San Mateo 9

Ni ndasaꞌa Jesús in tee ni ndutuchiin

1Yun te ni ndee Jesús nuu barco yun, te ni ndayaꞌa ya inka jioo ndute mar yun, te ni ndajino ya ñuu ya. 2Yun te ni ka jinsiaꞌa ñayiu in tee kuꞌu kueꞌe ndutuchiin, katuu de nuu jito de. Te nuu ni jini Jesús ja ka kandija guaꞌa tee yun, te jiñaꞌa ya nuu tee ndutuchiin yun:

͏―͏Koyutnu anu ron, vi Seꞌe, chi ja ni jakaꞌnu ini rin yika kuechi ron.

3Yun te sava tee ka kaxtnoꞌo Ley yun ka ndakani ini de: “Tnoꞌo kaꞌan tee yaꞌa, chi kaneꞌe de jin ia Dios”. 4Yun te nuu ni jini Jesús ja siun ka ndakani ini de, te jiñaꞌa ya:

͏―͏¿Nau ja ka ndakani kueꞌe ini ni jin anu ni? 5¿Nagua kuu vijin ka ja kaꞌan san jin tee yaꞌa? ¿A “ja ni jakaꞌnu ini san yika kuechi ni”, axi kuñaꞌa san: “Ndakoo, te kaka ron”? 6Su vitna te vi kuni ni ja Seꞌe Teyii, chi suni nevaꞌa jakaꞌnu ja tatnuni nuu ñuyiu yaꞌa, te kuu kuakaꞌnu ini yika kuechi ñayiu.

Yun te jiñaꞌa ya nuu tee ndutuchiin yun:

͏―͏Ndakoo, te ndakuiso ron jito ron, te kuanoꞌo veꞌe ron.

7Yun te ni ndakoo de kuanoꞌo de veꞌe de. 8Te nuu ni ka jini ñayiu ja siun ni saꞌa ya, te ni ka yuꞌi, vi ni ka chiñuꞌi ia Dios ja ni jiñaꞌa ya in jakaꞌnu ya nuu ñayiu.

Ni kana ña Jesús jin Mateo

9Te nuu ni yaꞌa Jesús yun, te ni jini ya in tee nani Mateo ja nukoo de kiꞌin de xuꞌun impuestu ka tniuyaꞌu ñayiu ja ndakan ñuu Roma, te jiñaꞌa Jesús:

͏―͏Kondikin ña ni na kiꞌon.

Yun te ni ndakoo de, te ni jata ndikin ña de kuaꞌankuei de.

10Yun te ni jinokuei ya veꞌe de, te ni ka jinkoo ya ka jaa ya xtaa. Te suni ni jinokuei kuaꞌa tee ka xtutu xuꞌun impuestu vi ñayiu ka saꞌa jakueꞌe, te ni ka jinkoo ndiꞌi de in ni nuu mesa jin Jesús vi tee ka skuaꞌa jin ya. 11Te nuu ni ka jini tee ka kuu fariseo yun, te ni ka jikan tnoꞌo de nuu tee ka skuaꞌa jin ya:

͏―͏¿Nau ja vi in ni ka jaa mastru ni xtaa jin tee ka xtutu xuꞌun impuestu vi ñayiu ka saꞌa jakueꞌe? ͏―͏ka jiñaꞌa de.

12Te nuu ni onini Jesús, te jiñaꞌa ya:

͏―͏Ñayiu ka oo vaꞌa, chi tu ka jiniuꞌu tee tatna, chi maa ni ñayiu ka kuꞌu kuu ja ka jiniuꞌu. 13Kuaꞌankuei ni te vi jinkuiꞌnu ini ni naxa kei tnoꞌo yaꞌa ja yoso nuu tutu ii: “Ja kuini rin kuu ja vi kundaꞌu ini ron ñayiu, masu ja vi soko ron nuu rin”. Chi masu vaji san ja ndakaꞌan san ñayiu ka ndakani ini ja ñayiu vaꞌa ka kuu, chi vaji san ja ndakaꞌan san ñayiu ka ndakuni ja ka oo yika kuechi, te vi ndatnaꞌu ini nuu yika kuechi.

Ni ka jikan tnoꞌo de Jesús ja jaꞌa ja ka ondite ñayiu

14Yun te ni kikuei ñayiu ka skuaꞌa jin Juan, tee skuandute, te ka jiñaꞌa de:

͏―͏¿Nau ja sein vi tee ka kuu fariseo ka ondite san kuaꞌa jichi, su tee ka skuaꞌa jin ni, chi tu ka ondite de? ͏―͏ka jiñaꞌa de.

15Yun te jiñaꞌa Jesús:

͏―͏Te ¿a kuu vi kondite ñayiu ka oo viko tnandaꞌa ja siun vi ka oi jin tee tnandaꞌa yun? Ñaꞌa, ma kuu vi kondite ñayiu ja siun vi ka oi jin maa tee tnandaꞌa yun. 16Chi ni in ñayiu tu ndatnaa in pedasu saꞌun jaa nuu in xioo tuꞌu, chi ndandiyi saꞌun jaa yun, te kaꞌnde ña jin saꞌun tuꞌu yun, te saa suaꞌa teꞌnde guaꞌa ka. 17Suni ni in ñayiu ma vi tnai vinu jaa nuu in itni ñii tuꞌu, chi kaꞌndi ñii yun, te kati vinu yun, te suni junaa jin ñii yun. Yun guaa vi tnaa ni vinu jaa nuu itni ñii jaa nagua ja saa te koo vaꞌa nduu.

