Luka 8

Ŋerep Natneŋo Yesu Mogare Arikoi

1Naso bamgo qoeki, Yesu mat suwaine so nigatne lolike more kisi maep don ra qelaŋange, Kaisaleŋo daleo waremaike eya wane kine, eŋe ŋei ŋerep edange, eŋane dokoine 12 eŋe weneŋ arikoi. 2Mo sogino Yesuŋo ŋerep natne eŋano ŋine asu qotkoine esoponge, so natne zomaenerop ma menaŋonge, ŋerep eya eŋerop lolike arike. Ŋerep eŋet tegoene iwa, Mariya, eŋetine mane Magdalena, eŋe mo sogine Yesuŋo asu qotkoine sewen (7) eŋano ŋine esoponge. 3Ŋerep mane Yoana, ŋaune eŋetine Kuza, eŋe kepe ware ware Herot wane ŋei ŋetne mane okange. Ŋerep mane, Suzana, so ŋerep natne loutne eŋe Yesu so dokoine eŋe enŋene wesi aboŋeneŋo qesiŋongoi.

Ŋei Mane Eŋe Wit Woune Euwo Rasuke Eŋane Don Rokop

4Ŋei ŋerep matko matko ŋine, eŋe Yesu wano tako rakot sari more, ŋei ŋerep magu suwaine lewage metkoi, eŋe Yesuŋo don rokop iwa edane rake,

5“Naso maneo, ŋei mane eŋe euwo wit woune ra suiyakane arike. Eŋe rasuki wouno natne eŋe maine euwo ket kitoke. Ŋo natne eŋe ari numao ket kito metki, eya ŋei edo sari gesokpi, so naŋi edo sari neu qoeke. 6Woune natne eŋe ari kepe wesi tabilainerop yewa wane kutno ket kitoki, ikopka poripke wiye more kaiwe sirike qeki, ururuke seukkoi, eya yemo kepe yewaŋo eŋe dokune midaine. 7Woune natne touk okolerop, eya wane koto ket kitokoi, wane touk okolerop yewaŋo wiye more, pise waliponge. 8Ŋo, wit woune natne eŋe kepe gukinerop eu koto yewao ket kitokoi, ket kito more komine poripke suwa more, wele maine zok manerop qekoi.”

Don eya qoeki, Yesu eŋe boka edange, “Ŋei ŋerep mane eŋe don iwa dere lukeyakane okane, so eŋe don iwa wane kine maine mauluke more ma desiyake.”

Don Rokop Wane Kineene

9Yesu wane dokoine eŋe Yesu wano sari eŋe maine don rokop wane kine ra qelaŋaniyakane qesonka rau, 10Yesuŋo don mainge rake, “Kaisaleŋo dalino ware ŋunmaike, na ŋine eya wane don sane desikei wane ŋidanmaile. Ŋo ŋei ŋerep natne eŋe yemo ŋadino gemami, yewa eŋe yemo naŋane yaup don rokop eya korop detwaremami, eya wane eŋe kaikei, ŋo, eŋe kine maine mi derelukkei. So eŋe maine naso baŋem desikei, ŋo mi dere qelaŋangei.”

Yesuŋo Don Rokop Eya Ra Qelaŋange

11Yesuŋo koso iwa yale rake, “Don rokop eya wane kine yemo iwa yale okanmaike, wit woune eyamo Kaisale wane donŋo okanmaike. 12Ŋo woune natne dumao ket kitokoi, eya yemo ŋei ŋerep natne eŋe Kaisale wane don naso bomitne so bamgoka detkoi, ŋo, Ŋei Borikineŋo sari more Kaisale wane don eya ŋei ŋerep natne eŋane kotoeno yasoke, yewamo ma biraki saket eŋine biŋek ariyake, pakimo ŋei ŋerep eya eŋe Kaisale wane don eya mi malipkau ma menaŋ-oniyake.

