Aposolo 11

Petoro Eŋe Kornilius Wane Donkisi Mali Malip Magu Yerusalem Edange

1Petoro eŋe qelaŋ ŋei ŋerep Yuda ŋadino Kaisale wane don edange, aposolo natne so mali malip magu Yuda kepe korop Kaisale wane don kisi eya detkakoi. 2Naso yewao mali malip magu keuweno ŋine ŋei natne edo iwa yale rakoi, “Ŋei qelaŋ natne Yuda ŋadino eŋe Yesu mogat kakei wane, yaene solaine kitasikei.” Pakimo, Petoro eŋe Yopa ŋine zinge Yerusalem ari lotkeki paki, Yuda ŋei edo Petoro ra wetkakoi, 3Eŋe iwa yale rakoi, “Ŋei eya eŋe yaene solaine mi kitatkoi, ge eŋane matko arikone, ari ŋei yewa eŋe yaene solaene mi kitatkoi, ge eŋerop mere ŋara nekone!” 4Yale rau so Petoro eŋe kine kine wakonge, eya korop ra qelaŋane edange.

5“Kaiwe mane na Yapa matko meŋenka more kulu kulu mane kakole, laplap suwaine wakonge, kine kine natne eŋe laplap eya nat parom etke so etke piseke so yale waka laplap qeliwo ŋine qere dege ket more, naŋane osono lotkeke, 6na mat osomine, osom zubaine, koma, logum, parewa so naŋi zubaine laplap kotino ongole. 7Pakiso, ŋei maneŋo nolatke, ‘Petoro, ge wiye more engu nenom!’ 8Ŋo, na mainge rakole, ‘Waom, na mi okanikale midakaka! Mose eŋe osom kine kine mi nenine rake, sogino na osom eya mi nekole’. 9Ŋei eya qeliwo ŋineŋo koso nolatke, ‘Kaisaleŋo kine kine eya mo raki libeka okange, ge maine misuk raikene, mi nenine.’ 10Atak karewe laplap ket wakongi kawe, so koso qeliwo wake. 11Naso yewao Kornilius wane ŋei karewe Sisariya ŋine Simon wane matko lotkekoi. 12Asu Koboboineŋo naŋano wakonnane rake, ‘Ge eŋerop ikop arinom.’ Ŋei 6 Ŋenze mali malip magu, Yopa ŋine eŋe narop weneŋ Sirariya arikoi, paki ŋene koropŋo Kornilius wane matko wa ketkone. 13Eŋe eŋine donkisi ŋedange, eŋe aŋelo maneŋo matine koto wakonkaki paki olatke, ‘Ge ŋei mane Yopa birakanom, eŋe ari Saimon Petoro maratka more, iwa iwenka sariyake. 14Petoroŋo don welerop ŋidaniyake, eya wane Kaisaleŋo ge so dokoŋone baŋ korop ma menaŋ ŋuniyake’ 15Pakiso, na eŋe don kiyeke edanbe, so Asu Koboboineŋo eŋane kuteno ketke, Asuŋo sogino ŋenane kutzo ketke, masi yaleka okane ketke. 16Ketki, so na don mane detsorokkole, Waomzeŋo rake, ‘Yohane eŋe ŋei ŋerep doku tau-onge, ŋo, noŋo ŋine Asu Koboboine ŋibonikale.’ 17Sogino ŋene Waomze Yesu Kristo mogatkaŋem so Kaisaleŋo ŋene Asu Koboboine ŋebonge, naso iwa na kaulukmaile, yalewaka, Kaisaleŋo qelaŋ ŋei ŋerep Yuda ŋadino, Asu Koboboine ebonge, na Kaisale maine mi rawetkakole!”

18Petoro eŋe raki qoeki, mali malip magu eŋe dere more, Petoro mi rawetka more, Kaisale wane eŋetine mau waki rakoi, “Kaisaleŋo rake, ‘Ŋei ŋerep qelaŋ, Yuda ŋadino, eŋe sotene ŋadek kaikeiwo, na eŋe ebuwe gege togongo wakesikei.’ ”

Mali Malip Magu Eŋe Antiok Matko Gekoi

19Naso sogino Kaunsol eŋe Stiwen qeu seukki, so mali malip ŋei ŋerep wikile suwaine detkoi, eya wane kakak nagu arikoi, eŋe Yerusalem ŋine Ponisiya kepe, Saiprus siya so Antiok matko arikoi. Eŋe Yuda ŋei ŋerep eŋanoka kisi maep don ra qelaŋane edangoi. 20Ŋo mali malip ŋei natne, Saiprus siya so Sairini matko ŋine eŋe qelaŋ ŋei ŋerep, Yuda ŋadino gekoi, eŋano yaleka ra qelaŋane edangoi, eŋe Waomze Yesu wane kisi maep don Antiok matko ra qelaŋane edangoi. 21Waomzeŋo ŋei eya zonom ebonge, eya wane ŋei ŋerep loutne eŋe Waom malipka more, Waom wano wetene maingekoi.

22Mali malip ŋei magu Yerusalem kotino gekoi, eŋe donkisi eya dere more Barnabas, Antiok matko birakau arike. 23Barnabas eŋe Antiok ari lotke more, so Kaisaleŋo dalino ŋei ŋerep mosop onge, eŋe eya ka more bakomine kitoke. Eŋe ŋei ŋerep qebinone rake, “Ŋine Waomze wetŋineŋo naso baŋem malip kaikei.” 24Barnabas eŋe ŋei wele, mali malip so Asu Koboboineŋo eŋano watke rokop kake, eya wane ŋei ŋerep loutne eŋe Waom mogat kakoi.

25Urata eya qoeki so Barnabas eŋe Tarsus matko ari Saulo ziyaŋkake. 26Barnabas eŋe maratka more, Saulo iwenkaki ere Antiok arikoik. Koma weku Saulo so Barnabas mali malip magu eŋerop lewaŋgoi, ere ŋei ŋerep magu suwaine kito ebongoik. Antiok mat welaine eŋe mali malip magu eŋane masi ka more, eŋetene “Kristen” (Doku Tau Tau Magu) edorakoi. Eŋet iwa sogino mi wakonge.

27Naso yewao propet ŋei natne eŋe Yerusalem ŋine Antiok arikoi. 28Ŋei mane, eŋetine Agabus, eŋe mali malip magu keuweno wiye okora more, Asu Koboboine eŋane zonomineŋo olatki rake, “Ŋara wane bodi suwaine kepe baŋem wakoniyake”. Naso Klaudius, Roma kepe ware ware geke, naso eya ŋara wane bodi wakonge. 29Mali malip magu, eŋe lewage rau togoleke, “Ŋene bonep bonep wesi aboŋze pa ŋebonmaike kop qeturage more, mali malip kimakopze Yuda kepeo gemami, eŋe qesiŋ-ongene.” 30Yale ra more wesi aboŋ qeturage more, Barnabas so Saulo eponbi, so Barnabas so Saulo ere Yerusalem ma ari more, mali malip magu ŋei suwaine ebongoik.

Currently Selected:

Aposolo 11: onsNT

Highlight

Copy