Ni ndasaꞌa Jesús ñaꞌa ni okuꞌu vi sesiꞌi Jairo

18Te vi nini kaꞌan ka ya siun, te ni jino in tee kuu nijaꞌnu nuu veꞌe ii sinagoga, te ni jinkuiin jiti de nuu ya, te jiñaꞌa de:

͏―͏Vi inka ni jiꞌi sesiꞌi san. Su kiꞌinkueio, te sonee ni ndaꞌa ni siki, te na ndatekui ͏―͏jiñaꞌa de.

19Yun te ni ndakoo Jesús vi ndiꞌi tee ka skuaꞌa jin ya, te ni ka jata ndikin ña ya kuaꞌankuei ya jin de. 20Yun te ni kuyatni in ñasiꞌi ja kuꞌu kueꞌe taꞌu ña ndee ja oo uxi uu kuia ichi yata Jesús, te ni tnii ña yuꞌu saꞌun ichi yata ya. 21Chi ni ndakani ini maa ña: “Nuu ja na tnio visi ja saꞌun yata ya, te nduvaꞌo”. 22Yun te ni jiokuiin Jesús, te ni jini ya ñasiꞌi yun, te jiñaꞌa ya:

͏―͏Sesiꞌi, koyutnu anu ni, chi ni kandija ña ni jin san, te ni nduvaꞌa ni.

Te vi ore saa ni nduvaꞌa ña.

23Yun te ni jinokuei ya veꞌe tee netniuu yun, te ni jini ya ñayiu ka tiuu yaa vi ñayiu ka ndaꞌi ka kana. 24Te jiñaꞌa ya:

͏―͏Vi kujioo ni, chi masu ni jiꞌi suchi siꞌi yaꞌa, chi suaꞌa ni kixin.

Te ni ka jaku ndee ña ñayiu yun jin ya. 25Su nuu ni keneꞌe ndiꞌi ya ñayiu yun yeꞌe, te ni kiuu ya ini veꞌe yun, te ni tnii ya ndaꞌa suchi siꞌi yun, te ni ndakoi. 26Yun te ni jitenuu tnoꞌo ndiꞌi ñuu yun ja siun ni saꞌa ya.

Ni ndasaꞌa Jesús uu tee ka kuꞌu nuu

27Te nuu ni yaꞌa Jesús yun, te ni ka jata ndikin ña uu tee ka kuꞌu nuu, ka kana jaa de, te ka jiñaꞌa de:

͏―͏Kundaꞌu ini ña ni jin san, vi ndikin tata ndee David.

28Yun te ni jinokuei ya in veꞌe, te ni ka jintnaꞌa ña tee ka kuꞌu nuu yun, te ni jikan tnoꞌo ña Jesús:

͏―͏¿A ka kandija ni ja kuu ndasaꞌa ña san?

Yun te ka jiñaꞌa de:

͏―͏Kuu saꞌa ni, vi Jitoꞌo san.

29Yun te ni tetuu ya ndaꞌa ya nduchi nuu nduu tee yun, te jiñaꞌa ya:

͏―͏Vi nagua ka kandija maa ni, te vi saa kokuu.

30Te ni ka ndanune nduchi nuu tee yun, te ni tatnuni Jesús, te jiñaꞌa ya:

͏―͏Vi kondiaꞌa guaꞌa ni ja ni in ñayiu ma vi kuni ja ni ndasaꞌa ña san.

31Su nuu ni kekuei de kuaꞌankuei de, te ni ka ndakani de nuu ñayiu ndiꞌi ñuu ja ka oo yun ja siun ni ndasaꞌa ña ya jin de.

Ni ndasaꞌa Jesús in tee kuu ñiꞌi

32Te nuu ni ndekuei tee ni ka okuꞌu nduchi nuu yun kuaꞌankuei de, te ni ka jinsiaꞌa ñayiu in tee kuu ñiꞌi, ñuꞌu ña tachi, nuu Jesús. 33Su nuu ni skunu ya tachi yun, te ni kuu ni ndakaꞌan tee kuu ñiꞌi yun. Te ni ka saꞌu kuii kuiti ini ñayiu yun, te ka kaꞌin:

͏―͏¡Ni in kiuu tu ka jinio ja na in saꞌa suaꞌa ñuo Israel!

34Su tee ka kuu fariseo yun ka jiñaꞌa suaꞌa:

͏―͏Kuu skunu tee yaꞌa tachi, chi maa tachi kuu kaꞌnu yun ni jiñaꞌa tniuu kaꞌnu ja kuu saꞌa de.

Joo ni ñayiu ka satniuu nuu tniuu ia Dios

35Te ni jiondita Jesús nii ñuu naꞌnu vi ñuu kueli kaxtnoꞌo ya taka veꞌe ii sinagoga tnoꞌo vaꞌa naxa tatnuni ia Dios vi ni ndasaꞌa ya ñayiu ka kuꞌu ndiꞌi nuu kueꞌe vi ndiꞌi ja ka jatu ka janiꞌni ñayiu. 36Te nuu ni jini ya ja kuaꞌa ñayiu ka kuu, te ni kundaꞌu ini ña ya, chi ni ka kuita ñayiu yun, te ka ndii ndaꞌu nui na kuinio ndikachi ja tu na in jito ña. 37Yun te jiñaꞌa ya nuu tee ka skuaꞌa jin ya:

͏―͏Vi ja ndaa ndija ja oo kuaꞌa ja ndaxtutuo, su joo ni ñayiu ka satniuu ka oo ja vi ndaxtutui. 38Vi kakantaꞌu ni nuu Jitoꞌo xiin tniuu yaꞌa ja na tetniuu ka ya ñayiu vi satniuu ͏―͏jiñaꞌa ya.

Currently Selected:

San Mateo 9: xtnNTplus

Highlight

Copy