LUKA 1
1
1Amu ki konde eunekwak che chaang' kotet ng'aleek agobo tuguuchooto ki kosulda eng' kwenunnyo, 2ko uu ye ki mwaiwech paorinik che ki keer kobooch taunet ak icheek che ki amdoi ng'olyoot. 3Ko uu ye ki achigil tuguuk tugul kobooch taunet, ko ki abwaat ale myee atetuun eng' sireet, ee inyee Theophilus ne ii tagunoot; 4si kobiit inai eng' iman ng'aleechooto ki kineetin.
Mwaet agobo sigeetap Johana
5Eng' peetuusyegap laitornatetap Herod eng' Judea ko ki mi tisiindet age ne ki kiguure Zekariah, ne po riipseetap Abijah: ak ki tinyei osotyot ne kisalu kap-Aaron, ak ki kiguure kainennyi Elizabeth. 6Ak ki po iman icheek tuwai eng' taitap Kamuktaindet, ak kibendotee ng'atuutik tugul ak karureiywek che po Kiptaiyat, ama tinyei leluut. 7Ak ki ma kotinyei lakwa, amu ki soon Elizabeth, ak kiga koosegitu tuwai.
8Ak ye kita koyaei tisiisyet eng' taitap Kamuktaindet, ko uu teteetap riipsennyi, 9ko uu piteetap tisiisyet, ko ki kilewen ineendet kwo hekaluutap Kiptaiyat kobeel nyamdutik. 10Ak ki mi saang' tuiyet komugul ne po piik, kosaaei eng' sait ne kibeelee nyamdutik. 11Ak ki mong'ji malakaiyatap Kiptaiyat kotonone komostap tai ne po kapkorosuut ne kibeelee nyamdutik. 12Ak kingo keer Zekariah ineendet koaragen ak koiyweis. 13Ago ki leenji malaikaiyat ineendet, Mearagen Zekariah: amu kogegasun soomeng'ung', ak ta kosigun osotyondeng'ung' Elizabeth weeriit, ak iguure kainennyi Johana. 14Inyooru poiboiyet ak kagasetapkei; ak poiboitu piik che chaang' eng' sigennyi. 15#Kai 6.3 Amu tuun egu ne oo eng' taitap Kiptaiyat, ama eei divai anan maiyo che ng'woneen; ago kinyiiti Kabuuset ne Tiliil, kobooch komi moetap kamet. 16Ak koweekyi `piigap Israel che chaang' Kamuktaindennywa. 17#Mal 4.5-6 Ak kowendot eng' tainnyi eng' muguleldo ak kimnateetap Elijah, si koweech mugulelwek che po kwanisyek kotokyigei lagok, ak kowelel ngelelik si kobendat eng' utaatyetap che po iman; si kochopchi Kiptaiyat piik che chobootiin.
18Ak ki leenji `Zekariah malaikaiyat, “Anae nee ng'olyoondoniito? Amu koaositu, ak ki kotar kenyiisyek che chaang' osotyondennyu.” 19#Dan 8.16; 9.21 Ak ki wolji `malaikaiyat koleenji, “Aa Gabriel, ne atononi eng' taitap Kamuktaindet; kagiyokwo ang'alaalun, ak aibun logoiywechu myachen. 20Keero, namoksein kuut, ak memuuchi ing'alaal agoi tuun peetuut ne yaaksei ng'aleechu, amu ma iyan ng'aleekyuk che tuun isuldoi eng' peetuusyekwak.”
21Ak ki igen `piik Zekariah kot kokwong'yo, amu ki igagei eng' Hekaluut. 22Ak ye kingo mong' saang', koma komuuchi kong'alaal, ak ki nai icheek kole, kagogeer kaboorunet ne po kwong'eet eng' Hekaluut. Ki ng'alaaljine pichooto euut ak ki tep konamat kuut.
23Ak ye kingo keskei peetuusyegap otisyennyi, kwo kaa. 24Ak ye kingo pata peetuusyechooto komanach osotyonnyi Elizabeth ak kiunygei arawek muut, yeityo komwa kole, 25“Koyaiywo ko uu niito Kiptaiyat eng' peetuusyek che ki ibwaata, si koistoena sasisyet ne ting'eno piik.”
