MATAYO 12

Kiptaiyatap Sabato

(Mar 2:23-28; Luk 6:1-5)

1Eng' kasarata, kogiwo Jeso kobun mbareenigap peek eng' peetuutap sabato. Ki am rubeet kasubikyik ak ki toi kobut mesiisegap peek ak koam. 2Ago ye kingo keer Pharisaik koleenji ineendet, “Keero, yaei kasubiguk ne ma chamdaat eng' ng'atuutik keyai eng' sabato.”

3 # 1Sam 21.1-7 Ago ki leenji icheek, “Tom osoman kiit ne ki yai Daudi ak che ki mi ak ineendet ye ki amei rubeet? 4#A.La 24.9 Ki wo kootap Kamuktaindet ak koam magatiinik che itabaanatiin che ki ma kochamdaat eng' ng'atuutik koam ineendet anan che ki mi kobooto ineendet, kobatee tisiik icheegei. 5#Kai 28.9-10 Anan tomo osoman eng' ng'atuutik keele eng' peetuutap sabato kong'waniti tisiik sabato eng' Hekaluut, ama kiityin icheek tengek? 6Ago amwaiwok ale, mi yu ne oo kosiir Hekaluut. 7#Mat 9.13; Hos 6.6 Ago nda ki ongen kaguiyetap ‘amache rireenetapkei ma tiseiywek,’ ta ki ma ogikyini che ma tinyei tengek, 8amu Weeriitap chii ko kiptaiyatap sabato.”

Chii ne ki meat euut

(Mar 3:1-6; Luk 6:6-11)

9Kiwechigei eng' olooto ak kwo agoi sinagoginnywa, ole 10ki miitei chiito ne ki meat euut. Komachei kong'ach ineendet, ko kiteebe icheek koleenji, “Tos chamdaat eng' ng'atuutik kisoop chii eng' peetuutap sabato?”

11 # Luk 14.5 Kowolji koleenji, “Ngot kotinyei chii eng' okweek keechiiryet ak kororokyi keriinget peetuutap sabato, ko tos masutu komong'? 12Po kamanuut anyun ne tya chiito kosiir keechiiryet? Ara anyun, chamdaat keyai ne myee eng' peetuutap sabato.” 13Eng' yooto, komwachi anyun chiichooto koleenji, “Chuul eung'ung'.” Ki chuul, ak kiga kosap koigei euut nin age. 14Ki manda anyun Pharisaik ak korwooch agobo ole partoi ineendet.

Otwogindet ne ki kilewen

15Ye kingo nai Jeso agobo nooto, kwo koistogei eng' olooto. Ki isup `ineendet piik che chaang' ak ki isoop icheek tugul, 16ak kong'at kole mat kobarta ineendet 17si kosulda ne ki kamwa maotyot Isaiah kole,

18 # Isa 42.1-3 “Ogeero, otwogindennyu ne ki alewen;

Chamanennyu ne paibai saboondanyu eng' ineendet:

Andoi ineendet Kabuusennyu ne Tiliil,

si komwachi pororyosyek kirwooget.

19Matiitos, anan kobol;

ama kasei chii kutinnyi eng' ortinwegap nganaseet.

20Ma iriei tegat ne chisot,

ama imisi ineendet kitambit ne iyeni,

kot koyookto kirwooget ne iterteerisyei.

21Ak imang'u pororyosyek kainennyi.”

Jeso ak chii ne ki tinyei oindet

(Mar 3:20; Luk 11:14-23)

22Ki kimutyi anyun chiito ne ki tinyei oindet ak ko koraat ak konamaat kuut. Ki isoop ineendet, kot kong'alaal ak kogeerto. 23Ki kwong'yo anyun tuiyosyek tugul koleen, “Tos weeriitap Daudi ni?” 24#Mat 9.34; 10.25 Ago kingo kas Pharisaik, kole, “Maonei chiichi oik kobatee eng' Beelsebul ne oo ne po oik.”

