LUKA 10

Koyooktoi `Jeso kasubik tamanwogik tisap ak aeng'

1Kingo pata tuguuchu kolewen Kiptaiyat piik alak tamanwogik tisap ak icheek, ak koyookto kobee aeng' kole, kondoe ineendet koba nganaseet age tugul ak komosta age tugul ole tuun punooti. 2#Mat 9.37-38 Ago ki leenji icheek, Oo kesisyet ago ng'ering' kesik: nooto anyun osoom Kiptaiyat ne po kesisyet, si kobiit koyookyi kesik kesisyennyi. 3#Mat 10.16 Oba: ogeero kaayooktok ko uu aaregap keechiirek eng' kwenutap suik. 4#Mat 10.7-14; Mar 6.8-11; Luk 9.3-5 Amoip lolet, anan suberet, anan kweonik: amogat chii eng' ooreet. 5Ak koot age tugul ne omong'jini, omwa ole, Ingotep kaalyeet eng' kooi. 6Ak ngo miitei weeriitap kaalyeet yooto, kotebee kalyeng'wong' ineendet: ak ngo ma mi, koweekyinogei okweek. 7#1Kor 9.14; 1Tim 5.18 Ak otebee koyooto anyun, ak tuguuk che koonok, oam ak oee: amu nyoljin kiboityot melektanyi. Amoitote kooriik. 8Ak nganaseet age tugul ne omong'jini, ak kotaachak, oam tuguuk che kindoi taing'wong'; 9ak osoop che myandos eng' olooto, ak oleenji icheek, Kagorikyok laitornatetap Kamuktaindet. 10#Poi 13.51 Ago nganaseet age tugul ne omong'jini, ama taachok, omande obe ortinwekyik ak omwa ole, 11kagibukyok temburyek che po nganaseng'wong', che kanam keelyekyok; ago onai ni, ole, kagoriik laitornatetap Kamuktaindet. 12#Tau 19.24-28; Mat 11.24; 10.15 Ago amwaiwok ale, Tuun kaigaitu Sodom eng' peetuunooto, kosiir nganasanooto.

Nganasook ngelelik

(Mat 11:20-24)

13 # Isa 23.1-18; Ezk 26.1-28.26; Joel 3.4-8; Amo 1.9-10; Zek 9.2-4 “Pwo! Wee Korazin! Pwo! Wee Bethsaida! Amu nda kiga kiyai eng' Tyro ak Sidon poisyonik che po kamuktaet ko uu che kogiyai eng' okweek, ta kiga kosik keny, ak kotebee oreek kolaachi kuniok. 14Ago tuun kaigaitu Tyro ak Sidon eng' kirwooget, kosiirok. 15#Isa 14.13-15 Ak inyee Kapernaum,

Tos tuun kitoroorin iwe kipsengwet?

Kiwiirchinin ng'wony kot iit ye mi che ki kobek.

16 # Mat 10.40; Mar 9.37; Luk 9.48; Jhn 13.20 “Ineendet ne kasook kogasa agane; ak ineendet ne eesyook koeesyoo agane; ak ineendet ne eesyoo koeesyoi ineendet ne ki iyookwo.”

Poiboiyetap piik tamanwogik tisap

17Ki week anyun pichooto tamanwogik tisabu eng' poiboiyet, ak komwa kole, “Kiptaiyat, agot oik kogaseech iit eng' kaineng'ung'.” 18Ak ki leenji, “Ki ageer Setani kochoorugei eng' kipsengwet ko uu kalyeleet. 19#T.Kal 91.13 Ogeero, kaagoonok kamuget si kobiit otyech erenook ak melmelwek, ak oterter kimnateet tugul ne po puunyoot; ak ma mi kiy ne imuuchi kong'emak. 20Ago amoboiboitu amu ng'olyoondoni, amu kasok iit oik; ago oboiboitu amu siraatiin kainaikwok eng' kipsengwet.”

Poiboiyetap Jeso

(Mat 11:25-27; 13:16-17)

21Eng' sainooto kobaibait Jeso eng' Kabuuset ne Tiliil, ak kole, “Aweegun kongoi, ee Abba, Kiptaiyat ne po kipsengwet ak ng'wony, amu ki iung'e tuguuchu che utaatiin ak che ng'oomeen, ak ki ing'aang'ji manyurunik: ee, Abba; amu ki chamak ko uu nooto eng' taing'ung'.

