Makekeng 15

Dedengerecyegec

1 # Yhkp 15:3 Naso imohai Mose nga Isracelngicngac yeni Kebu afehema yegec yofi heigec,

“Kebungo firang amma

ngabafora feracyunudacma

kpactoayagoc andeac ni eriendzong memibade.

Yeng becosic nga ngic becosic witiau tacgec

kpefacyunuu kondung manau kemegec.

2 # Myeg 118:14; Yes 12:2 Kebu ye kucna nga yegecna

amma yeng onggonnuec.

Ni ye dengerekecbade

yennoc Anutuna, ye kpac kuneng mibade,

ye mannaac Anutu.

3 Kebu ye wasaingic seria,

ye kpara Kebunoc.

4Ye Parecoac keretac nga wasaingicfora

habuya habuya kondunnu ukuyunudarec.

Parecoac dzikacngic enarafora

meisingyunuyunuya

yeni Kondung sacsacfu kemedacgec.

5Doku keme kemeango semeyunuu

hoc isoc emu yombong kemegec.

6 Kebu, geac marifoigaac kuc

imoc damuyagoc yombong.

O, Kebu marifoigango

faka kuhagoc mema

ngabafocga kpedzameyununec.

7 Kebu ge ngictau kucga engenango

firang amma ngabafocga yunuhomenec.

Ge herebugaac gerecborang mesima faina

imocngo kemma

kpindzingsiraac hania isoc yonohoec.

8Geng samacgango fifina

kondungdoku kperecgeu

wi emma dindingac amma nanec.

Siritembong yeni yacma oda isoc nanggec.

Doku dzuamagoc

kondung keme kemeau serima nanec.

9Anu ngabafocnina yeneng yofi degec,

‘Neni kporacyunuma meficyununide.

Neni wiacngina mema mederema

emema mekecdacnide.

Neni turung kpoukpou

ayemmennideac anemmede,

imoc yenearu mesinide.

Neni wasaibeannina taima

marininango kpetotieyununide.’

10 Kebu, ge firangga kpeudeac dena

kondungngo semeyunuec.

Yeni aieng ebira#15:10 leadaieng imoc aieng mong perec pereckea nga ebira anu hoc isoc doku manau kemeude. isoc

emu dokutoa manau kemedacgec.

11O Kebu, nemuonga

nga anutu hania hania yeneac botucfu

ge isoc mong mi kecdae!

O, ge isoc mong mi kecdae.

Ge engenatoa ngictauac kucgagoc

amma ge kpetiac.

Ge damu damugagoc

amma faka bibiagoc angkecnecac

geac heiwayong anggemma

yegec heigembesonga.

12Ge marifoiga sinena

bangecngo gbokoyunuec.

13Ge yoac dedzege amma

imoc modackecnec.

Ge faka imoc amma ngicngacfocga

uaac ebicfunac bummeyunuma

hesicyununa kenggec.

Ge kucgango wangeckpeteng ayemmema

kpetiac amagau faiyununec.

14Anu ngicngacareng yeni imoc negemma

dzonongngina fedeu

Peleset bangec mingina

yeni ubaongangina ebiriec.

15Naso imohai edomngictaufora

yeni bibictakpac takpacge anggec.

Mocaw enarafocngina kucnginagoc

yeni dzonongina fedeu kengecyunuec.

Kenacan bangec mingina yeni sasawa

sisingaima kpac andacgec.

16Kengectoa nga bibictakpac

takpacge ayemmeec.

Mariga kuctoayagoc imocngo faka mena

yeni hoc isoc kockpaha kpac nammagec

habufocga yeni ferecgegec.

O Kebu, ge geanggaoc

ngichabu bummenununec

nenennoc ferecgeding.

17Nga ge wangecnunuma kemma

geangga tikibangec yombonnu

heihomec anemmenade.

Ge geanggaoc tacyac annadeac

amabangec mengerenec,

yainoc geangga marigango

ama kpetiac menec.

18 Kebu ye ngictautatac mekecde

amma nasoya kpac meengkefude.

19Kondunnu sing fingeru

Parecoac becosic nga keretac

amma wasaingicfora becosic witiau kenggec

yeni sasawango imohai hagec,

imohai Kebungo kondung deu

dzigenema witinginau emma semeyunuec.

Isracelngicngac neni ine kondung dzongiau

bangec kerengau ferecgeing.”

Miryam ye yegec heiec

20Anu Miryam profetengac, ye Aharon naina, yeng tambaring mariau meu ngac sasawa yeni ye modacma tambaringngina mema kpema yegec fedegec. 21Nga Miryamngo yegec yofi heiyemmeec,

“Kebu ye firangngic engenatoa.

Ye becosic nga wasaingic becosicfu tacgecmoc

kondung manau ukuyunuu kemedacgec.

Neni yeac yegec heimini.”

Bangec dokuya hodungagoc

22Anu Mose ye Isracelngicngac Kondung sacsacfunac wangecyunuu Sur bangeckisiu kemma kecmagec uameme harebec anu doku mong mi meficgegec. 23Amma kengkecma Mara#15:23 Mara imocac titiha “hodungagoc.” bangecfu kensikema doku meficgegec. Nga doku imoc hodungagoc anecac yeni imoc negecdeacsoc mi anggec. Imocac amma bangec imocac kpara Mara dedea. 24Amma ngicngac yeni Moseac ubakpekpeyoac homac demima yofi edegec, “Neni doku dahacnac nenide?”

25Ifi degec Mose ye Kebu kpacsambic ammiu Kebungo ic siriha mong edzahau ye imoc mema dokuu ukuu kemeu doku sawera anec. Kebu ye imohainoc singyoac nga dederecgeyoac edeyunuec amma imohai ifingoc tobangyunuec. 26Anu yofi deec, “Ge Kebu Anutugaac ubaudumeng negemma kecnadeu nga yeng negenu faka dindingac andacde, imoc angkecnadeu amma yeng dederecgeyoac edeguu ge kedzac kpema faka imoc tofohonadeu amma singseria sasawa tofohonadeu yofi negemma kecbesena, ni Kebu geac memengerec, imocac amma hafei hania hania deba aigitangicngac ayemmeec, hafei imocfia ebihagoc geac witiu faiba mi enude.”

27Anu yeni kengkecma Elim amabangecfu kensikegec. Imohai dokudzohong twelf kiwaunac erema fegec nga pam ic sewenti nangkenec. Yeni imohai doku tegiau kporucamanginasoc kpedzigec enu tackenggec.

Currently Selected:

Makekeng 15: Ded

Highlight

Copy