Ak ki toi kong'alaalji icheek eng' kalewenaik kole, “Ki minji chiito age sabibuk mbareet, ak kong'oot, ak kobal keriinget ole kiruruung'e sabibuk, ak koteech koot ne kooi, ak komanakyi meek, ak kwo emet age. 2Ak kingo it peetuusyegap kesisyet, koyookto otwogindet kwo ole mi meek, si kobiit konyoorunee meechooto logoek che po mbareetap sabibuk. 3Ak ki nam ineendet ak kobir, ak koon kwo puch. 4Ak ki iyookyi kogeny otwogindet age; ak kibir metinnyi, ak koteweer. 5Ak ki iyookto age; ak kobar ineendet: ak ki iyookto alak che chaang'; kobir alak, kobar alak. 6Kita kotinyei anyun agenge, nooto weeriinnyi ne chamat: ki iyookto ineendet eng' let kwo ole mi icheek, kole, ‘Teechei weeriinnyu. 7Ago ki ng'alaalso meechooto icheegei, koleen, Niito ne namei tuguuk; obwa, kebar ineendet, si kindii tuguuk.’ 8Ak ki nam ineendet ak kobar, ak kowiirta komanda eng' mbareet ne po sabibuk.

9“Yaei nee anyun chiitap ko po mbareet ne po sabibuk? Nyoonei anyun kobarei meechooto, ak komanakyi meek alak mbaranooto po sabibuk. 10#T.Kal 118.22-23 Tom osoman siruutichu;

‘Koita ne ki eesyo teegik,

ki kiyai nooto koek metitap luuita.

11Ki punu ng'olyoondoni Kiptaiyat,

ak ko kwang'ut eng' konyekyok?’ ”

12Ak ki cheeng'ei ole namdoi ineendet; ago ki iywei tuiyet; amu ki nai kole kamwa kalewenoni agobo icheek: ak ki pagaakta ineendet ak koba.

Teebutyet agobo Caesarea

(Mat 22:15-22; Luk 20:20-26)

13Ak ki iyookyi Pharisaik alak ak che po Herodik, si korate ng'aleekyik. 14Ak kingo pwa, koleenji ineendet, Kaneetindoni, kingen keele ii po iman, ameiti chii age tugul: amu megeere itoondap chii, ago ineeti iman ooreetap Kamuktaindet: Tos chamdoi ng'atuutik kigoochi kodi Caesarea, anan ma chamdoi? 15Kigoite anan acha? Ago ki nai ineendet chombilennywa, ak koleenji icheek, Kalya si otyema? Oibwa dinarit ageer. 16Ak ki ipchi. Ak ki leenji icheek, Po ng'oo itooni ak sirooni? Ak koleenji, “Po Caesarea.” 17Ak ki leenji `Jeso, “Ogoochi Caesarea tuguuk che po Caesarea, ak ogoochi Kamuktaindet tuguuk che po Kamuktaindet.” Ak ki kwong'yo miising' agobo ineendet.

Teebutyet agobo ng'eetyeet

(Mat 22:23-33; Luk 20:27-40)

18 # Poi 23.8 Ak ki pwanji ineendet `Sadukaik, che mwaei kole, ma mi ng'eetyeet, ak koteebe ineendet, kole, 19#NKNg'a 25.5 Kaneetindoni, ki sirwech Musa kole, “Ngo me ng'eetap kametap chii, ak kobagaakta osotyonnyi, ama sich lakwa, kondii ng'eetap kamet osotyondonooto, si kobiit kolalji maat ng'eetap kamet. 20Ki mi weeriik tisabu che ki tupcho: ak kiitunis weeriit ne oo, kome ama sich lakwa; 21ak ki indi agine ne po aeng', kome ama sich lakwa; ak ki igei nooto agine ne po somok: 22ak ma pitunee tugul tisap lakwa. Let kome agine kobogoryondonooto. 23Tuun eng' ng'eetyeet kobunjin ng'oo eng' `icheek osotyondonooto? Amu kiga kobunji chooto tisap.” 24Ak ki leenji `Jeso icheek, “Ma nooto ne ki koonok oleel, amu mongen siruutik, anan kimnateetap Kamuktaindet? 25Amu ye tuun ng'eetyo icheek komong' eng' che ki pek, koma itunisyei, ama kituni; ago tebyei ko uu malaikaisyek eng' kipsengwet. 26#Kom 3.6 Ago agobo piik che ki kobek keele tuun ng'eetos, ko tomo osoman eng' bukuitap Musa, eng' ole ki mi keetit ne lalei, ko uu ye ki mwachi `Kamuktaindet ineendet, koleenji, ‘Aa Kamuktaindet ne po Abraham, ak aa Kamuktaindet ne po Isak, ak aa Kamuktaindet ne po Jakobo?’ 27Ineendet koma Kamuktaindet ne po che ki kobek, ago po che saptos; olele miising'.”