22 # Jhn 3.35; 10.15 “Ki kogoono tuguuk tugul Abba: ak ma mi chii ne ingen Weeriit kole ng'oo, kobatee Kwanda; ama nai chii Kwanda kole ng'oo, kobatee Weeriit, ak chii age tugul ne chamei Weeriit, kong'aang'jin.”

23Ak kiweleljigei kasubik, ak koleenji eng' ung'oot, “Iberuurotin koonyek che keerei tuguuk che ogeere: 24amu amwaiwok ale, kimachei maotik che chaang' ak laitorinik kogeer tuguuk che ogeere, ago ki ma keer; ak kimachei kogas tuguuk che ogase, ago ki ma kas.”

Kalewenet agobo Samarindet ne myee

25 # Mat 22.35-40; Mar 12.28-34 Ogeero, ki tonon ng'amotyot age ne po ng'atuutik koyoom ineendet, kole, “Kaneetindoni, ayai nee si tuun anyooru saboondap koigeny?” 26Ak ki leenji, “Ki kisir nee eng' Ng'atuutik? Isomandoi ano?” 27#A.La 19.18; NKNg'a 6.5 Ak ki wolji ineendet koleenji, “Cham Kiptaiyat Kamuktaindet ne Toroor neng'ung' eng' muguleldang'ung' komugul, ak eng' saboondang'ung' komugul, ak eng' kimnateng'ung' komugul, ak eng' ng'omnateng'ung' komugul; ak icham chiitap kokweng'ung' ko uu ye ichamdoige.” 28#A.La 18.5 Ak ki leenji, “Kewolu komyee: yai ko uu nooto, si isap.”

29Ago ye kimachei komyeeitkei, koleenji Jeso, “Ng'oo chiitap kokwennyu?” 30Kowolji Jeso koleenji, “Kichoortaegei chiito age Jerusalem kwo Jeriko; ak kotuiyo ak rebiik, che kirebe ngoroik ak kobir, ak koba, kobagaakta ko neegit kome. 31Ak kichoortaegei tisiindet age oranooto; ak kingo keer ineendet korop taban. 32Ak ye kingo it Lawindet yooto, ak kogeer, korop taban agine ko uu nooto. 33#2A.Pet 28.15 Ago ye kita kowendi Samarindet age eng' pandanyi, koit ye mi chiichooto: ak ye kingo keer ineendet, koriiree, 34kwo ole mi ineendet, koratyi ole kagibir, ak kosachinot mwaita ak divaik; ak kiganapchi chiichooto sigiryennyi, ak komut kwo kootap toek, ak koriip ineendet. 35Ak mutai konem dinarisyek aeng', kogoochi chiitap ko po koot, ak koleenji, ‘Riip ineendet; ak tuguuk alak tugul che inyae che siirei chu, kotuun kaweege, anyo ayaagun.’ 36Eng' chuuto somok, ileen ng'oo ne ki ek chiitap kokwennyi eng' chiichooto kituiye rebiik?” 37Ak ki le, “Ineendet ne kirireegei chiichooto.” Ak ki leenji Jeso, “Ui, iyai ko uu nooto.”

Marta ak Maria

38 # Jhn 11.1 Ak ye kita komi pandanywa, komong'ji anyun nganaseet age: ak kitaach eng' koonnyi kobogoryot age ne keguure Marta. 39Ak ki tinyei chepkamet ne kiguure Maria, ne kitebyei eng' ole po keelyegap Kiptaiyat, kogasei ng'olyoondennyi. 40Ago ki iimgei Marta eng' poisyonik che chaang'; ak konyonji ineendet ak koleenji, “Kiptaiyat, meiti kiy ak kabagaakta tupchennyu abois aneege? Mwachi anyun kotoreta.” 41Ago ki wolji Kiptaiyat koleenji, “Marta, Marta, igereeri met ak iimige agobo tuguuk che chaang': 42ago kiit agenge ne kemachei: amu kagolewen Maria kebeberta ne myee, ne ma kirebe.”

Currently Selected:

LUKA 10: KAPR

Highlight

Copy