Mataio 2

Wenac ere ereaunac ngic

1Yesu Betreheng amau Yudaia provinsiu fingerec, naso imohai Herodengo ngictau kefec. Kecmanu negen negengngic goa bangec wenac ere ereaunac Yerusalennu hama 2#Bki 24:17yofi degec, “Yudangic ngeneac ngictau fingecdac, ye dahai? Neni wenac ere ereau tacma yeac asomeng ereu hemma ye eweheiminideac hadimbe.” 3Ifi degec ngictau Herodengo imoc negemma ubaebic meec. Meu ngicngac Yerusaleng taonnu kecgec, yeneng ifingoc anggec. 4Nga ye yudaareng yeneac womonggareng enara nga mitiac negen negengngicfocngina sasawa heitaiyunuma yofi dekpesi ayemmeec, “Messiango dahai fingerudeac dedea?” 5Ifi kpesiyemmeu yofi degec,

“Imoc Betreheng taonnu Yudaia provinsiu. Imocacnoc profetengo yoac yofi ohoec fede, 6#Yoh 7:42‘Yuda bangecfu Beterehennac enara mong fingecma israengicngacfocna garengyunuudeac taong imoc yudaarenggac taong goa yeneac mamea kpac.’ ” (Mika 5:2)

7Ifi edegec Herodengo wenac ere ereaunac negen negengngic tembucfu heitaiyunuma asomeng noc nasoac fingerec, imocac naso dindingac negenudeac dekpesi ayemmeu edegec. 8Edegec yeng yofi dema Betreheng amau sueyunuec, “Ngeni kemma sabac dahai fede, imoc hofocma meficgema hama edenugec neng mong ifingoc kemma eweheimibesare.”

9-10Ngictaungo ifi deu yeni imoc negemma sinnu kenggec. Kemma asomeng wenac ere ereau henggec, imocngo monggoc fingeru hemma ubangerectoa negemma desogai homac anggec. Nga asomengngo waraiyemmeu kengkecma sabac feec, ama imocac witiau heiserima tarec. 11#Myeg 72:10-15; Yes 60:6Taru yeni amau emma sabac nga nonggea Maria yerenggec. Yeremma fafoc heima ngonducnema ye afehegec. Amma finachienginaunac ubangerecac wiac yofi widicma migec, gol nga hosuc homungkerengagoc amma icsopea homuna gombunga kpara mira. 12Nga Anutungo yeni Herodearu sing mi dzigenegecdeac gauu goro dema dederecge ayemmeu yeni sing monnu sing bangecnginau dzigenegec.

Yesu medac onggonggeec

13Dzigenema kenggec Kebuac angero mongngo Yosefe gauu fingecmima yofi edeec, “Ge yacma sabac nonggeagoc meyuruma worama Aigita bangecfu kemma kecgec. Kecmagec neng edengunubaguc monggoc habisia, nocac Herodengo sabac hofocma meficgema kpehomeudeac dede.” 14Ifi deu Yosefengo tofocnac imohaingoc yacma sabac nonggeagoc meyuruu Aigita bangecfu kenggec. 15Kemma ihai kecmagec Herode homeuguc dzigenegec. Nga Anutungo profeteac enacfu yoac faiu yofi deec,

“Ni Aigita bangecfunac medacna kpacba haec.” (Hos 11:1)

imoc fora anudeac ifi fingerec.

Medac yunukpebuc anec

16Anu negen negengngic yeneng Herodeac yoac wagec, ye ifi hemma herebutoa negenec. Negemma Betreheng nga amabangec imocac wegenacfu tarec, imohai wasaingic sueyunuu yeni ngicngac imoc yeneac medacfocngina kifangina yohockang namma made, yeni sasawa yunuhomedacgec. Imoc negen negengngic yenearunac naso negenec, imocac sirihau anec. 17Ifi anu profete Yeremiaaru yoac yofi dedea, imoc fora fingerec.

18 # Fing 35:19 “Raama taonnu kiacsonggong nga ubahodung kuneng fingecde. Imoc Rahengo nambaracfora homegec, yeneac kiackecde. Ye nambaracfora homedacgec mong mi kecdaeac demeefai ammigecdeac mi negende.” (Yer 31:15)

Isracel bangecfu dzigenegec

19Anu Herode homemanuguc Anutuac angero mongngo Yosefe gauu fingecmima yofi edeec, 20“Ge yacma medac nonggeagoc meyuruma Isracel bangecfu kenna, medac kpehomebesonga degec, ngic imoc yeni bic homegec.” 21Ifi deu Yosefengo efaima yacma medac nonggeagoc meyuruma Aigita bangec wama Isracel bangecfu dzigenema kenggec. 22Kemma Yosefengo yoacsiduc yomoc meficgeec, “Akelaongo mama Herodeac tatac mema Yudaia provins, imocac ngictau anec.” Yosefengo imoc meficgema ihai kecbeso kengec kpeec. Nga ye gauu goroyoac negenecac Gariraia provinsiu kenec. 23#Yes 11:1; 53:2; Ruk 2:39; Yoh 1:45Kemma taong mong kpara Nadzarete, ihai emma kecgec. Profete yeneng yoac yofi degec, “Ye nadzaretengic, ifi degecde.” imoc fora anudeac ifi fingerec.

Currently Selected:

Mataio 2: Ded

Highlight

Copy