25Ki ingen ineendet kabwaatutikwak ak ki leenji, “Ng'emaksei laitornatet age tugul ne pcheat, ama tononi nganaseet anan koot age tugul ne pcheat. 26Ngo oon `Setani Setani, ko kapcheigei ineegei; tonondoi ano anyun laitornatennyi? 27Ngaon oik eng' Beelsebul, koonei eng' ng'oo weeriikwok? Nooto anyun, egu icheek che kirwoogikwok. 28Ago ngaon oik eng' Kabuusetap Kamuktaindet, ko kagoitwak anyun laitornatetap Kamuktaindet. 29Anan, tos imuuchi kwo chii kootap chiito ne kiim ak korebe tuguukyik ngot ko marat korook chiichooto kiim yeityo kochoor koonnyi? 30#Mar 9.40 Ineendet ne ma kimi tuwai kogirindaa, ak ineendet ne ma kiyumi tuwai koiyestoi. 31Nooto anyun amwaiwok ale, kinyochin kaat piik tengek age tugul ak ng'olyoo age tugul ne ya, ago age tugul ne mwaei ng'olyoo ne ya agobo Kabuuset ne Tiliil, koma kinyochin kaat. 32#Luk 12.10 Age tugul ne mwaitoe yaityo Weeriitap chii kenyochin kaat, ago age tugul ne mwaitoe yaityo Kabuuset ne Tiliil, koma kinyochin kaat, ngo eng' kasari, anan ko eng' kasarta ne nyoonei.

Keetit ak logoekyik

(Luk 6:43-45)

33 # Mat 7.20; Luk 6.44 “Oyai keetit komyeeit, ak myagitu logoekyik, anan oyai keetit koyait, ak yagitu logoekyik, amu kinae keetit logoekyik. 34#Mat 3.7; 23.33; 15.18; Luk 3.7; 6.45 Lagochu po erenooi, omuktoi ano okweek che oo yaach omwa tuguuk che myach? Ng'alaali kutit che nyiitaat muguleldo. 35Ibune chii ne myee tuguuk che myach konorwennyi ne myee, ak ibune chii ne ya tuguuk che yaach konorwennyi ne ya.

36“Amwaiwok ale, ng'olyoo age tugul ne mwaei piich eng' tangoi, ko tuun tetu chooto tugul eng' peetuutap kirwooget. 37Ki ityinin imanda eng' ng'aleeguk, ak kirwoogun eng' ng'aleeguk.”

Mageetap Kabarunet

(Mar 8:11-12; Luk 11:29-32)

38 # Mat 16.1; Mar 8.11; Luk 11.16 Ki wol alage `eng' siriik ak eng' Pharisaik kowolji ineendet koleenji, “Kaneetindoni, kimache kegeer kabooruno kobunun.” 39#Mat 16.4; Mar 8.12 Ki wolji kole, “Ibinda ne ya ak ne po ibeetapkei kocheeng'ei kabooruno! Ago ma kigoochin kabooruno kobatee kaboorunetap maotyot Jona. 40#Jhn 1.17 Ko uu ye ki mi Jona peetuusyek somok ak kemousyek somok moetap njiryot ne oo miising', ko uu nooto tuun tebee Weeriitap chii peetuusyek somok ak kemousyek somok ng'wony oriit. 41#Jona 3.5 Tuun tonondos piigap Nineveh ak ibini eng' kapkirwook ak korwookyi, amu kisik icheek eng' amdaetap Jona ak ogeero, mi yu ne oo kosiir Jona. 42#1Lai 10.1-10; 2A.Pet 9.1-12 Ng'eetei tuun laitoryat kobogoryot koyoop murot komostap tai ak ibini eng' kapkirwook ak korwookyi, amu ki nyo kobun ole poochin ng'wony si kogas utaatyetap Solomon ak ogeero, mi yu ne oo kosiir Solomon.

Koweegugei tamirmiryet ne murwon

(Luk 11:24-26)

43“Ye kagomang'une chii `tamirmiryet ne murwoon, kwo kobunoot oldinwek che yamyotiin kocheeng'oti ole imuung'ee, amanyoor 44komwa kole, ‘Kaweekyigei koonnyu ole ki amang'une.’ Ye kingo nyo, konyoor koma mi kiy, kobugot ak ko choboot. 45Yeityo kwo anyun komut oik alak tisap che yaach kosiir ineendet ak kochut ak komeny olooto; ak eng' let koyaitu atebeetap chiichooto kosiir ne ki po tai. Egu ko uu nooto agine eng' ibini ya.”

Tilyanutigap Jeso

(Mar 3:31-35; Luk 8:19-21)

46Kingo ta kong'alaaljin tuiyosyek, ko kitonondos eng' saang' kamet ak che tupcho, kocheeng'ei kong'alaalji ineendet. 47Ki mwachi chii age koleenji, “Keero, mi saang' kamenng'ung' ak che otupche, cheeng'ei kong'alaalun.” 48Ago ki wolji ineendet koleenji, “Ng'oo kamennyu ak che kitupche?” 49Kotokyin eunnyi kasubikyik, koleenji, “Ang'chu, kamennyu ak che kitupche! 50Amu age tugul ne yaei mageetap Abba ne mi kipsengwet, ko nooto weeriit ne kitupche ak chepto ne kitupche, ak kamennyu.”

Currently Selected:

MATAYO 12: KALDC

Highlight

Copy