Taitase 1

Poleyewi Taitasema Sawi Momate Tiye Selawapowa Wekeye

1Newa Poleyewi sawi weyamowa momate tiye selawatakeye. Neyawa Koteyewi tima:na: tisewa timita: newa ta:peyakeye. Yesuyewi alusewa walomita: newa apasolo walosene sena ta:peyakeye. Koteyewi ta:peya sena kesaleyawa Kotewalapulu hekeya matanemita: newa ta:pelepita: Neyewi kiwa seselese walokeye. Koteyewi heneye sowa iyewi sopoke matanemita: neyewi se tiye kinakeye. Heneye sowa ta:tapola: Koteyewi alusewa kulu hamonite neyewi kiwa seselese walokeye. 2Alake Koteyewi se tiye miwa ta: tisene sena kesaleyawa matanese, “Niwa Kotewalapulu kao sita:pesena:keye,” aluse matanesekeye. Koteyewi Ene mokopo eta: selesemakeye. Puwano fa:nemi peleya: weyala meiki falala a timinima:na:no Kote Ene Ewemi pala sena kesalewa Ewalapulu kao sitalaposakeye. Aluse heneye seyakeye. 3Selapola: apola: Ene matana emi ela: Eyewi ta:peya ikila emiwa, sowa Koteyewi Ene tima:na: tisene senama hokato waiyakeye. Waiyawa sena kesaleyawa ta:pita: tima:na: tisene sena kiyewi se tiye kina:pa:, au seyakeye. Aluse Ene sowa sena kesalema semita: newana ta:peyakeye. Newa ta:peya Kote amokiwa niwa heleye tisekeye.

4 # 2 Kol 8:23; Kal 2:3; 2 Tim 4:10 Taitase, kema neyewi sawi weyamowa momatekeye. Koteyewi se tiye miwa neyewi ta: ti epapuluse keyawala ta: tinase kewa neyewi sala epapulakeye. Kotewa niyewi Ni Atakeye. Aputa: Yesu Kelesowa niwamo mene silisene senakeye. A:tewi kewa mokopo seselesewana, kewa hopola epesita:, aumita: neyewi kulukulula:la:keye.

Potapola: Sita: Tesene Senayewi Alusewa Wekeye

5Taitase, neyewi kewa Kiliti hano olo:luwemi iya:pela: newa ha:na:na:nase neyewi kema selese, “Na:tewi tima:na: tiwa eta: titimakeye. Alake kewa kemi ela: titiya:pa:. Koamesa: sopowemi Yesu Kelesowemi pala sena kesale pota: sita:pesa:na: senawa#1:5 Pote sita: tesene senawa paseta sena akeye. ta:pele tiya:pa:.” Aluse neyewi kema selapola: apola: newa minakeye. 6#1 Tim 3:2-7Sena tilila piseiki ta:pele tima:na:wa weyamu sita:newa ta:pele tiya:pa:. Ketea sopowa potapola: takalepela: aluse ta:pele tiya:pa:. Sena kesale sikapo mane olokeyatela matiminisaleke ewa sena nowamoke eta: wepi selesemakeye. Aputa: ene kesalewa semetei tiyapola: ela:, ene kesale amowa matanepela: tesekeye. Aputa: ene salayawala Yesu sowa ta: tiyapola: sita:la:, apula: ene e sa:yawana kesale akoma:na: eta: selesema, apula: ene e la:wala sena eta: setelesema, apula: ene salawa sena kesale nowamoke eta: wepi selesema, apula: sala amokiwa eta: tikape telamake seli sita: tesene, sala amo inawa ta:pele tiya:pa:.

