Fingec fingec 31

Yacakow ye woraudeac sing mengereec

1Anu Lawan medacfora yeneng yoac yofi degec imoc Yacakowac kedzacfu kemeec. “Yacakow ye manninaac iwai sasawa medarec. Manniaac wiactoa feec imohacnac hanahema iwai sasawa mekpedzuc amma medarec.” 2Ifi degec Lawanggac kicmesuya merenu siriha mong anu Yacakow ye imoc bic hentegecma yofi negenec ye warac gombunga anengkefec ifi isoc monggoc mi anenude.

3 # Fing 28:15 Anu Kebungo Yacakow yofi dema edeec, “Mangfocga nga arengfocga yeneac bangecfu monggoc dzigenena. Ni gegoc kecbade.” 4Deu Yacakow ye yoac fau Rahel nga Lea yerearu kenu yeri rama uau haoc. 5Haec edeyuruec, “Ni mangngiraac kicmesuya hemma yofi negenduae ye warac faka anengkefec ifi isoc monggoc mi anende. Nga mannaac Anutungo ine nigoc kecande. 6Nga ni mangngiraac ua kucgoc mekecanduae imoc negendape. 7#Fing 29:25; 31:29, 41-42; Myeg 105:14Anu mangngirango ine tobannuma ua bunna meeng mema anu atac 10 anec anu Anutungo kpae heimiu mong mi memanganenuec. 8‘Nga ramanoning faikperecge yeni geac bung ambisia.’ Ifi deec isoc rama nga noning yeni medacfocngina faikperecge sasawa fingecdacgec me ‘Kibi kibi yeni geac uabung ambisia.’ Ifi deec isoc medacfocngina kibi kibi sasawa fingecdacgec. 9Ifi fingecgec Anutungo mangngiraac ramanoning wangecma ni nenec. 10Anu ramanoningngiwa yeneng ngagera feracyunugec naso imohai gau fema gaukpefinnu yofi henai. Yeni ngagera feracyunugec yeneac sebingina imoc kibi kibi nga faikperecge andacgec.”

Yacakow ge dzigenena

11Amma gaukpefinnungoc Anutuac angerongo kpacnuma yofi dema edenuec, “Yacakow.” Deu ni yofi meremmiai, “Ni yoc.” 12Ifi deba yofi dema edenuec, “Lawangngo faka hania hania anggendarec imoc ni hendarai. Imocac ge kicga fina kenu henna. Ramaga nga noningga ngiwango ngagera feracyunuandae ngiwa imoc yeni sebingina faikperecge nga kibi kibi sasawa. 13#Fing 28:13-22Amma ni Bet El bangec imocac Anutu. Ge imohai hoc mong kerecdokungo nadzicmima yoac mong deserinennec. Ge yaguc yacma bangec yomoc wama arengfocgaac bangecfu dzigenema kembesena.”

Yacakow ye Lawan wama woraec

14Ifi deu Rahel nga Lea yeri Yacakow yoac turunga yofi meremmioc, “Manniraac maridzoming nganoc nereac onga mong mi fede. 15Neri yeac kicfu kuric isoc yombong kecandipe. Ye bunnira mema dzonira ukudarec. 16Imocac amma Anutungo manniraac wiac wangecdarec imoc sasawa nenang nga nambaracfocnina nenanggac ande. Imocac Anutungo derecgegendac imoc sasawa ambesena.” 17Ifi deec Yacakow ye yacma enenghora nga nambaracfora sasawa yeni kamele witiau faiyunuec. 18Faiyunuma ramaburumaka nga noning nga finac goa Paddan Aram bangecfu kecma meec imoc mekpedzunedacma Kenacan bangecfu mama Itsak yearu dzigeneudeac kenec.