13Woune natne kepe wesi tabilainerop eya wane kutno ket kitokoi, eya yemo ŋei ŋerep natne eŋe Kaisale wane don ikop dere ma more bakom kitokoi, ŋo don eyaŋo eŋane wet derereteno togole mi waket meki, eŋe naso bomitneka malipkau, umat natne wakongi, Kaisale wane don eya ikopkamde qeliŋkaikei. 14Woune natne eŋe touk okolerop eya wane koto ket kitokoi, eya ŋei ŋerep natne eŋe Kaisale wane don detkoi, ŋo kepe kutno gege wane umat so wesi aboŋ suwaine maratka maratka so kine kine natne eya wane bailalaŋ, eyaŋo ŋei ŋerep eŋane kotoeno waket more, Kaisale wane don kotoeno piseka more walipkaki, wele maine mi qekei. 15Ŋo woune natne kepe kelokinerop eyao ket kitokoi, eya yemo ŋei ŋerep natne eŋe Kaisale wane don dere more, ma wet wekumaneŋo nogankau paki ma more qotkakoi, eya wane eŋe togole togoleenane wele maine qekei.”

Kiwa Zake Bano Pake

16Pakiso, Yesuŋo koso rake, “Ŋei mane kiwa kuwake more diyao qeki me qeu okorayake? Lase bano me kulu papainane bano supakaki mesiyake? Midaka! Eŋe kiwake more qeki, zake kutno didiwo okoraki, ŋei ŋerep eŋe sari qelaŋanine eya maine kaikei so mat koto saikei.

17“Eya wane kine kine korop sane pamaike, eya na ŋado didiwo mawe wakon wareyake. So kine kine natne supawe metmaike, eya ŋado na ma lalagewe didiwo wakon wareyake.

18“Ŋine don kine kine korop detlukka more, don maine eya malip kaikei. Kaisaleŋo ŋei me ŋerep mane eŋe kine kine mane mangi, maine malipka geyakeo, eŋe koso takotke maniyake. Ŋo Kaisale eŋe ŋei me ŋerep mane eŋe kine kine mane mi mangeo, yemo ŋei ŋerep yewa eŋe baŋ matalioniyake.”

Yesu Wane Nagaine So Ŋolekoune

19Naso yewao, Yesu wane nagaine, eŋine so ŋolekoune maratkaikei wane sari lotkekoi, ŋo, ŋei ŋerep magu suwaineŋo lewage qeyatka watke more okorakoi, okorau Yesu wane nagaine so ŋole eŋe daleo osopka ari kau rap, 20eya wane ŋei mane magukoune eŋano ŋineŋo Yesu olale rake, “Ge onnom! Geŋane nagaŋone so ŋolekopŋone marat ganikei wane so don natne golasikei wane qeinat sari ziyaŋ-ganmami.”

21Yesuŋo eŋane don mainge more magu edane rake, “Ŋei ŋerep diyawa eŋe Kaisale wane don dere more malipkau paki, tewek kaikeiwo, ŋei ŋerep eya eŋe naŋane nagane, so qane so ŋolekopne okanmami.”

Yesu Eŋe Dibom Ma Pesekake

22Naso maneo, Yesu eŋe sekiwo wa more dokoine edane rake, “Ŋene sekiwo wa more doku namuŋ erinat yuwane wa kitare ariŋem.” Yale raki, eŋe kiyeke arikoi.

23Yesu eŋe kulu wane kaki, seki kutno kulu pake. Naso yewaka ikop mide, momo kakapa suwaine wiye puwangi dibom suwaine qeke, paki namuŋŋo siri dibom suwaine qe wa more seki koto qakki ket watke ma muruŋ oniyakane okange. 24Dokoine eŋe Yesu wano ari ma wirikka rakoi, “Waomze, Waomze, ŋene mo seukkenane okanmaine!”

Yesuŋo wiye more, togoleka kuroge, momo so dibom doŋ mane more kaloŋ qekeik wane etange. Paki momo so dibom ere doŋmangoik, so kaloŋ suwaine qe pake.

25Pakiso, Yesu eŋe dokoine edange, “Ŋine mali malip ŋine mida!”