7Apula: sena tilila piseiki senayewi Kelesopela: Kelesowemi pala sena kesalewa pota: sita: tesekeye.#1:7 Potapola: sita: tesene sena amunawa tikone senayewi alusewa akeye. Tilila piseiki senayewi olokeyale matiminisaleke ewa eta: wepi selesemakeye. Alanase tilila piseiki sena aluse sita:la: sena ta:pelekamakiwa ililakeye. Eyewi ene ewa tiye eta: putamake sena nokamoke matanawana ta:tapola:, apula: ene kipila konomonamake, apula: ene hano olokeyatela nase eta: tesema, apula: sena nowa kipila eta: sanosema, apula: moweni sosolo tima:na:pela: eta: matanamake sita: tesene senawa ta:pele tiya:pa:. 8Aputa: sena makene inapitekiwa nekanese siliyapola:, apula: nano ketea napolo sopolo matanese sita:la:, apula: seli matanepela: tima:na: tiya:sela: sita:la:, apula: mane olokeyatelawa takala:pela: Kotema matana semetei matanesewa tiye putupela: sita:la:, apula: tomayewi matanawa tiye sikapetapo himuyewi napolo matanesewa tiye putupela: sita:la:, epapuluse sita: tesene senawa ta:pele tiya:pa:. 9Heneye sowa puwano ema se tiye miwa, ta: tiyapola: ela:, eyawa sena kesale nokamawa solo hekeyawa se tiye kinapola:, apula: tikape tesene sena kesalemawana hekeya:sela: se tiye kinapola:, aluse timinisene senawa ta:pelekamakiwa ililakeye.

10Koiyawemiye, sena kesale mutayewi heneye sowa tikapeye tipela:, iyewi ipitane mokopo sowa kele tiye mokopo selesekeye. Solo kele tiye apola: sena nokama sutuse selesekeye. Iyawa solo elewa “Kaka hekelesa: nana:pa:,” aluse solo elewa kulu hanose sena noka sukulu tiye selapitekiwa tikili tesekeye. 11Alake iyawa mokopo sowa sema:pekise kiwa pota: sita: tesene senayawa iwa kapa:. Iyawa mokopo sowa se tiye mamiyapekeye. Alawamona mokopo sowa se tiye kinisekeye. Mokopo se tiye kinapita: koane semetei sita:ne sena kesale sala sopoyawa ta:tapola:, heneye sowa iya:tesekeye. Iya:tapita: potapola: moweni sosolo tima:na:pela: matanese mokopo sowa kinisekeye. Moweni sosolo tima:na:pela: mokopo sowa walosene sena tepela: se tiye kinise ewamapetakeye.

12Aputa: puwano Kiliti sepatosene sena unuwa sosolo elakamoke selese, “Kiliti senayewi i kene kemi mokopo sela:sela: sita: tesekeye. Ikayewi olokeyatela yekele tesene epapuluse yekele tesa: sita:la:, sena amoke sena nowa alusekeye. Iyawa ma:na: sosolo ma:na:pela: epeya kamona ma:na: nasewa tima:na:pela: iyawa tima:na: eta: tisemakeye. Mokopo tima:na:pela: matanesekeye.” Aluse sepapolakeye. 13Ta:ta:pa:. Sena amoke seyawa heneye kalusekeye. Alanase mokopo seyawa Kelesowemi pala sena kesaleyawa ta: tima:pekise, iwa hekeya:sela: penanose walopa:. Kote solo henewa iyewi ta: tiyapola: penanose sita:pesita: keyawa seli walopa:. 14Aputa: Yu sena tililayawa puwano fa:nemi aluse napokeye. Aluse solo henema sele minawa#1:14 Puwano fa:nemi tesa:le walosene epapulakeye. ta: tiyapa. Heneye solo tikape tesene sena amokiwa ipitane matana solo ele tuwapowa ta: tiyapa.

15Sena kesale seli sita:neyawa matanese ketea nowamokiwalao, ketea nakamokiwalao, nano ketea sopoke napolo sopolo telakeye, iyewi esa: matanesekeye. Alawamona, sena kesale olokeyale sita:neyawa iyewi Yesu Kelesowemi matana semetei eta: matanamake sita:neyawa matanese ketea sopoyawa iwa eta: napola: tesemakeye, aluse matanesekeye. Alake iyewi mane olokeyatelawa wekeye, ketea napowa wekeye, aluse takalese eta: matanesemakeye. Iyawa olokeyale timiya:sela: kemi, iwa eta: ewalosemakeye. 16Iyewi selese, “Kotewa niyewi heneye matanekeye,” e seya kamona iyawa kao olokeyale timiya:sela: sita: tesekeye. Aputa: Kote sowa iyewi tikapeye tipela:, Koteyewi mapoya keteawa iyewi tiya:sela: sita: tesekeye. Iyawa napolo tima:na:pela: eta: matanesemakeye. Aluse tikape tesene sena kesaleyewi ketea napowa matanepela: eta: timinima:na: telamanakeye.

Currently Selected:

Taitase 1: khs

Highlight

Copy