TAUNET 42

Kobendi tupchosyegap Joseph Misiri

1Ye kingo kas anyun Jakobo kole miitei peek Misiri, koleenji `ineendet weeriikyik, “Amu nee si ogeeregei kityo?” 2#Poi 7.12 Ak ki leenji, “Koagas keele miitei peek Misiri. Ochoortegei oalwech peek eng' oliindo, si kobiit kesapchee, si ma kibegu.” 3Ki choortagei anyun weeriik tamanu che tupcho ak Joseph koba Misiri, koal peek. 4Ago ki ma iyookto `Jakobo Benjamin ng'eetap kametap Joseph, kobooto tupchosyekyik, amu ki le, si ma nyoor kiy ne ya. 5Ki pwa anyun weeriigap Israel kobooto che kibwanei koalisyei, amu ki miitei rubeet emetap Kanaan. 6Ki pounindet Joseph ne po emet, ak ki ineendet ne ki aldochin peek piik tugul che po emet. Ki pwa anyun tupchosyegap Joseph, ak kong'uruuk eng' tainnyi kotokyi metowekwak ng'wony. 7Ak ki keer `Joseph tupchosyekyik ak konyit, ago ki yaigei koigei chii ne ma ingen icheeget, ak kong'alaalji icheeget eng' koroomnateet. Ki teebe koleenji, “Obunu ano?” Ak ki wolji koleenji, “Ki punu emetap Kanaan, kibwane keale amitwogik.” 8Nganda ki nai `Joseph tupchosyekyik, ko ki ma nai `icheek ineendet. 9#Tau 37.5-10 Ki ibwaat kogeny Joseph karwotitaosyek che kiga korwotyi agobo icheek, ak ki leenji, “Oo segeik, kobwa ogeer nyeraatyetap emet.” 10Ki leenji `icheek ineendet, “Achicha, kiptaiyandennyu, ago kagibwane acheek otwogiguk keale amitwogik. 11Ki weeriigap chiito agenge acheek tugul, ki piik che po iman, ma kisegeik acheek otwogiguk.” 12Ago ki leenji icheek, “Achicha, ago kobwa ogeer nyeraatyetap emoni.” 13Ak ki leenji, “Kitupche acheek otwogiguk ko ki taman ak aeng' ak ko weeriigap chiito agenge ne po Kanaan. Keero, miitei ne ming'in eng' peetuuni kobooto kwandanyo, ak ki kobetito agenge.” 14Ago ki leenji `Joseph icheek, “Nooto anyun ne kamwaiwok aleenjok, oo segeik. 15Kimuuchi ketyemenak ng'olyoondoni: ko uu ye sabei Pharaoh, ko momuuchi obe eng' oli, ngo ma nyo yu ng'eetap komet ne ming'in. 16Oyookte age eng' okweek, komut ng'eetap komet, ak keratak kot kenai ng'aleekwok ngo mi imanit eng' okweek. Ngo ma uu nooto, ko ko uu ye sabei Pharaoh, ko kaagaa oo segeik.” 17Ak kiger tugul kip agenge peetuusyek somok.

18Eng' peetuutap somok koleenji `Joseph icheek, “Oyai ko uu ni si osapche, amu aiywei Kamuktaindet: 19ngo oo piigap iman, kerati agenge eng' okweek, eng' koot ne kogigerchok. Si obe okweek, oip amitwogik amu rubeet ne mi kooriikwok. 20Ak omutwaa ng'eetap komet ne ming'in; si kotook ng'aleekwok ngo po iman, si mobegu.” Ak ki yai ko uu nooto. 21Ki ng'alaaljigei icheegei kole, “Kagonamech kirwooget iman agobo tupchennyo, amu ki kigeer nyalildap muguleldanyi, ye ki igaigaech, ak ki ma kicham kegasyi; kanyonjech anyun nyalili amu nooto.” 22#Tau 37.21-22 Ak ki wolji Reuben, koleenji, “Ki ma amwaiwok, aleenjok, amoyachi kiy ne ya lakweet? Ago ki ma ocham ogas. Ogeer anyuno, kiyaachei korotiikyik.” 23Ki ma nai kole kasei Joseph ng'aleekwak, amu ki mi weegindet ne ki iweechi ng'aleekyik. 24Ki weigei kotuktoochi patai, ak koriir; yeityo koweleljigei icheeget kogeny kong'alaalji. Ak ki inem Simion eng' kwenunnywa, korat ineendet eng' tainnywa. 25Ki ng'at Joseph anyun kinyiit lolotinwekwak peek, ak keeweekyi chii tugul silingisyekyik kinde kinnyi, ak kogoochi amitwogik che po ooreet. Ak ki kiyachi ko uu nooto.

26Ki ratyi peechooto chwaget sigirokwak, ak koba. 27Ago ye kingo tyach age lolennyi eng' kootap toek, kole kogoochi sigiryennyi amitwogik che konorotiin, kogeer silingisyekyik komi kutitap lolet. 28Ak ki leenji weeriik che tupcho, “Kageweech silingisyekyuk, ogeero, miitei iman lolennyu.” Ak ki aragenso, kogeeregei kobotandos, koleen, “Nee ni kayaiywech Kamuktaindet?” 29Ye kingo it anyun icheek kap Jakobo kwandanywa eng' emetap Kanaan, kotetyi ineendet tuguuk tugul che kibiityi eng' ooreet, koleenji, 30“Ki ng'alaalwech chiito, ne kiptaiyatap emet, eng' koroomnateet, amu ki leen ki segeik che kisegei emet. 31Ago ki kileenji, ‘Ki piik che po iman; ma kisegeik. 32Kitupche acheek ko ki taman ak aeng', ki weeriigap kwandanyo; ma mi age, ak mi ne ming'in kobooto kwandanyo eng' emetap Kanaan.’ 33Ak ki leenjech chiichooto, kiptaiyat ne po emonooto, ‘Anaenok ni, ngo oo piik che po iman; obagakwo ng'eetap kamenng'ung' age, ak obe oipchi peek piikwok che miitei kaa. 34Omutwaa weeriit ne otupche ne ming'in, si anai anyun ale ma oo segeik, ago kaagaa oo piik che po iman. Yeityo agoonok weeriit ne otupche kogeny, ak oyai mung'aaret eng' emet.’ ”

35Ye kingo abuch lolotinwekwak, ko ki mi chepkondok che po chii tugul lolennyi ko ratotiin. Ye kingo keer icheek kobooto kwandanywa silingisyekwak che ratotiin, koaragenso. 36Ak ki leenji Jakobo kwandanywa, “Ki obetena lagokyuk, ma mi Joseph, ak ma mi Simion, ak omache omutena Benjamin agine. Ki kobwanjo anyun tuguuchu tugul.” 37Yeityo koleenji `Reuben kwandanyi, “Tuun ibar weeriikyuk aeng' ngo mamutun ineendet kogeny. Koono kotebee eunekyuk, ak amutun ineendet kogeny.” 38Ago ki le, “Mobendi ochoortoigei kobooto weeriinnyu amu ki kome ng'eetap kamet, ak ineegei kityo ne ng'etunot. Ak ngot konyoor kiy ne ya eng' panda ne obendi, ogoono ariirat agoi tuun amei.”

Currently Selected:

TAUNET 42: KAPR

Highlight

Copy