Ibeb 19

Awaji îchep Sodọm mè Gomora

1Me otu ikakwun̄ usen ya, ebi osat Awaji iba cha ejeje isi ire Sodọm. Me ike mgbọ ya, Lọt ìsisiki ikweek me otunchit ama ya. Mgbọ îmun̄be ema, inanan̄a ikeke ije ikweek ema, mè itọbọ ibot inyi ema, 2mè ibe ema, “Ebikaan̄ n̄a, soso ìna mè ǹsa enyi ǹsi uwu n̄a, mè enyi esi egwọk ukot, mè elaak ewele egwe. Egwe isiwele, enyi mêkọt inan̄a ije ije kinyi.”

Ife cha kpechieek. Ebe ke ema mêlaak me oyet ile iwele egwe.

3Ire, Lọt okpọkpọ itet lek inye ikiriaak ife cha. Ema enenichieek, mè igọọk ọmọ ije. Mgbọ ema erebe uwu kè Lọt, Lọt ototo ijọk inyi ema, mè irọ fituru kpunube olat me lek isa itet ema ichen. Ema ererie. 4Sabum mgbọ ema ebelaak, ebirieen̄ ama Sodọm, nsabọn mè ugane, ewawak ikana uwu ya me ijọn̄, 5mè ikigwen Lọt ido ibe, “Mọmọ ebirieen̄ cha ebi ìnu me uwu kwun̄ me otu ikakwun̄ yi? San̄a ife cha sibi, mè eji egọọk elaak.”

6Lọt onanan̄a me emen uwu isibi isi ichichini ema, mè itaba isotu igwuk me udun̄ kan̄, 7mè isi itumu inyi ema ibe, “Ebi ngwan̄ n̄a, ìkanwọn ibe enyi erọ ojelek inu ikpak òkup ikeya. 8Ìkpọ, emi nkaan̄ nsabọn ibaan̄ iba ebi ekariọọn̄ge ebirieen̄. Mâsan̄a ema isibi inyi enyi esa erọ inu geelek òneneme enyi. Ire, ikarọ ijo inu geege me lek ebirieen̄ chi, mije, ema ìre ene isotu uwu n̄a.”

9Ife cha ebebe Lọt, “Je nan̄a eji me isi. Owu ogwu ichen òbojeje inikitọ ikọ inyi eji ebikaan̄ ama? Ire òkanan̄a eji me isi, inu eji eberọ owu môfieek igak eyi eji eberọ ebi ichen kwun̄ cha.” Ebirieen̄ cha ebebieen̄ Lọt isan̄a me unye, mè ibenibum isotu uwu ya.

10Ebi ichen iba cha egwugwuku isotu, mè inyana ubọk itaba Lọt itap me emen uwu, mè igwuk isotu, 11mè itap otutuuk ebirieen̄ cha ǹnàan̄, nsabọn mè ugane. Ema kpeyaka ikọt iriọọn̄ ere òrere isotu me lek uwu ya.

12Ebi ichen cha enenitumu inyi Lọt ibe, “Ìre ekene si ke oyaka ikaan̄ me ama yi? Ire okaan̄ ofifi bọn ulọk me ama yi, kubọk bọn kwun̄ ebirieen̄ mè ebibaan̄, mè ebi òyet bọn kwun̄, kpulu sibi, 13mije, eji mênichep ama yi, bak me lek, ijo inu ebi ama yi ekirọ îmin enenen me isi Okumugwem. Îre eya orọ Okumugwem oriabe eji inu ibe enechep ama yi.”

14Lọt osisibi isi ilook ebirieen̄ ebi ìtetet bọn kan̄ ikaan̄ ibedo#19:14 Mè ìyaka ire: ebi òyet bọn kan̄. ibe, “Ìgwat lek ìnan̄a me emen ama yi ìsibi. Okumugwem mônichep ama yi.” Ire, ebirieen̄ chi ekikeek ibe Lọt ìkifit ifit.

15Mgbọ egwe okitoon̄ inu, ebi osat cha etutumu inyi Lọt ibe, “Gwat lek, kpulu nwa kwun̄ mè bọn ebibaan̄ kwun̄ iba ìkup me uwu sa libi sibi, inyi enyi ekagọọk ìkwaan̄ ìnin̄ me emen osusut ijo inu ebi ama yi.”

16Ire, Lọt okekikiket ukot. Ebi osat cha etetet ọmọ me ubọk, mè itet si ogwu nwa mè ebi bọn ebibaan̄ iba cha me ubọk, mè itaba ema isa isibi me emen ama ya. Unan geege ìkasak ema me lek, mije, Okumugwem îkaan̄ ejit nsan me lek kiban̄. 17Mgbọ etababe ema isibi me emen ama ya, ene ge me lek ebi osat iba cha otutumu inyi Lọt mè ebi kan̄ ibe, “Ìlibi ekot ugwem kinyi. Ikayaka chieen̄ ìkpọ udun̄. Ikakeke me ere geege me iteke ijọn̄ yi. Ìlibi ìsi ìnene inyọn̄ ogoon̄, inyi mkpa ikare enyi lek.”

