Fingec fingec 46

Yacakow ye Aigita bangecfu kenec

1 # Fing 28:10, 13; Myeg 105:23 Anu Isracel ye wiara sasawa medacma kemma Becer Sewa amau sikeec. Sikema mama Itsakac Anutu sese faimima hosuc ohomiec. 2#Fing 22:11; 31:11Ohomima femanu tofocnac Anutungo Isracel gaukpefinnu yofi dema kparec, “Yacakow, Yacakow.” Deu yeng yofi deec, “Ni yomoc.”

3 # Fing 35:11 Ifi deu yofi dema edeec, “Ni manggaac Anutu. Ni Aigita bangecfu ge mesaheguba ngicngacareng kuneng ambesannec. Ge imohai kennadeac kengec mi gubeso. 4#Fing 28:15; 50:1Ni gegoc Aigita bangecfu momoc kemma kecbade amma foracngoc, ni monggoc merengguba dzigenebesannec. Yosefngo ine kicga mesufuude.”

5Ifi edeu Yacakow ye Becer Sewa amaunac yacma kenec. Anu medacfora yeni Parecongo Yacakow kenudeac keretac fau kenec imohai mangngina nga nambaracfocngina kapia amma enengfocngina momoc faiyunugec enggec. 6#Aps 7:15Amma ramaburumakafocngina nga finacngina Kenacan bangecfu kecma meficgegec imoc momoc medacma kendacgec. Anu Yacakow nga esamedacfora sasawa Aigita bangecfu sikegec. 7Ye medacfora nga yeneac medacfocngina nga naroangfora nga nambaracfora yeneac naroangfocngina amma ngabobangecfora sasawa wangecyunuma Aigita bangecfu kenggec.

Yacakow esamedacfora

8 # Mke 1:1-4; 6:14; Bki 26:5; 1Ngts 2:1 Yomoc Isracelac areng Aigita bangecfu kenggec yeneac kpacareng. Imoc Yacakow nga medacfora.

Leaarunac nambarac yomoc fingecgec

Yacakowac warac medaha Recuwen. 9Recuwenggac medacfora yofiguc, Hanoc, Fallu nga Hetseron amma Haremi.

10Nga Simeconggac medacfora yofiguc, Yemucel, Yamin, Ohad, Yahin nga Tsohar amma kenacangngac yeac medaha Sacul.

11Nga Lewiac medacfora yofiguc, Gereson nga Kehat amma Merari.

12Nga Yehudaac medacfora yofiguc, Er, Onan, Sela nga Perets amma Dzera. Er nga Onan yeri Kenacan bangecfungoc homeoc. Nga Perets medachora imoc yeri Hetseron nga Hamul.

13Nga Issasharac medacfora yofiguc, Tola, Fuwa, Iow nga Simeron.

14Amma Dzewulunggac medacfora yeneac kpacngina imoc yofi, Sered nga Elon amma Yahelecel. 15Leango Paddan Aram bangecfu Yacakowac medacfora imoc meyunuec amma naroanga Dina. Yerearunac esamedacfocngira kpeturanggeu 33 ande.

Dzilepaarunac medac yomoc fingecgec

16Anu Gadac medacfora yofiguc, Tsifion, Haggi, Suni, Etsebon, Eri nga Arodi amma Arseli. 17Nga Aserac medacfora yofiguc, Imena, Isewa, Isewi nga Berica amma naingngina Sera. Nga Bericaac medachora imoc Hewer nga Malekicel. 18Imoc yeni Lawangngo naroanga Lea Dzilepa miec yearunac Yacakowac esamedacfora 16 fingecgec.

Rahel yearunac medac yomoc fingeroc

19Nga Yacakowac enema Rahel yeac medachora imoc Yosef nga Benyamin. 20#Fing 41:50-52Nga Yosef ye Aigita bangecfu kecma medac yohockang kpeficyuruec yereac kpacngira Manasse nga Efrayim. Imoc yeri On amaunac sesememe Poti Feraac naroanga Asenatango meyuruec. 21Nga Benyaminggac medacfora yofiguc, Bela, Beher, Asebel, Gera, Nacaman, Ehi, Ros, Muppim nga Huppim amma Ared. 22Rahel yearunac Yacakowac esamedacfora kpeturanggema 14 fingecgec.

Bilha yearunac medac yomoc fingeroc

23Dan ye medaha kpara Husim. 24Nga Naftaliac medacfora yofiguc, Yahetsecel, Guni nga Yetser amma Sillem. 25Lawangngo naroanga Rahel Bilha miec yearunac Yacakowac esamedacfora kpeturanggema seweng fingecgec.

26Ngicngac sasawango Yacakowac arennunac fingecgec nga Aigita bangecfu kensikegec yeneac kpetecngina kpeturanggeu 66 andae. Imoc Yacakowac medacfora yeneac enengfocngina yenigoc mi osoyunuyunuya. 27#Aps 7:14Nga Yosef medachora Aigita bangecfu fingeroc yeri yohockangsac. Ifi anu Yacakowac esamedacfora 70ngo kemma Aigita bangecfu kecgec.

Yosefngo Yacakow meficgeec

28Yeni Gosen sing kemmagec Yosef ihai yenigoc eacemema sing edzacyunuudeac Yehudango Yosef edeudeac Yacackowngo ye sueu waraima kenec. 29Kemma ifi edeu Yosef ye imoc negemma deu keretaha mengeremigec ye mama Isracel meficgeudeac Gosen bangecfu kenec. Kemma ihai sikema meficgema mama tofohoma homac yombong kiarec. 30Ifi anu Isracelngo Yosef yofi dema edeec, “Ge kecnecngoc nga ni kicmesuga henduae imocac yaguc naric homebade.”

31Anu Yosef ye dacfora nga mamaac wiacfora yofi dema edeyunuec, “Ni kemma Pareco yoacsiduc ammima yofi debade, ‘Dacfocna nga mannaac wiacfora yeni Kenacan bangecfu kecgecmoc yaguc ine nearu bic hasikedau. 32Ngic imoc yeni ramaburumakanginagoc kecandaeac yeni ramaburumakagareng andae. Anu yeni ramahabungina nga burumakahabungina amma wiacngina sasawa medacma hadau.’ 33Ifi deba Parecongo ngeni kpacngunuu enggec ngeni noc ua meandae kpesingemmeu 34ngeni yofi dema edebisia, ‘Enac tofoc tofohofocga neni mangfocnina yeni ramaburumakagareng kecgec anu neni ifingoc modacyunuma sebigborininaunac kecma yaguc ua imocngoc mekecdimbe.’ Ngeni ifi dema edegec Gosen bangec imoc kecgecdeac desingemmeude. Imoc yofiac, aigitangic yeni ramaburumakagareng yeneac modzotiti yombong angandae imocac amma ngeni naric imohai kecbisia.”

Currently Selected:

Fingec fingec 46: Ded

Highlight

Copy