Ng'atuutyet ne oo

(Mat 22:34-40; Luk 10:25-28)

28 # Luk 10.25-28 Ak ki nyo age eng' siriik, ak kogas koteebegei, ak kingo nai kole kawolji icheek komyee, koteebe ineendet, kole, “Nee ng'atuutyet ne po tai eng' tugul?” 29#NKNg'a 6.4-5 Kowolji Jeso koleenji, “Ne po tai ko ni, ‘Ogaso ee Israel; Kiptaiyat Kamuktaindet ne Toroor nenyo ko Kiptaiyat agenge. 30Ak cham Kiptaiyat Kamuktaindet ne Toroor neng'ung' eng' muguleldang'ung' komugul, ak eng' saboondang'ung' komugul, ak eng' ng'omnateng'ung' komugul, ak eng' kimnateng'ung' komugul.’ 31#A.La 19.18 Ne po aeng' ko ni, ‘Cham chiitap kokweng'ung' ko uu ole ichamdoigei. Ma miitei ng'atuutyet age ne oo kosiir chu.’ ”

32 # NKNg'a 4.35 Ak ki leenji siriindet, Iman, Kaneetindoni, kaimwa komyee, ile, ineendet ko agenge; ama mi age kobatee ineendet: 33#Hos 6.6 ak ngo cham ineendet eng' muguleldo komugul, ak eng' kaguiyet komugul, ak eng' kimnateet komugul, ak ngo cham chiitap kokwet ko uu ole chamdogei, kosiirei nooto kagoochinoik tugul che kibeelei ak tiseiywek. 34Ak kingo keer Jeso kole kawol eng' ng'omnateet, koleenji, “Ma ii loo eng' laitornatetap Kamuktaindet.” Ak mata kogany chii koteebe ng'olyoo age tugul.

Teebutyet agobo Kristo

(Mat 22:41-46; Luk 20:41-44)

35Ak ye ki ineetisyei Jeso eng' Hekaluut, komwa kole, “Lyon si komwaei siriik koleen Kristo ko weeriitap Daudi? 36#T.Kal 110.1 Ki mwa Daudi ineendet eng' Kabuuset ne Tiliil, kole,

Ki mwachi Kiptaiyat Kiptaiyandennyu, kole,

‘Tebee eunnyu ne po tai,

agoi ande puuniguk keldebesaigap keelyeguk.’ ”

37“Kuuree Daudi ineendet Kiptaiyat; koegundoi ano anyun weeriinnyi?” Ak ki epchin iit tuiyet ne oo ineendet eng' poiboiyet.

Kanyool keriibegei siriik

(Mat 23:1-36; Luk 20:45-47)

38Ak eng' kaneetisyennyi, koleenji, “Oriibegei siriik, che chamei kobendat kolaachi ngoroik che kooen, ak kagatosyek eng' ole kiyae mung'aaret, 39ak ng'echerok che po tai eng' sinagogisyek, ak oldinwek che po tai eng' igoorwek: 40ak korebe icheek mosoogik kooriikwak, ak kosaaei saautik che kooen kong'aalsei; nyooru pichu kirwooget ne oo kosiir.”

Kagoochinet ne po mosoget

(Luk 21:1-4)

41Ak kitep kotokyigei ole kiyumjin tuguuk che kigoitoi, kogeer ole indoitoi tuiyet sendeisyek ole kiyumjin: ak ki inde mogoreek alak sendeisyek che chaang'. 42Ak ki nyo mosoget age ne kibanania, ak konde sendeisyek aeng', che aechin ak chepkondet agenge. 43Ak kiguur kasubikyik anyun kobwa ole mi ineendet ak koleenji, Amwaiwok iman ale, Kagonde mosogani panan che siirei che kagonde piik tugul che indoi tuguukwak ole kiyumjin: 44amu kagonde icheek tugul che po chaang'indap tuguukwak; ago kagonde ineendet che po panandanyi, tugul che katinyei, agot che kosabe.

Currently Selected:

MARIKO 12: KALDC

Highlight

Copy