ZECHARIAH 14

Pooryet ne nyoonei ak katerteerisyet ne po let

1Ogeero, nyoonei peetuutap Kamuktaindet ne Toroor, ye tuun kipcheei paruneniguk eng' kwenung'ung'. 2Amu tuun ayumi pororyosyek tugul kobookyi Jerusalem kobargei; ak kenam nganaseet ak keluul kooriik, ak kesuup kwonyiik: ak kimut kebebertap nganaseet koek luulenik, ama ki parei piik che kang'et eng' nganaseet. 3Yeityo kwo Kamuktaindet ne Toroor, kwo kobargei ak pororyosyechooto, ko uu ye kiyaei pooryeet eng' peetuutap lugeet. 4Ak tuun tononie keelyekyik eng' peetuunooto tulweetap mseituni, ne mi taitap Jerusalem eng' komostap kong'asiis, ak kobetak kwenutap tulweetap mseituni ole tokyingei kong'asiis ak cherongo, ak kobiit eng' yooto atebweet ne oo; ak kwo kebebertap tulwoonooto kotokyingei murot kaataam, ak kwo kebeberta age kotokyigei murot tai. 5Ak omwei obun atebweetap tuloonookyuk; amu itei atebweetap tuloonoogap Asel: ee, omwei, ko uu ye ki omwei ye kibotani ng'wony eng' peetuusyegap Uzziah laitoryatap Judah: ak konyo Kamuktaindet ne Toroor Kamuktaindennyu, komi piik tugul che tiliileen kobooto ineendet.

6Ak ma iluu lapkeiyet eng' peetuunooto amaimenitu: 7ago peetuut agenge ne naat eng' Kamuktaindet ne Toroor; ma peet, ama kemoi: ago lapkeitu koskoleny.

8 # Ezk 47.1; Jhn 7.38; Ng'a 22.1 Ak tuun mang'une peek che saptos Jerusalem eng' peetuunooto; pendi kebeberta age kotokyingei nyanjetap Mediterenian ne mi kong'asiis, kobendi kebeberta age kotokyingei nyanjet ne mi cherongo: pendi ko uu nooto eng' kemei ak iwot.

9Ak koek Kamuktaindet ne Toroor laitoryatap ng'wony komugul: egu agenge Kamuktaindet ne Toroor eng' peetuunooto, ak koek agenge kainennyi.

10Kiwolei emet tugul koigei Arabah, kobooch Geba agoi Rimon murot tai ne po Jerusalem; ak kieeti, ak komeny oldanyi, kobooch ormariichetap Benjamin, agoi komostap ormariichet ne po tai, agoi ormariichetap luuita, kobooch teekseet ne kooi ne po Hananel, agoi komoswegap laitoryat ole kitue sabibuk. 11#Ng'a 22.3 Ak komeny piik olooto, ama komi chubisyet kogeny; ago meng'iisyei Jerusalem eng' chametapkei.

12Ak piitu koroitap ng'wony ne pire `Kamuktaindet ne Toroor piik tugul che ki pargei ak Jerusalem: nundos poorwekwak kota kotonondos, ak konunio konyekwak eng' kelongonikwak, ak konunio ng'elyebwekwak eng' kutusweekwak. 13Punu Kamuktaindet ne Toroor eng' peetuunooto wasetapkei ne oo, ne nyoonei kwenunnywa; ak konam age tugul eng' icheek eutap chiitap kokwennyi, ak kobargei ineendet ak chiitap kokwennyi. 14Ak kobargei Judah agine ak Jerusalem; ak kiyomo mogornatosyek che po pororyosyek tugul, che mi komoswek tugul, thahabu, fedha, ak ngoroik, eng' chaang'indo ne oo. 15Ak piitu ko uu nooto, koroito ne po paraisiit, ak ne po nyumbut, ak ne po tambeesyet, ak ne po sigiryet, ak ne po tyong'ik tugul che miitei meng'otosyechooto, ko uu koroiyooto.

16 # A.La 23.39-43 Ak age tugul ne ng'etu eng' pororyosyek tugul che ki ibookyin Jerusalem, kotogostoi olooto eng' kenyiit age tugul, kolasu Laitoryat, Kamuktaindet ne Toroor ne po lugoosyek, ak koyai igoorto ne po keryosyek. 17Ak age tugul ne po ortinwek tugul che po ng'wony ne ma togostoi Jerusalem kolasu Laitoryat, Kamuktaindet ne Toroor ne po lugoosyek, koma nyooru chooto ropta. 18Ak ngot koma togosta ooreetap kootap Misiri, amabwa, ko marobonjin ak icheek; piitu koroito ne pire Kamuktaindet ne Toroor pororyosyek che ma togosta koba koyai igoorto ne po keryosyek. 19Egu niito piretap Misiri, ak piretap pororyosyek tugul che ma togosta koba igoorto ne po keryosyek.

20Tuun kisirchin eng' peetuunooto cheptingiloogap paraisisyek kole, “Tiliil eng' Kamuktaindet ne Toroor.” Ak igeitu tereenik che mi kootap Kamuktaindet ne Toroor taabook che mi taitap kaptisisyet. 21Ee, kitiliiljin Kamuktaindet ne Toroor ne po lugoosyek tereet age tugul eng' Jerusalem ak eng' Judah; ak kobwa icheek tugul che eng'sei, koip tereenichooto ak koyoise: ama komiitei kogeny eng' peetuunooto chemung'araindet eng' kootap Kamuktaindet ne Toroor ne po lugoosyek.

Currently Selected:

ZECHARIAH 14: KAPR

Highlight

Copy