Aposolo 17

Paulo So Silas Ere Tesalonaika Matko Arikoik

1Paulo so Silas ere Ampipolis matko so Apoloniya matko ari kitare more Tesalonaika matko lotkekoik, Yuda eŋane lewa lewaŋ urum mane eya Tesalonaika metke. 2-3Paulo eŋe Yuda eŋane lewa lewaŋ urumgo naso baŋem wa ket okan okan maŋke, eya wane eŋe Tesalonaika geke, naso eyao eŋe lewa lewaŋ urum yewao zonom ma met met nasoo atak karewe waket more, eŋe ŋei ŋerep eŋano Kaisale wane ekapko ŋine dapore sorin one more kito edange, eŋe so ŋei ŋerep ekap eya ra more don aukoi, Mesiya eŋe wikile dere more, koso wisikae wiyeke, eya Paulo eŋe ŋei ŋerep ra qelaŋan one more rake, “Na Mesiya iwa ra more mo ŋidanmaile, eŋe Kristo Yesu.” 4Ŋei ŋerep natne eŋe Paulo wane don malipka more, Paulo so Silas erano lewaŋgoi. Grik ŋei ŋerep so mat wane ŋerep ŋetne, eŋe mo Kaisale ewine kitokoi, eŋe weneŋ Paulo so Silas erano lewaŋgoi.

5Ŋei ŋerep loutne eŋe erano ari takotkekoi, eya wane Yuda ŋei natne busu lele more, ŋei qotkoine natne qeturaŋ ongoi, magu yewa eŋe mat lolike more, ukat suwaine ma more, ŋei mane eŋetine Yason eŋane matko ari Paulo so Silas ziyaŋ ore more, epu ŋei ŋerep eŋane kaiteno waraŋ ore arikei wane, mat eya matalikoi, 6Ŋo eŋe ere mi maratore more, Yason so kimakopene mali malip magu natne eŋe waraŋone, mat wane ŋei ŋetne kaiteno biraone boka rakoi, “Ŋei etke eya ere masi qotkoine kepe baŋem kepe baŋem makoik, naso iwa ere matzo sari matali ŋonikeik wane sarikoik. 7Pakimo, Yasonŋo biraotki, eŋane matko metmamik eŋe ere matino newanotke. Ere korop Roma ware ware rara togon don eya qe barake more, ŋei ŋerep edane ramamik, ‘Ware ware mane gemaike, eŋetine Yesu’ yalewa ra edanmamit.” 8Yale rau so ŋei ŋerep magu so mat wane ŋei ŋetne eŋe dere more oŋaene qaeke, pake ukat suwaine makoi. 9Pakiso mat wane ŋei ŋetne eŋe Yason so kimakoune natne eŋe wesi qoleu so biraonbi mateno arikoi.

Paulo So Silas Ere Bereya Matko Arikoik

10Ruwo kereki so eyaka mali malip magu eŋe Paulo so Silas Bereya matko biraotpi arikoik, ere ari Bereya lotke more Yuda eŋane lewa lewaŋ urumgo waketkoik. 11Yuda ŋei ŋerep Bereya matko gekoi, eŋe mayakakatne, edo Tesalonaika wane Yuda ŋei ŋerep magu dereret mayakatnane yuwan ongoi, eŋe Paulo wane don desikei wane simin onge, so Kaisale wane ekap dapotkoi, ekap eya so Paulo wane don eya naso baŋem dapore wele me isi eya wane kine etne detluk kakoi. 12Yale okane more, Yuda ŋei ŋerep loutneŋo don eya malip kakoi, eŋe yalewa okanbi, Grik wane ŋei ŋerep suwaine natne eŋe yalewa korop mali malip korop okanwarekoi, so don eya malip kakoi. 13Ŋo Yuda edo Tesalonaika ŋine, eŋe Pauloŋo Kaisale wane don Bereya ŋei eŋano ra qelaŋange, eya wane eŋe dere more, Bereya sari ŋei ŋerep kiyeke qebinone ukat suwaine mau wakongi, 14ikopka, mali malip ŋei ŋerep magu eŋe Paulo iwenka ari kiwet mezenoka birakau arike, ŋo Silas so Timoti ere Bereya metkoik. 15Ŋei natne eŋe Paulo iwenka ari, Atens matko biraka more, Bereya zinge arikoi. Pakiso, Paulo eŋe ŋei eya edange, “Ŋine Silas so Timoti iwa ikop sarikeik wane etanikei.” Rakiso, eŋe zinge ari etangoi.

16Paulo eŋe Atens matko Silas so Timoti toma ore mat lolike ge more, lopio so kepe nemu nemu loutne ongi paki, bauine wake. 17Eya wane eŋe ari Yuda lewa lewaŋ urumgo waketki paki, Yuda ŋei so Grik ŋei ŋerep eŋe Kaisale malipka ewine kito gekoi, kaiwe baŋem eŋe eŋerop don au sorin nagukoi, so mat sobeŋ suwaino ŋei ŋerep weneŋ lolikmaŋkoi, eya wane Paulo eŋe ŋei ŋerep eŋerop kaiwe baŋem don aukoi. 18Epikuriyan kito ebo ebon, so Stoik kito ebo ebon ŋei natne, eŋe Paulorop don sori sorin aukoi, ŋei natne qeson one rakoi, “Ŋei dereretine midaine eya eŋe onoka don ramaike?”