18Lọt ofọfọọk ibe, “Soso Ogwukaan̄ n̄a, ìkare ikeya ma. 19Mgbọ owu owuwuuk lek itap ubọk inyi emi ikeyi, mè inyan̄a ugwem n̄a, soso kaan̄ si ejit nsan me lek n̄a. Emi m̀kpakọt ilibi isi igwook me inyọn̄ ogoon̄ chilọ. Sabum eji ebelibi isi ire inyọn̄ ogoon̄ cha, uyọrọlek ge mônenisoon̄ emi, mè ikpan̄ emi me oniin̄. 20Kpọ, sọntiik ama ge ire eyilọ. Ama yi îgbet ere ire lek emi mâkọtbe igwat lek ilibi isi ire. Soso, nye lek tele mè ǹlibi ǹsi ǹlet lek me emen ama yi, mije, ke îre sọntitiik ama, inyi nkakwu.”

21Ogwu osat ya obebe, “Înwọn ma. Mâtap si ubọk ge inyi owu. M̀kpachep sọntiik ama yi owu otumube ikọ ibak. 22Ire, ìgwat lek ìlibi ìfo ama ya, mije, m̀kpakọt irọ inu geege îtata enyi erere ama ya.” Mije Lọt otumube ibe ke ama ya ìre sọntiik ama, ọmọ orọ ekigwen ama ya Sowari.#19:22 Sowari ìsibi ‘sọntiik.’

23Ura îbum sabum Lọt oninin̄ ama ya. 24Okumugwem oneniria ukan̄ biridọni òkirep kubọk ibot inan̄a me isinyọn̄ igwook me ama Sodọm mè ama Gomora. 25Ikeya ke Okumugwem osa ichep ama iba cha, mè otutuuk ama geelek òkup me iteke ijọn̄ ya, mè otutuuk ebi geelek ìluk me emen ama cha, mè inu geelek òtitibi me inyọn̄ ijọn̄ ya isan̄a kpai. 26Ire, nwa kè Lọt, òkigọọk ogwu olom me udun̄, oyayaka chieen̄ ikpọ udun̄, mè ikana ewuuk uchi òkeke kubọk atà.

27Ofit iwele kan̄, me ata otu ewelegwe, Ebereyam onanan̄a ikeke, mè ije isi ikeke me ere mgbọ ọmọ melek Okumugwem ekekebe ya, 28mè ibene chieen̄ ikpọ agan̄ Sodọm mè Gomora, mè otutuuk iteke ijọn̄ ya, mè imun̄ oduku okibumu ifo inyọn̄ kubọk oduku ukan̄ etapbe me ejit oron.

29Mgbọ Awaji ochepbe otutuuk ama òkup me iteke ijọn̄ ya, îkeek Ebereyam, mè ibak me lek kan̄ isan̄a Lọt isibi me emen ama cha ere îlukbe, sabum înichep ama cha.

Lọt mè bọn ebibaan̄ iba kan̄

30Lọt onenisibi itele Sowari, mè inene ifo inyọn̄ ogoon̄ cha, ọmọ melek bọn ebibaan̄ iba kan̄, mè isi iluk me emen ǹkororok ge me inyọn̄ ogoon̄ cha, mije, ukpook îtet ema iluluk me Sowari. 31Usen ge, ogwu ugane me lek bọn ebibaan̄ iba kan̄ cha onenitumu inyi ogwu ijija ibe, “Kpọ, mgbọ keyi, nte kiji îkan. Kpunu ofifi enerieen̄ geege me inyọn̄ ijọn̄ yi ogwu òbogọọk eji ilaak, mè eji emaan̄ bọn kubọk otutuuk ebibaan̄ ekimaan̄ me linyọn̄. 32Eya orọ, eji enenyi nte kiji miin̄, mè inwọ isa, mè eji egọọk elaak, mè emaan̄ bọn enyi, inyi uwu kiji ikachep.”

33Me ikakwun̄ usen ya, ema eneninyi nte kiban̄ miin̄. Inwọnwọ isa. Ogwu gwun̄ enenwaan̄ ogwu ugane osisi igọọk nte kiban̄ ilaak, mè inween̄ lek inan̄a isibi. Ogwu ute ìkariọọn̄ mgbọ înube, ìkariọọn̄ si mgbọ înan̄abe isibi.

34Ofit iwele kan̄, ogwu ugane ya otutumu inyi ogwu ngwan̄ ogwu ijija ibe, “Ngọọk nte kiji ilaak ikakwun̄ iyakwut. Ngwa, eji eyaka enenyi nte kiji miin̄, inyi inwọ isa ikakwun̄ chereyi si, inyi owu ògọọk òsi òlaak, mè eji emaan̄ bọn enyi nte kiji, inyi uwu kiji ikachep.” 35Me ikakwun̄ usen ya si, ema ekpọkpọk inyi nte kiban̄ miin̄. Inwọnwọ isa. Gwun̄ kan̄ enenwaan̄ ogwu ijija osisi igọọk ọmọ ilaak. Nte kiban̄ ìkariọọn̄ si mgbọ înube inigọọk ọmọ ilaak, ìkarọriọọn̄ si mgbọ înan̄abe isibi.

36Sa me ikeya, bọn ebibaan̄ iba kè Lọt cha eninin̄ owot inan̄a me lek nte kiban̄. 37Ogwu ugane oneniman gwun̄ enerieen̄ ge, mè igwen Mowabu.#19:37 Mowabu ìsibi ‘gwun̄ nte n̄a.’ Gwun̄ yi ore nte otutuuk ebi Mowabu ìkukup cherekeyi. 38Ogwu ijija omaman si gwun̄ enerieen̄ ge, mè igwen Ben-Ami.#19:38 Ben Ami ìsibi ‘gwun̄ ogwu ulọk n̄a.’ Ọmọ ore nte otutuuk ebi Amọn ìkukup cherekeyi.

Currently Selected:

Ibeb 19: ANNa

Highlight

Copy