San Mateo 8

Ni ndasaꞌa Jesús in tee kuꞌu kueꞌe ndiꞌyi teꞌi

1Te nuu ni nuu Jesús nuu yuku yun, te ka ndikin ña kuaꞌa ndevaꞌa ñayiu. 2Yun te ni jino in tee kuꞌu kueꞌe ndiꞌyi teꞌi, te ni jinkuiin jiti de nuu ya, te jiñaꞌa de:

͏―͏Jitoꞌo san, nuu ja kuini ni, te kuu ndasavii ña ni joo ja na nduvaꞌa san.

3Yun te ni sonee ya ndaꞌa ya siki de, te jiñaꞌa ya:

͏―͏Kuini san, te nduvii ni.

Yun te vi ore saa kuaꞌan kueꞌe yun. 4Te jiñaꞌa Jesús:

͏―͏Masu ja kokaꞌan ni nuu ni in ñayiu ja ni ndasaꞌa ña san. Kuaꞌan ni te xneꞌe ni maa ni nuu sutu, te suni soko ni nagua ni tatnuni Moisés, nagua ja vi kuni ñayiu ja ni nduvaꞌa ni jin kueꞌe ni ͏―͏jiñaꞌa ya.

Ni ndasaꞌa Jesús tee jinokuechi nuu in tee kuu capitán

5Nuu ni ndiuu Jesús Capernaúm, te ni jino in tee kuu capitán tatnuni nuu soldado Roma, te ni jikantaꞌu de nuu ya, 6te jiñaꞌa de:

͏―͏Jitoꞌo san, veꞌe san oo in tee jinokuechi nuu san, te kuꞌu de kueꞌe ndutuchiin, te kaꞌu ndevaꞌa kuꞌu de.

7Yun te jiñaꞌa Jesús suaꞌa:

͏―͏Kiꞌin san, te ndasaꞌa san de.

8Yun te jiñaꞌa tee kuu capitán yun:

͏―͏Jitoꞌo san, masu na in guaa kuu saꞌun san ja kiuu ni ini veꞌe san. Suaꞌa ni kaꞌan ni, te na nduvaꞌa tee jinokuechi nuu san. 9Chi suni oo in tee tatnuni nuu san, te suni nevaꞌa san soldado ja tatnuni san nuu de. Te nuu kaꞌan san nuu in de “kuaꞌan ni yun”, te kiꞌin de. Te nuu kaꞌan san jin inka de “neꞌe ni”, te kii de. Axi nuu tatnuni san nuu tee jinokuechi nuu san ja na saꞌa de jayaꞌa, te saꞌa de ͏―͏jiñaꞌa capitán yun.

10Te nuu ni onini Jesús, te vini saꞌu kuii kuiti ini ya, te jiñaꞌa ya nuu ñayiu ka ndikin ña:

͏―͏Kaꞌan ndaa san ja nii ñuu mao Israel, tu jinkuꞌun san ni in ñayiu ja kandija ia Dios nagua kandija capitán yaꞌa. 11Te kaꞌan san nuu ndiꞌi ni ja kikuei kuaꞌa ñayiu sava ka tatatnoꞌo ichi kana nikandii, te suni ichi kee ya, te vi jinkoi jin Abraham vi Isaac vi Jacob nuu tatnuni ia Dios ndee andivi. 12Te seꞌe ñuo Israel, chi kiꞌinkuei ndee yeꞌe nuu nee, te ma kiukuei nuu tatnuni ia Dios. Te yun kuu nuu vi ndaꞌi vi kanai, te vi ndakaꞌñi noꞌi.

13Yun te jiñaꞌa Jesús nuu capitán yun:

―Kuanoꞌo ni veꞌe ni, te vi nagua ni kandija maa ni, saa kokuu.

Te vi ore saa ni nduvaꞌa tee jinokuechi nuu de.

Ni ndasaꞌa Jesús nana xiso Pedro

14Te nuu ni jino Jesús veꞌe Pedro, te ni jini ya ja kuꞌu kaꞌu ndevaꞌa nana xiso de, katuu ña nuu jito jin kueꞌe kiji. 15Te ni tnii ya ndaꞌa ña, te vi ore saa ni nduvaꞌa ña. Yun te ni ndakoo ña, te ni jiñaꞌa ña ja ni ka jaa ya.

Ni ndasaꞌa Jesús kuaꞌa ñayiu ka kuꞌu

16Yun te nuu ni kunee, te ni ka kisiaꞌa ñayiu nuu ya kuaꞌa ñayiu ka ñuꞌu ña tachi, te vi ja tnoꞌo kaꞌan ni ya, te ni skunu ya tachi yun. Te ndiꞌi ñayiu ka kuꞌu sava ka kueꞌe ni ndasaꞌa ya. 17Te ndiꞌi yaꞌa ni kuu nagua ja skunkuu tnoꞌo ni kaꞌan Isaías, tee ni ndakani tnoꞌo maa ia Dios ndee janaꞌa, nuu jiñaꞌa de suaꞌa: “Te vi maa ya ni ndakeꞌen ndiꞌi kueꞌo vi ni ndakuiso ya ja ka jatu ka janiꞌnio”.

