MARIKO 16

Ng'eetyetap Jeso

(Mat 28:1-8; Luk 24:1-12; Jhn 20:1-10)

1Ak kingo kagosiirto sabato koal Maria Magdalene, ak Maria kametap Jakobo, ak Salome, nyamdutik, si kobwa koiil ineendet. 2Ak eng' karon inne, eng' peetuutap tai ne po wigiit, koit kererit ko kachor asiista. 3Ak kong'alaaljigei icheegei kole, “Mildaiywech ng'oo koita eng' kurgeetap kererit?” 4Ak kingo ng'eet met, kogeer ko kagemilda koita: amu ki oo miising'. 5Ak kingo chut kererit, kogeer muren kotebyei eng' komostap tai, ne ilaachi ngoryeet ne leel; ak ki kwong'yo.

6Ak ki leenji icheek, “Amokwong'ye; ocheeng'e Jeso, Nazaretindet, ne kiga kigartaat: kagong'eet; ma komi yu: ogeer ole kiga kinde ineendet! 7#Mat 26.32; Mar 14.28 Ago, oba, omwachi kasubikyik ak Petero, oleenji, Kagondoenak kwo Galilaya: ogeere ineendet eng' olooto, ko uu ye kiga komwaiwok.”

8Ak kimanda saang' eng' kererit, ak komwei; amu kiga potanso ak kokwong'yo: ak ma mwachi chii kiy; amu ki iyweis.

Koboorchingei Jeso Maria Magdalene

(Mat 28:9-10; Jhn 20:11-18)

9Ak kingo ng'eet Jeso anyun karon miising' eng' peetuutap tai ne po wigiit, kochunji korook Maria Magdalene, ineendet ne kiga kocherunee Jeso oik tisap. 10Ki wo komwachi icheeget che ki mi kobooto ineendet, ye kita koarongendos ak koriirtos. 11Ak kingo kas icheek kole sabei, ak kole, kagogeer ineendet chebyosonooto, koma iyan.

Koboorchingei Jeso kasubik aeng'

(Luk 24:13-35)

12Ak kingo pata tuguuchu, kong'aang'jigei eng' itoondo age aeng' eng' icheek kobendi eng' ooreet kooret age. 13Ki pa anyun ak komwachi chuun alak, ak ki ma iyan chooto ak icheek.

Koboorchingei Jeso taman ak agenge

(Mat 28:16-20; Luk 24:36-49; Jhn 20:19-23; Mate 1:6-8)

14Ak kingo pata nooto, kong'aang'jigei icheeget taman ak aeng' kotebyei eng' amisyet; ak koger kong' amu pistoennywa ak uuindap mugulelwekwak, amu ki ma iyan icheeget che ki keer ineendet ko kagong'eet. 15#Poi 1.8 Ak ki leenji, “Oba ng'wony komugul, oamjinote logoiywek che myach piik tugul. 16Ineendet ne iyani ak kibatisan kesaru; ago ineendet ne ma iyani ko tuun kirwookyin. 17Ak isubi kaboorunoichu icheek che iyani: oonei oik eng' kainennyu; ak kong'alaali ng'alaalet ne leel; 18namei erenook, ak ngo ee tuguuk che parei piich, koma nyooru ng'wanindo matiny; igonoori eunekwak piik che myandos ak kosapcho.”

Kimuti Jeso kwo kipsengwet

(Luk 24:50-53; Mat 1:9-11)

19 # Poi 1.9-11 Ye kingo kagong'alaal ak icheeget `Kiptaiyat Jeso, kimut anyun ineendet kwo kipsengwet, ak kotebee eutap tai ne po Kamuktaindet. 20Ak ki pa anyun, koamdaat eng' oldo tugul, kobois Kiptaiyat kobooto icheek, ak kogimit ng'olyoot eng' kaboorunoik che ki isuboti.

Currently Selected:

MARIKO 16: KAPR

Highlight

Copy