Ŋo eŋe oŋaene qaeki, so kaet suwaine okane more, enŋene auye rakoi, “Ŋei iwa eŋe zok ŋei kine mane! Eŋe momo so dibom don etangi, ere yewaka done dere teweke more, doŋ manmamik.”

Yesu Eŋe Ŋei Mane Wane Asu Qotkoine Esopkake

26Kaloŋ okangi, Yesu so dokoine eŋe Galili namuŋ erinat ari lotkekoi, kepe yewa eŋetine, Gerasa. 27Yesu eŋe seki qeliŋka more saweko ketki, yewaka ŋei mane asu qotkoineŋo kotino pake, eŋe sari maratkake. Mo naso kiroine ŋei yewa eŋe lawam ge more, mat koto mi doŋ mane metke me kulu pake, midakaka, eŋe deŋesere wane kezem aŋaino ge okange. 28Eŋe Yesu ka more, aroine suwaine aroke ket Yesu wane kino rasu pa more bokake, “Yesu, ge Wawaine Kaisale wane gipole! Ge dalino okan nanikene? Na ge meŋen ganmaile, ge na wikile zok misuk ninikene!” 29Eŋe yale rake, eya wane Yesuŋo asu qotkoine yewa olale rake, “Asu qotkoine, ge ŋei yewa qeliŋka arinom!” Mo sogino ŋei ŋerep eŋe ma more, kiye metine mulap togoleŋo pisemaŋkoi, ŋo eŋe naso baŋem asu qotkoineŋo qeki, eŋe mulap togole kiye metino eya romatkeki toeki, so kepe yaup papaino ari mageke.

30Wanemo, Yesuŋo qesonka rake, “Ge eŋetŋone ma?”

Eŋe mainge rake, “Naŋane eŋetne, ‘Magu Suwaine’.” Asu qotkoine eŋe loutneŋo eŋane kotino gekoi, eya wane eŋe yalewa rake. 31Ŋo asu qotkoine eŋe Yesuŋo esopongi sorao me gerepko mi kesikei wane meŋenkakoi.

32Kepe yewao berek magu suwaine eŋe meŋoine eya ŋara ne gekoi, eya wane asu qotkoine eŋe Yesuŋo esopongi, eŋe berek kotoeno wakesikei wane meŋenkakoi.

33Paki Yesu eŋe esopongi, so ŋei eya qeliŋka more berek kotoeno waketkoi, waketpi so, berek magu korop eya eŋe biririke ari sorao sontake ket doku namugo qok qok ne more seukwarekoi.

34Berek ware ware eŋe kine kine wakonge, eya korop ka more, ket ari matko matko so kepe saiwo ŋei ŋerep don kisi edangoi. 35Ŋei ŋerep eŋe don kisi eya dere more kine kine wakonge, eya ari kakoi, eŋe Yesu wano ari more, ŋei yewa kau, eŋe sogino asu qotkoineŋo matalikaki geke, eya eŋe mo maine laplap ramu more, wetine lotkeki tikŋane Yesu osino metke, ka more kaetonge. 36Yesuŋo dalino ŋei ma menaŋkake, eya ŋei ŋerep eŋe ka more kimakopene edanwarekoi. 37Ŋei ŋerep eŋe koropŋo kaet suwaine onge, eya wane Yesu qesonka rakoi, eŋe eŋane kepeo ŋine qelige ariyake. Yesu eŋe sekiwo wa more eya qelige arike. 38Ŋei eya asu qotkoineŋo mo qeliŋkake, eŋe Yesu sorinka more rake, “Na maine weneŋ, detnannom gerop arikale?”

Ŋo, Yesuŋo biraka more rake, 39“Ge matŋono ari, Kaisale eŋe kine kine geŋano maki wakonmaike, eya wane ŋei ŋerep edanikene.”

Yale olatkiso, ŋei eŋe Yesu qeliŋka more, Yesuŋo kine kine eŋano maki wakonge, eya wane ari mat suwaino korop ŋei ŋerep edange.

Yesu Eŋe Yairus Borasine So Zoma Ŋerep Mane Ma Menaŋotke.

