MARIKO 13

Sip kemwau agobo ng'emisyetap Hekaluut

(Mat 24:1-2; Luk 21:5-6)

1Ak ye kimandoi eng' Hekaluut, koleenji age eng' kasubikyik, Kaneetindoni, keero, kie uu koichu ak kie uu teeksoni! 2Ak ki leenji `Jeso ineendet, “Tos igeere teeksosyechu eecheen? Matun ng'etu koita agenge eng' paragutap age, ne ma ki wiirchin ng'wony.”

Kaimutik ak nyalilwogik

(Mat 24:3-14; Luk21:7-19)

3Ak kingo tebyei ng'wony eng' tulweetap mseituni ye tokyindos ak Hekaluut, koteebe ineendet Petero ak Jakobo ak Johana ak Andrea komi icheegei, kole, 4“Mwaiwech, yaaksei tuguuchuuto auiyo? Ak nee kaboorunet ne tuun ibooru kole kariik kosulda tuguuchuuto tugul?”

5Ak ki toi `Jeso koleenji, “Oriipkei si ma ibeetook chii. 6Pwoonei tuun che chaang' eng' kainennyu, koleen, ‘Aa ineendet!’ ak kobeet che chaang'. 7Ak ye tuun ogas agobo lugoosyek ak ng'aleek agobo paretapkei, ko moaragense: kanyool koek ko uu nooto; ago tomo koit kagesunet. 8Amu setyin pororyet age pororyet age, ak setyin laitornatet age laitornatet age; ak kobiit potaneetap ng'wony eng' oldinwek che teerchiin; ak kobiit rubosyek. Tuguuchuuto ko taunetap ng'waninwek.

9 # Mat 10.17-20; Luk 12.11-12 “Ago oriipkei okweek: amu tuun kimutyinok kapkirwook; ak kebirok eng' sinagogisyek; ak oteleli eng' taitap pounik ak laitorinik agobo anee, si koek paornat eng' icheek. 10Ak kanyool keamji korook logoiywek che myach pororyosyek tugul. 11Ak ye tuun kimutak kapkirwook, ak kindeak eunegap piik, ko mat ogereer met agobo kiit ne tuun omwae: ago kiit age tugul ne ki koonok eng' sainooto, ko nooto ne omwae: amu ma okweek che ong'alaali, ago Kabuuset ne Tiliil. 12Ak kong'wekta `chii ng'eetap kamet kebar, ak kong'wekta `kwanda lakweennyi; ak kong'eetyi `lagok sigiikwak, ak kogoito kebar. 13#Mat 10.22 Ak kowechok piik tugul amu kainennyu: ago ne muitoi agoi let, kesaru nooto.

Ng'emisyet

(Mat 24:15-28; Luk 21:20-24)

14 # Dan 9.27; 11.31; 12.11 “Ago ye tuun ogeer kiit ne kiwechei ne po ng'emisyet kotonone ole ma nyoljin kotonone (ingoguiyo ne somani), ingomwechi anyun che mi Judea tuloonook: 15#Luk 17.31 ama choortagei chii ne mi koot parak anan kwo ko, si kobiit konem kiy eng' koonnyi: 16amat koweek chii ne mi mbar kwo koip ngoryennyi. 17Pwo eng' icheek che chiioo ak che tinyei lagok che reritos eng' peetuusyechooto! 18Ak osaa si ma tuun yaak chooto eng' peetuusyek che po kaititindo. 19#Dan 12.1; Poi 7.14 Amu egu nyalilda eng' peetuusyechooto, ne kitom koegu ko uu nooto kobooch taunetap yaetap ng'wony ne ki yai Kamuktaindet, agoi nguno, ama kobiitu ko uu nooto kogeny agoi. 20Ak nda ki ma til Kiptaiyat peetuusyek konwagitu, ta ma kisaru chii: ago kitil peetuusyek amu che lewenotin che ki lewen.

21“Ak ngo leenjok chii eng' peetuusyechooto, ‘Ogeero! Mi Kristo oli!’ anan, ‘Ogeero! Miitei olo!’ ko mat oyan. 22Amu ng'eetos Kristoisyek che po lembech, ak maotik che po lembech, ak koboortoi kaboorunoik ak kwang'utik, si kobeet, agot che kigelewen nda imugaksei. 23Ago oriipkei: ogeero, kasip amwaiwok tuguuk tugul.

Nyonunetap Weeriitap Chii

(Mat 24:29-31; Luk 21:25-28)

24 # Isa 13.10; Ezk 32.7; Joel 2.10,31; 3.15; Ng'a 6.12 “Ago eng' peetuusyechooto, ko kagobata nyalilata, koimenit asiista, kama kooluu arawet, 25#Isa 34.4; Joel 2.10; Poi 6.13 ak kororok kecheik eng' kipsengwet, ak kotumdumgei kimnatosyek che mi kipsengwet. 26#Dan 7.13; Ng'a 1.7 Eng' sainooto kogeer anyun Weeriitap chii konyonei eng' poolik kobooto kimnateet ne oo ak liilindo ne oo. 27Yeityo koyookto malaikaisyek, ak koyum lewenikyik, kobun usoonaik ang'wan, kobunu tabandap ng'wony agoi tabandap kipsengwet.

Kanyool keriipkei

(Mat 24:32-35; Luk 21:29-33)

28“Oneetkei kalewenetap mogoywet: ye kang'arng'aritu mooriikyik, ak kong'atyo sogeek, onai ole kariik kesisyet; 29uu nooto ak okweek ye ogeer kosuldoi tuguuchu, onai ole kagoriik ineendet, mi kurgotik. 30Amwaiwok iman ale, Masiirtoi ibini, ama isulda tuguuchuuto tugul. 31Siirtoi kipsengwet ak ng'wony, ago ma siirtoi ng'aleekyuk.

Ma ingen chii peetuut anan saait

(Mat 24:36-44)

32 # Mat 24.36 “Ago ma mi chii ne naei agobo peetuunooto anan sainooto, agot malaikaisyek che mi kipsengwet, agot Weeriit, kobatee Kwanda ineegei. 33Oriipse anyun, ogenisye ak osaae: amu mongen ye egune. 34#Luk 12.36-38 Uu chii, ne ki pagaach koonnyi, ak koruto emet age, ak kogoochi otwogikyik kimnateet, chii age tugul ak poisyennyi, ak kong'at riibindet koriipso. 35Oriipse anyun: amu mongen ye itu chiitap ko po koot, ngo lagat, anan kemoi kween, anan ye iteei kipsoiywet, anan karon; 36si ma cheak ak konyoorwok oruitosi. 37Ak ng'olyoot ne amwaiwok okweek amwachini tugul, ale: Oriipse.”

Currently Selected:

MARIKO 13: KAPR

Highlight

Copy