Ka kuini ñayiu ja vi kondikin Jesús

18Te nuu ni jini Jesús ja ni ka jionduu ña kuaꞌa ndevaꞌa ñayiu, te ni tatnuni ya ja vi yaꞌa de inka jioo yuꞌu ndute mar. 19Te ni jintnaꞌa ña in tee kaxtnoꞌo Ley, te jiñaꞌa de:

͏―͏Mastru, kondikin ña san jin ni ndee ni nuu ni kuu ja kiꞌin ni.

20Yun te jiñaꞌa Jesús:

͏―͏Ñukuii, chi ka oo kava veꞌe ti, saa ni kiti ndagua, chi ka oo taka ti. Su sein ja kuu san Seꞌe Teyii, chi vini nuu kakintuu san xini san, tu nagua nevaꞌa san.

21Yun te ni jino inka tee ka skuaꞌa jin ya, te jiñaꞌa de suaꞌa:

͏―͏Jitoꞌo san, kuandetu ni na kiꞌin san xtnañuꞌu ka na tayuꞌu san tata yua san, te saa na kondikin ña san.

22Yun te jiñaꞌa Jesús:

͏―͏Kondikin ña ni, te xndoo ni ndiyi yun na vi tayuꞌu tnaꞌa ndisa ndiyi maa ͏―͏jiñaꞌa ya.

Ni junkani Jesús tikacha vi ola ndute mar

23Yun te ni ndee ya nuu barco, te ka ndikin ña tee ka skuaꞌa jin ya. 24Yun te ni jinkiꞌi in tikacha niꞌi ndevaꞌa nuu ndute yun, te ndakoo sukun de, te ni ka jaꞌnu ndevaꞌa ola ndute yun ja ni jinonta ndee nuu barco yun. Su Jesús, chi kixin ni ya. 25Yun te ni jinokuei tee ka skuaꞌa jin ya, te ni ka xtoto ña de jin ya, te ka jiñaꞌa de:

͏―͏Jitoꞌo san, skaku niꞌnu ña ni, chi vi saꞌuo nuu ndute yaꞌa.

26Yun te jiñaꞌa ya:

͏―͏¿Nau ja ka yuꞌu ni, seꞌe tee tu ka kandija guaꞌa?

Yun te ni ndakoo ya, te ni tatnuni ya nuu tikacha yun jin ola ndute yun, te ni jinkuiin ndiꞌi. 27Yun te vini ka saꞌu kuii kuiti ini de, te ka ndatnoꞌo tnaꞌa de:

͏―͏¿Na in kuu tee yaꞌa ja vi ndee tikacha vi ndute mar yaꞌa ka jantnoꞌo ña jin de?

Ni ndasaꞌa Jesús uu tee ka ñuꞌu ña tachi ja ka oo de yuku ja tnii Gadara

28Te nuu ni ka ndejioo ya inka yuꞌu ndute yun nuu kuu ñuꞌu ñayiu gadara, te ni ka nditnaꞌa ña uu tee ka ñuꞌu ña tachi, ja ni ka oo de nuu ka yiyuꞌu ndiyi. Tee xeen ka kuu de ja ni in ñayiu ña ni okuu ja vi yaꞌa ichi nuu ka oo de yun. 29Te ni ka kana jaa tachi yun ndee anu de, te ka jiñaꞌa:

͏―͏¿Nagua kuini ron ja vaji ron nuu ka oo rin, vi Seꞌe Dios? ¿A vaji ron ja taa ron tnundoꞌo vi tnaꞌa rin ama ka ja jino kiuu sandiꞌi?

30Te ndee jika nuu ka oo ya yun ka ñuꞌu kuaꞌa kini ka jaa ti. 31Te ni ka jikantaꞌu tachi ndee anu tee yun, te ka jiñaꞌa:

͏―͏Nuu ja skunu ña ron, te kuandetu na ndekuei rin chii kini ka ñuꞌu yun.

32Yun te jiñaꞌa ya:

͏―͏Kuaꞌankuei nuu saa.

Te kuaꞌankuei, te ni ndekuei chii kini yun. Yun te ni ka jino ndiꞌi kini yun kuaꞌankuei ti, te oo ndeyi ja ni kentakuei ti ndee nuu ndute mar yun. Te ni ka tnaa ti maa ti, te ni ka jiꞌi ti.

33Yun te ni ka jino tee ni ka ojito kini yun, te kuanoꞌokuei de maa ñuu, te ni ka ndakani de ndiꞌi ja ka jini de vi naxa ni ka ndoꞌo tee ni ka ñuꞌu ña tachi yun. 34Te ndiꞌi ñayiu ñuu yun ni kekuei ni ka jintnaꞌa ña jin Jesús. Te nuu ni ka jini ña, te ni ka jikantaꞌu ja na kujioo ya ñuu yun.

Currently Selected:

San Mateo 8: xtnNTplus

Highlight

Copy