MARIKO 1

Amdaetap Johana kabatisanindet.

1Taunetap logoiywek che myach che po Jeso Kristo, Weeriitap Kamuktaindet. 2#Mal 3.1 Ko uu ye ki kisir eng' maotyot Isaiah keele,

“Keero, ayooktoi kiboityonnyu kondoenen,

ne chobei oreng'ung';

3 # Isa 40.3 tuugeetap chii ne kuursei eng' surkwen koleen,

‘Ochop ooreetap Kiptaiyat,

olitiit ole punooti.’ ”

4Ki nyo Johana kobatisanisyei eng' surkwen ak koamdoi kabatisanet ne po siguunet agobo nyoetap kaat ne po tengekwogik. 5Ak ki pwanji `piik ineendet kobunu emet komugul ne po Judea ak meng'iigap Jerusalem tugul; ak ki ibatisan icheek eng' aineetap Jordan, kong'aanyei tengekwogikwak.

6 # 2Lai 1.8 Ki ilaachi Johana sambut ne po tambeesik ak ki rategei pireneetap muito, ki amei ineendet chereng'enyinik ak kumigap timiin. 7Ak ki amda kole, “Isubwo ineendet ne kiim kosiiro, ak ma nyoljino ang'uruuk atyach anoogap kweonikyik. 8Ki abatisanak eng' peek; ago ibatisanook ineendet eng' Kabuuset ne Tiliil.”

Kabatisaneetap Jeso

(Mat 3:13-4:11; Luk 3:21-22; 4:1-13)

9Ki nyo anyun Jeso eng' peetuusyechooto kobunu Nazareth ne po Galilaya, ak ki ibatisan Johana ineendet eng' Jordan. 10Yeityo kogatogos eng' peek, kogeer kipsengwet kogayaatak ak kochoorchigei ineendet Kabuuset ne Tiliil ko uu cheptuget. 11#Tau 22.2; T.Kal 2.7; Isa 42.1; Mat 3.17; 12.18; Mar 9.7; Luk 3.22Ak ki mong' tuugeet eng' kipsengwet kole, “Ii Weeriinnyu chamanennyu, agasenengei.”

12Ak koma tyanit komut Kabuuset ne Tiliil ineendet kotokyi surkwen. 13Ki tebi ineendet eng' surkwen peetuusyek artam koyomei Setani; ak kitebyei ak tyong'ik che po timiin; ak ki poisyechin ineendet malaikaisyek.

Kotau `Jeso poisyet

(Mat 4:12-22; Luk 4:14-15; 5:1-11)

14Kingo kagenam Johana, konyo Jeso Galilaya, koamdooti logoiywek che myach che po Kamuktaindet, 15#Mat 3.2 koleen, “Kagosulda peetuusyek, ak kagoriik laitornatetap Kamuktaindet; osigu, ak oyan logoiywek che myach.”

16Ye kiwendi Jeso kobunei tabandap araraita ne po Galilaya, kogeer Simion ak tupchennyi Andrea kowiirchin araraita regereiywot ne kinamee njireenik, amu ki ramiigap njireenik. 17Koleenji `Jeso icheek, “Obwa osubwo si ayaak oegu ramiigap piik.” 18Ak ki pagaakta regereiywekwak ak koosup ineendet. 19Ak ye ki pa kitigin, kogeer Jakobo weeriitap Zebedayo ak tupchennyi Johana, che ki mi eng' moingennywa kochobei regereiywek. 20Ki kuur `ineendet icheek; ak ki pagaakta kwandanywa Zebedayo komi moinget kobooto otwogik, ak koosup ineendet.

Chii ne ki tinyei tamirmiryet ne murwoon

(Luk 4:31-37)

21Ki pa anyun Kapernaum; ak ye kibetut ne po sabato, ko ki wo ineendet sinagogit oriit ak koneetis. 22#Mat 7.28-29 Ki kwong'yo icheek eng' kaneetisyennyi, amu ki ineeti icheek ko uu chii ne tinyei kimnateet, ama ko uu siriik.

23Ki mi sainooto eng' sinagoginnywa chii ne ki tinyei tamirmiryet ne murwoon, ak kiwaach, 24kole, “Kiting'egei nee ak inyee, Jeso ne po Nazareth? Kenyo ing'emech? Angenin ale, ii Ne Tiliil ne po Kamuktaindet.” 25Ago ki kergong' `Jeso ineendet koleenji, “Siis, ak imang'une ineendet!” 26Ak kibirabirto ineendet ak kowaachei eng' kutit ne oo, yeityo komanda oindonooto murwoon eng' ineendet. 27Ki tang'any tugul, ak koteebeegei icheegei kole, “Nee ni? Leel kaneetisyoni! Ng'atei eng' kimnateet agot tamirmirik che murwonen ak ko kasei iit ineendet.” 28Kong'eetee yooto ko kinaak inee eng' komoswek tugul che po Galilaya.

Kosoobi `Jeso piik che chaang'

(Mat 8:14-17; Luk 4:38-41)

29Ye kingo mong' eng' sinagogit, koba kootap Simion ak Andrea, kobooto Jakobo ak Johana. 30Ki myani kametap kwondap Simion kolalee maat ak kiruei, ak ki kimwachi Jeso eng' chokyinet agobo ineendet. 31Ki nyo ak konam eunnyi, ak kong'eet ineendet. Kisoop ineendet ak kotoi kobois koboisyechi icheek.

32Kingo ek koskoleny, ko karorokto asiista, kimutyi tugul che ki myandos ak icheeget che ki tinyei oik. 33Ak ki iyumgei nganaseet komugul eng' kurgat. 34Ki isoop che chaang' che ki myandos eng' myanwek che teerchiin, ak koon komanda oik che chaang'. Ki ma chamji oik kong'alaal amu ki ingen oichooto ineendet.

Koamdoi Jeso eng' Galilaya

(Luk 4:42-44)

35Eng' karon kogairir emet, kong'eet ineendet komanda saang' ak kwo surkwen kosa. 36Ki isup `Simion ak icheek che ki mi tugul. 37Kingo nyoor ineendet, koleenji, “Cheeng'in piik tugul.” 38Kowolji koleenji, “Ongetestai keebe agoi nganasook che rubei si kobiit aamda eng' olooto kora; amu ki anyoon agobo nooto.” 39#Mat 4.23; 9.35 Ki wo koyom Galilaya komugul, koamdooti ak ko oonei oik eng' sinagogisyekwak.

Kitiliili chii ne ki tinyei mogondos

(Mat 8:1-4; Luk 5:12-16)

40Ki nyoonji ineendet `chii ne ki tinyei mogondosaik kosoomei ak kogutunyi koleenjin, “Ngot icham, imuuchi itiliilo.” 41Kiriree ineendet ak koyogoito eunnyi kotwa ak koleenji, “Tiliiliitu!” 42Eng' yooto, kogisaapcho mogondosaik ak kotiliilit chiichooto. 43Ki kergong' ineendet ak kotyakta kwo; 44#A.La 14.1-32 koleenji, “Memwachi chii kiy, ago ui iboorchigei tisiindet ak igoite konunotyotap katiliileng'ung' ko uu ye ki ng'at Musa, si koek paornat eng' icheek.” 45Ago kimanda inee ak kotoi komwaitaat ak kobarastaat ng'olyoondonooto kot ko mata komuuch kowendoot Jeso eng' nganaseet kegeeroti, ago kitebote kewaniin kityo. Ki pwanji `ineendet piik kobun komoswek tugul.

Currently Selected:

MARIKO 1: KALDC

Highlight

Copy