19 # Fing 31:34; 35:2; Des 17:5; 18:14, 17; 1Sm 19:13; Hos 3:1 Naso imohai Lawan ye ine ramafora yeneac dzongina merecgeudeac kemma kefec. Ihai kecmanu Rahel ye mamaac nemuonga imoc hamangec meec. 20Yacakow ye woraudeac negemma faka sufu sufuu amma aramngic Lawan yoac mong mi edeec. 21#Fing 31:47Ye engsac yacma wiara sasawa medacma woraec. Worama kemma doku#31:21 Doku imoc Euferat doku. ferecgema Gilecad sifecbangecfugeng kenec.

Lawan ye Yacakow kisamma kenu Anutungo fingecmiec

22Anu uameme harebec wisickemanu Lawan yofi dema edegec, “Yacakow ye bic woradac.” 23Ifi edegec negemma ye sactosofora meyunuu uameme seweng kisangyunuma kengkecma Gilecad sifecbangecfubigeng meficyunugec. 24#Fing 20:3, 6Anu Anutungo ine aramngic Lawan tofocnac gaukpefinnu fingecmima yofi dema edeec, “Ge fakaga garenggema Yacakow yoac kucgoc mi debesena me mangana mong mi ammibesena.”

25Anu Yacackow ye sifecfu kporucamangina kpedziu Lawan yeng kengkecma meficyunuec. Meficyunuma sactosoforagoc Gilecad sifecbangecfu momoc kporucamangina kpedzima yai fegec. 26Anu Lawangngo Yacakowac yofi dema edeec, “Ge noc faka yombong anendang? Ge hesonnuma naroanghocna dzikacfu meyunuma witicamau kengandae ifi isoc meyuruma hadang. 27Anu ge nocac hesonnuma waic waic woradang? Edenubang debac ni wiacfocna edeyunuba yegec heima tambaring nganoc kpema sogac sogaigoc namma faingunuba habau. 28Anu ge ine naroanghocna kokocyurubadeac mi negensinendang amma esafocna maringina mebadeac mi negendang. Ge faka imoc mi angana anendang. 29#Fing 31:24, 42, 53Imocac ni faka mong anggembeso kuc fenende. Nga manggaac Anutungo ine tofocnac kpetarinemma yofi dedac. ‘Ge fakaga garenggema Yacakow yoac kucgoc mi debesena me mangana mong mi ammibesena.’ 30#Fing 31:19Anu ge manggaac amau kennadeac songoga kuneng anu woradang imoc naric. Amma ge nocac nemuongana hamangec medang?” 31Ifi deu Yacakowngo Lawanggac yoac turunga yofi meremmiec, “Ge naroanghocga goriangoc wangecnubanggac ni kengec amma mi edeguma woradua. 32Anu ge monggaru me monggaru nemuonga meficgenadeu imoc ye homebeso. Wiac sasawa mekecdimbe imoc sactosofocnira yeneac kicfu hendacbesena. Amma nemuonga mong meficgenadeu mebesena.” Yacakow ye Rahelngo wiac imoc hamangec meec imoc mi negenec.

Kporucamanginau emma nemuonga hoforec

33Anu Lawan ye Yacakow nga Lea amma wanacngac yohockang yeneac kporucamau emma nemuongaya mong mi henec. Anu ye Leaac kporucamaunac mama Rahelac kporucamau enec. 34Enu Rahelngo nemuonga mema kamele yeneac finac meme hie imohai barima witiau heima tarec. Taru Lawan ye bedzou hofoc hofoc ua mekefu kpac andarec. 35Ifi anu Rahel ye mama yofi dema edeec, “Kunenna ngachafi ayemmeande imoc anendacac ni geac kicfu naric mi yacbade.” Ge herebu mi ambesena. Ye ine wiac sasawa imoc hendarec nga nemuongaya ine mong mi henec.

