Aposolo 12

Herotŋo Yakop Qeki Seukkiso Petoro Mulap Urumgo Birakake

1Naso yewao kepe ware ware Herot eŋe mali malip magu wikile kiyeke ebonge. 2Eŋe kawali ŋei koune edangi eŋe Yakop, Yohane wane tatine pilaŋŋo qeu seukke. 3Herot eŋe masi eya maki, so Yuda ŋei ŋerep eŋe kau siminonge, eya wane eŋe kawali ŋei koune biraongi, so eŋe Petoro mulap urumgo birakakoi, Yuda eŋane zonom ma met met nasoo so mere kasap sap saune ne okangoi, naso yewao. 4Eŋe Petoro malipkaki paki, mulap urumgo birakaki waketke, paki kawali magu etke so etke, eŋe Petoro eya eŋane meteo birakake, paki eŋe eŋane diyam okorakoi, paki tego etke so etke (4) eya ŋine mapok ongi, kawali ŋei tego eya etke so etke okangoi. Paki Herot eŋe detke, ŋado Aŋelo Loloŋon Loloŋon Naso qoeki, eyao Petoro ma ari more ŋei ŋerep eŋane kaitko qewe seukeyake. 5Herot eŋe Petoro mulap urum koto birakaki metke, ŋo mali malip ŋei ŋerep eŋe Petoro wane ra more Kaisale wano togole meŋenkakoi.

Aŋelo Eŋe Petoro Mulap Urumgo Ŋine Iwenka Ketkoi

6Qaeki Herot eŋe Petoro iwenka ari dongo birakayakane wetkeke, ŋo qei kino mi okangi, ruwoo Petoro eŋe kawali ŋei etke erane keuwetno kulu pake, eŋe mulap senŋo lukkakoi, ŋo kawali ŋei eŋe mulap ŋei eŋane mat madetko diyam okorakoi. 7Ikopka, Kaisale wane aŋelo maneŋo mulap urum koto okoraki, so qelaŋaneŋo mulap urum koto qelaŋange. Aŋelo eŋe Petoro wokino ma wirikaki wiyeki olatke, “Ikop! Wiyenom!” Raki eyaka ikopka mulap metino ŋine qoe ketke. 8Pakiso aŋeloŋo olatke, “Ge radepŋone ramu more kiye kulitŋone bira makatakenom.” Petoro eŋe yale okangi, aŋeloŋo koso olatke “Ge momo takotŋone bira more na mogat nanikene”. 9Petoro eŋe aŋelo mulap urumgo ŋine mogatka saketke. Kine kine iwa wakonge, Petoro eŋe mi detlukkake. Eŋe wetke rake, “Kulu kulu mane kamaile,” yale ra wetkeke. 10Ere kawali ŋei magu mane eya yuwan ongoik. Paki ere koso ari kawali ŋei magu mane eya yuwanone more, mulap urum wane madet suwaino lotke more, mat suwaino wakesikeik wane ariuk, so madet eya oŋomka qoe lalaŋgi, mat ŋadino waketkoik. Ere numa maneo ketpik paki, ikopka aŋelo eŋe Petoro qeliŋkake.

11Pakiso, kine kine wakonge, eya Petoro eŋe detlukka more rake, “Welekatne, Herot so Yuda ŋei ŋerep eŋe na wikile ninikei wane detkoi, ŋo Waomnane aŋeloineŋo birakaki, ket na mulap urumgo ŋine iwennane ketmaike, Herot so Yuda ŋei ŋerep eŋe mi matali nanikei.”

12Petoro eŋe yale dere more Mariya wane matko arike, Mariya eŋe Yohane Mareko wane nagaine. Ŋei ŋerep loutne mat eyao lewage meŋenkakoi. 13Petoro eŋe mat madetko lotke more madet ŋadino yatoke. Paki so qelit ŋerep mane eŋetne Roda, oŋo don turuŋine maingeyakane sarike. 14Ŋerep eŋe Petoro wane done mo detkake, ŋo eŋe qom suwa so kaet ŋerep, eya wane eŋe Petoro wane nigetkaki, eŋe madet mi lalage, eŋe zinge ari don kisi eya ŋei ŋerep edange. 15Ŋei ŋerep eŋe dere more olale rakoi, “Ge qelaŋ okanmaine!” Ŋo eŋe koso sorinone edangi, ŋei ŋerep eŋe rakoi, “Aŋelo maneŋo sarimaike.”

16Don yale auye rauso, Petoroŋo takotke edoraki, eŋe sari madet lalage more, kau paki, oŋaene qaeke. 17Petoro eŋe metineŋo ma zop onge, eya wane ŋei ŋerep eŋe donene midaine metkoi, yale metpiso Kaisaleŋo dalino okane more, eŋe mulap urumgo ŋine iwenka ketke, Petoro eŋe eya wane korop ra qelaŋane more edange paki rake, “Don kisi iwa Yakop so mali malip magu natne korop edan warekei.” Yale ra more eŋe Yerusalem qelige more mat maneo arike.

18Kepe qaeki so mulap urum wane diyam gege ŋei eŋe kaet suwaine ongi, dere mezet okane qesonnagukoi. “Petoro eŋe diyao arike?” 19Herot eŋe ware ware ŋei loutne edangi, eŋe ari Petoro ziyaŋka more mi maratkakoi. Herot eŋe ware ware eya wanokone more kawali ŋei natne edoraki, so eŋe ware ware enguwi seukkoi.

Herot eŋe kine kine eya ma more Yuda kepeo qelige more Sisariya matko arike.

Herot Eŋe Seukke

20Herot eŋe Tire so Sidon mat welaine eŋane sotine osike, paki mat welaine eŋe Herot korop lewaŋgei wane arikoi. Mikepka eŋe Blastus mau eŋane ŋadeeno arike, eŋe Herot wane mat ware ware oŋo qesiŋoniyakane eŋe qesonkakoi. Pakiso, eŋe Herot wano ari peyam dume niyakane, eya wane eŋe Herot olatkoi. Onoka wane Sidon so Tire mat welaine eŋe Herot wane kepeo ŋine ŋara aboŋ korop qole okangoi, eya wane eŋe Herot sot osi osiine eya qoeyakane sorinka meŋenkakoi.

21Herotŋo kaiwe naso mane motke, paki kaiwe naso yewao eŋe ware ware wane kibi auke, paki eŋe ari ware ware met met wane kutno pese metke, eŋe mere don suwaine edange. 22Ŋei ŋerep eŋe don dere more boka rakoi, “Iwa mo Waom mane wane aŋa don me ŋei mane wane aŋa don mida!” 23Ikopka Kaisale wane aŋelo maneŋo Herot qeke. Qeki koma koma eŋe Herot qomine ki lotke neu, so seukke. Onoka wane Herot eŋe Kaisale ewine mi kitoke, eya wane aŋeloŋo qeki seukke.

24Naso yewao Kaisale wane donŋo takotke more suwa matko matko arike. 25Barnabas so Saulo ere urataetne Yerusalem matko mauk qoeke paki, ere koso zinge arikoik, ari Yohane Mareko mauk ererop arikoi.

Currently Selected:

Aposolo 12: onsNT

Highlight

Copy