Ŋei natne eŋe weneŋ rakoi, “Iwa mo kamaine, eŋe mat natne eŋane lopio wane don ramaike.” Don iwa rakoi, yemo onoka wane Paulo eŋe Yesu seuseuno ŋine wisikae wiyeke so eŋine don kisiine ra qelaŋange, eya wane ŋei eŋe don eya rakoi. 19Pakiso eŋe Paulo ma more mat mane kaunsol, eŋetne Areopagus, eŋano iwenka lewa lewaŋeno ari more olatkoi, “Ge ŋei ŋerep don kine kine musele mo kito ebonmaine, eya korop ranom ŋene detlukkaikene. 20Ge kine kine natne ŋene detŋem ge ramaine, eyamo don kuneŋine okanmaike, so don eya wane kine daleo eya rau lukenom, ŋene desikene.” 21Atens mat welaine so lobo ŋei eya gekoi, eŋe naso kiroine korop kine kine musele wakonge, eyaka korop desikei wane don aumaŋkoi.

22Yale rauso, Paulo eŋe mat ware ware kaunsol Areopagus wane lewa lewago ŋei kaiteno wiye more rake, “Atens mat welaine, na kawe ŋine lopio so kepe nemu nemu loutne togole eweene kitomami. 23Na matŋine lolike meŋenka okanmami, eyao ari lopio so kepe nemu nemu loutne ongole. Na yale lolike more, lopio so kepe nemu nemu wane arata mane kakole, kibiine iwa yale qekoi, ‘Waom kuneŋine mi dereretze’. Ŋine Waom kuneŋine eya mi dereretze, ewine kitomami, ŋo siluŋ ŋine mi detmami, na eŋane don iwa ra wakone ŋidanikale. 24Eŋe Kaisale koboboine, oŋo kepe so yeye kine kine iwa pamaike, eya make. Eŋe qeli so kepe wane Waom, so eŋe ŋeiŋo bakom urum mamaine eyao mi gemaike. 25Me eŋe kine kine natne ŋaŋaeki, ŋeiŋo urataine ma mi qesiŋkakene, eŋe oŋomka gege so asu, so eŋe ŋara aboŋ so kine kine korop ŋei ŋerep ebon okanmaike, eya wane ŋene maine mi mapik kaikene, 26eŋe ŋaboze ŋei weku ma wakonkake, eso ŋaboze wekuwo ŋine magu korop kepe baŋem gekei wane ebuki wakongoi. Eŋe oŋomka mokaka nasoene so zawoene koboine kepe diyawao gekei wane mauluke motke, Kaisaleŋo ŋei ŋerep kepe biŋek ra togoleke. 27Eŋe eya okange, yemo ŋei ŋerep eŋe Kaisale ziyaŋka ari more, marat kaikei, eya wane Kaisale eŋe yale okange, ŋo siluŋ Kaisale eŋe ŋene qeliŋŋone amaŋ mi gemaike, eŋe osozo met okanmaike. 28Ŋei maneŋo rake,

‘Ŋene eŋane kutno gemaine, so ari sari okanmaine so togolemaine, eŋe maki ŋene wakongone, iwa gemaine.’

Ŋinane ŋei natne kisi raraŋo ra okanmami, yale eŋe iwa yale rakoi, ‘Ŋene korop Kaisale wane medewekoune.’

29Ŋene Kaisale wane medewekoune okane gemaine, eya wane ŋene misuk metke raikene, Kaisale eŋe gol me silwa me wesiŋo ŋei mete kibi mama edo ŋei oŋa mamami, kait toqaine yalewa misuk desikene. 30Mo sogino, ŋei ŋerep eŋe Kaisale wane kine mi det lukkakoi, eyao Kaisaleŋo loloŋonge, ŋo ukude yemo eŋe ŋei ŋerep korop yeo yeo numaene qotkoine ŋadek kaikei wane, don togole edanmaike. 31Eŋe kaiwe mane mo mauluke more ra togoleke, naso yewao eŋe ŋei mane mo birakake, ŋei eyaŋo ŋei ŋerep kepe baŋem kineene baŋ ma wakoniyake. Iwa yale Kaisaleŋo ŋene sikan ŋonge, kine kine eya wakonge, eŋe ŋei eya seuseuwo ŋine maki wisikae wiyeke!”

32Ŋei maneŋo seuseuwo ŋine wisikae wiyeke, eya ŋei ŋerep eŋe dere more, natne Paulo ma sirak okankakoi, ŋo ŋei natne rakoi, “Ŋene ŋinane don koso desikene.” 33Yale rau so Paulo lewa lewaŋ qeliŋkaki, 34Ŋei natne eŋe Paulo mogatka more, eŋane don malip kakoi. Ŋei mane, eŋetine Dionisius, eŋe Kaunsol ŋetne mane, eŋe malipkake. Ŋerep mane, eŋetine Damaris, eŋine so ŋei ŋerep natne weneŋ eŋe malipkakoi.

Currently Selected:

Aposolo 17: onsNT

Highlight

Copy