JOHANA 15

Keetitap sabibuk ak temeenik

1Aa keetit ne po iman ne po sabibuk, ak semberindet Abba. 2Tilei temeet age tugul ne mi eng' anee ne ma iyei logoek, ak kotiliili temeet age tugul ne yiei logoek si koi logoek alak. 3Oo tiliileen nguno amu ng'aleek che kaamwaiwok. 4Omenya, ak amenyok. Ko uu ye ma imuuchi temeet koi logoek ineegei, ngot koma menyei keetit; ko momuuchi ak okweek, ngot ko momenya.

5Aa keetitap sabibuk, ko oo mooriik: ineendet ne menya, ak amenye ineendet, ko nooto ne yiei logoek che chaang': amu momuuchi oyai kiy okweegei ngo ma mi anee kobootok. 6Ngo ma menya chii, kewiirtoi ineendet ko uu temetap keetit, si koyaam; ak koyum piik, ak kowiirchi ma, ak kolalyo. 7Ngot omenya, ak komenyok ng'aleekyuk, osoom anyun kiy age tugul ne omache, si keyaiywok. 8Kigonyiti Abba eng' niito, ye oiyie logoek che chaang'; si oegu kasubikyuk. 9Ko uu ye ki chama Kwanda, ko uu nooto ki achamak agane; otebi eng' chamyennyu. 10Ngot oriibe ng'atuutikyuk, otebye anyun eng' chamyennyu; ko uu ye ki ariip ng'atuutik che po Abba, ak atebye eng' chamyennyi. 11Kaamwaiwok tuguuchu, si kotebi eng' okweek poiboiyennyu, si kobiit kosulda poiboiyeng'wong'.

12 # Jhn 13.34; 15.17; 1Jhn 3.23; 2Jhn 5 Ng'atuutyennyu ni, ale ochamye, ko uu ye ki achamak. 13Ma tinyei chii chamyet ne siirei ni, ale kogoito chii saboondanyi agobo choronokyik. 14Oo choronokyuk, ngot oyai tuguuk che ang'atook. 15Ma aguurenok otwogik; amu ma naei otwogindet kiit ne yaei kiptaiyandennyi: ago kaaguurenok choronok; amu kaang'ang'wok tuguuk tugul che ki agase Abba. 16Ki ma olewena, ago ki alewenok, ak ki andeak, ale obe ak oii logoek, si kobiit kotebi logoekwok: si kobiit kogoonok Kwanda kiit age tugul ne osoome eng' kainennyu. 17Ang'atwok tuguuchu, ale ochamye.

Sip koteu Jeso agobo ng'wony

18Ngo wechok ng'wony, onai ole ki kowecha kotom kowechok. 19Nda oo po ng'wony, ta chamei ng'wony chechiik: ago amu mo po ng'wony, ago ki alewenok eng' ng'wony, kowechok ng'wony anyun amu nooto. 20#Mat 10.24; Luk 6.40; Jhn 13.16 Obwaat ng'olyoot ne ki amwaiwok, Ma siirei otwogindet kiptaiyandennyi. Ngot kogiusa anee, kousok ak okweek; ngot ko ki nam ng'olyoondennyu, konamei neng'wong' agine. 21Ago yaiywok tuguuchu tugul agobo kainennyu, amu ma nai ineendet ne ki iyookwo. 22Nda ki ma anyoo ang'alaalji icheek, ta ma tinyei tengek: ago nguno koma tinyei kiit ne ityagegei agobo tengektonywa. 23Ineendet ne wecho ko kawech Abba agine. 24Nda ki ma ayai eng' kwenunnywa poisyonik che ki ma yai chiito age, ta ki ma kotinyei tengek: ago nguno ko kagogeerech ak kagowechech anee ak Abba. 25#T.Kal 35.19; 69.4 Ago, si kosulda ng'olyoot ne ki kisir eng' Ng'atuutikwak, keele, Ki kowecha puch.

26Ago ye kagoit Kagaigaindet, ne tuun ayookwok kobunu Kwanda, Kabuuset ne Tiliil ne po imanit, ne punu Kwanda, konyo kobaoryanjo: 27ak obaoryani ak okweek, amu ki omi kobooto kobooch taunet.

Currently Selected:

JOHANA 15: KALDC

Highlight

Copy