Aposolo 18

Paulo Eŋe Korinti Arike

1Pakiso, eya wane ŋadino Paulo eŋe Atens mat qelige more, Korinti matko ari lotkeke. 2Yewao Paulo eŋe Yuda ŋei mane, eŋetine Akwila maratkake, eŋe Pontus kepeo wakonge, eyamo wakon wakon matine. Ŋei eya eŋine so ŋanomine Prisila, ere musele Itali kepeo ŋine sarikoik, onoka wane Roma kepe ware ware, Sisa Klodius, eŋe Yuda ŋei ŋerep korop Roma mat qelige arikei, eya wane edane more esoponge. 3Paulo eŋe ari ere otki, pakiso erane matko ari mere more, eŋerop urata make, onoka wane eŋe enŋene okanmaŋkoi, yale Paulo eŋe seli kise ma more, eyaŋo motki kiyatki gegeene qesiŋkake, eŋe so ŋei so ŋanomine, eŋe korop seli kise ma more, qolemaŋkoi, iwa yale eŋe ŋara aboŋ wane mamaŋkoi. 4Paulo eŋe zonom ma met met nasoo, naso baŋem Yuda lewa lewaŋ urumgo ari more, Yuda ŋei ŋerep so Grik ŋei ŋerep eŋe Yesu Kristo dere malip kaikei, eya wane dereretene kito wirike edange.

5Pakiso, Silas so Timoti ere Makedoniya kepeo ŋine lotkeuk, yewao Paulo eŋe kaiwe korop kisi maep don eya ra qelaŋange, eŋe Yuda ŋei ŋerep lewageu, Yesu eŋe Mesiya eya wane don edange. 6Yuda edo Paulo rawetkau, Paulo eŋe wazaone okora edange, “Ŋine kine kine qotkoine maikeiwo, Kaisaleŋo ŋine esop-ŋuniyake, eya ŋinane simile, na maine mi mapik ŋunikale, naŋane sot mida! Naso iwa ŋine kiyeke wetela kutno arimaike, eyao na qelaŋ ŋei ŋerep Yuda ŋadino gemami, eŋano ari ra qelaŋane edanikale.” 7Ŋei mane Yuda ŋadino eŋetine Titius Yastus, eŋe Kaisale ewine kito more Korinti geke, mat yewao Yuda lewa lewaŋ urum osino Paulo eŋe ari geke. 8Ŋo Yuda ŋei mane, eŋetine Krispus, eŋine so ŋanom dokoine eŋe korop Waom mogat kakoi, ŋei eya eŋe Yuda lewa lewaŋ wane ŋetne okange, eŋe so Korinti mat welaine loutne eŋe Waom wane don dere malipka more, peyam doku taukoi.

9Naso yewao, ruwo maneo Paulo eŋe kulu kulu mane kaki, Kaisaleŋo olale rake, “Ge misuk kaet ganiyake, ge maine takotke ra qelaŋane edanikene, ge urata eya misuk qeliŋgene. 10Onoka wane na gerop gemaile, ŋei maneŋo ge mi geku matali ganiyake, onoka wane ŋei ŋerep loutne mat iwa wane kotino gemami, eŋe naŋane biŋek okanmami.” 11Waomŋo yale olatki, so Paulo eŋe Korinti mat yewao koma weku so meso 6 takotke ge more, ŋei ŋerep Kaisale wane don edange.

12Pakimo, ŋei mane, eŋetine Galio, eŋe Roma gavaman eya ŋine, eŋe Akaiya kepe ware ware birakakoi, naso yewao Yuda edo Paulo ma ari more dongo biraka rakoi, 13“Ŋei iwa eŋe ŋei ŋerep don mane Kaisale ewine kitokei wane edanmaike, eŋane don eyaŋo so ŋenze ra rokop don, eya ŋabakamaike!”