Yacakowngo herebu negemma Lawan yoac demiec

36Ifi anu Yacakow ye herebu negemma Lawan yoac demima yofi dema kpesimiec, “Ni noc wiac mangana me kopocsic meficgeaiac kucgoc kporacnuma hadang? 37Nga ge yaguc wiacna sasawa hendacdang imohai ge wiac mong meficgedannu sactosofocnira yeneac kicfu faina yeneng hemma neranggac yoac negemma mengerebisia. 38Amma ni gegoc kecba kifa 20 wisickeec naso imohai rama nga noningfocga yeni medac meyunugec imoc mong mi manganeec. Nga geac ramahabuunac ngiwa mong kpenec mi anai. 39Me wasaiyang yeneng ramafocga yinigec mehama mi edzacguanduae. Ni neannaoc turunga faianduae. Ge wenacfu me tofocnac hamangec meyunugec turunga gembadeac deannec. 40Anu ni wenacfu wenactoango nohokefec nga tofocnac nomanggoc yombong gauna kpac kefai. 41#Fing 29:18, 27, 30; 31:7Nga kifa 20 yombong amagau enac tofoc tofohoga kefai. Kifa 14 imoc naroanghocga yereac amma kefai nga kifa 6 imoc ramanoninghabuga yeneac amma kefai. Amma geng ine uabunna mekemmeha angkecna atac teng anec. 42#Fing 31:24, 29Anu mannaac Anutu, Awrahamgac Anutu ye Itsakngo eweheimikefec ye mi kecbac debac ge eng yombong fainuna habai. Anutungo ine ubaebicna nga kpendzeng uana imoc hemma tofocnac yoac imoc isinggema edegudac.”

Lawan nga Yacakow yeri dzadzahac anoc

43Ifi deu Lawangngo Yacakow yofi dema edeec, “Naroanghocna yeri neac nambarachocna nga ramanoning nga wiac sasawa hendacnec imoc yeni neac sasawa. Naroanghocna yomoc nga nambarac meyunugec yeni ine wiac mangana ayemmeba naric mi anude. 44Imocac amma nerang dzadzahac mong amma wiac mong faide imocngo dzadzahacniraac kpete ambeso.”

Demeseriyoacac hocguru

45Ifi deu Yacakow ye hoc mong miacma gununggema kpete faiec. 46Faima sactosofora yofi dema edeyunuec, “Ngeni hoc homac kpedzucnegec.” Ifi deu yeni hoc kpedzucnegec enu hocguru imocac witiau yakangina faima enacurec negec. 47Anu Lawangngo hocguru imocac kpara Yegar Sahaduta#31:47 Yegar Sahaduta imoc aramyoac nga Galeced imoc hebiraioyoac nga yoac titiha imoc “Demeseriyoacac hocguru.” kparu Yacakowngo ine kpara Galeced kparec.

48 # Yos 22:27; 24:27 Ifi kparu Lawangngo yofi deec, “Hocguru yomocngo yaguc neranggac kpetenira ande.” Imocac amma kpara Galeced kpacgec. 49Amma ye torokpema yofi deec “Kebungo faiemema kecde garennira kecbeso. Imocac amma hockpete imocac kpara mong Mitsepa#31:49 Mitsepaac titiha imoc “Garenggeudeac wiac.” kpacgec. 50#1Sm 12:5-6; Yer 42:5Nga ge naroanghocna sisic ayecmenade me mi negembare ngac goa monggoc meyununadeu ine yofi negembesena. Ngic mongngo mi genude gedang anu Anutungo hepucnira amma genudenoc.”

51Anu Lawangngo torokpema Yacakow yofi dema edeec, “Negennec, hocguru nga hockpete botucnirau gununggema faidua 52imocngo kpetenira nammanu ni ngaba amma gearu mi habade. Nga ge ifingoc ngaba anemma kpete imoc ferahama nearu mi habesena. 53#Fing 31:42; 28:13Anu Awraham nga Nahor yereac Anutungo desi desinira ambeso. Ifi deu Yacakow ye mama Itsakngo Anutu eweheimima kefec yeac kpacfu deseriec.” 54Deserima tikiu Anutuac sesegerec ohoma sactosofora yakaac heitaiyunu hama yaka imoc enacurec nema tiki imohaingoc fegec. 55Fegec ama wereckenu Lawan ye asoacguc yacma esamedacfora kokocyunuma kenecyunuec. Ifi amma faiyunuma dzigenema amabangehau kenec.

Currently Selected:

Fingec fingec 31: Ded

Highlight

Copy