Mwaet agobo sigeetap Jeso
26Ki iyookto `Kamuktaindet malaikaiyat Gabriel eng' arawetap lo kwo nganaseet ne po Galilaya, ne kiguure Nazareth, 27#Mat 1.18 kwo ole mi chepto pergeiya ne kiga kebwatererchi muren age ne kiguure Joseph, ne po kootap Daudi; ak ki kiguure pergeiyandanooto Maria. 28Ak ki nyo ole mi chebooto, ak koleenji, “Chamge, inyee ne ii chamat miising', mi Kiptaiyat kobooten.”
29Ago ki iimgei miising' ineendet eng' mwaonooto, ak ki ibwaat kole tos egu nee kagatyoni. 30Ak ki leenji malaikaiyat ineendet, “Meiywei, Maria: amu kainyooru chameet eng' Kamuktaindet. 31#Mat 1.21 Ak keero, imanachi, ak isich weeriit, ak tuun iguure kainennyi Jeso. 32#2Sam 7.12,13,16; Isa 9.7 Egu ne oo ineendet ak tuun kiguuree Weeriitap Ineendet Ne Toroor Miising'; ak kogoochin `Kiptaiyat Kamuktaindet ng'echereetap laitornatet ne po kwandanyi Daudi: 33ak tuun laitorane kootap Jakobo koigeny; punjin laitornatennyi koigeny.” 34Ak ki leenji `Maria malaikaiyat, “Egundoi ano ng'olyoondoni, amu mangen muren?” 35Ak ki wolji malaikaiyat koleenji, “Nyonjinin Kabuuset ne Tiliil ak kouurin kamuktaetap Ineendet Ne Toroor Miising'; nooto anyun kiguure ne tiliil, Weeriitap Kamuktaindet, ineendet ne tuun kisichei. 36Ak keero, managaat agine Elizabeth tupcheng'ung', tuun sichei weeriit eng' osindanyi: ne po lo arawani eng' ineendet ne ki kiguure soon. 37#Tau 18.14 Amu ma mi ng'olyoo ne punu Kamuktaindet ne ma kiim.” 38Ak ki le Maria, “Keero, aa chepto ne otwogindetap Kiptaiyat; ingeyaiywo ko uu ng'olyoondeng'ung'.” Ak ki wo malaikaiyat kobagaakta ineendet.
Korutochin `Maria Elisabeth
39Ki ng'eet anyun Maria eng' peetuusyechooto kwo kochaakta emetap tuloonook, agoi nganaseetap Judah; 40ak ki wo agoi kootap Zekariah ak kogat Elizabeth. 41Ak ye kingo kas Elizabeth kagateetap Maria, kotoromben lakweet eng' moennyi; ki nyi anyun `Kabuuset ne Tiliil Elizabeth; 42ak komwa eng' kutit ne oo, kole, “Ii iberuurot inyee eng' kobogorisyek, ak iberuurot ineendet ne isiche. 43Ak katepto ano kot anyooru niito, kot konyoonjo kametap Kiptaiyandennyu? 44Keero, ye ka ngo it iitiikyuk kutitap kagateng'ung', kotoromben lakweet eng' moennyu eng' poiboiyet. 45Ak paibai kobogoryondonooto iyani; amu tuun isuldoi tuguuk che ki kemwachi ineendet che punu Kiptaiyat.”
Tyendap Maria
46 # 1Sam 2.1-10 Ak ki le Maria,
“Itoroori saboondanyu Kiptaiyat,
47Ak kagobaibait saboondanyu eng' Kamuktaindet Yetindennyu,
48 # 1Sam 1.11 amu kagogeer nyeraatyetap otwogindennyi.
Ogeero, kobooch ra koguureno ibinwek tugul ne paibai,
49amu kagoyaiywo ineendet ne po kamuktaet tuguuk che eecheen;
ak tiliil kainennyi.
50Tebyei rireenennyi eng' ibinda agoi ibinda
eng' icheeget che konyiti ineendet.