40Pakiso, Yesu eŋe koso doku namuŋ ratoke, erinat ariuso, ŋei ŋerep magu suwaine eŋe mo sari qalakko tomaka okora more bakom kito more rakoi, “Mo sarimaine!” 41Pakiso, ŋei mane, Yairus eŋe sari lotkeke, eŋe Yuda wane lewa lewaŋ urum yewao ŋei ŋetne okange, eŋe sari Yesu wane kino ket rasu more, Yesu eŋe matino ariyakane meŋenkake, 42onoka wane eŋane borasine wekuku, komaine 12 okange, eŋe seukeyakane nasoine mo bomile sarike.

Yesu eŋe ŋei yewa eŋerop ariuk, so ŋei ŋerep loutne eŋe watke lolika mogare arikoi. 43Ŋei ŋerep magu keuweno ŋine, ŋerep mane eŋe ŋerep zoma weneŋ. Zoma eya koma 12 zok manerop okankaki, so eŋe wesiine zoma yewa wane ra more mauluk mauluk ŋei eŋano biraki midakake, ŋo eŋe maine mi ma menaŋ-kakoi. 44Ŋerep eya eŋe magu keuweno ŋine sari Yesu ŋadino lotke more, takotine suwaine uwakaki, eŋane ŋerep zoma yewa mo ikopka mida leleke. 45Pakiso, Yesuŋo qesonone rake, “Maŋo na uwa nanike?”

Ŋei ŋerep koropŋo bisopkau, so Petoro eŋe olatke, “Waomze, ŋei ŋerep loutne edo wonge maguk-ganbi, ge onine, ŋo ge onoka wane don yaline qeson-ŋonmaine?”

46Ŋo, Yesu eŋe edane rake, “Ŋei me ŋerep maneŋo na mo uwanangi detmaile, eya wane naŋane zonomne natne mo eŋano wa ketmaike.” 47Yesu eŋe ŋerep wane masi eyamo detlukke paki, eya wane eŋe qesonge pakimo ŋerep eŋe zok zonomine manerop oreki, sari Yesu wane kino ket rasu more, ŋei ŋerep kaiteno eŋe Yesu mo uwakeke, eya wane ikopka menaŋkaki ra wakon edange. 48Rakiso, Yesu eŋe olale rake, “Borasone, mali malipŋoneŋo ma menaŋ ganmaike, eya wane ge maine ari more wet maepko gekene.”

49Yesu eŋe ŋerep don olale okorake, naso yewaka ŋei mane Yairus wane matko ŋine lotke more, Yairus olale rake, “Ge borasoŋone mo seukmaike, kito ŋebo ŋeboze mi iwenka sarikene, yeine.”

50Ŋo, Yesu eŋe detka more Yairus olale rake, “Ge misuk kaet gangep! Ge naŋane don dere more malipkaikeneo, maine mawe menaŋ kayake.”

51Pakiso, Yesu eŋe matko lotke more, ŋei ŋerep ma waulukone more, Petoro so Yakop so Yohane so ŋerep ŋerep naga magaine eŋerop urumgo wa ketkoi. 52Ŋei ŋerep korop zok manerop arokkoi, Yesu eŋe edane rake, “Ŋine misuk arokkei, ŋerep ŋerep mi seukmaike, eŋe kulu pamaike.”

53Ŋerep ŋerep eŋe seukki, eŋe mo detlukkakoi, eya wane ŋei ŋerep korop eŋe Yesu tenikkakoi. 54Ŋo Yesu eŋe ŋerep ŋerep seuseune eya wane metino ma more orake, “Medepne ge wiyenom!” 55Ŋerep ŋerep yewa eŋe asuine koso ikopka sari takotkakiso, wisikae wiyeke, pakiso Yesu eŋe etane raki, naga magaine eŋe maine ŋara mangoik. 56Ŋerep ŋerep wane naga magaine eya eŋe oŋaetne qaeke, ŋo Yesu eŋe togoleka etane rawetore more rake, “Kine kine iwa wakonmaike, eya ŋire ŋei ŋerep mane misuk edanikeik.”

Currently Selected:

Luka 8: onsNT

Highlight

Copy