14Paulo eŋe don rayakane wetke okorake, ŋo Galio eŋe Yuda ŋei edane rake, “Ŋei iwa eŋe masi qotkoine make, me sot mane okanikeo, na ŋinane don maine detŋunikale. 15Ŋo ŋine, Yuda ŋinŋine don wane so eŋet wane so ra rokop don eya wane ra more don auye kitat aumami, eya wane ŋine ŋidomka maulukeu, noŋo kine kine yaline eya maine mi ma wesake kaikale!” 16Eŋe yale ra more kot urumgo ŋine esopongi, qeinat ketkoi. 17Ŋei ŋerep magu eŋe korop busu lele more Sostenes, Yuda eŋane lewa lewaŋ wane ŋetne malipka, kot wane kaitko qekoi. Ŋo Galio eŋe eya wane dere mezet mane mi okange.

Paulo Eŋe Antiok Zinge Arike

18Pakiso, Paulo eŋe Korinti ŋei ŋerep mali malip magu eŋerop kaiwe loutne ge more qeliŋongi paki, eŋine so Prisila so Akwila, eŋe Senkriya matko kere more, seki maneo wa more, Siriya kepeo arikei wane arikoi. Paulo eŋe mi wake, Kaisale wane kaitko don natne ra togoleke, eya wane eŋe lewetine zoune korop kitat wareke, lewine setneka metke. 19Eŋe seki kutno Epeso matko lotke more, Prisila so Akwila qeliŋore more, Yuda lewa lewaŋ urumgo waketki, so eŋe so Yuda edo don ra kitoqok aukoi. 20Ŋei ŋerep eŋe Paulo newaliŋka more rakoi, “Ge maine takotke ŋenerop gekene.” Ŋo Paulo eŋe mi okke, 21so eŋe edange, “Kaisaleŋo siminkayakeo, na ŋinano koso zinge sarikale.” Eŋe yale ra more ari, seki mane wa more Epeso qeliŋkake.

22Seki eya ari mage ari mage, Sisariya mat Yuda kepeo lotkeke, yewao, Paulo seki qelige more, Yerusalem ari mali malip magu maratone, wet pese don edane more Antiok zinge arike. 23Eŋe soda natne, naso kiro kirop Antiok matko ge more, qelige Galatiya kepeo so Prigiya kepeo lolike, mali malip magu yewa ma togole one arike.

Yuda Ŋei Mane Apolos Eŋe Epeso So Korinti Matko Arike

24Naso yewao, Yuda ŋei mane, eŋetine Apolos, eŋe Alekzandriya matko wakonge, eŋe Epeso sarike, eŋe don ewekine ramageke, eŋe Kaisale wane ekap wane kine korop detlukwareke. 25Apolos eŋe Waom wane numa eya kito manbi detke, eya wane Apolos eŋe ŋei ŋerep Yesu wane don kisi koboine eya kito edange, ŋo siluŋ eŋe Yohane wane doku tau tau masi eyaka detkake. 26Eŋe Yuda lewa lewaŋ urumgo ari more, kaet midaine don ra qelaŋane edange, naso yewao, Prisila so Akwila ere eŋe detka more, eŋe matetno iwenka ari more, ere Kaisale wane numa manerop koboboine det-kakoik eya mauluke ra qelaŋanka olatkoi. 27Apolos eŋe dere more, Akaiya kepeo ariyakane rake, eya wane Epeso wane mali malip magu eŋe mapitka more, ekap mane qe more Akaiya mali malip magu eŋano motpi paki, qebinone rakoi, “Ŋine Apolos maine newankaikei.” Eŋe yale dere newanka rauso, Apolos eŋe ari Akaiya kepeo lotke more, mali malip magu zok manerop mapikonge, Kaisaleŋo ŋei ŋerep mosoponge, eya wane eŋe Waom wane don malipkakoi. 28Eŋe Kaisale wane ekapko dapore more, eyaŋo ŋei ŋerep Yesu eŋe Mesiya eya wane ra wakone sikan on lukke, eŋe Yuda ŋei eŋerop lewa lewago don togole au sorin nagu more, eŋane don qelaŋine eya Aposolo wane don zonomineŋo Yuda ŋei eŋane don qeki ketki yuwan-onge.

Currently Selected:

Aposolo 18: onsNT

Highlight

Copy