51Ki koboor kimnateet eng' eunnyi;
ak kigoiyesta che menotik eng' kabwaatutigap mugulelwekwak.
52 # Job 5.11; 12.19 Kagochoor pounik eng' ng'echerokwak,
ak kagoeet che nyerootiin.
53Kagobae che amei rubeet tuguuk che myachen,
ak kagoon mogoreek koba puch.
54Kagotoret otwogindennyi Israel,
si kobwaat rireenetapkei,
55 # Tau 17.7 ko uu ye ki ng'alaalji kwanisyekyok,
eng' Abraham ak iyotennyi agoi koigeny.”
56Ak ki tebi Maria ak Elizabeth neegit arawek somok; yeityo koweek kwo kaa.
Sigetap Johana
57Ki it anyun peetuut ne sigisye Elizabeth; kosich weeriit. 58Ak kogas piigap kokwennyi ak piigap ooreennyi kole kagoboorchi Kiptaiyat rireenennyi kwonyooto; ak kiboiboitu tugul.
59 # A.La 12.3 Ak kingo it peetuut ne po sisiit, kobwa icheek koyatita lakweet; kimachei koguure Zekariah, kemwaitae kainetap kwandanyi. 60Ak ki wol kamet kole, “Achicha; kiguure Johana.” 61Ak ki leenji icheek ineendet, Ma mi chii eng' oreng'wong' ne keguure kainanooto. 62Ki ng'alaaljine icheek euut kwanitap lakweet, koteebe kainet ne machei ketoochi. 63Kosoom kiit ne kisirei, ak kisir kole, “Johana kainennyi.” Ak ki kwong'yo tugul. 64Koyaatak anyun kutinnyi sainooto, ak kotyagak ng'elyeptanyi, ak kitwek kolas Kamuktaindet. 65Ak ki nyoonji kaiyweisyet tugul che ki menyei komoswekwak; ak ki kimwaita ng'aleechuuto tugul koyom emetap tuloonook ne po Judea. 66Ak kigonoree mugulelwekwak ng'aleechooto icheek tugul che ki kas, kole, “Tuun egu nee anyun lakwani?” Amu ki mi kobooto ineendet eutap Kiptaiyat.
Maonatetap Zekariah
67Ki nyi anyun Kabuuset ne Tiliil kwandanyi Zekariah, ak ki maoten, kole:
68“Iberuurot Kiptaiyat, Kamuktaindet ne po Israel;
amu kagorutoochi piikyik ak koyachi katyaget icheek,
69Kagong'eetwech kuinetap yetunet
eng' kootap Daudi kiboityondennyi
70Ko uu ye ki mwa eng' kutusweegap maotikyik che tiliileen che ki mi kobooch ko kagitoi ng'wony,
71si kosarwech eng' puunikyok ak eng' eunegap tugul che wechech.
72Si koriiree kwanisyekyok,
ak kobwaat kayomisennyi ne tiliil;
73kayosyet ne ki iyasyechi kwandanyo Abraham,
kole koonech
74si kobiit kogoonech, ko kagosarwech eng' eunegap puunikyok,
keboisyechi ineendet ama eng' kaiyweisyet,
75eng' tiliilindo ak eng' imanda
eng' tainnyi eng' peetuusyekyok tugul.
76 # Mal 3.1 Ee lakwani, kigurenen maotyotap Ineendet Ne Toroor Miising';
amu iwendi eng' taitap Kiptaiyat indoi, si kobiit ichop ortinwekyik,
77si igoochi piikyik naet ne po yetunet
eng' nyoetap kaat ne po tengekwogikwak,
78amu muguleldo ne rireegei ne po Kamuktaindet nenyo,
si kochorchech lapkeiyet ne punu parak,
79 # Isa 9.2 si koluuchi icheeget che tebyei eng' mesundeito ak che mi urwetap meet;
si kondochi keelyekyok kot koit ooreetap kaalyeet.”
80Ak ki ner lakwanooto, ak kotesak kogimit eng' saboondo, ak ki meng'ooti surkwen agoi peetuut ne ki iboorchigei Israel.
Currently Selected:
LUKA 1: KAPR
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
